Eclesiástico 8
8
Bajche' xuk'ul yom lak kajñel
1Mach acha'leñ a'leya t'añ ti' tojlel ñukbä x-e'tel,
mi mach awomik yajlel ti' ik'äb.
2Mach awäl'eñ wiñik ambä itak'iñ;
kome ñumeñ al jiñi itak'iñ, ya'i mi' ikaj imälbeñet.
Kome ti kaj jiñi k'äñlemañbä tak'iñ
ka'bäl tsi' chañ-esañob ibä,
yik'ot jiñi chu'bä añäl,
tsa' iyäk'ä ichañ-esañob ipusik'al jiñi año'bä ik'äjñibal.
3Mach acha'leñ a'leya t'añ yik'ot juñtikil yujilbä wulwult'añ
lajaläch bajche' woli awotsäbeñ isi'il ik'ajk.
4Mach api'äleñ majlel machbä añik ts'äkäl iña'täbal,
cha'añ ma'añik mi' ibi'leñetob jiñi ñuko'bä.
5Mach awäk' ti kisiñ jiñi tsa'ixbä ikäyä mulil;
ña'tañ cha'añ ti lak pejtelel xmuliloñla.
6Mach awäk'eñ iyilañ kisiñ jiñi ñoxobixbä,
awilañ, joñonla ja'el mi kaj lak ñox-añ.
7Mach amel wajleya ti' itojlel jiñi chämeño'bixbä;
ña'tañ cha'añ ti lak pejtelel mi kaj lak chämel.
8Mach añusäbeñ ikäñtesa jiñi año'bä iña'täbal,
yom ma' weñ ñop pejtelel ikäñtesäñtel.
Kome ti' itojlelob ma' kaj ataj aña'täbal,
yik'ot ma' akaj añop awajñel ti itojlel año'bä ik'äjñibal.
9Mach abi'leñ iña'täbal jiñi lak tatuchob,
awilañ, jiñob ja'el tsi' iñopoyob ti' itojlel iñojte'elob.
Kome ti' tojlelob mi' kaj achumtäl ti xuk'ul
ya'i toj mi kaj ajak' che' mi' kaj ak'ajtibeñtel.
10Mach atech imich'ajel jiñi xmulil,
kome lajaläch che' bajche' ma' wusiñ k'ajk,
ame ixä' tajet ik'äk'al che' mi' ju' lejmel.
11Mach puts'iket majlel ti' tojlel xmich'lelbä,
ame awäk'eñ isajkañ bajche' mi' kaj itik'lañet.
12Mach awäk'eñ imajñañ ñumeñ ambä itak'iñ bajche' jatet,
mi' tsa' awäk'ä ti majañ achu'bä añ, sätbilix.
13Mach awäk'eñ ti bet majki ñumeñ ambä icha'añ,
mi' tsa' awäk'e, ña'tañ cha'añ jatetix ma' akaj atoj ibet.
14Mach awotsañ abä ti a'leya yik'ot juñtikil xmeloñel,
kome jiñi mi kaj ik'äñ iye'tel cha'añ ikoltañ ibä.
15Mach acha'leñ xämbal yik'ot juñtikil sojkembä iña'täbal,
mi mach awom añumeñ otsañ awokol;
kome jiñi toj mi' ikaj imel chuki mi' iña'tañ,
ya'i jatet mi' ikaj asajtel ti' kaj ijoñtolil.
16Mach acha'leñ a'leya yik'ot juñtikil joñtolbä ipusik'al,
mi mejlik mi' amajlel awik'ot ti xämbal ti ñajtbä lum.
Kome jiñi ma'añik mi' k'uxbiñ majki yom itsäñsañ,
che' ma'añik majch mi' mejlel ikoltañet, mi' kaj itsäñsañet.
17Mach yom ma' laj tsiktesañ chuki mi' aña'tañ ti apusik'al jiñi machbä añik iña'täbal,
awilañ, mach mejl ilot ti' ipusik'al mu'bä amuku su'beñ.
18Ti' tojlel machbä akäñä acha'añ mach amel muku melbilbä,
awilañ, mach awujilik chuki mi kaj iyujtel.
19Mach ajamäl su'beñ chuki mi' iña'tañ apusik'al jiñi machbä akäñä acha'añ,
mi' mach awom mi iputs'ijel majlel jiñi tijikñäyel ti' atojlel.
ទើបបានជ្រើសរើសហើយ៖
Eclesiástico 8: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM