Fuɗɗoode 50
50
No Yaakuubu uwiraa
1Yusufu yani dow yeeso baaba mum, wuunii mo, yanti e wulla. 2Ɓaawo mum Yusufu wi'i lokotorooɓe mum mooma ɓannu baaba mum lekki gam to ŋol nyolu. Ɗon nun lokotorooɓe ɓen moomi ɓannu Isira'iila lekki. 3Ɓannu ŋol moomiraa lekki faa balɗe lasoy ɗiɗi (40). Misirankeeɓe bo jooɗii faa balɗe lasoy tati e sappo (70), e wulla maayde Yaakuubu.
4No ɓe bullidi maayde Yaakuubu, Yusufu wi'i himɓe wuro Firawna: Mi eelan on nun gaɗanon am moƴƴere, batanon am Firawna bi'on: 5No baaba am ɓattii maayugo, o wi'ii mi hunanoo mo, mi hooran mo faa leydi Kanaana, mi uwa mo der yanaane ne o wasunoo. Gam mum, mi eelete nun, accu mi yaha, mi uwaa baaba am, ɓaawo mum, mi wittaan. 6Firawna toontii wi'i: Yahu, uwaa baaba maa hande no kunaninoɗaa mo.
7Yusufu yahi uwoygo baaba mum. Maccuɓe Firawna, e mawɓe wuro mum, e mawɓe leydi Misira fu yaadii e makko. 8Non bo himɓe wuro Yusufu, e mawniraaɓe mum, e miiraaɓe mum, e himɓe wuro baaba mum fu yaadii e maɓɓe. Sukaaɓe maɓɓe, e baali maɓɓe, e na'i maɓɓe tan nun ɓe acci der ladde Gosan. 9Laanaaji pucci, e waɗɗiiɓe pucci, e himɓe ɗuuɓɓe yaadii e Yusufu faa leydi Kanaana. 10No ɓe jottii fiyirde alkamaari Atadi wonune fonŋo Urudun, ɓe cimii e semme. Yusufu jooɗii ton wulli maayde baaba mum faa balɗe jeeɗiɗi. 11No Kanaaninkeeɓe jooɗiiɓe leydi nin yi'i no ɓe jooɗorii der fiyirde alkamaari Atadi, gam wullugo maayde Yaakuubu, ɓe bi'i: Maayde neɗɗo Misira mawɗo gom nun ɓe jooɗii ɗon. Go ɓe noddi nokkuure nen Abeeli Misirayimu, ka filliti nun, bojji Misira. Nokkuure nen tawa nun fonŋo Urudun. 12Ɓiɓɓe Yaakubu waɗi ka baaba maɓɓe batunoo ɓe. 13Ɓe etti ɓannu baaba maɓɓe ɓe koori faa leydi Kanaana. Ɓe uwi mo der lowol gonuŋol der gesa Mapela, gesa ŋa Iburaahiima soodunoo to Eforoni Hittiyankeejo, takkol Mamure, gam uwugo maayɓe mum. 14No Yusufu uwidi baaba mum, o witti leydi Misira, kanko e mawniraaɓe makko, e miiraaɓe makko, e yaadunooɓe e makko fu gam uwugo baaba makko.
Ko Yusufu waɗani mawniraaɓe mum
15No mawniraaɓe Yusufu yi'i baaba maɓɓe maayii, ɓe bi'i: Too, jooni to Yusufu wanyii en, go yoɓi en kalluɗum ɗum gaɗannoɗen mo bo naa! 16Ɗon nun ɓe gaɗi lilaaɗo o wi'a Yusufu: Go baaba maa maaya, o batii men kaa ɗo, o wi'i: 17Baton Yusufu bi'on: Yaafana mawniraaɓe maa hakkeeji mum, gam ɓe gaɗanii maa ko halli. Mi eelete nun, yaafana tokkuɓe Alla baaba maa hakke mum. No Yusufu nani ka, o wulli: 18Mawniraaɓe makko e ko'e mum wari jiccii e koyɗe makko wi'i: Men laatake maccuɓe maa. 19Yusufu wi'i: To on kulee, min bane woni Alla kiitotooɗo. 20On miiliino waɗango am ko halli, amma Alla waylitii ɗum ko wooɗi, gam o faaboo yonkiiji himɓe ɗuuɓɓe. 21To non nun, to on kulee, mi hokkan on ko nyaamoton onon e himɓe wuro mon fu. O deƴƴitiniri ɓerɗe maɓɓe e haala belka.
22Yusufu jooɗii der leydi Misira, kanko e himɓe wuro baaba makko fu. O waɗi duuɓi hewre e sappo (110) der duuniyaaru ɗoo. 23Yusufu yi'ii sukaaɓe Efurayimu e taanirakon mum. Non bo sukaaɓe Makiri ɓii Manase jooɗake e koyɗe makko. 24Ɓaawo mum Yusufu wi'i mawniraaɓe mum: Min mi maayan. Amma Alla waran wurtina on diga leydi nii ɗoo, o yaara on faa leydi ni o wi'i o hokkan Iburaahiima, e Isiyaaku, e Yaakuubu. 25Yusufu wi'i ɓiɓɓe Isira'iila hunanoo mo wi'a, to Alla warii wurtingo ɓe diga leydi nii ɗoo, ɓe koora ƴi'e mum faa leydi Kanaana.
26No Yusufu waɗi duuɓi hewre e sappo (110), o maayi. Ɓannu makko moomaa lekki gam to ŋol nyolu. Ŋol wattaa der Pakoroowal maayɓe der leydi Misira.
ទើបបានជ្រើសរើសហើយ៖
Fuɗɗoode 50: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.