Matewuji 13
13
Yofwalrafwaniha ya maliba woka mbewu
Markuji 4:1-9; Lukaji 8:4-8
1Siku nimohive nenne, Yesu agakumile mmba mule, ohomaruwaga, liye dowa garati tcherela ya ntiya. 2Mwa enne ohogumana mwindji ohokala wa masika, aliwa za wa liye. Yesu agaaonne atwale, ohogwelaga mmwadeyani, liye garati. Eto mwindji watene kafwanyeyaga kagaimenle tcherela ya ntiya nne.
3Mwa enne Yesu ohoromaga awandela jengo jidjindji mwa jofwalrafwaniha eraga: <<Ohokalawo mulombwana mmohi avenyilege ira adowe awoke mbewu. 4Awokaga, mbewu dimohi diwa dohomorelaga mmambalo mwa ndila. Evale mbalrame dohozaga, aliwa dja. 5Eto mbewu dimohi diwa damorenlege nimburo nafwanyeyana mabwe, vevo vahali teya idjindjene. Evale kadarutchile, dohomelaga mobaranya, mwasiwa mbewu dile kadatimbeleyile bure. 6Mbwenye nzuwa nagazilewo, mbewu damenle dile dohomala ja, aliwa umma, mwasiwa mitchitchi diwa kadadowile vati na mwasa wa mabwe ale. 7Mbewu dimohi diwa damorenlege vamingani. Evale minga dile diulukulaga, dohopitikelrelra jomela jile, aliwa nyala. 8Mbwenye mbewu dimohi diwa dohomorelaga vateyani vapama. Evale dohomelaga, aliwa ulukula, vaha jovaha jidjindji. Dimohi diwa dohovaha jovaha 100, dimohi diwa 60, dimohi diwa 30. 9Ule unna mabaru ovwana, avwe.>>
Mwasa wawongela Yesu mwa jofwalrafwaniha
Markuji 4:10-12; Lukaji 8:9-10
10Evale Yesu agamanle wonga enne, anamamuharaye kohozaga, aliwa nfuka keraga: <<Kodi mwasiwa gwa nni nyo awandelaga atu mwa jofwalrafwaniha?>>
11Evale Yesu ohawakulaga eraga: <<Nyo muhuvahiwa ira muonelremo jokoyeya ja Umwene wa zulu. Mbwenye aliwa kivahiwe.#13:11 Nyo muhuvahiwa ira muonelremo jokoyeya ja Umwene wa zulu. Mbwenye aliwa kivahiwe. Mazu a Mulugu anoniwandela ira onelramo ibaribari no twaruwa no kana nroromelo kunazela mofuna wa kada mutu. So mbwenye mutu ira akayena, unavahiwa. Kohokalawo anavahiwa eto kohokalawo kahanavahiwa. Nione Matewuji 19:11; Markuji 4:11-12; Juwawu 6:65; Joira ja Anamarumiwa 16:14; Roma 9:16; 2 Timoteyo 2:25. 12Tchoira mutu wenne unna, gunafuna vahiwave, liye wendjediwagave. Mbwenye ule ahanna, eto mwa yengo ya vang'ono yenno inna liye, unoza awakiwe. 13Na mwasa wenno miyo nnaawandela mwa jofwalrafwaniha ira aliwa masiki kaganna meso, kaing'anaga, kahawande ona eto kagannave mabaru, kavuruwanagave, kahawande vwa nne kahawande onelramo inawonga miyo.#13:13 miyo nnaawandela mwa jofwalrafwaniha ira… kahawande ona: Kaali funa wa Yesu ira aalaleyege atu atene movweya. Amohiwa liye aawongana mmisimbeni ira kahawande onelramo jawonga liye. Tchoira atu amohiwa kohovahiwa ira kaonelremo, atu amohiwa anoummihiwa murima ira kahawande onelramo. Nione Matewuji 13:11. 14Aliwa jatene jinera atu jinafuna jikwakwanelihede mazu Mulugu awongile liye muwari mwa Izaiya ira:
Na ibaribari, vwave, munerege vwa, mbwenye kamuza muonelragamo. Eto onave, munerege ona, mbwenye kamuza muiziwaga pama! # 13:14 onave, munerege ona, mbwenye kamuza muiziwaga pama! Ku wonga kohokalawo atu anaonelramo pama mazu anawongiwa mBibiliyani eto kiza kakana ibaribari mmirimani mwewa. Kafukiwa zela makalelo ovulusiwa nari jofuna ja Mulugu, anowakula mwa ibaribari kahanna eto nroromelo. Nione Matewuji 13:20-22. 15Mwasiwa atwala mirima dewa dinnanave vanda. Kagannave mabaru, anavwa vang'ono. Kagannave meso, anaona vang'ono bahi. Kinafuna ona na meswiwa nne kinafuna vwa na mabaruwa, tawiha ira anoza kaonelremo na mmirimani mwewa, katwaruwe ira miyo daavulumutche.
16<<Mbwenye orelihiwa ba meso enyu mwasiwa anowanda ona eto orelihiwa ba mabaru enyu mwasiwa anovwa! 17Na ibaribari nnouwandelani ira anamafiyiheda adjindjene na atu owongowa adjindji a malambo a mundulri, kohofunafuna ira kaone jengo jejo jinaona nyo, mbwenye aliwa tchaonile. Eto aliwa kohofunafuna ira kavwe jengo jejo jinavwa nyo, mbwenye tchavwile!>>#13:17 kohofunafuna ira kavwe jengo jejo jinavwa nyo: Ku wonga atu omuroromela Mulugu a wanle kohokana funafuna ira kamuone Namatikeliwa afuna za eto kohokana funafuna ira kavwe jowonga ja Namatikeliwa. Aliwa mbwenye kohokwa kahanamunone eto kahanavwe jowonga jaye. Nona anamamuhara Yesu kohorelihiwa mwasiwa kohowanda muona Yesu eto kohowanda vwa jowonga jaye.
Yotapulela ya yofwalrafwaniha ya namawoka mbewu
Markuji 4:13-20; Lukaji 8:11-15
18Yesu ohowongagave eraga: <<Kavuruwanani pama yotapulela ya yofwalrafwaniha ya namawoka mbewu damuwonga miyo ule. 19Mutu uli watene unavuruwana mazu a muUmweneni ahaonelragamo, unaza gu Mutu Wabure, liye muwaka jejile jizaliwe mmirimani mwaye.#13:19 unaza gu Mutu Wabure, liye muwaka jejile jizaliwe mmirimani mwaye: Mutu wabure unawongiwa gu Satana. Nione eto 2 Korinto 4:4. Ku wonga yenno tchi mbewu yamorenle mmambalo mwa ndila. 20Eto mbewu yenne yamorenle vateyani vafwanyeya mabwe gu mutu wenne unavwa mazu eto agavwile evale unowanda awatchela mohagalala. 21Mbwenye voira liye kanna mitchitchi mwa liye eka, jejile kajinadibeliwa. Kagazile makatamiho no harahariwa na mwasa wa mazu, mobaranya unowelela mundulri.#13:20-21 unowanda awatchela mohagalala… mbwenye mobaranya unowelela mundulri: Kohokalawo atu anarumela Muselu Wapama moonelramo eto anagomela welela mundulri. Fwanyeya ira aliba welela mundulri kiza kakana pandi muUmweneni mwa Mulugu. Nione Matewuji 10:22, 24:13; 1 Korinto 6:9-11; Eberewu 3:6,14, 6:4-9, 10:26-27; 1 Juwawu 2:19, 3:8-10. 22Eto mbewu yenne yamorenle vevo vamenle minga gu mutu wenne unavwa mazu, mbwenye agavwile enne, kaza makatamiho a mwilamboni na jonyenga ja jorayela, jatene ejo jinopitikelrelra mazu avwile liye, evale liye kanavaha jovaha. 23Mbwenye mbewu yenne yamorenle vateyani vapama gu mutu wenne unavwa mazu, aonelragamo, ante afiyeda vaha jovaha jimohi jiwa 100 owu hehi 60, owu hehi 30.>>#13:23 vaha jovaha jimohi jiwa 100 owu hehi 60, owu hehi 30: Anavaha jovaha ba atu anne anamuroromela Yesu bahi. Tchoira mutu masiki akale mutu oirana japama, mbwenye akala liye kanarome muroromela Yesu, joira japama jatene jinaira liye kajinna mabasa.
Yofwalrafwaniha ya mwidani mmohi awokile ntandje mmundani mwa tirigu
24Noira enne, Yesu ohowongaga yofwalrafwaniha imohiwa eraga: <<Umwene wa zulu unafwalrafwana na mulombwana mmohi azanle mbewu yapama ya tirigu mmundani mwaye. 25Mbwenye na mahiyu anamalabaye kagonaga, ohozaga mwidanaye, liye woka ntandje vari va munda vale, liye dowaga. 26Noira enne, tirigule agamanle ulukula, agamanle manga mihumbu, ntandje nne nohooneya mmundani mule. 27Anamalabale kagaonne ntandje nne, kohomaruwaga, dowa nfwanya mwinnya wa mundole, aliwa muwandela keraga: <Mbwiyeni nihifwanyamo ntandje mmundani mule. Kodi kamwanizalihilemo mbewu yapamave? Nnga ntandje nne nnakumela waani?> 28Evale liye ohowakulaga eraga: <Ukala mwidani uzile asakanya jejo.> Evale anamalaba ale kohonfukaga keraga: <Mbwiyeni nnga nyo munofuna ira hiyo nidowe nadulemo?> 29Liye ohowakulaga, liye ira: <Nari! Muhiye mwemule, tawiha ira mwadulaga ntandje niwa, munadulege vamohi na tirigu wenne! 30Muhiye jatene jiulukulege vamohi ante tempu ya mahandelo. Tchoira tempu yohanda yafiya, miyo nnoawandela anamahanda ira: <<Mubabihe gudela ntandje natene vamohive, mumangihege mapitika mapitika ira jitumeyiwe. Mbwenye tiriguwa, mugudele, mudowena musandjani mwaga!>> > >>#13:30 Muhiye jatene jiulukulege vamohi ante tempu ya mahandelo: Tapulela wa ibaribari zela yofwalrafwaniha ila inafwanyeya sogolro muwari mwa mazu a Matewuji 13:36-43. Mazwala kinawonga zela mawendelo a nikuru na atu omuroromela Yesu mbwenye anawonga zela makalelo Mulugu unawenda liye na atu atene a mwilamboni ya vati.
Yofwalrafwaniha ya mbewu ya mostarda
Markuji 4:30-32; Lukaji 13:18-19
31Eto ohawandelaga yofwalrafwaniha imohiwa eraga: <<Umwene wa zulu unalingana na mbewu ya mostarda, yenno mulombwana mmohi atukunle liye, azala mmundani mwaye. 32Fwanyeya ira mbewu ya mostarda tchi mbewu ing'ining'inive igomihede yeva muwari mwa mbewu datene da mmundani. Mbwenye mulombwanole agamanle zala, yagamenle, mutenguwa ohoulukula kwaranya mbewu datene dozaliwa da mmundani. Evale mbalrame dovava zulu dozaga, aliwa mangaga jitundji mutambini mwa mutengole.>>#13:32 mutenguwa ohoulukula kwaranya mbewu datene: Yofwalrafwaniha ila zela mbwewu ya mostarda na yofwalrafwaniha yoharela zela leverina jinawonga yengo imohive. Jinawonga ira Umwene wa Mulugu unaroma nnga yengo ing'onong'ono eto unoza uulukule fiyeda ugondjihe jatene. Nione Daniyeli 2:35,45.
Yofwalrafwaniha ya leverina
Lukaji 13:20-21
33Nomala eno, Yesu ohawandelagave yofwalrafwaniha imohiwa eraga: <<Umwene wa zulu unalingana na leverina muhiyana mmohi atukunle liye, adowa atanganiha na malanta mararu a utu. Liye agatanganihile, masa matene kohonyakuwa.>>
Yesu alabana jofwalrafwaniha ve
Markuji 4:33-34
34Jatene jeji jawongile Yesu na mwindji wa atu, awonga mwa jofwalrafwaniha. Eto kilivo nne yengo imohi yahawongile liye muwari mofwalrafwaniha. 35Jatene ejile ali ira jikwakwanele na mazu awongile namafiyiheda mmohi wanle ira:
Miyo nnofugula mulomo waga, diwongege mwa jofwalrafwaniha. Nnovweyiha jengo jejo jali jokoyeya romela mapanduwelo a ilambo! #
Salmu 78:2
Yotapulela ya yofwalrafwaniha ya ntandje
36Noira enne, Yesu ohahiyaga anamwindjale evale, liye dowa volowa mmba. Agavolowile mmba mule, anamamuharaye kohozaga, aliwa nfwanya, atu kwi: <<Niwandeleni yotapulela ya yofwalrafwaniha ya ntandje nafwanyeya mmundani mule!>> 37Evale liye ohowakulaga eraga: <<Unazala mbewu yapama gu Mwana wa Mutu. 38Eto munda damuwonga miyo unafwanyeya agali ilambo ya vati. Mbewu yapama yazanle mundimuwole ba ahima a muUmweneni. Eto ntandje nne ba ahima a Mutu Wabure. 39Eto mwidani wenno azile wokamo ntandje nne unafwanyeya agali Diyabo. Eto mahandelo uwa unafwanyeya agali magomelo wa ilambo eto anamahanda ba angelro. 40Mwa eno, voira ntandje nnogudeliwa dowa tumeyiwa na munlo eto pinafuna ireya magomelo wa ilambo. 41Mwana wa Mutu unoza aarume angelro aye ira kaakumihemo muUmweneni mwaye anne anaategiha afwiwa vamohi na aliba tega. 42Kagamanle akumihamo, anoatatilela muhofuni mwa munlo ohindetchetcha. Wewule mbwenye unoza ukale nla no takuna meno! 43Mbwenye atu apama anoza kakayena wareya nnga nzuwa muUmweneni mwa Babiwa. Ule unna mabaru ovwana, avwe.>>#13:38-43 mahandelo uwa unafwanyeya agali magomelo wa ilambo eto anamahanda ba angelro: Mazwala kinatapulela ira mutu wabure afwanyeya muwari mwa nikuru na atu omuroromela Yesu, inafwanela afwaye kamuhiye eno, nari. Tchoira munda unawongiwa kahi nikuru na atu omuroromela Yesu mbwenye unafwanyeya agali ilambo yatene ya vati. Eto anamalabiwa anawongiwa muwari mwa mazwala kahi hiyo atu mbwenye ba angelro. Eto Yesu na Pawulo kohowonga ira inafwanela wenno ahanawanda twaruwa atamangihiwe muwari mwa nikuru na atu omuroromela Yesu unakaletcha liye. (Matewuji 18:15-17; 1 Korinto 5:1-7,11)
Yofwalrafwaniha ya yengo yofuneyetchetcha yatimbeliwe
44Yesu ohowongagave eraga: <<Vamohive vevo Umwene wa zulu unalingana na yengo yofuneyetchetcha yatimbeliwe mmundani mwa mutu. Evale mulombwana mmohiwa ohoifwanya yengwele. Agaifwanyile, muwari moira mundole kaali waye, liye aromile weliheda vali atu. Mwa enne ohokagana hagalala, liye venya dowa guliha jatene janna liye, tukula kobiri diwa, liye gulana mundole ira adje yengwele.>>#13:44 liye gulana mundole ira adje yengwele: Va fwanyeya ira yengo yofuneyetchetcha yohodiwaliwa mmundani mwa mutu. Kalaga nnga mwinnya ohokwa wanle. Evale mulombwanole agaifwannye, kafunne iba. Muwari mohofuna ba, liye agulihile jatene janna liye ira awande gula mundole mmandani mwa atu kahanlena. Evale agagunle, liye ohodja yengo yofuneyetchetcha ile mohokana ova. Tapulela nnga Umwene wa Mulugu. Mutu unowanda puzeya jaye jatene ja ilambo ya vati muwari momuhara Yesu. Mbwenye liye kapuzeyile mwasiwa liye ufwanya yengo yofuneyetchetcha kwaranya jatene janna liye. Nione Filipo 3:7-8.
Yofwalrafwaniha ya nibwe nofuneyetchetcha
45Yesu ohowongagave eraga: <<Vamohive vevo, Umwene wa zulu unalingana na mulombwana mmohi osakanya malronda, wenno asaka mabwe ofuneyetchetcha.#13:45 mabwe ofuneyetchetcha: Na izugu ani pérolas. 46Evale liye asayelagave, ohofwanyaga nibwe nimohi nofuneyetchetcha, nokwima bure. Mwa enne ohovenyaga, liye dowa vande vaye, guliha jatene janna liye, dowa gula nibwe nne.>>
Yofwalrafwaniha ya ntavi na somba
47Yesu ohowongagave eraga: <<Vamohive vevo Umwene wa zulu unalingana na ntavi navokediwe mwiko niwandaga dodela somba da makalelo matene. 48Nagazanle, aliba meza ale kohotutumulela tcherela ya bara, aliwa dowa garati roma sakulrelraga somba dapama, aliwa helaga mungogodani, mbwenye jatene jabure kohotatila. 49Yengo imohive tchinafuna za ireya magomelo wa ilambo. Angelro anoza kaasakulrelemo atu apama na abure. 50Eto anoza kaatatilele atu abure muhofuni mwa munlo ohindetchetcha wewo unaza ukale nla no takuna meno.>>
Makalelo a namafundjiha wapama
51Noira eno, Yesu ohafukaga anamamuharaye eraga: <<Kodi muhuonelramo jatene jiwongile miyo?>> Evale aliwa kohomuwakulaga keraga: <<He, nihionelramo!>> 52Nomala enne, ohawandelaga eraga: <<Akala muhuonelramo, miyo nnouwandelani ira namafundjiha malamulo wenno ufundjihile ja Umwene wa zulu unalingana na mwinnya wa vande, wenno unawanda dowa nimburo naye nokoyamo jaye, liye kumiha jengo japama jixa vamohi na jengo japama ja wanle.>>#13:52 liye kumiha jengo japama jixa vamohi na jengo japama ja wanle: Va mazwala anawonga zela mulombwana unawanda koya jengo japama mmba mwaye nari vatatani vaye. Mbwenye liye kanakoya jengo ira jigomele mmba mwemule. Ja wanle jipile liye eto jixa jipile liye, unokumiha ira atu a vande vaye kakayena jodja jiwa nari jowara jiwa nari jofuneya jimohi jiwa. Mazwala tapulela nnga mutu wenno ufundjile mazu a Mulugu unowanda tukula jifundjile liye wanle vamohi na jengo jixa jifundjile liye tchineneva, liye roma awandelaga afwaye.
Yesu agali sidadi ya Nazareti
Markuji 6:1-6; Lukaji 4:16-30
53Yesu agamanle wonga jofwalrafwaniha jatene ejile, ohovenyagavo nimburo nenne. 54Noira enne, ohowelelaga ilambo ya waniwa, liye fundjihaga munyumbani mwiwa mwemo mwafundja atu mazu. Evale atu atene kavuruwana jawonga liye, kokala otikiniheyene kafukaga keraga: <<Kodi zelru unna liye na kopolo doirana jotikiniha ji, unakumana waani? 55Kodi wenna kahi mwana namasema? Nnga mmaye kahi wenno unaitaniwa Mariya? Liye mbalaye kahi Tiyagu, Joze, Simawu na Judaji? 56Nnga kodi arongoliye kahi anna anakala tatamo yenna? Nnga jatene jinaira liye ji jinakumela waani?>> 57Na mwasa wenne, kohomutakaleliwa. Mbwenye Yesu ohawandelaga eraga: <<Namafiyiheda unorihediwa pandi datene dene, mbwenye ilambo ya waniwa na atu a vande vaye kinamuriheda.>> 58Nona na mwasa ohofuna roromela wewa, wewule Yesu kasakanyilewo matikiniho madjindji a kopolo.
ទើបបានជ្រើសរើសហើយ៖
Matewuji 13: iLolo
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral
