Eclesiástico 1
1
Ik'äyiñtel iñuklel ña'täbaläl
1Pejtelel ña'täbaläl mi' tilel ti Lak Yum,
yik'ot ya'äch mi' tem yajñel yik'ot ti' pejtelel k'iñ.
2¿Majki mi' mejlel itsik jiñi ji' ambä ti ti' ñajb,
yik'ot jiñi ja'al mu'bä iyajlel ju'bel ti panchañ,
yik'ot jiñi k'iñiltak machbä añik ijilibal?
3¿Majki mi' imejlel ip'is ichañlel panchañ
iñajtel ixujktak pañämil,
yik'ot jiñi ik'yoch'añbä itamlel kolem ñajb?
4Che' maxto chajpäbilik pañämil
Lak Ch'ujutat tsi' mele ti ñaxañ jiñi ña'täbaläl.
5Ikäñtesa Lak Yum
jiñäch itejchibal ña'täbaläl,
ixku jiñi ña'täbaläl
mi ikäñtesañoñlaj ijak'beñtel ixik'ojeltak.
6¿Majki käñä icha'añ iwi' ña'täbaläl?
¿Majki yujil pejtelel machbä tsiktesäbilik icha'añ?
7¿Majki yujil icha'añ pejtelel isujmlel jiñi ña'täbaläl?
8Kojach añ juñtikil ñukbä iña'täbal,
bäk'ñäbilbä ti' pejtelel pañämil,
jiñäch Lak Yum mu'bä ibuchtäl
ti ñukbä ibuchlib ambä ti panchañ.
9Jiñäch Lak Yum majki tsa'bä imele jiñi ña'täbaläl.
Tsi' weñ käñä, tsi' weñ p'isi,
ya'i tsi' pam puku ti pamol pejtelel imelbal.
10Lak Ch'ujutat tsi' yäk'ä jiñi ña'täbaläl
ti' tojlel pejtelel wiñikob x-ixikob,
yik'ot ñumeñ oñ mi' yäk' ti' itojlel mu'bä ik'uxbiñ.
Isujmlel majki ambä iña'täbaläl
11-12Jiñi mu'bä ich'ujbiñob Lak Yum
mi kaj ik'uxbiñtelob ja'el.
Mi kajelob ti chumtäl ti tijikñäyel ipusik'al
k'äläl che' mi iñox-añob.
13Jiñi mu'bä ich'ujbiñ Lak Yum
tijikña mi' kaj ichämel ti' ñäch'tälel,
yik'ot mi' kaj ichäñ ña'täñtelob ila ti pañämil.
14Pejtelel majki yombä itaj iña'täbaläl
ñaxañ yom mi' ich'ujbiñ ixik'ojel Lak Yum.
Jiñi ña'täbaläl mi iyajñel
ti itojlel jiñi mu'bä iñopob Lak Ch'ujutat
che' käñtäbilto ti' iñäk' iña'.
15Tsa' ajñi ti' tojlel wiñikob x-ixikob k'äläl ti' tejchibal,
yik'ot mi' kaj iyajñel ti' itojlel ip'olbalob ti' pejtelel k'iñ.
16-17Jiñi tojbä ña'täbaläl jiñäch che' mi lak ch'ujbiñ ixik'ojel Lak Yum.
Majki ti isujm mi' chäñ sajkañ jiñi ña'täbaläl
mux itaj ti oñlel.
Jiñi ña'täbaläl mi' iyäk'eñ ichobejtäbal
yik'ot mi' laj pajmel jiñi yotlel chu'bä añäl ti' iwut päk'äbältak.
18Ti' pejtelelob mu'bä ich'ujbiñob Lak Yum,
mux itajob jiñi ña'täbaläl,
jiñi mi' kaj ip'ol ñäch'tälel yik'ot k'ok'lel.
19Lak Yum tsi' ik'ele yik'ot tsi' iweñ p'isi jiñi ña'täbaläl
che' jiñi tsa' ichoko ju'bel ti lak tojlel
che' bajche' mi ju'bel tilel ja'al ti pañämil.
Che'äch che' bajche' iliyi tsi' yäk'e ichobejtäbal
ti' pejtelelob tsa'bä isäklayob.
20Jiñi ña'täbaläl lajaläch bajche' juñtejk te':
Jiñi iwi' jiñäch ich'ujbiñtel it'añ Lak Ch'ujutat,
jiñi ik'äbtak jiñäch ja'bil mu'bä yäk'eñoñla cha'añ lak kuxtälel.
21Ich'ujbiñtel ixik'ojel Lak Yum mi' ñajt-esañ jiñi mulil,
yik'ot mi' lajmesañ imich'ajel Lak Yum.
Jiñi ña'täbaläl mi' yuts'esañ Lak pusik'al
22Mach mejlik iñusäbeñtel imul
majki bajñel jach mi' mich'esañ ibä,
kome jiñi mich'ajel mi' ipäy tilel wokolil.
23Jiñi wiñik machbä añik mi' miche'sañibä ti se'b,
ti wi'ilbä k'iñ mi' taj itijikñäyel ipusik'al.
24Ñäch'äl mi' kälel che' bajche' yom imel
che' jiñi ti wi'ilbä k'iñ ti' pejtelelob
mi' kaj ikäñob jiñi oñbä iña'täbaläl.
25Majki ti isujm añ iña'täbal
mi' weñ ña'tañob chuki mi' yälob,
ixku jiñi xmulil ma'añik mi' mulañ its'äktesañ ixik'ojel Lak Yum.
26Mi' jatetla awom la' ña'täbal, jak'beñla itik'ojel Lak Ch'ujutat,
che' jiñi Lak Yum mi' kaj iyäk'eñetla oñbä la' ña'täbaläl.
27Mi' tsiktiyel lak ña'täbaläl
che' mi lak ñuk'esañ ik'aba' Lak Yum,
kome Lak Yum mi' imulañ jiñi ixuk'tälel yik'ot iyutslel lak pusik'al.
28Yom mi la' ch'ujutesañ Lak Yum ti' pejtelel la' pusik'al,
yom la' läk'tesañ abä ti jump'ejljach apusik'al.
29Mach yomik cha'chajp apusik'al ti' tojlel wiñikob,
che' ja'el yom tsajalet che' ma' cha'leñ t'añ.
30Mach yomik ma' chañ-esañ abä,
kome mejletla ti yajlel ja'el ti wokol,
ya'i kisiñ mi ikajel la' awu'biñ.
Awilañ, Lak Yum mi' mejlel iyäk' ti tsiktiyel mukulbä amelbal,
ya'i mi' yäk'et ti yajlel ti lum ti' yojlil baki temelob wiñikob.
ទើបបានជ្រើសរើសហើយ៖
Eclesiástico 1: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM