Wurtaago 1
1
ALLA WURTINII HIMƁE ISIRA'IILA DIGA MACCUŊAAKU LEYDI MISIRA
(1:1–15:21)
Maccuŋaaku himɓe Isira'iila der leydi Misira
1-4Nani ɗo inɗe ɓiɓɓe Yaakuubu, noddeteeɗo kade Isira'iila ɓe o waddi der leydi Misira. Moy fu e maɓɓe warii e debbo mum e sukaaɓe mum. Kamɓe woni: Rubeni, e Simeyon, e Leewi, e Yahuuda, e Isakaa, e Jabulon, e Benyamin, e Dan, e Nefutali, e Gada, e Asee. 5Ɓiɓɓe Yaakuubu e taaniraaɓe mum ɓe o waddi der leydi Misira, ɓe fu ɓe laati nun himɓe lasoy tato e sappo. Foti den mum, Yusufu kan na'onno der leydi Misira. 6Waala fina, Yusufu maayi, mawniraaɓe mum e miiraawo mum, e himɓe wonuɓe e wakkati mum maayi. 7Amma himɓe Isira'iila rimii ɗuuɗi sanne, hebbini leydi Misira fu. Ɓee jaha ɓee cemmiɗa.
8Ɗon nun laamiiɗo keso mo annaano Yusufu wari laamii der leydi Misira. 9Go o bati himɓe makko o wi'i: On ji'ii hinaa, himɓe Isira'iila ɓurii en ɗuuɗugo, ɓurii en semme bo. 10To non nun, e haani ƴoƴanen ɓe, kaɗen ɓe ɗuuɗugo gam to konu yottake, to ɓe kawtu e wayɓe men ɓe kaɓida en. To ɓe jaalake en, ɓe burtoo leydi men ɓe dilla.
11Himɓe Misira suɓani ɓe ardiiɓe gollinooɓe ɓe golle caɗuɗe. Non non ɓe mahiniraa wanŋarɗe ɗiɗi noddeteeɗe Pitomu e Ramusesi, ɗe laati cuuɗirɗe jawdi Firawna. 12Amma no ɓe gollinirtee golle cattuɗe, non non ɓe ɓeydortoo ɗuuɗugo. Go himɓe Misira huli ɓe sanne. 13Go Misirankeeɓe macciɗini ɓe e semme. 14Ɓee taƴinee birikiiji e leydi sonnuuri. Ɓee gaɗinee golle deme feere feere, go goonki maɓɓe laatii caɗuki, gam e bongol reedu nun ɓe gollinirtee.
Firawna e toora himɓe Isira'iila
15Ɗon nun laamiiɗo Misira bati rewɓe riminooɓe rewɓe Iburaninkeeɓe, noddeteeɓe Sifira e Pu'a wi'i ɓe: 16To oon dimina rewɓe Iburaninkeeɓe, to on tawii suka gorko nun ɓe dimi, baree mo. To suka debbo nun bo, accon mo e yonki. 17Amma rewɓe riminooɓe ɓen e huli Alla. Ɓe gaɗay ka laamiiɗo batunoo ɓe. Ɓe acci sukaaɓe ɓen fu e yonki. 18Ɗon nun laamiiɗo Misira on noddi rewɓe riminooɓe ɓen, ƴami ɓe wi'i: Gam ume nun go gaɗuɗon ɗum ɗon, accuɗon sukaaɓe ɓen fu e yonki? 19Ɓe toontii Firawna ɓe bi'i: Rewɓe Iburaninkeeɓe nandaa e rewɓe Misirankeeɓe. Ɓe goodu nun semme, go diminoowo yottoo fu, tawan nun ɓe dimii.
20Alla waɗani rewɓe riminooɓe ɓen moƴƴere. Lenyol Isira'iila ɓeydii ɗuuɗugo, waɗi semme bo. 21Gam sabbu rewɓe riminooɓe ɓen e hula Alla, o hokki ɓe sukaaɓe. 22Ɗon nun Firawna hokki himɓe mum sariya wi'i: To Iburaninkeejo rimii suka gorko fu, paɗɗee mo der maayo Nili. Amma to debbo nun, accee mo e yonki.
ទើបបានជ្រើសរើសហើយ៖
Wurtaago 1: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.