Matayo 27
27
Etorikoki Yesu enetii Pilato
(Mk 15.1; Lk 23.1-2; Yhn 18.28-32)
1Ore pee ekenyu, netumo ilapolosak pooki o lpayiani lo lorere neiguanare pee ear Yesu metua. 2Neen ninye nerik aaitarasaki olgafanai oji Pilato.
Keeya e Yudas
(Iat 1.18-19)
3 #
Iat 1.18,19 Ore Yudas ilo otakaldayie Yesu pee edol ajo eidipaki aaiguanare, neitoki ainosu neshuku nena pisai tomoni uni e nkosholai ashukoki ilapolosak kituaak o lpayiani, 4nejo, “Aitarruoyie atakaldayie oltung'ani lemeeta entiyoto metari.” Kake etiaakita ninche, “Kainyoo natii ninche iyiook? Iyie ine.” 5Nenang'aki nena pisai e nkosholai atua enkaji e Nkai neipung; nelo agor kewan. 6Nedumu ilapolosak nena pisai e nkosholai nejo, “Mebara ti nikipik olbene le Nkai amu osarge einosieki.” 7Neiguana te nebo neinyiang'unye enkurma o laitobirani loo motioo pee enukarieki iltung'ana leeiking'a. 8Te nkaraki e ina pee eji ina kurma, enkurma o sarge o taata. 9#Sak 11.12,13Ina kata eitabayioki ina natejo oloiboni le Nkai oji Yeremia pee ejo, “Neya ninche impisai tomoni uni e nkosholai nainosieki ilo otudung'oki enkinyiang'a, otudung'okito enkinyiang'a lkulikae ayiok loo Siraeli. 10Neishooyo aainosie enkurma o laitobirani loo motioo anaa enaaitanapa nanu Olaitoriani.”
Eikilikuanishore Pilato Yesu
(Mk 15.2-5; Lk 23.3-5; Yhn 18.33-38)
11Neitasheyieki Yesu te dukuya olgafanai neikilikuan olgafanai ninye ajoki, “Aa ira iyie olaiguanani loo Lyahudi?” Nejoki Yesu, “Iyie ojo.” 12Ore pee eitang'or ilapolosak kituaak o lpayiani, neitu hoo ewaliki. 13Nejoki Pilato, “Ai mining eneba imbaa nikinteenikini?” 14Kake eitu ewaliki te mbae hoo nabo, o meing'asiayu olgafanai oleng.
Etudung'okoki Yesu enkiguana metaari metua
(Mk 15.6-15; Lk 23.13-25; Yhn 18.39–19.16)
15Naa ore apa ake to sirua le Pasaka, naa kelaaki olgafanai esiamo oltung'ani obo oena anaa oloyieu ninche.
16Netii ina kata oltung'ani obo yioloti te nkarruoisho oena oji Barabas. 17Ore pee etumo, nejoki Pilato ninche, “Kalo iyieuu nalaaki intae? Ai Barabas anaa Yesu oji Kristo?” 18Amu keyiolo ajo to lom eishooitie ninye. 19Ore pee eton Pilato to lorika le nkiguana neirriwaki enkitok enye olkilikuai ajoki, “Toduaa miaas ae te ilo tung'ani lemeeta entiyoto amu atanyamala duoo too mbaa kumok te nkidetidet te nkaraki ninye.” 20Kake etukurrakita ilapolosak kituaak o lpayiani lo lorere metoomonu Barabas, neishooyo Yesu metaari. 21Neitoki ake olgafanai ajoki ninche, “Kaing'ae te kulo pokira aare iyieuu nalaaki intae?” Nejo, “Barabas.” 22Nejoki Pilato, “Kaa naa aitaas Yesu oji Kristo?” Nejoki pooki, “Inchooi metashei.” 23Nejo, “Aainyo, kaa torroni etaasa ninye?” Neitoki aaitulusoo aabuak aajo, “Inchoo metashei!” 24#Enkig 21.6-9Ore pee edol Pilato ajo meeta ae naidim ataasa, kake keponari ake oloilole nedumu enkare, neisuj inkaik te dukuya olorere nejo, “Maata taa nanu entiyoto to sarge lele tung'ani eng'urai maate ena bae.” 25Newaliki iltung'ana pooki aajoki, “Inchoo osarge lenye meeu shumata iyiook o nkera ang.” 26Nelaaki teina kata Barabas; neari Yesu too nkeenta, neishori metashei.
27Nerik isikarini lo lbalusui Yesu atua enkaji o lbalusui naji Praitorio neiturrurrokinote oltim pooki. 28Neoru nkilani enyena neishopoki olkila onyokie. 29Neshetu olmarisian loo lkiku nepik elukunya enye, nepik entiyani enkaina enye e tatene, negilaki kung aakueniyie nejoki, “Supa olaiguanani loo Lyahudi!” 30Nenotaki ninye neoru ina tiyani naibung'ita, neoshioshie endukuya enye. 31Ore pee eidip aatakueniyie, neoru olkila onyokie neishopoki nkilani enyena, nerik ninye aapuo aashe.
Etashoki Yesu
(Mk 15.21-32; Lk 23.26-43; Yhn 19.17-27)
32Ore epuku aapuo neinepu oltung'ani le Kirene oji Simon nearaki ninye pee enap osalaba. 33Ore pee ebaiki ewueji neji Golgata, (aa keji ewueji e mborbor), 34#Olk 69.21neisho ninche Yesu enaisho oo sabibu naitushulakaki olodua metooko. Ore pee eishamisham neany eok. 35#Olk 22.18Ore pee eidip aatasho ninye, neor nkilani enyena aaoshie enkukuo. 36Netoni ninche aarrip ninye teine. 37Nepik ele sirata shumata elukunya enye aajo “YESU ELE OLAIGUANANI LOO LYAHUDI.” 38Neshei ninye teina kata te nebo o lapurrok aare, obo te nkaina e tatene, o likae te nkaina e kedianye. 39#Olk 22.7; 109.25; Esek 12.17,18; 13.7Nemor iloogiroo eipirripir ilukuny, aajo, 40#Mat 26.61; Yhn 2.19“Eiyie doi ogil enkaji e Nkai nishet too nkolong'i uni, intajeu kewan; te naa iyie Enkerai e Nkai, tadou to salaba.” 41Neiko sii ninche neijia lapolosak o lasirak te nebo lpaiyiani ejo, 42“Kulikae ake eitajeu nemeidim aitejeu kewan, olaa ninye olaiguanani loo Siraeli. Inchoo taata edou to salaba pee kiruk ninye.” 43#Olk 22.8; Eng'e 2.18-20Ore amu Enkai etipika osiligi lenye inchoo naa eitajeu Enkai ninye tenaa keetayie tipat; amu etejo naa, “Kara Enkerai e Nkai!” 44Nemor sii lelo apurrok ootashoki te nebo o ninye.
Keeya ee Yesu
(Mk 15.33-41; Lk 23.44-49; Yhn 19.28-30)
45Ore pee ebaiki saa ile, nerip enaimin enkop o metabaiki saa naaudo. 46#Olk 22.1Ore pee ebaya saa naaudo, neishir Yesu to ltoilo sapuk ajo, “Eli, Eli, lama sabaktani?” Naa inchere, “Enkai ai, Enkai ai, kaainyo pee kitung'uayie?” 47Ore pee ening kulikae te lelo ooitashe teine nejo, “Eliya eipoto.” 48#Olk 69.21Nekuet nabo kata obo le lelo nepik osuguroi enaisho naisuisho oo sabibu neremoki eng'udi naado neisho metooko. 49Nejoki ilkulikae, “Tapala maing'urai te naa kelotu Eliya aitajeu.” 50Neitoki Yesu aishir to ltoilo sapuk, nedung'o tau.
51 #
Ena 26.31-33
Neiperra nabo kata olkarasha le nkaji e Nkai aaku are, aiteru te shumata o metabaiki abori, neikirikira enkop nedanya ndapidapo; 52nebolo inkuraren neitopiuni seseni kumok loo sinyat ooirurate; 53ore pee epuku too nkuraren eidipa Yesu atopiu, nejing ina ang sinyati neipang'aki ltung'ana kumok. 54Ore ilo kitok loo sikarini oorripito Yesu o lelo ootii te nebo ninye, pee edol eikirikire enkop o kulie baa naataasate, neureishoyu oleng ejo, “Kesipa Enkerai e Nkai ele tung'ani.”
55 #
Lk 8.2,3 Netii ine wueji inkituaak kumok naaing'orita te nelakua naatusujutua Yesu eing'uaa Galilaya eisiaaita ninye. 56Ore te nebo ninche etii Mariamu Magdalene o Mariamu ng'otonye Yakobo o Yosef o ng'otonye layiok le Sebedayo.
Etunukayioki Yesu
(Mk 15.42-47; Lk 23.50-56; Yhn 19.38-42)
57Ore pee eaku teipa nelotu oltung'ani karsis oing'uaa Arimatea oji Yosef, otaa apa olointeng'eni le Yesu. 58Nelo sii apa ninye enetii Pilato neomonu osesen le Yesu. Neitanapisho Pilato pee eishori. 59Neitayu Yosef osesen, neirin te nkarasha sidai e kitani, 60neirragie te nkurare enye ng'ejuk nataguetua to soit, neibeleleng'oki osoit sapuk enkutuk e ngumoto, nelo. 61Netii ine Mariamu Magdalene o enkae Mariamu etoni aaipirare enkurare.
62Ore taaisere aa enkolong nasujita ene Nkitobirare, neiturrurrokino lapolosak kituaak o Lfarisayo Pilato, 63#Mat 16.21; 17.23; 20.19; Mk 8.31; 9.31; 10.33,34; Lk 9.22; 18.31-33aajoki, “Lo kitok, kitadamutua aajo etejo, apa ilo kalamas eton eishu, ‘Ore pee elusoo nkolong'i uni, napiu.’ 64Intanapisho naa metorripi enkurare o metabaiki enkolong e uni, pee mepuonu lkipaareta lenyena aapurroo nejoki olorere, ‘Etopiwuo’; neaku elejare torrono oleng alang ene dukuya.” 65Nejoki Pilato, “Iatata larripok loo sikarini, enchom entorrip anaa enindimidimi.” 66Nepuo aaitagol erripoto e nkurare, nepik olmishire osoit te nebo ilarripok.
ទើបបានជ្រើសរើសហើយ៖
Matayo 27: BIBLIAPRO
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 2018
