Worra Rooma'aa 15
15
Ifi Adoo Hin Te'in Worra Dhibii Gammachiis
1Nuuti worri dhugeeffanna'aan jajjaba teene, ba'aa worra dadhaboole'ee ba'atuu qanna malee, ifi gammachiisuu hin qannu. 2Tokko tokkoon keenna akka nami dhibiin dhugeeffannaa ifiitiin jabaatu#15:2 jabaatu: yookiin ijaaramu, dansaa isaatiif isa gammachiisuu qanna. 3Kiristoos ifi hin gammachiinne; ammoo, akkumma Barreeffam Woyyichi, “Arraba ittiin si arrassanetti ana dhaqqabe” jedhutti isa irratti muummaye. 4Ossaa fi jajjabeenna Barreeffam Woyyichi nuuf kennuun addii akka qabaannu, wonni Barreeffama Woyyicha keessatti barreeffamane marti nu barsiisu'uuf barreeffante. 5-6Waaqi, ossaa fi jajjabeenna namaaf kennu, yaada tokko qabaattanee, fakkeenna Yesuus Kiristoosii hordottanee, addee tokko qoonqoo takka'aan, Waaqa Abbaa Yesuus Kiristoosii akka leellifattanu isin dandeessisu.
Oduun Gammadaa Worra Yihudoota Hin Te'iniif
7Akkuma Kiristoos isin fudhate, isinille ulfinna Waaqaatiif wol fudhadha'a. 8Waadaan Waaqi abbootii isaaniitii gale akka muummawuu fi Waaqi addatamaa akka te'e mudhisiisaaf, Kiristoos tajaajilaa Yihudootaa akka te'e, ani isinitti hima. 9Akkasuma worri Yihudoota hin te'inille marartii isaatiif, Waaqa akka leellisuuf tajaajilaa isaanii te'e; kunille kama Barreeffam Woyyichi,
“Tanaaf ani worra Yihudoota hin te'in oddu'utti si hin leellisa;
maqaa keetiifille faaruu hin faarfadha” jedhu.
10Ammalle Barreeffam Woyyichi,
“Isin worri worra Yihudootaa hin te'in, kolbaa isaa woliin gammada'a” jedha.
11Ammalle,
“Worri Yihudoota hin te'in marti, Goottaa galateeffadha'a;
kolbaan marti, isa galateeffadha'a!” jedha.
12Akkasuma Isaayaasille,
“Ka sanyii Iseyii keessaa dhalatu hin dhufa;
inni worra Yihudoota hin te'in bulchiisaaf hin ka'a;
isaanille isa hin addatan” jedha.
13Addiin teessan hunna Ayyaana Woyyichaatiin ittuma akka guddattu, Waaqi addii namaaf kennu, isatti dhugeeffachuu keessaniin, gammadaa fi nageya maraan isin guutuu ti.
Sababa Phawuloos Sodaa Malee Barreesse
14Obboleeyyan tiyya! Dansa'aan akka guutantaneertanu, beekkunsa maraayyuu akka qaddanuu fi wol barsiisuu akka dandeettanu, mama tokko malee aninuu hubadheera. 15Badhaadhi Waaqaa waan anaaf kenneef, marroo waan tokko tokkoo isin yaadachiisu'uuf sodaa malee isinii barreesseera. 16Badhaadhi kunille, akka ani Oduu Gammadaa, ta Waaqaa, worra Yihudoota hin te'iniif lallabiisaan akka hayyichaa te'ee, Yesuus Kiristoos tajaajiluuf naa kenname. Tanaaf worri Yihudoota hin te'in ka Ayyaana Woyyichaan woyyoomee fi kennaa Waaqa gammachiisu te'ee akka dhikaatu tajaajila. 17Karaa Kiristoos Yesuusiitiin Waaqa tajaajiliisa kiyyaan ani hin boona. 18Worri Yihudoota hin te'in dubbi'ii fi hujii tiyyaan akka Waaqaaf ajajamanu, waan Kiristoos karaa kiyyaan godhe qofa malee waan tokkolle dubbatiisaaf ani ila hin jabaadhu. 19Akkasuma hunna bilbaasotaatii fi baasotaatiin, hunna Ayyaana Waaqaatille'een, Yerusaalemii jalqabee haga Iliiriqumiititti, Oduu Gammadaa ta Kiristoosii guutuma guutu'utti lallabeera. 20Halchaan tiyya ta yennaa maraa hundee nami dhibiin buuse irratti ijaaruu adoo hin te'in, addee Kiristoos hin dhage'amin maratti Oduu Gammadaa lallabiisa. 21Ammoo, tun tama,
“Worri marroo isaa isaanitti hin himamin hin dhaggan;
worri hin dhage'in hin hubatan” jedhantee barreeffante.
Phawuloos Roomaa Dhaqiisaaf Yaadate
22Sababa kanaaf ani yennaa hedduu isin bira dhufiisa dhooggame. 23Amma ammoo adaala kana keessaa hujii tiyya waan fixadheeruu fi dhufee isin ilaaliisaafille woggaa hedduu dharra'aa waan tureeruuf, 24yennaa gara Isphaaniyaa dhaqu goree isin ilaaliisaaf karoorfadheera. Yennaa diqqoo isin dhaggiisaan gammadeen duuba, akka ani ittiin achi dhaquuf qarqaarsa akka anaa gotanu hin addadha. 25Ammaa tana ammoo, kolbaa Waaqaa ta achi jirtu tajaajiliisaaf#15:25 tajaajiliisaaf: yookiin gargaarsa beese'ee geessiisaaf ani gara Yerusaalemii deemiisatti jira. 26Wolde'i kiristaanaa ka Maqedooniya'aatii fi Akaayya'aa, hiyyeeyyii Yerusaalem keessatti kolbaa Waaqaa odduu jirtuuf, qarqaarsa kenniisaaf murteeffataneeran. #1Qor 16:1-4 27Murteen tama isaanii ti; ammoo dhuguma isaan, isaan qarqaaruu qaban; eega Yihudooti eebba Ayyaana Waaqaa irraa dhaggatane worra Yihudoota hin te'in woliin qoodamane, worri Yihudoota hin te'inille eebba jiruu fooniitiin dhaggataneen Yihudoota qarqaaruu qaban. #1Qor 9:11 28Maarre, ani yennaa hujii tana fixe, beesee isaaniif wolitti qabante maraayyuu isaanii kenneen duuba, Isphaaniyaa dhaqaara; yennaa achi dhaqu goree isin ilaala. 29Yennaa gara keessan dhufu, eebbaa Kiristoosii guutumaa guutu'utti fidee akka dhufu ani hin beeka.
30Obboleeyyan tiyya! Gootta keenna Yesuus Kiristooniin, jaalala Ayyaanni Woyyichi nuu kennelle'een, ana woliin itti cittanee#15:30 itti cittanee: murattanee akka anaaf daadimattanu isin maganniffadha. 31Akka ani miidhaa worra hin dhugeeffannee, ka Yihudaa keessaa irraa fayyuu fi tajaajilli kiyya Yerusaalem keessatti kolbaa Waaqaa ta achiitiif fudhatamaa akka te'u daadimadha'a. 32Maarre anille fedhii Waaqaa yoo teete, gammadaan gara keessan dhufee, isin dhaggee isin woliin hin haareeffama. 33Waaqi, maddi nageya keennaa, isin mara woliin jiraatu. Ameen.
ទើបបានជ្រើសរើសហើយ៖
Worra Rooma'aa 15: GAXNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Guji Oromo New Testament © Bible Society of Ethiopia, 2007.
