Fuɗɗoode 39
39
Goonki Yusufu der wuro Potifaa
1Isuma'iilankeeɓe soodunooɓe Yusufu ɓen yaari mo faa Misira. Ɗon nun gorko gom Misirankeejo noddeteeɗo Potifaa soodi mo e juuɗe maɓɓe. Potifaa on laati nun mawɗo reenooɓe laamorde laamiiɗo leydi Misira. 2Alla e wondi e Yusufu, e barkiɗina ko o waɗata der wuro joomiraawo makko Misirankeejo on fu. 3Joomiiko yi'i no Joomiraawo e wondi e makko, e barkiɗina ko o waɗata fu. 4Kan acci joomiiko yiɗi mo sanne, laatini mo mawɗo gollooɓe der wuro mum fu, halfini mo ko woodi fu. 5Diga Potifaa Misirankeejo on halfini mo wuro mum e ko woodi fu, Alla barkiɗini wuro ŋon gam sabbu makko. Alla barkiɗini ko Potifaa woodi e wuro, e ko woodi e deme fu. 6Potifaa halfini Yusufu ko woodi fu. Walaa kade ko o hakkilani, sey nafa makko tan.
Yusufu e debbo joomiiko
Yusufu e wooɗi yeeso, e woodi bo darande wooɗune.
7Ɗon nun nyalaane gom, debbo joomiiko daari mo, suunii mo wi'i: Accu pukkodoɗaa e am. 8Amma Yusufu salii, wi'i debbo joomiraawo mum on: Min nun joomiraawo am halfini ko woni e wuro mum fu, walaa kade ko o hakkilanta. 9Min nun o hokki manŋaaku wuro ŋon fu. Walaa fu ko o haɗimmi e wuro ŋon, sey an tan, gam a laati nun deekiiko. Noy baawiranmi waɗugo kalluɗum iri ɗum ɗon, den mi waɗa hakke yeeso Alla? 10Weetune fu, debbo on eytan nun Yusufu. Amma Yusufu salii nanango mo, salii fukkodaago e makko, salii du jooɗaago baa takkol makko. 11Nyalaane gom, Yusufu naati der suudu gam waɗugo golle mum. Foti bo, himɓe wuro ŋon, goɗɗo mum walaa ɗon. 12Ɗon nun debbo on happi toggoore Yusufu, wi'i mo: Fukkoda e am! Yusufu yoofani mo toggoore mum doggi wurtii yaasi. 13No o yi'i Yusufu yoofanii mo toggoore mum doggi wurtii yaasi, 14o noddi himɓe wuro makko, o wi'i ɓe: Garee ji'ee, gorko am waddanii en Iburaninkeyel gam ŋel fijira en. Ŋel warii gam ŋel fukkodoo e am, go kalɓumi e semme. 15No ŋel nani kalɓumi e semme, ŋel doggi ŋel wurtii yaasi, ŋel accanimmi toggoore maggel. 16Debbo on yesi toggoore nen faa to joomiraawo Yusufu wartii. 17No o warti, debbo on wi'i mo: Maccuɗo Iburaninkeejo mo gaddanɗaa en on warii gam sentingo am. 18Go kalɓumi, Go o doggi, o accanimmi toggoore makko o wurtii yaasi. 19No Potifaa nani ka debbo mum bati mo, mone waɗi mo sanne. 20Joomiraawo Yusufu nanŋi mo, watti mo e kasu. Yusufu maɓɓaa e nokkuure to nanŋaaɓe laamiiɗo maɓɓetee. Ɗon nun o jogaa.
Yusufu maɓɓaama der kasu
21Amma enon fu, Joomiraawo e wondi e Yusufu, waɗani mo moƴƴere. Mawɗo kakkilanoowo maɓɓaaɓe yiɗi Yusufu sanne. 22Mawɗo on halfini mo maɓɓaaɓe kasu ɓen fu. Ko waɗetee der kasu ɗon fu, kanko nun waɗata ɗum. 23Mawɗo kasu on kade meeɗay daarugo ko Yusufu waɗata, gam Joomiraawo e wondi e mum. Joomiraawo e acca ko o waɗata fu e yaha yeeso.
ទើបបានជ្រើសរើសហើយ៖
Fuɗɗoode 39: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.