Fuɗɗoode 48
48
Yaakuubu barkiɗinii Manase e Efurayimu ɓiɓɓe Yusufu
1Ɓaawo mum Yusufu bataa no baaba mum yanɗaa. O etti Manase e Efurayimu ɓiɓɓe makko, ɓe jahi to makko. 2Yaakuubu bataa wi'aa: Suka maa Yusufu warii daarugo maa. Ɗon nun Isira'iila haɓitii ummii, jooɗii dow banni mum. 3Yaakuubu wi'i Yusufu: Alla mo baawɗe fu suppitanake am faa Lusi, der leydi Kanaana, go o barkiɗinimmi. 4O wi'immi: Mi hokkete ɓeyŋu, mi ɗuuɗinan lenyol maa, lenyi ɗuuɗɗi ƴiwan e maa. Mi hokkan lenyol ɓiɓɓe maa leydi nii ɗoo, gam ɓe jeyta ni faa e baadey. 5Jooni, ɓiɓɓe maa ɗiɗo, Efurayimu e Manase, ɓe ɗum rimani maa der leydi Misira, go mi wara to maa, laatoto hande Rubeni e Simeyon, ɓiɓɓe am. 6Amma sukaaɓe ɓe dimuɗaa ɓaawo Manase e Efurayimu laatoto ɓe maa. E inɗe mawniraaɓe maɓɓe nun ɓe donirta donŋu maɓɓe. 7Gam no gartanmi diga Paddan Aramu, Rahiilu maayii takkol am der leydi Kanaana. Uwu moo mi e laawol, takkol Efurata. Efurata nin nun noddetee Baytilaama.
8Ɗon nun Isira'iila daari ɓiɓɓe Yusufu, go wi'i: Ɓee nun ɗoo? 9Yusufu toontii baaba mum wi'i: Sukaaɓe ɓe Alla hokkimmi der leydi nii ɗoo non ɗon. Isira'iila wi'i: Ɓattin ɓe takkol am mi barkiɗina ɓe. 10Tawi gite Isira'iila tampii gam sabbu nayeraaku, o waawataa kade yi'ugo deydey, kan acci Yusufu ɓattini ɓe, go o wuunii ɓe. 11Isira'iila wi'i Yusufu: Mi miilayno kade yi'ugo maa, amma Alla hollii am sukaaɓe maa. 12Yusufu etti ɓe diga e koyɗe baaba mum, go kanko e hoore makko o jiccii yeeso baaba makko, o tuggi tiine makko e leydi. 13Ɓaawo mum Yusufu etti ɓe ɓe fu ɗiɗo, ɓattini takkol baaba mum. O darni Efurayimu e juunŋo Yaakuubu nano, o darni Manase bo e juunŋo Yaakuubu nyaamo. 14Amma Isira'iila waafontiri juuɗe mum, o forti juunŋo makko nyaamo, o yowi ŋo e hoore Efurayimu laatiiɗo miiraawo, juunŋo makko nano bo, o yowi ŋo dow hoore Manase laatiiɗo mawniraawo. Nani bo Isira'iila e anni ko waɗata, gam oo anni no Manase nun laatii mawniraawo. 15O barkiɗini Yusufu o wi'i:
Alla mo yeeso mum kookiraaɓe am Iburaahiima e Isiyaaku nyaami goonki mum,
duruɗo am diga nyanne dimaami faa yottii hanne,
16Alla mo lilaaɗo mum daɗinimmi diga ko halli fu, barkiɗina sukaaɓe ɓee ɗo.
Ɓe noddiree e inne am,
e inɗe kookiraaɓe am, Iburaahiima e Isiyaaku.
Ɓe dima, ɓe ɗuuɗa der leydi.
17No Yusufu yi'i baaba mum yowi juunŋo mum nyaamo dow hoore Efurayimu, ɗum welay mo. O yowti juunŋo baabiiko diga dow hoore Efurayimu, o yowi ŋo dow hoore Manase, mawniraawo. 18Ɗon nun Yusufu wi'i baaba mum: Baaba am, non non bane, gam oo ɗoo nun woni mawniraawo, yowu juunŋo maa nyaamo dow hoore makko. 19Amma baabiiko salii, wi'i mo: Suka am, mii anni. Mii anni no kanko bo, o laatoto baaba lenyol manŋol, amma minnyiiko ɓuran mo manŋu, gam kanko o laatoto baaba lenyi ɗuuɗɗi. 20O barkiɗini ɓe nyanne mum o wi'i:
Maa goɗɗo e barkiɗina der Isira'iilaaɓe, e inne mon nun o barkiɗinirta o wi'a:
Alla barkiɗine hande Efurayimu e Manase. Non non o ɓuriniri Efurayimu dow Manase.
21Ɗon nun Isira'iila wi'i Yusufu: Jooni mi maayan, amma Alla wondan e mon, o hoora on leydi kookiraaɓe mon. 22Mi hokkete leydi ɓuruni ni mawniraaɓe maa e miiraawo maa. Mi hokkii maa leydi Sikemu ni jeytirmi e kaafahi am e biroogal am to Amorinkeeɓe.
ទើបបានជ្រើសរើសហើយ៖
Fuɗɗoode 48: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.