Matewuji 12
12
Yesu gu mwinnya wa sabado
Markuji 2:23-28; Lukaji 6:1-5
1Mwa tempu yenne, siku nimohi na sabado, Yesu ohoviraga na anamamuharaye nimburo eni wafwanyeya munda wa tirigu. Evale anamamuharaye na mwasa wa ndala, kohoromaga kotola mangala a tirigu, aliwa takunaga.#12:1 kohoromaga kotola mangala a tirigu: Malambo a mundulrimu muwari mwa malamulo Mulugu awandenle liye aIzarayeli tempu ya Mozeji, nlamulo nimohi nawonga ira mutu awendaga mundila, unorumelihiwa ira aperuwe mmindani mwa mutwene, adje uva nari atakune jalo ja mmundani mule. Mbwenye akumaga mmindani mule, kavili rumelihiwa ira ahele vang'ono mbolrosani mwaye nari musakwini ira adje unaya liye. So mutu adjela mmundani emule bahi. (Detoronomiyo 23:24-25) 2Evale aFarizewu kagaonne enne, kohomuwandelaga Yesu keraga: <<Kaing'anani! Anamauharaninyu anairana yenno inakameliha malamulo irana siku na sabado.>>
3Mbwenye Yesu ohawakulaga, liye ira: <<Kodi nyo kamunaileri mMazuni jejo jairile mulombwana Davi tempu yanna liye ndala vamohi na afwaye annaga liye? 4Navenda mMazuni nnofwanyamo ira Davi aganna ndala, ohovolowa Nyumba ya Mulugu, liye dja pawu dotchenihiwa, pawu dedile datapulela ira Mulugu uli vamohi na atwaye.#12:4 pawu dedile datapulela ira Mulugu uli vamohi na atwaye: Malambo a mundulrimu Mulugu oharuma aIzarayeli ira kasakanye meza, kahele muwari mwa Musasa wa Yehova amala katukule pawu kumi na mbinli, kahiye vameza. Pawu kumi na mbinli datapulela malogo kumi na menli a aIzarayeli. Va kada sumana anamakuta kohokana mabasa otchindja pawu. Da wanle dile, aliwa dja. Mbwenye mutu wa vaheno vene nnga Davi kadja. Zela muselu wenno, nione eto Ezodu 25:30; Levitiku 24:5-9. Eto fwanyeya ira muwari mwa malamulo kavali jowandeya ira Davi atukule pawu dedo arome djaga nne afwaye. Mbwenye anarumelihiwa ira kadje ba anamakuta bahi! Mulugu mbwenye kamutakaleliwe mulombwana Davi. 5Vamohive vevo, kodi nyo kamunaileri mmalamuloni ira anamakuta kalabaga mabasiwa siku na sabado Nyumba ya Yehova, laba wewo anotakaliha siku na sabado mbwenye kinakana mulandu?#12:5 anamakuta kalabaga mabasiwa siku na sabado Nyumba ya Yehova, laba wewo anotakaliha siku na sabado: Fwanyeya ira anamakuta muwari mohinda mabasiwa siku na sabado, koirana jengo jaharumelihiwe ira jiireye siku na sabado. Kohinda mabasa opa anavinyama siku na sabado eto kotumbanya munlo ira katumeyegena mikuto dewa agali ejo kajarumelihiwa ira mutu wa vaheno vene airegena siku na sabado. (Numero 28:9-10; Ezodu 35:3) Nnga kohorumiwa na Mulugu, Yesu kwi kairagana ejo, aliwa mbwenye kinakana mulandu. 6Miyo mbwenye nnouwandelani ira ukala uzile uli mundimuwa kwaranya Nyumba ya Yehova.#12:6 ukala uzile uli mundimuwa kwaranya Nyumba ya Yehova: Va Yesu unaviwonga mwinnya. Tchoira Nyumba ya Yehova yali nimburo nadowa atu ira kavelele mikuto diwa. Mbwenye muwari mwa mabasa alabile Yesu, liye amalihile mabasa matene a Nyumba ya Yehova muwari mokala mukuto ogomiheda. Nione Eberewu 7:27, 9:24-28. 7Nyo ahakanlege muiziwa yotapulela ya mazu a Mulugu oira: <Miyo nnafuna tangaranga hiya mikuto.>,#Ozeya 6:6; Matewuji 9:13 kamwaatongege atu ohokana mulandu. 8Mwasiwa Mwana wa Mutu, unafwanyeya eto agali mwinnya wa sabado.>>#12:8 mwinnya wa sabado: Ku wonga liye okana utongi ira aawandele atu yengo tchivi inarumelihiwa labiwa siku na sabado.
Siku na sabado Yesu ohonvulumutcha mulombwana orangala ndanda
Markuji 3:1-6; Lukaji 6:6-11
9Noira enne, Yesu ohomaruwaga evale, liye dowa volowa munyumbani mwiwa mwemo mwafundja atu mazu. 10Emule mohokalaga mulombwana mmohi annaga ndanda norangala. Mwa enne aFarizewu muwari mofuna ira kawande onavo muselu omunukedana Yesu, kohonfukaga keraga: <<Kodi tchi yengo yorumelihiwa mMalamuloni nvulumutcha mutu siku na sabado?>>
11Yesu ohowakulaga eraga: <<Kodi muwari mwa nyo mulombwana guvi uni aganna nibila naye, nibila nne nimorela mmulihani siku na sabado ahadowa ahinda, akumihamo? 12Nnga ikalele mutu ompumbula? Tchoira mutu gofuneya kwaranya nibila. Mwa eno, miyo nnouwandelani ira tchi yengo yofwanela sakanya upama siku na sabado.>> 13Mwa enne Yesu ohowongaga na mutule eraga: <<Katapula ndanda nawo!>> Evale mutule ohotapulaga ndanda naye. Mwa enne agatapunle, ndanda nne nohowongowaga, aliwa kala pama nnga ndanda nimohi niwa nne.
14Noira enne, aFarizewu ale kagakumile evale, kohoromaga mpanganela Yesu ira kampe.
Yesu gu Namalaba osakulriwa wa Mulugu
15Yesu muwari moiziwa jejile, ohomaruwaga, ahiya evale, liye dowaga jaye. Evale liye adowaga, kohokalawo atu adjindji kamuhara. Mwa enne liye ohavulumutcha atu atene kali arenda. 16Eto oaruma ira: <<Mwadowa, kamuwongege na atu mudivweyihaga.>> 17Jatene ejo jalaba ira jiwande kwakwaneliheda mazu a Mulugu anno kawongiwe na namafiyiheda Izaiya ira:
18 <<Kaing'anani, ula gu namalabaga wenno dimusakunlre miyo, # 12:18 Ula gu namalabaga wenno dimusakunlre miyo : Namalaba unawongiwa va gu Yesu. Mulugu gwamusakunlre Yesu ira akale namalabaye. Ku wonga Yesu azile nnga mutu orumiwa na Mulugu Baba. wenno unadihagalaliha kalawo waga. Miyo nnonvaha Munemba waga eto unodowa aalaleyege atu ohokala aJudewu matongelo a ibaribari. 19Liye kanakana madugudugu, nne kaza akuwa movweya, nne nizu naye kaniza nivweya murampani. 20Liye kaza anyenya murere okotoliwa na wanle, nne kaza atimiha munlo uhanlena tuwelave bahi,#12:20 kaza anyenya murere okotoliwa na wanle, nne kaza atimiha munlo uhanlena tuwelave bahi: Ku wonga Yesu makalelo afuna liye za kana kaali makalelo oanonga atu ovuta mbwenye liye afuna aavenyihe. fiyeda azena matongelo a ibaribari mwatene mwene. 21Eto atu ohokala aJudewu anadedihege nzina naye.>>#Izaiya 42:1-4
Utongi wanna Yesu wotamangihana minemba dabure
Markuji 3:20-30; Lukaji 11:14-23
22Noira enne, kohomuzagana mulombwana mmohi ozuzumihiwa na munemba wabure. Muwari mokana munemba wabure mule, mutule kaona nne kawonga. Evale aliwa kagamuzilena wa Yesu, liye ohonvulumutchaga. Mwa enne aganvulumutchile, mutule ohoromaga wonga eto liye onaga. 23Atu atene kafwanyeya evale kohotikiniheyaga keraga: <<Kodi wenna kaza akala Mwana Davi?>>#12:23 Atwale kamukayikelaga Yesu ira: Kodi wenna kaza akala mwana Davi?, ku wonga aliwa kamukayikela Namatikeliwa amuwonga Mulugu. Mwasiwa wanle Mulugu ohowonga na Davi ira: <<Muwari mwa weyo munoza mubaliwe mutu wenno unafuna kala Nvulusi.>> Zela ibaribari ira Nvulusi afuna akumele muzizani mwa Davi, inafwanela nione eto 2 Samuweli 7:16; Jeremiya 23:5; Salmu 132:10-11; Joira ja Anamarumiwa 13:22-23; Juwawu 7:42.
24Mbwenye aFarizewu kagavwile ejile kohowongaga oka oka keraga: <<Wenna kahi mwana Davi. Liye unatamangiha minemba dabure na kopolo da Belizebu wenno uli mundimuwa wa minemba dabure.>> 25Yesu mbwenye muwari moiziwa jaumbuwela atu mmirimani mwiwa ohowongaga eraga: <<Umwene watene unavigawa uromaga wana oka oka, unagomela bwanyuliwa. Eto sidadi yatene inavigawa nari nivande nnavigawa, karomaga wana oka oka, magomelo wewa ku bwanyuliwa. 26Eto Satana akala unomutamangiha Satana, ku wonga Satana mmohive guvigawile, roma wanaga ekave. Nnga jaireya eno, umwene waye unawande limba avi? 27Eto akala miyo nnatamangiha minemba dabure na kopolo da mundimuwa Belizebu, nnga ahiminyu anatamangiha minemba dabure na kopolo da ani? Na mwasa wenno miyo nnouwandelani ira aliwene anoza kakale anamatonga anafuna utongani nyo!#12:27 nnga ahiminyu anatamangiha minemba dabure na kopolo da ani? Ira Yesu awonge mazu anno, fwanyeya aFarizewu kohokana asempuru ewa anno katamangihetcha minemba dabure muwari mwa kopolo da Mulugu. Kalaga nnga Yesu afuka ira: <<Akala nyo munodikayikela ira nnalaba na kopolo da Belizebu, mwasiwa gwa nni haakayikelaga afwinyu anatamangiha minemba dabure? Nona afwinyu banafuna za umangani mulandu mwasiwa aliwa kohokana ibaribari zela kopolo nnalabana miyo.>> 28Mbwenye akala miyo nnatamangiha minemba dabure muwari mwa Munemba wa Mulugu, ku wonga Umwene wa Mulugu uhufiya wa nyo.
29<<Nari kodi mutu unawanda avi dowa vande va mulombwana mmohi olimba adowa amuwaka jengo jaye jatene ahanababihe mmanga? Tchoira liye ahanarome tukula yengo, unaroma mmanga. Amala mmanga, aona ira: <Eniva dihimugondjiha>, unoroma tukula jatene.#12:29 Amala mmanga, aona ira: <Eniva dihimugondjiha>, unoroma tukula jatene. Muwari mwa mazwala, mutu olimba gu Satana. Yesu mbwenye unowanda mmanga, liye labaga mabasaye mofuna mwaye. Tchoira Satana ohakana atwaye. Yesu ohowanda mmanga Satana ira awande awombola atu anno kafwanyeya na Satana. Yesu unakala nnga mutu afunaga wombola fwaramento vamohi na atu anno katukuliwe na mutu olimba. Maliba wombola kanaroma tukula fwaramento na atwaye adowagana vande ahanamugondjihe mwidanaye ule. Unaroma mmanga mutu olimbole, amala liye sakanya jejo. Yesu eto muwari mommanga Satana, liye ohowanda tamangiha minemba dabure mofuna mwaye.
30<<Mutu wenne ahali na miyo, gwenno unadiida. Eto wenne ahanadikamiheda gumaniha, gwenno unamwada. 31Na mwasa wenno nnouwandelani ira yotega ili yatene na jomululuviha Mulugu jatene jinowanda kurumuweliwa. Mbwenye ule unamululuviha Munemba Otchena kaza akurumuweliwa! 32Mutu awonga ubure zela Mwana wa Mutu unowanda kurumuweliwa. Mbwenye mutu amululuviha Munemba Otchena kaza akurumuweliwa, nne tempu ili hiyo ila nne tempu inafuna za sogolro.>>#12:32 mutu amululuviha Munemba Otchena kaza akurumuweliwa: Munemba Otchena gunazana umboni ira mutu akayena ibaribari zela Yesu. Mbwenye aFarizewu kohotukula umboni wa Munemba Otchena, aliwa sandutcha roma wongaga ira Yesu ohoirana jionihedo na kopolo da Satana. Fwanyeya ira mutu akonda vwa umboni wa Munemba Otchena zela Yesu, liye kaza eto avulusiwa. Yesu eto ohowonga ira: Munemba Otchena aza… unoawandela atu makalelo a yotega yewa. Yotegiwa, tchoira kinadiroromela miyo. (Juwawu 16:8-9) Tapulela ira Munemba Otchena agaawandenle atu yotega yewa zela hafuna muroromela Yesu, atwale kapokiha umboni wa Munemba Otchena, kavali vulusiwa. Kalaga nnga anamafundjiha malamulo. Aliwa kagaonne jaira Yesu muwari mwa kopolo da Munemba Otchena, tcharumenle. Eto muwari mohovwa, aliwa kohompeta Yesu. Eto fwanyeya ira kavali vulusiwa para atu anapeta umboni wa Munemba Otchena zela Yesu.
Mutengo na jovaha jiwa
Lukaji 6:43-45
33<<Mwaona mutengo ovaha jovaha japama, muiziwe ira mutengole gwapama. Mwaona mutengo ovaha jovaha jabure, muiziwe ira mutengole gwabure. Mwasiwa kada mutengo unaiziweya mwa jovaha jaye.
34<<Nyo mulogo wa jivili nyo! Kodi nyo munawande avi wonga mazu apama agali nyo muli atu abure? Mwasiwa mulomo unawonga jengo jinafwanyeya mmirimani mwa mutu! 35Mutu wapama unakumiheda unde upama waye wenno unafwanyeya mmirimani mwaye mwapama. Eto mutu wabure unakumiha ubure wenno unafwanyeya mmirimani mwaye mwabure. 36Miyo mbwenye nnouwandelani ira siku notonga naza nifiya, kada mutu unoza amangiwe mulandu zela jowonga jatene johofwanela jinakumela vamulomoni vaye. 37Mwasiwa mutu unaza arumeliwe wapama mwa jowonga jaye eto unaza amangiwe mulandu mwa jowonga jaye.>>#12:37 mutu unaza arumeliwe wapama mwa jowonga jaye: Kalaga nnga mazu a Yesu oira: Na mwasa wenno, mutu wenne unadirumele vari va atu, na miyene nnoza dimurumele vamentoni va Baba wenno uli zulu. (Matewuji 10:32) Nione Roma 10:10. Eto unaza amangiwe mulandu mwa jowonga jaye: Kalaga nnga mazu a Yesu oira: Mbwenye wenne unadirune vari va atu, na miyene nnoza dimurune vamentoni va Baba uli zulu. (Matewuji 10:33)
Yesu ohowonga zela gwana mulandu wa ale kafuna ona ionihedo
Markuji 8:11-12; Lukaji 11:29-32
38Evale Yesu agawongile enne, anamafundjiha malamulo amohiwa na aFarizewu kohoromaga wonga keraga: <<Namafundjiha, hiyo nnafuna muirena ionihedo imohi ira nione!>> 39Yesu mbwenye ohowakulaga eraga: <<Atu a tempu ili hiyo ila ba atu abure, atu oraruwa.#12:39 atu oraruwa: Mazwala podi tapulela fendo mbinli. Voroma podi tapulela ira atu a tempu yenno kohokana imanya yorarutchana eto kohokana makalelo omwalana amala aliwa za telana akoka. (Matewuji 5:31-32, 19:9) Yowelela podi tapulela ira aliwa kawongetcha nzina na Mulugu, mbwenye kagali olapela wene na Mulugu muwari mwa joira jiwa. Tchoira raruwa ozela hiya muhara Mulugu ira kaahare amilugu amohiwa unowongiwa mMazuni. Nione Jeremiya 3:20; Ozeya 3:1. Anavepa ira kaone ionihedo. Mbwenye aliwa kinaireliwa ionihedo ili yatene yahali ionihedo ya namafiyiheda Jonasi. 40Tchoira sawasawa nnga mulombwana Jonasi ohomala malambo mararu ntana na mahiyu mbani mwa somba indimuwa, Mwana wa Mutu na liyene unomala malambo mararu ntana na mahiyu vati va teya. 41Siku notonga naza nifiya, atu a Ninive anoza kavenye kaumangeni mulandu nyo atu a tempu ila, mwasiwa aliwa kagavwile mazu a Jonasi, kohowanda twaruwa mwa jotega jewa. Kaing'anani eto wenno uli eva umukwaranya mulombwana Jonasi eto nyo mwagavuruwanile jinawonga liye, kamunafuna twaruwa. 42Siku notonga naza nifiya, mwana muhiyana atonga ilambo ya Suli, liye unoza avenye aumangeni mulandu nyo atu a tempu ila.#12:42 mwana muhiyana atonga ilambo ya suli unawongiwa kaali muIzarayeli. Muselu zela mwana muhiyana unawongiwa unafwanyeya 1 Amwene 10:1-13 nari 2 Koronika 9:1-12. Inaumangeleni liye mulandu tchoira liye ohovenya waniwa ilambo yolapa, liye dowa ira avuruwane zelru da Salomawu. Eto kaing'anani, peno ukalawo uzile omukwaranya Salomawu wenno.#12:42 peno ukalawo uzile omukwaranya Salomawu wenno: Va Yesu unaviwonga liye mwinnya. Mbwenye nyo mwagavuruwanile jinawonga liye, kamunafuna vwa.>>
Makalelo a munemba wabure amuwelela mutu
Lukaji 11:24-26
43Yesu ohowongaga eraga: <<Munemba mmohi otakala akuma mmaningoni mwa mutu unawenda mwemo mwahanafwanyeya mahindje, sakaga nimburo napama ira awande vuma. 44Mbwenye liye asaka, ahafwanye vovuma, unowonga ira: <Nnafuna diwelele vande vevo vikumile miyo.>#12:44 Nnafuna diwelele vande vevo vikumile miyo: Ku wonga munemba wabure ule unafuna awelele mmaningoni mwa mutu mwemo mukumile liye. Era enne unowela, liye dowa vande vale. Afiya vande vale unafwanya kavali mutu eto vihimala jeliwa, vili vapama vene. 45Era eno unodowa tukula minemba dabure dimohi diwa mitanu na minli dokana makalelo abure omukwaranya liye, aliwa za kalaga mmaningoni mwa mutule. Era enne makalelo ogomiheda a mutule anakala otakala kwaranya makalelo oroma anna liye. Makalelo anna banafuna aireyela atu abure a tempu ili hiyo ila.>>#12:45 makalelo ogomiheda a mutule anakala otakala kwaranya makalelo oroma anna liye: Munemba wabure atamangihiwa, amala awela, afwanya ira Munemba Otchena ulive evale, unokwaranyavo. Mbwenye aona ira: <<Mutula agavulumuwile na nzina na Kiristu, kafunne muitana Yesu ira akale na liye>>, unaadowela afwaye anno anafuna muzuzumiha mutule na makalelo abure kwaranya makalelo anna liye wanle. Kalaga nnga aIzarayeli a tempu yenno. Aliwa kafuna tchenihiwa muwari molaleyiwa na Yesu Kiristu, mbwenye muwari mohorumela jolaleya jaye, kafuna kagomele kana makalelo abure kwaranya makalelo kanna atu Yesu ahanaalaleye. Tchoira kagomenle kana mulandu ompa.
Yesu ohowonga zela ibali yaye ya ibaribari
Markuji 3:31-35; Lukaji 8:19-21
46Mwa enne Yesu aawandelagave anamwindji ale, mmaye vamohi na abalaye kohozaga, aliwa kala unde, kafunaga ira kawonge na liye. 47Evale ohokalaga mutu azilege muwandela Yesu eraga: <<Mminyu vamohi na adibilinyu anafwanyeya unde wu, anafuna kawonge na nyo.>> 48Yesu mbwenye ohomuwakulaga wenne azilege muwandela, liye ira: <<Kodi mmaga bani? Nnga adibilaga bani?>> 49Noira enne, ohotapula mandaye, liye atonya anamamuharaye eraga: <<Kaing'anani! Mmaga na adibilaga banna kali evano na miyo. 50Tchoira mutu wenno unerana funa wa Baba uli zulu, mbalaga, murongolaga, na mmaga, gwenno.>>#12:50 wenno unerana funa wa Baba uli zulu: Unairana yofuna ya Baba Mulugu gwenno unamuroromela Yesu. Mutu akala ahanamuroromele Yesu kanairana funa wa Mulugu. (Roma 6:17, 14:23; Efezo 2:1-3) Kalaga nnga mazu Yesu awongile liye eraga: Mabasa anafuna Mulugu boira mmuroromelege wenno umurumile liye. (Juwawu 6:29) Hiyo nihiiziwa ira Yesu abalaye voroma vene tchamuroromenle. (Juwawu 7:5) Nona liye aalramwisaga. Mazu a Yesu oira: mbalaga, murongolaga, na mmaga, gwenno tapulela ira inafwanela mutu omuroromela Yesu awendaga abalre ira: <<Abalaga a ibaribari anna miyo banno anamuroromela Yesu.>> Eto akana makatamiho vande vaye, inafwanela aatamangele afwaye anairana jofuna ja Mulugu hiya abalaye obaliwana. Tchoira zelru diwa nnohiyana. Fwanyeya eto Yesu kamurihedile mmaye nnga mutu ohokala wa masika nnga vinaira atu amohiwa. Ku wonga Yesu karumenle zelru dakungile atu dolobela muwari monvepa Mariya. So Yesu aawandenle atu ira kalobele na nzina naye bahi. Nione Juwawu 14:13-14, 16:23-26.
ទើបបានជ្រើសរើសហើយ៖
Matewuji 12: iLolo
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral
Matewuji 12
12
Yesu gu mwinnya wa sabado
Markuji 2:23-28; Lukaji 6:1-5
1Mwa tempu yenne, siku nimohi na sabado, Yesu ohoviraga na anamamuharaye nimburo eni wafwanyeya munda wa tirigu. Evale anamamuharaye na mwasa wa ndala, kohoromaga kotola mangala a tirigu, aliwa takunaga.#12:1 kohoromaga kotola mangala a tirigu: Malambo a mundulrimu muwari mwa malamulo Mulugu awandenle liye aIzarayeli tempu ya Mozeji, nlamulo nimohi nawonga ira mutu awendaga mundila, unorumelihiwa ira aperuwe mmindani mwa mutwene, adje uva nari atakune jalo ja mmundani mule. Mbwenye akumaga mmindani mule, kavili rumelihiwa ira ahele vang'ono mbolrosani mwaye nari musakwini ira adje unaya liye. So mutu adjela mmundani emule bahi. (Detoronomiyo 23:24-25) 2Evale aFarizewu kagaonne enne, kohomuwandelaga Yesu keraga: <<Kaing'anani! Anamauharaninyu anairana yenno inakameliha malamulo irana siku na sabado.>>
3Mbwenye Yesu ohawakulaga, liye ira: <<Kodi nyo kamunaileri mMazuni jejo jairile mulombwana Davi tempu yanna liye ndala vamohi na afwaye annaga liye? 4Navenda mMazuni nnofwanyamo ira Davi aganna ndala, ohovolowa Nyumba ya Mulugu, liye dja pawu dotchenihiwa, pawu dedile datapulela ira Mulugu uli vamohi na atwaye.#12:4 pawu dedile datapulela ira Mulugu uli vamohi na atwaye: Malambo a mundulrimu Mulugu oharuma aIzarayeli ira kasakanye meza, kahele muwari mwa Musasa wa Yehova amala katukule pawu kumi na mbinli, kahiye vameza. Pawu kumi na mbinli datapulela malogo kumi na menli a aIzarayeli. Va kada sumana anamakuta kohokana mabasa otchindja pawu. Da wanle dile, aliwa dja. Mbwenye mutu wa vaheno vene nnga Davi kadja. Zela muselu wenno, nione eto Ezodu 25:30; Levitiku 24:5-9. Eto fwanyeya ira muwari mwa malamulo kavali jowandeya ira Davi atukule pawu dedo arome djaga nne afwaye. Mbwenye anarumelihiwa ira kadje ba anamakuta bahi! Mulugu mbwenye kamutakaleliwe mulombwana Davi. 5Vamohive vevo, kodi nyo kamunaileri mmalamuloni ira anamakuta kalabaga mabasiwa siku na sabado Nyumba ya Yehova, laba wewo anotakaliha siku na sabado mbwenye kinakana mulandu?#12:5 anamakuta kalabaga mabasiwa siku na sabado Nyumba ya Yehova, laba wewo anotakaliha siku na sabado: Fwanyeya ira anamakuta muwari mohinda mabasiwa siku na sabado, koirana jengo jaharumelihiwe ira jiireye siku na sabado. Kohinda mabasa opa anavinyama siku na sabado eto kotumbanya munlo ira katumeyegena mikuto dewa agali ejo kajarumelihiwa ira mutu wa vaheno vene airegena siku na sabado. (Numero 28:9-10; Ezodu 35:3) Nnga kohorumiwa na Mulugu, Yesu kwi kairagana ejo, aliwa mbwenye kinakana mulandu. 6Miyo mbwenye nnouwandelani ira ukala uzile uli mundimuwa kwaranya Nyumba ya Yehova.#12:6 ukala uzile uli mundimuwa kwaranya Nyumba ya Yehova: Va Yesu unaviwonga mwinnya. Tchoira Nyumba ya Yehova yali nimburo nadowa atu ira kavelele mikuto diwa. Mbwenye muwari mwa mabasa alabile Yesu, liye amalihile mabasa matene a Nyumba ya Yehova muwari mokala mukuto ogomiheda. Nione Eberewu 7:27, 9:24-28. 7Nyo ahakanlege muiziwa yotapulela ya mazu a Mulugu oira: <Miyo nnafuna tangaranga hiya mikuto.>,#Ozeya 6:6; Matewuji 9:13 kamwaatongege atu ohokana mulandu. 8Mwasiwa Mwana wa Mutu, unafwanyeya eto agali mwinnya wa sabado.>>#12:8 mwinnya wa sabado: Ku wonga liye okana utongi ira aawandele atu yengo tchivi inarumelihiwa labiwa siku na sabado.
Siku na sabado Yesu ohonvulumutcha mulombwana orangala ndanda
Markuji 3:1-6; Lukaji 6:6-11
9Noira enne, Yesu ohomaruwaga evale, liye dowa volowa munyumbani mwiwa mwemo mwafundja atu mazu. 10Emule mohokalaga mulombwana mmohi annaga ndanda norangala. Mwa enne aFarizewu muwari mofuna ira kawande onavo muselu omunukedana Yesu, kohonfukaga keraga: <<Kodi tchi yengo yorumelihiwa mMalamuloni nvulumutcha mutu siku na sabado?>>
11Yesu ohowakulaga eraga: <<Kodi muwari mwa nyo mulombwana guvi uni aganna nibila naye, nibila nne nimorela mmulihani siku na sabado ahadowa ahinda, akumihamo? 12Nnga ikalele mutu ompumbula? Tchoira mutu gofuneya kwaranya nibila. Mwa eno, miyo nnouwandelani ira tchi yengo yofwanela sakanya upama siku na sabado.>> 13Mwa enne Yesu ohowongaga na mutule eraga: <<Katapula ndanda nawo!>> Evale mutule ohotapulaga ndanda naye. Mwa enne agatapunle, ndanda nne nohowongowaga, aliwa kala pama nnga ndanda nimohi niwa nne.
14Noira enne, aFarizewu ale kagakumile evale, kohoromaga mpanganela Yesu ira kampe.
Yesu gu Namalaba osakulriwa wa Mulugu
15Yesu muwari moiziwa jejile, ohomaruwaga, ahiya evale, liye dowaga jaye. Evale liye adowaga, kohokalawo atu adjindji kamuhara. Mwa enne liye ohavulumutcha atu atene kali arenda. 16Eto oaruma ira: <<Mwadowa, kamuwongege na atu mudivweyihaga.>> 17Jatene ejo jalaba ira jiwande kwakwaneliheda mazu a Mulugu anno kawongiwe na namafiyiheda Izaiya ira:
18 <<Kaing'anani, ula gu namalabaga wenno dimusakunlre miyo, # 12:18 Ula gu namalabaga wenno dimusakunlre miyo : Namalaba unawongiwa va gu Yesu. Mulugu gwamusakunlre Yesu ira akale namalabaye. Ku wonga Yesu azile nnga mutu orumiwa na Mulugu Baba. wenno unadihagalaliha kalawo waga. Miyo nnonvaha Munemba waga eto unodowa aalaleyege atu ohokala aJudewu matongelo a ibaribari. 19Liye kanakana madugudugu, nne kaza akuwa movweya, nne nizu naye kaniza nivweya murampani. 20Liye kaza anyenya murere okotoliwa na wanle, nne kaza atimiha munlo uhanlena tuwelave bahi,#12:20 kaza anyenya murere okotoliwa na wanle, nne kaza atimiha munlo uhanlena tuwelave bahi: Ku wonga Yesu makalelo afuna liye za kana kaali makalelo oanonga atu ovuta mbwenye liye afuna aavenyihe. fiyeda azena matongelo a ibaribari mwatene mwene. 21Eto atu ohokala aJudewu anadedihege nzina naye.>>#Izaiya 42:1-4
Utongi wanna Yesu wotamangihana minemba dabure
Markuji 3:20-30; Lukaji 11:14-23
22Noira enne, kohomuzagana mulombwana mmohi ozuzumihiwa na munemba wabure. Muwari mokana munemba wabure mule, mutule kaona nne kawonga. Evale aliwa kagamuzilena wa Yesu, liye ohonvulumutchaga. Mwa enne aganvulumutchile, mutule ohoromaga wonga eto liye onaga. 23Atu atene kafwanyeya evale kohotikiniheyaga keraga: <<Kodi wenna kaza akala Mwana Davi?>>#12:23 Atwale kamukayikelaga Yesu ira: Kodi wenna kaza akala mwana Davi?, ku wonga aliwa kamukayikela Namatikeliwa amuwonga Mulugu. Mwasiwa wanle Mulugu ohowonga na Davi ira: <<Muwari mwa weyo munoza mubaliwe mutu wenno unafuna kala Nvulusi.>> Zela ibaribari ira Nvulusi afuna akumele muzizani mwa Davi, inafwanela nione eto 2 Samuweli 7:16; Jeremiya 23:5; Salmu 132:10-11; Joira ja Anamarumiwa 13:22-23; Juwawu 7:42.
24Mbwenye aFarizewu kagavwile ejile kohowongaga oka oka keraga: <<Wenna kahi mwana Davi. Liye unatamangiha minemba dabure na kopolo da Belizebu wenno uli mundimuwa wa minemba dabure.>> 25Yesu mbwenye muwari moiziwa jaumbuwela atu mmirimani mwiwa ohowongaga eraga: <<Umwene watene unavigawa uromaga wana oka oka, unagomela bwanyuliwa. Eto sidadi yatene inavigawa nari nivande nnavigawa, karomaga wana oka oka, magomelo wewa ku bwanyuliwa. 26Eto Satana akala unomutamangiha Satana, ku wonga Satana mmohive guvigawile, roma wanaga ekave. Nnga jaireya eno, umwene waye unawande limba avi? 27Eto akala miyo nnatamangiha minemba dabure na kopolo da mundimuwa Belizebu, nnga ahiminyu anatamangiha minemba dabure na kopolo da ani? Na mwasa wenno miyo nnouwandelani ira aliwene anoza kakale anamatonga anafuna utongani nyo!#12:27 nnga ahiminyu anatamangiha minemba dabure na kopolo da ani? Ira Yesu awonge mazu anno, fwanyeya aFarizewu kohokana asempuru ewa anno katamangihetcha minemba dabure muwari mwa kopolo da Mulugu. Kalaga nnga Yesu afuka ira: <<Akala nyo munodikayikela ira nnalaba na kopolo da Belizebu, mwasiwa gwa nni haakayikelaga afwinyu anatamangiha minemba dabure? Nona afwinyu banafuna za umangani mulandu mwasiwa aliwa kohokana ibaribari zela kopolo nnalabana miyo.>> 28Mbwenye akala miyo nnatamangiha minemba dabure muwari mwa Munemba wa Mulugu, ku wonga Umwene wa Mulugu uhufiya wa nyo.
29<<Nari kodi mutu unawanda avi dowa vande va mulombwana mmohi olimba adowa amuwaka jengo jaye jatene ahanababihe mmanga? Tchoira liye ahanarome tukula yengo, unaroma mmanga. Amala mmanga, aona ira: <Eniva dihimugondjiha>, unoroma tukula jatene.#12:29 Amala mmanga, aona ira: <Eniva dihimugondjiha>, unoroma tukula jatene. Muwari mwa mazwala, mutu olimba gu Satana. Yesu mbwenye unowanda mmanga, liye labaga mabasaye mofuna mwaye. Tchoira Satana ohakana atwaye. Yesu ohowanda mmanga Satana ira awande awombola atu anno kafwanyeya na Satana. Yesu unakala nnga mutu afunaga wombola fwaramento vamohi na atu anno katukuliwe na mutu olimba. Maliba wombola kanaroma tukula fwaramento na atwaye adowagana vande ahanamugondjihe mwidanaye ule. Unaroma mmanga mutu olimbole, amala liye sakanya jejo. Yesu eto muwari mommanga Satana, liye ohowanda tamangiha minemba dabure mofuna mwaye.
30<<Mutu wenne ahali na miyo, gwenno unadiida. Eto wenne ahanadikamiheda gumaniha, gwenno unamwada. 31Na mwasa wenno nnouwandelani ira yotega ili yatene na jomululuviha Mulugu jatene jinowanda kurumuweliwa. Mbwenye ule unamululuviha Munemba Otchena kaza akurumuweliwa! 32Mutu awonga ubure zela Mwana wa Mutu unowanda kurumuweliwa. Mbwenye mutu amululuviha Munemba Otchena kaza akurumuweliwa, nne tempu ili hiyo ila nne tempu inafuna za sogolro.>>#12:32 mutu amululuviha Munemba Otchena kaza akurumuweliwa: Munemba Otchena gunazana umboni ira mutu akayena ibaribari zela Yesu. Mbwenye aFarizewu kohotukula umboni wa Munemba Otchena, aliwa sandutcha roma wongaga ira Yesu ohoirana jionihedo na kopolo da Satana. Fwanyeya ira mutu akonda vwa umboni wa Munemba Otchena zela Yesu, liye kaza eto avulusiwa. Yesu eto ohowonga ira: Munemba Otchena aza… unoawandela atu makalelo a yotega yewa. Yotegiwa, tchoira kinadiroromela miyo. (Juwawu 16:8-9) Tapulela ira Munemba Otchena agaawandenle atu yotega yewa zela hafuna muroromela Yesu, atwale kapokiha umboni wa Munemba Otchena, kavali vulusiwa. Kalaga nnga anamafundjiha malamulo. Aliwa kagaonne jaira Yesu muwari mwa kopolo da Munemba Otchena, tcharumenle. Eto muwari mohovwa, aliwa kohompeta Yesu. Eto fwanyeya ira kavali vulusiwa para atu anapeta umboni wa Munemba Otchena zela Yesu.
Mutengo na jovaha jiwa
Lukaji 6:43-45
33<<Mwaona mutengo ovaha jovaha japama, muiziwe ira mutengole gwapama. Mwaona mutengo ovaha jovaha jabure, muiziwe ira mutengole gwabure. Mwasiwa kada mutengo unaiziweya mwa jovaha jaye.
34<<Nyo mulogo wa jivili nyo! Kodi nyo munawande avi wonga mazu apama agali nyo muli atu abure? Mwasiwa mulomo unawonga jengo jinafwanyeya mmirimani mwa mutu! 35Mutu wapama unakumiheda unde upama waye wenno unafwanyeya mmirimani mwaye mwapama. Eto mutu wabure unakumiha ubure wenno unafwanyeya mmirimani mwaye mwabure. 36Miyo mbwenye nnouwandelani ira siku notonga naza nifiya, kada mutu unoza amangiwe mulandu zela jowonga jatene johofwanela jinakumela vamulomoni vaye. 37Mwasiwa mutu unaza arumeliwe wapama mwa jowonga jaye eto unaza amangiwe mulandu mwa jowonga jaye.>>#12:37 mutu unaza arumeliwe wapama mwa jowonga jaye: Kalaga nnga mazu a Yesu oira: Na mwasa wenno, mutu wenne unadirumele vari va atu, na miyene nnoza dimurumele vamentoni va Baba wenno uli zulu. (Matewuji 10:32) Nione Roma 10:10. Eto unaza amangiwe mulandu mwa jowonga jaye: Kalaga nnga mazu a Yesu oira: Mbwenye wenne unadirune vari va atu, na miyene nnoza dimurune vamentoni va Baba uli zulu. (Matewuji 10:33)
Yesu ohowonga zela gwana mulandu wa ale kafuna ona ionihedo
Markuji 8:11-12; Lukaji 11:29-32
38Evale Yesu agawongile enne, anamafundjiha malamulo amohiwa na aFarizewu kohoromaga wonga keraga: <<Namafundjiha, hiyo nnafuna muirena ionihedo imohi ira nione!>> 39Yesu mbwenye ohowakulaga eraga: <<Atu a tempu ili hiyo ila ba atu abure, atu oraruwa.#12:39 atu oraruwa: Mazwala podi tapulela fendo mbinli. Voroma podi tapulela ira atu a tempu yenno kohokana imanya yorarutchana eto kohokana makalelo omwalana amala aliwa za telana akoka. (Matewuji 5:31-32, 19:9) Yowelela podi tapulela ira aliwa kawongetcha nzina na Mulugu, mbwenye kagali olapela wene na Mulugu muwari mwa joira jiwa. Tchoira raruwa ozela hiya muhara Mulugu ira kaahare amilugu amohiwa unowongiwa mMazuni. Nione Jeremiya 3:20; Ozeya 3:1. Anavepa ira kaone ionihedo. Mbwenye aliwa kinaireliwa ionihedo ili yatene yahali ionihedo ya namafiyiheda Jonasi. 40Tchoira sawasawa nnga mulombwana Jonasi ohomala malambo mararu ntana na mahiyu mbani mwa somba indimuwa, Mwana wa Mutu na liyene unomala malambo mararu ntana na mahiyu vati va teya. 41Siku notonga naza nifiya, atu a Ninive anoza kavenye kaumangeni mulandu nyo atu a tempu ila, mwasiwa aliwa kagavwile mazu a Jonasi, kohowanda twaruwa mwa jotega jewa. Kaing'anani eto wenno uli eva umukwaranya mulombwana Jonasi eto nyo mwagavuruwanile jinawonga liye, kamunafuna twaruwa. 42Siku notonga naza nifiya, mwana muhiyana atonga ilambo ya Suli, liye unoza avenye aumangeni mulandu nyo atu a tempu ila.#12:42 mwana muhiyana atonga ilambo ya suli unawongiwa kaali muIzarayeli. Muselu zela mwana muhiyana unawongiwa unafwanyeya 1 Amwene 10:1-13 nari 2 Koronika 9:1-12. Inaumangeleni liye mulandu tchoira liye ohovenya waniwa ilambo yolapa, liye dowa ira avuruwane zelru da Salomawu. Eto kaing'anani, peno ukalawo uzile omukwaranya Salomawu wenno.#12:42 peno ukalawo uzile omukwaranya Salomawu wenno: Va Yesu unaviwonga liye mwinnya. Mbwenye nyo mwagavuruwanile jinawonga liye, kamunafuna vwa.>>
Makalelo a munemba wabure amuwelela mutu
Lukaji 11:24-26
43Yesu ohowongaga eraga: <<Munemba mmohi otakala akuma mmaningoni mwa mutu unawenda mwemo mwahanafwanyeya mahindje, sakaga nimburo napama ira awande vuma. 44Mbwenye liye asaka, ahafwanye vovuma, unowonga ira: <Nnafuna diwelele vande vevo vikumile miyo.>#12:44 Nnafuna diwelele vande vevo vikumile miyo: Ku wonga munemba wabure ule unafuna awelele mmaningoni mwa mutu mwemo mukumile liye. Era enne unowela, liye dowa vande vale. Afiya vande vale unafwanya kavali mutu eto vihimala jeliwa, vili vapama vene. 45Era eno unodowa tukula minemba dabure dimohi diwa mitanu na minli dokana makalelo abure omukwaranya liye, aliwa za kalaga mmaningoni mwa mutule. Era enne makalelo ogomiheda a mutule anakala otakala kwaranya makalelo oroma anna liye. Makalelo anna banafuna aireyela atu abure a tempu ili hiyo ila.>>#12:45 makalelo ogomiheda a mutule anakala otakala kwaranya makalelo oroma anna liye: Munemba wabure atamangihiwa, amala awela, afwanya ira Munemba Otchena ulive evale, unokwaranyavo. Mbwenye aona ira: <<Mutula agavulumuwile na nzina na Kiristu, kafunne muitana Yesu ira akale na liye>>, unaadowela afwaye anno anafuna muzuzumiha mutule na makalelo abure kwaranya makalelo anna liye wanle. Kalaga nnga aIzarayeli a tempu yenno. Aliwa kafuna tchenihiwa muwari molaleyiwa na Yesu Kiristu, mbwenye muwari mohorumela jolaleya jaye, kafuna kagomele kana makalelo abure kwaranya makalelo kanna atu Yesu ahanaalaleye. Tchoira kagomenle kana mulandu ompa.
Yesu ohowonga zela ibali yaye ya ibaribari
Markuji 3:31-35; Lukaji 8:19-21
46Mwa enne Yesu aawandelagave anamwindji ale, mmaye vamohi na abalaye kohozaga, aliwa kala unde, kafunaga ira kawonge na liye. 47Evale ohokalaga mutu azilege muwandela Yesu eraga: <<Mminyu vamohi na adibilinyu anafwanyeya unde wu, anafuna kawonge na nyo.>> 48Yesu mbwenye ohomuwakulaga wenne azilege muwandela, liye ira: <<Kodi mmaga bani? Nnga adibilaga bani?>> 49Noira enne, ohotapula mandaye, liye atonya anamamuharaye eraga: <<Kaing'anani! Mmaga na adibilaga banna kali evano na miyo. 50Tchoira mutu wenno unerana funa wa Baba uli zulu, mbalaga, murongolaga, na mmaga, gwenno.>>#12:50 wenno unerana funa wa Baba uli zulu: Unairana yofuna ya Baba Mulugu gwenno unamuroromela Yesu. Mutu akala ahanamuroromele Yesu kanairana funa wa Mulugu. (Roma 6:17, 14:23; Efezo 2:1-3) Kalaga nnga mazu Yesu awongile liye eraga: Mabasa anafuna Mulugu boira mmuroromelege wenno umurumile liye. (Juwawu 6:29) Hiyo nihiiziwa ira Yesu abalaye voroma vene tchamuroromenle. (Juwawu 7:5) Nona liye aalramwisaga. Mazu a Yesu oira: mbalaga, murongolaga, na mmaga, gwenno tapulela ira inafwanela mutu omuroromela Yesu awendaga abalre ira: <<Abalaga a ibaribari anna miyo banno anamuroromela Yesu.>> Eto akana makatamiho vande vaye, inafwanela aatamangele afwaye anairana jofuna ja Mulugu hiya abalaye obaliwana. Tchoira zelru diwa nnohiyana. Fwanyeya eto Yesu kamurihedile mmaye nnga mutu ohokala wa masika nnga vinaira atu amohiwa. Ku wonga Yesu karumenle zelru dakungile atu dolobela muwari monvepa Mariya. So Yesu aawandenle atu ira kalobele na nzina naye bahi. Nione Juwawu 14:13-14, 16:23-26.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral