Деяния 19

19
Павел Ефесылъҳӣ
1Аполлос Коринфымылъюку, Павел қӯткун иглыӷакақ Ефесымун кынляңа. Тама̄ни иляңи малихся̄ҳтыт налъяӷлюки 2а̄птыкӣ: «Аглыӷналӷӣк Таӷныӷак алъхыҳсимастыкык ухпыӷақңафси?»
Пика̄т: «Нака̄, налъюкңўа̄ӷахпут Аглыӷналӷӣк Таӷныӷак».
3А̄плъя̄тақӣ: «Сямунми крестиӷимастык?»
Кӣмсиқа̄т: «Иоанным крестиӷылъҳатун».
4Павелым пикӣ: «Иоанным крестиӷилъҳа авутыҳқылъютың сыӷлыҳқынъанилӷинун аюқуқ. Пикақӣлъю ухпықысқылъюку киңуминың тагияҳқақ, та̄на Иисусыңӯқ». 5Нагақуӷьямыхтыху та̄на, крестиӷикат а̄тҳакун Атанӷым Иисусым. 6Павелым ся̄фсяқминики Аглыӷналӷӣк Таӷныӷак ӣтқак лъңитнун. Та̄хкын акузикат алъя̄ҳӣна̄стун улюстун, ӯкналиқумаӷмыңлъю пикат. 7Ынтақун қуля ма̄лӷук сӣпнықлъюку ю̄к таўантуқ.
8Пиңаюни танқини Суббота тамаҳа̄н Павелым тытукаҳпынани алыҳтуқӣ югыт синагогами. А̄ҳнақуткыхкӣ, лӣгикыснақуткыхкӣ Атаныҳпагулъҳаның Кияӷныӷым. 9Иўырңа иляңи пиныҳлъюлӷӣт ухпыӷьюнӷиткат, ынка̄м сивуңитни югыт сыӷлытун акузиткыхка̄т кияҳта̄лъық Атанӷым апыҳтӯся̄. Ынка̄м Павелым униткӣ кылъқылъюки ухпықат. Та̄хкын аҳутаңа тамаҳа̄н Тиранным апыҳтуӷивигани, Павелым алыҳқуӷақыхкаңи югыт. 10Таўатын пикақ ма̄лӷук аюмиқулъҳык, ынка̄м тамаҳаӷмың Иудеитлъю, Грегытлъю Асиямылңӯт нагақуқӣт акузитаңи Атанӷым.
Иӷныӷи Скевам
11Кияӷнық алъя̄ҳлъюхўаҳтӣӷа̄тақақ сяӷӣӷаналӷӣмың Павелкун. 12Талўа иляңита югыт Павелым какыхлъюгӣтӣлъю, а̄ткӣлъю лъиныӷмыхтыки қинуюгнун на̄лъҳутақылӷӣт, туӷныӷа̄тлъю илюңитнилңӯт а̄нақылӷӣт. 13Иляңи Иудеит иглыӷаңулӷӣт нунанун, югның а̄нысқӯңукаңит туӷныӷа̄т. Та̄хкын Атанӷым Иисусым а̄тҳа а̄нысқӯсиқнақуткыхкақсяқаңат. Пикат: «Қылӷамкын а̄нысқылъютын та̄хун ата̄сикун Иисусыкун Павелым уңипақыхка̄кун». 14Скевам ма̄ӷраӷвинлык иӷныӷи таўатын пикат. (Та̄на Скева Иудейеңулӷӣ первосвященнига.) 15Иўырңа туӷныӷа̄м пикӣ: «Лӣсимакақа Иисус, лӣсимакақа Павел, лъпыси кинкуңустык?»
16Та̄хкын югым илюмикун туӷныӷалгым қытхыӷвиклъюки та̄кут югыт қывутӣқӣ, икнақыпихтутминың қамахлъюки аваңилъкыхкӣ. Ынка̄м мыңтыӷа̄ның а̄нқаҳталъютың қимагӯткат амсикаӷмың, кӣтиқулъылиӷлютың. 17Қамахлъютың Ефесыӷмӣт, Иудеитлъю, Грегытлъю алиңрӯӷуткат та̄на нагақуӷлюку, ынка̄м а̄тҳа Иисусым ўатақа̄ӷақ қӯлвақа̄т. 18Угляпихлъыҳӣт ухпынҳақанӣт юхтуқами апыӷрақӣт алигнаҳта̄лъытың. 19Угляпихлъыҳӣт алигнаҳта̄қаюгуялӷӣт тагиқӯлъюки алигнаҳта̄ӷусит игатың паныҳқуқӣт юлӷутыт ысҳа̄манӷитни. Игалӷутыт акитулысюӷьяқмыхтыки 50,000 серебро драхмат акикыфтӣт. 20Тама̄на апалъюқлъюку ўатақа̄ӷақ акузитаңи Атанӷым миңитка̄т, ынка̄м угляпихлъыҳӣт ухпықыхкӣт.
21Киңуңитның тама̄кут Павел қакиқниқыхкақ Иерусалимымун пиналюни, Македониякунлъю, Грециякунлъю а̄глюни. Пикақ: «Иерусалимымитаҳлъюңа та̄хкын Римысяҳқапыста̄ӷӯңа». 22Та̄хкын Павелым каютыгни Тимофейялъю, Ерастылъю каяхтыкакык агляқыстӣсқылъюкык Македониямун, лъңа Асиямытаӷақақ.
Сереброңлъяҳтыт Сыӷлылӣҳқилъҳат Ефесыми
23Нани тама̄ни пилъыӷми угля̄пихлъыӷӣт Ефесыӷмӣт ынңа̄талъ сыӷлылӣӷуткыхка̄т кияҳта̄лъық Атанӷым апыҳтӯсяқыхка̄. 24Тама̄на сыӷлылӣлъық Димитрийем серебромың улимастым пӣнлиқа̄. Таўатын пикақ қаюҳлъяк улималгуткулъҳӣт ынңа̄талъ маниңлъя̄сиқңукаңит серебромың улима̄ӷыт храмыңўа̄ҳа̄т. Тама̄кут храмыңўа̄ҳа̄т кияӷныңлъяқамун Артемидамун манигӯтфигыстун аюқылӷӣт. 25Димитрийем улималгутнилъю, иляңилъю таўатылңуӷмың улимакаюгыт қырңуҳлъюки пикӣ: «Укуҳси югни, лӣсимакаҳси ынңа̄талъ маниңлъяӷақукут қыпҳақамнъың. 26Иўырңа ысҳапагаҳсилъю, нагатаҳсилъю Павелым пилъҳа. Пӣқуқ кияӷныңлъяқат кияӷныпигунӷинъилюки. Ынка̄м угляпихлъыҳӣ ю̄к алъяңуҳқуӷа̄ ма̄ни Ефесыми, ма̄ниңина̄хпына̄н тамаҳа̄нилъю Асиями пӣқуқ. 27Сыӷлыҳалык сянӷилъкумта қыпҳақаҳпут укаваҳлъықуқ. Лӣсимакаҳси қамахлъютың Асияӷмӣтлъю, нунатаҳа̄нилңӯтлъю манигуӷақа̄т аӷнақ кияӷнық Артемида. Сянӷилъкумта югыт сюмыҳтаӷа̄ткысягулъықа̄т храм мыгнунӣнъилюку, Артемидамлъю а̄ңылъыҳлъяга сятңунаниҳлъықуқ».
28Та̄кут югыт нагалъюку Димитрий ынңа̄талъ сякша̄кат, акилӷӯҳлъякатлъю: «А̄ңыҳлъяхтуқ Артемидаңа Ефесым!» 29Мулюхпынатың қамахлъютың Ефесыӷмӣт кытанқўа̄ӷа̄ткат акилӷӯмаӷмың налъюкыӷңа̄ӷмыхтыки ся̄қутаңи. Павелым иглыӷалгуткык Гаийемлъю, Аристархылъю Македонияӷмӣк тама̄нлыңӯк увитаңитни. Иляңита югыт та̄кук акуқаӷлюкык қамуқлъюкык кытарўакат қырңуӷутфихлъягмун малихлъюки юлӷутыҳлъягыт. 30Павел итыӷьюка̄ялӷӣ юлӷун алыҳқуӷналюку иўырңа ухпықат иӷлыкыхка̄т. 31Талўа иляңита Асиям иглыӷутистыңита кывгақутка̄т илякумта̄ҳтың Павел ўатаҳлъяк итыфқа̄н қырңуӷутфихлъягмун писқылъюку. 32Та̄кут қырңуӷутфихлъягмылңӯт ўанлыги ныпухлъягуҳтыкат. Иляңи югыт сямың акилӷӯҳлъягыт, иляңи сямың алъяның акилӷӯҳлъягыт. Кияң алъюлъютың налъюкыхкаңат сяңамың қырңуӷутат. 33Та̄хкын ю̄к а̄тқылӷӣ Александрымың, Иудеит апыҳтуӷўа̄ӷлюку сямың пилъыҳқамың, акузияҳтӣсқыхка̄т сивуңитнун юлӷутыҳлъягыт. Александрым ӣхыни ныңугуткӣ нагатысқылъюни югнун. 34Иўырңа юлӷутыҳлъягыт лӣгиксямыхтыху Александр Иудейеңутаңа, қырңаҳлъягмың акилӷӯҳлъякат: «А̄ңыҳлъяхтуқ Артемидаңа Ефесым!» Таўатын акилӷӯкат кытхўылъ ма̄лӷук афлъюк.
35Ата̄сим Ефесым умӣлўа̄ӷан ныпӣҳтыстықаҳсямики юлӷутыт пикӣ: «Ефесыӷмӣни, тамаҳаҳлъягми лӣсимака̄ Ефес афлъыңакистыка̄ а̄ңылӷӣм Артемидам храмыңан, аглыӷналӷӣмлъю уйӷагым ифкақам қилягмың. 36Китум алңунак айгуӷикна̄нӷитӣлъю та̄кугның афлъыңакыстыңутфут ынка̄м ныпӣҳтык. Сяңўа̄ тымңиҳлъяк апыӷӣӷвагилгафсигу сюмыҳтаӷаҳтык. 37Та̄кук югык хўавык тагиткақахси талўа сямың тыглынӷитыӷңа̄гмык храмыми, акузиткынӷитыӷңа̄мыклъю сямың сыӷлыӷмың кияӷныҳпут Артемида. 38Уна нанқихтивигунӷитуқ. Димитрийелъю қыпҳаҳтыкулъҳӣт сямың апалъюлгукумың нанқихтивигмун агляӷлит. Таўани нанқихтистынун апыӷнакаңит апалъютың ынка̄м ынңа̄талъ авуткӣра̄ҳа̄т. 39Ўата сямың пияҳқалгукуфси сямың тама̄кын қырңуӷутфихпигаӷми агӷиткынъакыси. 40Таўатын пӣмси қаюҳлъяк Римым умӣлгита нагақуқумыхтыху уна сыӷлылӣлъық аӷныӷми хўани, та̄на апалъюқлъюку қа̄ткунъыӷинъилюта лӣлиҳтӯсямыхнун пинақӣлъю. Сямыңʼңам пилъықыстыки қаюҳлъяк апалъӣтукут сыӷлылӣҳқӣлъымнъун». 41Та̄м умӣлўа̄ӷым таўатын пилюки агляҳтӯтыстыкӣ.

ទើបបានជ្រើសរើសហើយ៖

Деяния 19: ess2

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល