San Mateo 17
17
Ku jä Jesús ojts tikets jä nyijkx kyopk
(Mr 9.2-13; Lc 9.28-36)
1Tujtejk xëë wyena jä it nya'x, wa'nit jä Jesús tweew jä Pedro, Santiago jäts Juan jää y'uts Santiago wa'nit tmëëte apïjk jäm kopk këxm. 2Jää winkujkta, ojts jä Jesús jää wyin jää y'aa tijkets. We'n jää wyin jää y'aa ojts jyaty tëjkxp majtskep we'n ixu'n jää xëë, jäts poop jä wyit ojts jyaty we'n ixu'n jää ajatejk. 3Xä t'ixpaate jä Moisés jäts jä Elías tmënamyaatketa jää Jesús. 4Wa'nit jä Pedro tnïmye jää Jesús:
—Wintsën, wa'ts oy ku ïïm yaja. Pen mtsejkp mits, nyajk'oyap ëts tuuk jä xoma: mits tujk mjää, jä tujk Moisés jyää jäts jä tujk Elías jyää.
5Kotspnem wyena jä Pedro, ku jä winejts juu ajäp ojts nyijuuxepeta jää nyijkxmta ojts y'atïwa, jäp winejts jeet ojts pitsem jää ayuuk, jäts wya'any: Yëë ëts n'unejk mëjk ëts ntsejk, juu ëts te nwinken: Yëë miits m'amotenaxtap.
6Ku we'n tmotete, jäts jä ixpëjkpatëjkta kyuxtenyete jäts ojts nyaxmujtsta, mëjk ojts tsyëketa. 7Wa'nit jä Jesús ojts twintema jääta, jäts tukëye tuxapet jäts tnïmye:
—Putketa; ka' mtsëjketa.
8Ku i'xëjkte nipëna ojts tko o'k ixtene, jä'ye tujkam Jesús.
9Kitaaktenep wyena jäm kopkëxm, Wa'nit jä Jesús pyawaanete:
—Nipëna xka' wanetat juu te x'ixta, wanitnem ku wyena jä naaxwinete jaye y'unejk jä tujk ook jyuukypëjket.
10Wa'nit jää ixpëjkpatëjkta tyajktïiwete jää Jesús:
—Tyëx we'n wya'anta jä yajk'ixpëjkpata juu yëë naxwiinete kyutujken tnijaawetep jäts jä Elías jää jayïp mätsep.
11Jäts jää Jesús y'atseew:
—Wenam jää Elías jayïp mätsp, jäts jää tukëye tyajkni'ooyekëxep. 12We'n ëts miits nëjmeta jäts tëë jä Elías y'ets jäts yëëta ka' ojts t'ixkajpta, jäts tmujktuunte wintsoj ojts tsojkta. Jäts naywe'en, jä naaxwinete jaye y'unejk nëjkx jä tsyatsypaaty jää kyë'ëmta.
13Wa'nit jä y'ixpëjkpatëjkta ojts twinmoteta jäts jä Jesús jää nyimatykep jä Juan yajknëpätpa.
Jesús tyajktse'ek tujk jä waatyëjk juu tmëët jä winëëmpa
(Mr 9.14-29; Lc 9.37-43)
14Ku jya'tye jääta juma wye'na jä jaye, tujk jä ya'atyëjk ojts twintema jää Jesús, jäts twinkuxtenye jäts tnïmye:
15—Wintsën, ni'ayowa ëts n'unejk, paaty ku ka' opya'amap ye myëët jäts mëjk yë tsaatsy paaty; may ook yë jyëënkitepet o'k nyëkitepet. 16Xä njä tunimets yë m'ixpëjkpatëjkta, jäts ka' y'oyxeta tyajktso'oktat.
17Wa'nit jä Jesús y'atseew:
—Miits jayeta ka x'ok nijawetene tii mtuntat jäts katii mjaantsy jaawenta. Jumawaat miits njak mëët ijtat. Jumawaat miits njak mutänat yajkminta yaj jä waatyëjk.
18Wa'nit jä Jesús ojts twintso'oy jä winëëmpa jäts tkäxpitsen jäm waatyëjk y'am jootm, wa'nitjye ojts tsye'ek. 19Ix'ook jä ixpëjkpatëjkta apïjk jää Jesús tyajktïiwete:
—Tyëx ëëts xka ooyxe, nkäxpitsemet yëë winëëmpa.
20Jäts jä Jesús ojts nyë'ëmxeta:
—Jääkëx ku miits wa'ts waanye jä mjaantsyi jaawenta. We'en ëts miits nëjmeta pen mjakyäptep miits xjaantsyi jawenta jäm mjaawen këxmta, oyïïnema ixu'n tujk jä mostaza pyajk, ooyxep miits xnëjmat yë kopk: Käjke yaj jäts nëjkxe wiink tsoj, käjkep tsa kopk. Ka' miits tii mka' oyxetat pen mjaantsy jawetep miits jä Kunuukxtee. 21Mnaak'ayu'ap'ej mtsapkotsep ej we'n pitsemet yë ka'oyap.
Jä Jesús t'awana mumätsk ook jä y'ooken
(Mr 9.30-32; Lc 9.43-45)
22Nayjäänem jää Jesús mëët jä ixpëjkpatejkta tmëëtwiita jäm Galilea it jootm, wa'nit jä Jesús nyë'ëmxete:
—Jä Naaxwinete jaye Y'unejk nëjkx xä yajkëëyajky jäm ya'atyëjkta kyë'ëmta, 23jäts tyajk'ooktat; jäts kutuukxëë jyuukypëjket jä tujk ook.
Ku we'en yajk'nïmyete mëjk ojts tutsaatsy winmayta.
Jä tsaptëjk kupëëmen kyujuuyen
24Ku jä Jesús jäts jä y'ixpëjkpatëjkta jya'tye jäm kajpen Cafarnaúm, wa'nitjye jä tsaptëjk kupëëmen pëjkmujkpata tninëjkxte jä Pedro, jäts tyajktïïwete:
—Kyujuupy yë myajk'ixpëjkpa jä tsaptëjk kupëëmen. 25We'n, kyujuupy yëë —Pedro y'atseew.
Wa'nit, jä Pedro tyëjke tijkp, xä jä Jesús jayïp ojts myukejtse, jäts nyë'ëmxe:
—Wintsoj mits m'ok wa'any, Simón. Pën wi'n y'amotetep jä kupëëmen jäts jä putëjken jä mëj yajkutujkpata juu yaj naaxwiin: Jä wi'n jä jyayeta o'k jä wiink jayeta juu jä tujk it tsoontep.
26Jäts jä Pedro y'atsew:
—Jä jä'ywa jayeta juu ja tujk it tsoontep.
Wa'nit jä Jesús nyë'ëmxe:
—We'n'ej, Jä kukajpen ni tii kupëëmen tka tkujuytat.
27Jääkëx, ka tii jyäja jä joot'anen xëm jä yam, nëjkxe jäm juma në'ë akëya, jäts xnë'ëkujat jä puxen ajojken juu yajkwaantep ajkx mäjtsen mutu'k jä ajkx juu kujokep jäm puxen ajoken këxm jää myajkpitsemep, ku xwëën wajkxet jä y'aa jäp tujk jä puxen meen xpaatet, nipaatap tsawe jäts xkujuyet ëts nkupëëmen jäts mits jää; kone jäts xkujuyet.
ទើបបានជ្រើសរើសហើយ៖
San Mateo 17: JKAYUUK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
