Eclesiástico 33
33
1Majki mu'bä ich'ujbiñ Lak Yum
ma'añik mi kaj iwis taje' wokol,
yik'ot che'bä mi' iñopbeñtel ipusik'al
mux ilok'el ti uts'at.
2Majki ambä iña'täbal mi' k'uxbiñ jiñi tik'ojel,
ixku jiñi mu'bä iloñ ñope' isajkañ
lajaläch bajche' jump'ejl jukub
ambä ti' imal ñajb che' yorajlel chäk ik'lel.
3Majki ambä iña'täbal,
mi' xuk'chokoñ ipusik'al ti itik'ojel Lak Yum,
yik'ot mi' ich'äm bajche' ch'ujulbä käñtesa.
4Cha'añ mi' ñäch'tañob jiñi at'añ,
yom ma' chajpañ pejtelel chuki ma' awäl;
Yom mi lak weñ ña'tañ
jiñi uts'ataxbä jak'beñtel.
5-6Jiñi machbä añik iña'täbal, che' woli ti t'añ;
mach toj mi yäl chuki mi' ña'tañ;
majki mi' mulañ wajleya,
ma'añik mi' p'is ibä ti' itojlel lak pi'älob,
lajaläch che' bajche' joñtolbä kawayu'
mu'bä ilaj läptek' chuki mi' ik'el.
Lak Ch'ujutat mi' icha'leñ yumäñtel ti' pejtelel chukitak añ
7Jiñi k'iñ mi' pasel ti jujump'ejl k'iñ,
awilañ, yajkabilix jiñi k'iñtak ñumeñ ñukbä ik'äjñibal.
8-9Ti iña'täbal, Lak Yum
tsi' tsolo jiñi k'iñ ti' chajp ti' chajp.
Pejtelel ili k'iñtak lajaläch ik'äjñibal,
awilañ, Lak Yum tsi' yajka
jiñi ch'ujulbä k'iñtak
cha'añ mi lak cha'leñ k'iñijel.
10Jiñi ñaxambä wiñik ik'aba' Adan
temel yik'ot pejtelel wiñikob x-ixikob
laj lok'emob ti ts'u'bejñ,
11ixku jiñi Lak Yum ti ñukbä iña'täbal
tsi' mele ti' chajp ti' chajp,
che' ja'el, tsi' ipäsä jiñi ibijleltak ti jujuñtikil.
12Juñmojt tsi' ch'ujutesa
yik'ot tsi' yäk'eyob iye'tel ti' it'ejl.
Jixku jiñi yambä tsi' pek'esayob,
yik'ot tsa' ichilbeyob iye'tel.
13Lak Yum mi' cha'leñ yik'otoñla
che' bajche' mi' ixäk' lum jiñi xmel uk'um:
Mi' mel che' bajche' yom ipusik'al.
14-15Pejtelel chuki tsa'bä imele Lak Ch'ujutat,
cha'chajp mi' mejlel la jk'el:
Jiñi joñtolil machbä che'ik bajche' chuki toj,
jiñi chämel machbä che'ik bajche' kuxtälel,
jiñi xmulil machbä che'ik bajche' xuk'ulo'bä wiñikob.
Jiñi xmel juñ yik'ot iye'tel
16-17Che' bajche' jiñi mu'bä ipäk' ts'usubil,
jiñi p'ip'obä ijol tsi' ikäñtayob iña'täbal ja'el;
joñoñ, cha'añ mik taj jiñi ña'täbaläl,
ak'älelix mik majlel ti wäyel
yik'ot ñaxañ mik ch'ojyel ti säk'ajel,
ixku yik'ot ich'ujutesaya Lak Yum,
ka'bäl jax chuki tsa' kñopo.
18Ixku ma'añik tsa' kcha'le e'tel
cha'añ kom ktaj kbajñel weñlel,
tsa' kcha'le cha'añ yomo'bä itajob iña'täbal.
19Jiñ cha'añ jatetla yumäletbäla,
yom mi' la' ñäch'täbeñoñ kt'añ.
Bajche' yom mi la jk'äñ chu'bä añäl
20-21Che' añixto akuxtälel,
mach awäk' abä ti tik'läñtel ti' tojlel ya'ño'bä;
che' ja'el, mach ma' wäk' achu'bä añäl ti' ik'äb yaño'bä,
cha'añ ma'añik ma' k'ajtiñ koltaya ti wi'il.
22Cha' uts'atäch che' jiñi awalobilob
mi' k'ajtibeñetob chuki yomob,
mach uts'atik mi che' jatet
ma' amel k'ajtiya cha'añ ma' koltäñtel ti' tojlel awalobilob.
23Yom chäñ xuk'ulet amel ti' pejtelel chuki mi' aña'tañ,
cha'añ ma'añik ma' bi'besañ añuklel;
24mach awa' puke' achu'bä añäl,
che' maxto k'otemik iyorajlel achämel.
Bajche' yom mi la jk'el jiñi x-e'telob
25-30Jiñi burro ma' weñ we'esañ,
che' ja'el, ma' wets' majlel yik'ot te'.
Awilañ che'äch yom ma' mel ja'el yik'ot jiñi x-e'telob acha'añ:
Yom ma' wäk' jiñi bälñäk'äl,
yik'ot choko majlel ti' e'tel ja'el.
Mach ma' wäkob ti k'aj oj,
kome jiñi ts'u'lel mi' päy tilel chuki machbä uts'atik.
Ak'eñ ti' tojmulil mi' mach yom ijak' at'añ,
ixku mach ma' ñusañ abä yik'otob,
che' ja'el, yom ma' cha'leñ chuki toj ti' itojlelob.
31-33Mi juñtikil jach jiñi x-e'tel acha'añ,
yom ma' weñ k'uxbiñ che' bajche' juñtikil awerañ,
kome lets itojol tsa' ataja.
Mi tsa' ap'ump'um tik'lañ, mi' ikajel ti puts'el lok'el,
che' jiñi, ma'añik ma' akaj acha' k'el.
ទើបបានជ្រើសរើសហើយ៖
Eclesiástico 33: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM