Eclesiástico 32
32
Bajche' yom lak cha'leñ ti k'iñijel
1Che'bä ma' ak'otel ti jump'ejl k'iñijel,
yik'ot che' ma' buchtäl ti' ijol jiñi we'te',
mach amel che' bajche' ñukbä ak'äjñibal.
Yom ma' cha'leñ che' bajche' juñtikil päybilo'bä cha'añ k'iñijel,
yik'ot yom ma' ñaxañ k'elob chuki yom icha'añob
che'bä maxto buchulet.
2Che'bä tsa'ix ujti amel pejtelel iliyi,
tijikñesañ ti' itojlelob.
Che' jiñi, jiñob uts'atax mi' kaj ik'eletob.
3Mi' añix aja'bilel,
mux amejlel acha'leñ t'añ che' woliyet ti we'el uch'el,
che' jiñi, yom tsajilet cha'añ ma'añik ma' näch'chokoñ jiñi xñijka soñob.
4-6Che' mi kajel jiñi ñaxambä jap chuki japbilbä,
mach ma' cha'leñ che' bajche' oñbä aña'täbal,
che' ja'el mach yomik ma' tech akäñtesa
che' woli iñäch'tañ jiñi api'älob.
Ma'añix yambä ñumeñ uts'at
che' bajche' jiñi soñ yik'ot ya'lel ts'usub
che' añoñlaj ti k'iñijel.
¡Ñumeñ ñuk ik'äjñibal iliyi,
che' bajche' jiñi uts'ataxbä xajleltak!
7Mi ch'itoñet to, mach ma' acha'leñ t'añ
mi ma'añik majch woli ipejkañet.
Ixku mach ma' ñusañ abä ti t'añ.
8Toj yom awäl chuki ma' ña'tañ,
che' bajche' mi' cha'leñob majki año'bä iña'täbal.
9Mi' ya' añet ti' itojlel ñukbä wiñikob,
mach ma' amel che' bajche' mi' icha'leñob iliyob,
che' ja'el mach ma' wotsañ abä che' woliyob ti t'añ.
Mach yomik ch'änch'äñayet ti' tojlel jiñi ñuko'bä.
10Awilañ, ñaxañ mi' tsiktiyel jiñi ixojob chajk,
ya'i mi' cha'leñ t'añ lak mam,
che' ja'el, che'äch mi' tsiktiyel ixuk'tälel ipusik'al jiñi wiñik,
ya'i mi' tsiktiyel iyutslel.
11Che'bä mi' yujtel jiñi k'iñijel,
mach ma' sujtel ti' wi'ilix,
yik'ot mach ma' jaltesañ abä
che' ma' sujtel ti awotot.
12Ya' ti awotot mi' mejlel amel
pejtelel chukitak awom
ixku mach yom acha'leñ p'ajoñel ti' itojlel api'älob.
13Che' ja'el, ti' pejtelel k'iñ
yom ma' ñuk'esañ Lak Yum
tsa'bä iyäk'eyet jiñi akuxtälel.
Ibäk'ñäñtel Lak Yum
14Majki mu'bä ich'ujbiñob Lak Yum
mux ijak'ob pejtelel ikäñtesäñtel;
jiñi mu'bä isajkañob ti säk'ajel mux itajob iyutslel.
15Jiñi ikäñtesa Lak Ch'ujutat
mi' tijikñesañ ipusik'al majki mu'bä ik'uxbiñ,
ixku ti' itojlel majki bixel jax ipusik'al,
lajaläch bajche' jiñi xajlel mu'bä imäktañ ibijlel.
16Majki mu'bä ich'ujbiñob Lak Yum
mux itajob isujmlel ti' pejtelel chuki toj.
Awilañ, pejtelel tojbä imelbalob
mux ipäs ik'äk'al che' bajche' k'ajk.
17Ixku jiñi xmulilob,
ma'añik mi' jak'ob itik'ojel,
mi' chäñ sajkañob bajche' mi' jop' it'añ
cha'añ mi' koltañ ibä.
18Jiñi wiñik ñukbä iña'täbal,
ñaxañ mi' ña'tañ chuki mi' kaj imel,
ixku majki mi' chañ-esañ ibä,
ma'añik mi' ch'ämbeñ isujm chuki mi' ikajel.
19Yom ak'ajtiñ xik'ojel che' ma' kaj amel chuki ma' ña'tañ,
20Mi' mach awom ajats' awok ya' ti xajlel ambä ti bij,
mach yom axäñ majlel ba' pam pukul jiñi xajleltak;
21che' ja'el, mach ma' wäk' ti apusik'al
ya' ti uts'ataxbä bijtak.
22Yom weñ tsajilet, kome mach awujil
chuki mi' kaj itilel ti wi'il.
23-24Yom ma' cha'leñ pejtelel chuki ma' ña'tañ
yik'ot ixuk'tälel apusik'al.
Yom ma' jak' itik'ojel Lak Yum,
cha'añ che' jiñi, jiñi Lak Yum mi' chäñ käñtañet.
Yom ma' xuk'chokoñ apusik'al ti Lak Yum
che' jiñi, uts'atax ma' kaj amel pejtelel
chuki ma' ña'tañ.
ទើបបានជ្រើសរើសហើយ៖
Eclesiástico 32: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM