Eclesiástico 13
13
Bajche' mi la jkajñel ti' tojlel jiñi p'ätälo'bä
1Majki mu'bä itäl chuki täk' mi' toybeñ ik'äb;
yik'ot jiñi mu'bä itempañ ibä yik'ot xwajleyajob
mi kaj isujtel bajche' mi' melob jiñob.
2Mach ach'uy albä ñumeñbä iyalel bajche' ap'ätälel,
mi yomik atem abä awik'ot wiñikob ambä ti ka'bäl ichu'bä añ.
Jiñi lump'ejt ma'añik mi lak tem'ak' ti' t'ejl tak'iñ p'ejt;
mi tsa' ilaja jats'äyob ibä, jiñi lump'ejt mux itojp'ejl.
3Jiñi oñbä ichu'bä añ che' mi' imel chuki machbä toj
mi' bajñel chañ-esañ ibä ti' ipusik'al;
jiñi p'ump'umbä che' mi' taj itik'läñtel
ya'i mu'to ik'ajtiñ cha'añ mi' ñusäbeñtel imul.
4Che' añto ak'äjñibal ti' itojlel ambä itak'iñ,
mi' kaj ipäyet ti' x-e'tel icha'añ;
mi ma'añix ak'äjñibal ti' itojlel,
mux ijuñyaj choket käytäl.
5Mi añ chuki añ acha'añ,
mi' chäñ ajñel awik'ot
cha'añ mi' chilbeñet chuki mejl icha'añ.
6Mi añ chuki yom ti atojlel,
uts'atax mi' kaj ik'elet,
tse'tse'ñajax iñi' iwut,
mi kaj ixuk'chokoñ ipusik'al ti' tojlel.
Uts'atax mi' kaj ipejkañet
yik'ot mi' k'ajtibeñet mi añ chuki añto yom acha'añ.
7Mi' kaj iyäk'et ti kisiñ
che' mi' ichäñ päyet majlel ti we'el uch'el.
Mi' kaj ilotiñet che' mejl icha'leñet bajche' yom;
cha'sujtel uxsujtel mi' kaj ichañ-esañet,
ixku ti wi'il, che' mi yilañet, mi' kaj imich'ik'elet,
ya'i ti' iwut tsikil ibi'leya ti' atojlel.
8¡Tsajilet! ¡Mach axuk'chokoñ apusik'al ti se'b!
¡Max amel che' bajche' jiñi machbä añik iña'täbal!
9Mi juñtikil ambä oñbä ichu'bä añ
mi' iläk'tesañ ibä ti atojlel,
mach ajuñyaj läk'tesañ abä;
che' jiñi, mi' ikaj ichäñ päyet ti' itojlel.
10Mach añumeñ läk'tesañ abä ti' itojlel,
che' mach awom ñajt mi' käyet ti' iwut,
mach yomik mi' añumeñ ñajt-esañ abä,
ame juñyaj ñajiyet icha'añ ti' itojlel.
11Mach alajiñ at'añ yik'ot,
mi yomik alaj ñop pejtelel chuki mi' iyäl,
awilañ, ka'bäl mi' yäl it'añ cha'añ mi' ñope' apusik'al,
yik'ot ti' yälas t'añ mi' kaj ikäñ aña'täbal.
12Mi juñtikil wiñik joñtolbä mi' iwa'chokoñtel ti yumäl,
ma'añik mi' ikaj imel p'uñtaya ti' tojlel mi juñtikilik,
ya'i mi' ikaj imel jisaya ti' tojlelob.
13¡Yom chäñ tsajilet,
ñajt-esañ abä ti itojlel joñtolbä wiñikob!
14[Che' ma' wu'biñ pejtelel iliyi che' wäyäletix, p'ixeñ ti se'b.
K'uxbiñ Lak Ch'ujutat ti' pejtelel k'iñ,
yik'ot yom achäñ k'ajtiñ ikoltaya.]
15Pejtelel chuki kuxulbä ti pañämil mi' ik'uxbiñ ipi'älob;
che'äch ja'el jiñi wiñikob mux ichäñ k'uxbiñob ibä.
16Pejtelel chuki kuxulbä ti pañämil
mi' itempañ ibä yik'ot lajalo'bä ipi'äl,
che'äch ja'el jiñi wiñikob mux imajlel ba'añ lajalbä yik'ot.
17¿Bajche' mi' ikajel item ibä mate'el ts'i' yik'ot täñäme'?
Che' ja'el, mach mejlik ixäk'ob ibä joñtolbä yik'ot utso'bä.
18Mach mejlik iyajñel ñäch'tälel jiñi joñtolbä mate'el ts'i' yik'ot ts'i'.
Che'äch ja'el, ti' itojlel jiñi oñbä ichu'bä añäl yik'ot jiñi p'ump'umbä.
19Jiñi mate'el tsimiñ iwe'eläch jiñi bajlum;
che'äch añob jiñi p'ump'uño'bä ti' tojlelob jiñi oñbä ichu'bä añäl.
Año'bä itak'iñ yik'ot p'ump'uño'bä
20Jiñi mu'bä ichañ-esañ ibä ts'a' mi' k'el jiñi utsbä ipusik'al,
jiñi oñbä ichu'bä añäl ts'a' mi' k'el jiñi p'ump'uño'bä.
21Che' mi' yajlel juñtikil ambä itak'iñ
ti' pejtelelob mi' ikoltañob ti se'b,
ixku che' mi' iyajlel jiñi p'ump'umbä,
jiñto ipi'älob mi' ixitchokob yajlel.
22Che' mi' icha'leñ t'añ jiñi ambä itak'iñ,
ka'bäl mu'bä iñopbeñob chuki mi' iyäl,
mach yälä mi joñtol it'añ, tojäch mi' iyu'biñtel.
Mi mach toj tsa'bä iyälä jiñi p'ump'umbä,
mi' ikaj itse'tañob,
mi tojäch wolibä iyäl,
ma'añik majki mi' iñopbeñ.
23Che' mi' icha'leñ t'añ jiñi ambä itak'iñ,
pejtelel mi' ñäjch'elob iyu'bibeñob it'añ,
ixku che' mi' icha'leñ t'añ jiñi p'ump'umbä,
ti' pejtelelob mi' k'ajtibeñob ibä: «¿Majkibä ajiñi?»
Mi che' mach toj it'añ, mu'to ixitchokob ju'bel.
24Uts'atäch che' oñ lak chu'bä añ tajbilbä ti tojbä lak ke'tel,
ixku lekojix che' mi lak yajlel ti p'ump'uñlel ti ikaj lak joñtolil.
25Ti' iwut jiñi wiñik mi' itsiktiyel chuki añ ti' ipusik'al,
mi' joñtolil, mi' utslel.
26Che' tijikña ipusik'al, tijikñajax ti' k'elol ti' iwut,
jiñi ju'beñbä iwut, jiñäch ch'ijiyembä iña'täbal.
ទើបបានជ្រើសរើសហើយ៖
Eclesiástico 13: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM