Daniɛl 4
4
1«M bɔbɔ min famiɛn Nɛbikadnɛzar, n wo min famiɛn awlo'n nun, mín wla ti ase guawa. 2Kɔnguɛ kun n lali, kpɛkuun n cɛnnin laliɛ kun b'ɔ kunnin min srɛ kpa, afin like nga bɔ n wunnin i'n ɔ yo sro. 3N seli kɛ be `yia Babilɔni sa sifuɛ'm be kwlaa kɛ be `wa tu min laliɛ'n i bo. 4Kɛ wunnzue yifuɛ fanunfanun'm be bali'n, n kannin min laliɛ'n n kleli be, sanngɛ be nun kun sa ɔ'a kwla tu-mɛn i bo ɔ'a kle-man min. 5Kɛ ɔ cɛli kan'n, Daniɛl wa toli min. Daniɛl sɔ'n be flɛ i kɛ Bɛltsazar, be fali min amuɛn'n i dunman yɛ be tɔnnin i-ɔ. Nyanmiɛn Kpli'n i wawɛ'n wo i nun. N kannin min laliɛ'n n kleli i. 6N seli i kɛ: ‹Bɛltsazar, a ti sa sifuɛ'm bé su kpɛn, n si kɛ Nyanmiɛn Kpli'n i wawɛ'n wo ɔ nun. I sɔ'n ti, nvialiɛ nun sa'm be wunlɛ ti-man kekle ɔ́ sa nun. Tutu laliɛ nga n cɛnnin'n i bo kle min. 7Kɛ n lali kɔnguɛ'n, like nga n wunnin i'n yɛ.
N wunnin waka kun
b'ɔ jin asiɛ'n i afiɛn sa kpandangblauun.
8Waka sɔ'n yoli fleiin kpa, yɛ ɔ trɛli kpa.
I sama'm be ti tɛnndɛn kpa,
be to nyanmiɛn b'ɔ la nglo lɔ plaii'n lɔ.
Asiɛ'n i lika kwlaa nga be jran lɛ'n,
bé nyin ta waka sɔ'n.
9I nnya'm be ti klanman,
yɛ i mma'm be sɔnnin kpa.
I mma sɔ mun yɛ like kwlaa di-ɔ.
Blo nnɛn'm be wa fiɛ i fɔnvɔ'n bo.
Anunman'm be yo bé sua i sama'm be nun.
I yɛ ɔ ta ninnge nga be de wunmiɛn
bɔ Nyanmiɛn yili be'n be kwlaa-a.
10N tɛ la min bɛ'n su lɛ,
kpɛkuun n ´wun i-ɔ,
anz kun fin Nyanmiɛn su lɔ su jra.
11Ɔ kpannin kekle kpa kɛ:
Amun `bu waka nga bo,
amun `kpɛkpɛ i sama mun,
amun `kpɛkpɛ i nnya mun,
yɛ amun `sanndi i su mma be nun!
Man nnɛn'm be wanndi i bo be wɔ mmua,
man anunman'm be jaso i sama'm be nun!
12Sanngɛ amun `yaci i bo olui'n i su lɛ,
man ɔ ka fie'n su lɔ ijre'm be afiɛn.
Amun `fa blalɛ jrɔkɔ nin aaba jrɔkɔ be ci i.
Man nyansue'n ɔ bo sran nga i nzɔliɛ yɛlɛ waka sɔ'n,
yɛ man ɔ di ijre kɛ nnɛn'm be sa.
13I sran ngwlɛlɛ'n wa kaci,
ɔ wa yo kɛ nnɛn'm be liɛ'n sa.
Ɔ ´kɛ i sɔ'n nun lele afuɛ'n nso.
14Anz mun yɛ be kan ndɛ nga-a, kɛ ɔ ´yo nan be kwlaa nga be nyin o su'n b'a si kɛ Nyanmiɛn b'ɔ o nglo-nglo lɔ'n yɛ ɔ sie sran'm be famiɛn diwlɛ mun'n ti. Sran kwlaa nga i klun klo kɛ ɔ ´fa famiɛn bia'n ´fa mɛn i'n, yɛ ɔ fa mɛn i-ɔ. Ɔ kwla man sran'm be nun aunnvuɛfuɛ kpa'n i su bɔbɔ.
15Laliɛ nga m bɔbɔ min Nɛbikadnɛzar n cɛnnin'n yɛ ɔ o lɛ-ɔ. I sɔ'n ti, wɔ, Bɛltsazar, tutu i bo kle min, afin min famiɛn diwlɛ'n nun sa sifuɛ'm be nun ba kun sa ɔ'a kwla tu-mɛn i bo, sanngɛ ɔ liɛ'n, a kwla tu i bo yɛlɛ kɛ Nyanmiɛn i wawɛ'n wo ɔ nun.› »
Daniɛl tutuli famiɛn'n i laliɛ'n i bo
16Srɛ kunnin Daniɛl bɔ be flɛ i kɛ Bɛltsazar'n, yɛ i wla boli i wun bɔ lɔun kan. Famiɛn'n seli i kɛ: «Bɛltsazar, nán man laliɛ'n nin i bo tulɛ'n yo wɔ sro.» Daniɛl tɛli i su kɛ: «Nannan, man laliɛ'n nin i bo'n be yo ɔ kpɔfuɛ'm be liɛ. 17A wunnin waka dan kun. I ti'n to nyanmiɛn b'ɔ la nglo lɔ plaii'n. Asiɛ'n i lika kwlaa nga be wo lɛ'n, bé nyin tɛ i. 18Waka sɔ'n i nnya'm be ti klanman, yɛ i su mma'm be sɔnnin. I yɛ ɔ ta ninnge nga be de wunmiɛn'n be kwlaa-a. I bo yɛ blo nnɛn'm be fia-a. I sama'm be nun yɛ anunman'm be la-a. 19Nannan, wɔ yɛ a ti waka sɔ nin-ɔn. W'a yo dan, yɛ w'a nyan wunmiɛn. Ɔ dan'n, sɛ e ´kwla se'n, ɔ'a nyin lele i ti'n ɔ'a to nyanmiɛn b'ɔ la nglo lɔ plaii'n, yɛ ɔ sielɛ'n kusu kɔ lele ju asiɛ'n i awieliɛ. 20I sin, a wunnin anz kun b'ɔ fin nyanmiɛn su lɔ su jra, ɔ seli kɛ: ‹Amun `bu waka'n i bo nan amun `saci i, sanngɛ amun `yaci i afiɛn flolo'n lɛ, yɛ amun `yaci i olui'n asiɛ'n nun, man ɔ ka fie su ijre'm be afiɛn, man be fa blalɛ jrɔkɔ nin aaba jrɔkɔ be ci i. Man nyansue'n ɔ bo i, man ɔ nin blo nnɛn'm be di ijre lele afuɛ nso.› 21Nannan, laliɛ'n i bo'n yɛ ɔ o yɛ, like nga Nyanmiɛn bɔ like fi nun-mɛn i sin'n ɔ ´wa yo wɔ'n, yɛ. 22Be wa kan ɔ bo sran'm be nun. A nin blo nnɛn mun yɛ amun wa tran-an. A wa di ijre kɛ nannin'm be sa. Nyansue'n ɔ wa bo wɔ. A ´ka sɔ lele afuɛ nso. Kɛ blɛ sɔ'n ko sin'n, blɛli yɛ a wa si kɛ kannzu Nyanmiɛn bɔ like fi nun-mɛn i sin'n yɛ ɔ sie sran'm be famiɛn diwlɛ mun-ɔn, nan ɔ fa famiɛn bia'n man sran nga i klun klo kɛ ɔ ´fa mɛn i'n. 23Waka'n i afiɛn flolo nga be waan be `yaci i i olui'n su lɛ'n, i bo yɛlɛ kɛ a wa kaci famiɛn ekun blɛ bɔ a ko si kɛ Nyanmiɛn bɔ like fi nun-mɛn i sin'n yɛ ɔ ti siefuɛ'n. 24I sɔ'n ti, Nannan, nán man n lo wɔ ngasi, fa min afɔtuɛ nga n fa man wɔ'n su. Kaci ɔ́ sin si sa tɛ'n nin ɔ fɔnlɛ mun, yɛ yo sa i nuan su nan si yalɛfuɛ'm be aunnvuɛ, i liɛ'n wienun-ɔn a ´nyan ye ekun.»
Laliɛ'n kpɛnnin su
25Sa nga be boli be su kleli Nɛbikadnɛzar, be kwlaa bé nuan yiali kpan. 26Afin, kɛ ɔ dili afuɛ kun'n, famiɛn'n wo Babilɔni lɔ i awlo lɔ ɔ su wlan-wlan i sua'n i ti su gbagblagba'n su. 27Kpɛkuun ɔ kpan seli kɛ: «?Nán Babilɔni klɔ dan bɔ m bɔbɔ n fali min wunmiɛn dan'n n kplɛnnin i kɛ n ´fa yo min famiɛn klɔ'n yɛ ɔ o yɛ? ?M'an kplɛn-mɛn i kɛ n ´fa yi min fanngan nin min anyrunnyan'n i nglo?»
28I nuan'n tɛ o ndɛ'n su kpɛkuun be osu kunngba'n nun lɛ be tili sran kun nnɛn nyanmiɛn su lɔ, ɔ seli i kɛ: «Famiɛn Nɛbikadnɛzar, sie ɔ́ su. Ɔ famiɛn diwlɛ'n ɔ'a fi ɔ́ sa. 29Be wa kan ɔ bo sran'm be nun. A nin blo nnɛn mun yɛ amun wa tran-an. A wa di ijre kɛ nannin'm be sa. A ´ka sɔ lele afuɛ nso. Kɛ blɛ sɔ'n ko sin'n, blɛli yɛ a wa si kɛ kannzu Nyanmiɛn bɔ like fi nun-mɛn i sin'n yɛ ɔ sie sran'm be famiɛn diwlɛ mun nan ɔ fa famiɛn bia'n man sran nga i klun klo kɛ ɔ ´fa mɛn i nin-ɔn.»
30Bé ja kunngba'n nun lɛ ndɛ sɔ'n i su sa'n juli. Be fuannin Nɛbikadnɛzar sran'm be nun. Ɔ tɔli ijre dilɛ'n su kɛ nannin sa. Nyansue'n yɛ ɔ bo i siɛn nin-ɔn. I timuɛn'n yoli tɛnndɛn kɛ anunman nyin i ndrɛ'n sa. I sa bui'm be yoli glaunglaun kɛ anunman'm bé ja bui'n sa.
Nɛbikadnɛzar i kpa yolɛ
31Nɛbikadnɛzar waan: «Kɛ afuɛ nso nga be kleli'n juli'n, m mannin mín nyin'n su n niannin nyanmiɛn su lɔ, kpɛkuun min klɔ sran ngwlɛlɛ'n ɔ sɛli i sin i osu'n nun kɛ laa'n sa. N yoli Nyanmiɛn bɔ like fi nun-mɛn i sin'n b'ɔ o lɛ tititi'n i kwla, m mɛnmɛnnin i, yɛ n kannin i anyrunnyan'n i wun ndɛ kpa. I kwlalɛ'n lɛ-man awieliɛ, i sielɛ'n wo lɛ tititi. 32Mɛn'n nun sran'm be kwlaa be ti-man like fi i nyrun. Like ng'ɔ klo kɛ ɔ ´fa yo asiɛ'n su wa sran mun nin nglo lɔ anz mun'n yɛ ɔ fa yo be-ɔ. Sran fi nun-man lɛ b'ɔ kwla jrɛn i annzɛ ɔ usɛ i kosan kɛ: ‹?Nzu ti yɛ a yo sɔ-ɔ?›
33Blɛ sɔ'n nun yɛ min klɔ sran ngwlɛlɛ'n ɔ sɛli sin i osu'n nun-ɔn. Be fali min sieli famiɛn bia'n su ekun, n nyannin nyrun kɛ laa'n sa, yɛ be buli min sran kɛ laa'n sa. Min afɔtuɛ manfuɛ'm be nin min junman difuɛ dandan'm be usali min osu. Be sieli min famiɛn ekun, yɛ min nyrun nga n nyɛnnin i'n, ɔ yoli dan trali laa liɛ'n. 34I sɔ'n ti siɛn'n, m bɔbɔ min Nɛbikadnɛzar m ´manman Nyanmiɛn b'ɔ ti nglo lɔ famiɛn'n. N ´yi i ayɛ yɛ n ´kɛn i wun ndɛ kpa. Like ng'ɔ yo be'n be kwlaa be ti nanwlɛ. Ɔ yo sa'n kwlaa i nuan su. Ɔ kwla kan be nga be tu bé wun'n be ase bɔbɔ.»
ទើបបានជ្រើសរើសហើយ៖
Daniɛl 4: BB98
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Baoulé Bible © Alliance Biblique de Côte d'Ivoire, 1998.