Ŋúnuyɔ 139
139
Yewe 'mi kɛnmɛ cɛ́n bè
1Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Yewe yo, muɔ 'mi laamɛ siʔɛ bè nɛ̀ wéli, nɛ́ mi sɔ́migɔ nɛ̀ cɛ́n.
2Muɔ wè, muɔ 'ki cɛ́n lɛ̀lɛ líì nī mi nɛ̂ tɛ́ni wè
nɛ́ lɛ̀lɛ líì nī mi nɛ̂ yɛ̀ wè.
A muɔ cɛ yē liʔi, muɔ nɛ mi sɔ̀ngirɔ cɛ́n dè.
3Muɔ nɛ̂ mi wéli a mi nɛ tári koligo nɛ̄ gè, nɛ́ míɛni a mi sìnɛ́ wè.
Muɔ 'ki cɛ́n kele gálì ke mìɛni mi nɛ kpínʔini gèle.
4Cí ! Nyasiɛnkaanna niì cé fìɛ yiri mi nyuɔ nī gèʔ
nɛ̀ ki yaʔa, Yewe, a muɔ 'ni cɛ́n nɛ̀ kúɔ.
5Muɔ 'mi màʔa nɛ̀ suʔu yiʔɛ mɛ́ nɛ́ kàduʔu mɛ́,
muɔ 'muɔ kɔli wúʔuro gè mi nɛ̄.
6Bɛ̀ muɔ 'mi sɔ́migɔ nɛ̀ cɛ́n mmɛ gè, a kire 'mi fungo wúɔ;
kire sícilige gáà ki 'líili nɛ̀ tóri mi nɛ̄, miì gbɛ̀ ki cɛ́nʔ !
7Sé sí m'bé gbɛ̀ kɛ́ liilige muɔ Pìle nɛ̄ lè ?
Sé m'bé gbɛ̀ fɛ̀ bè kɛ́ liilige muɔ yiʔɛ mɛ́ gè ?
8A mi 'tánʔa nyìʔɛnɛ nī lè, muɔ yē baa,
a mi sí jíin kusiʔi nī gè, ki n'gɛ, muɔ yē baa.
9A mi cɛni yɛ̀ nɛ̀ fini nɛ̀ kɛ́ cɛngɛnyɛnifoligɔli mɛ́ gè,
a mi cɛ́ni jo m'bé kɛ́ bè sa kò cɛngɛnyɛnijiingɔli mɛ́ gè,
10kire tiʔɛ nī gè muɔ kɔli ki nɛ̂ mi nàʔa,
muɔ kàliige kɔli ki nɛ̂ mi cò.
11A mi sí ń'nɛ jo: «Kányiʔɛ nɛ̄, yebilige ki bé mi làrigɛ wè,»
kire nɛ́ ki mìɛni ní pìlige ki nɛ̂ yiʔɛ nɛ̀ kò kpìɛnmɛ
nɛ̀ mi màʔa nɛ̀ suʔu.
12Muɔ mɛ́ wè, yebilige ki wè pìlige muɔ mɛ́ʔ,
nɛ̀ pínɛ pìlige ki nɛ̂ puu bɛ̀ cɛnvunyiɛnɛ tíɛlɛ.
Yebilige nɛ́ kpìɛnmɛ, piī numɔ muɔ mɛ́.
13Muɔ ma 'mi fungo faan gè,
muɔ ma mi 'tìin mi yàa liyɛ nī yè.
14M'béri muɔ gbùʔɔrɔ́,
nɛ́ ki cɛ́n muɔ 'mi sɔ́migɔ nɛ̀ faan a mi 'nyuɔ nɛ̀ tóri.
Muɔ kakpiʔiligele kiyē funwuɔrɔ wuʔulo, mi 'ki sɔ́migɔ nɛ̀ cɛ́n.
15Mi céri tiì puu làridɛ muɔ yiʔɛ mɛ́ʔ lɛ̀lɛ líì nī muɔ 'mi kpíʔile tiɛlarigɛ nī gè,
bà muɔ 'mi sɔ́migɔ nɛ̀ tìin dàala laamɛ nī bè#139.15 dàala laamɛ nī bè: Kire tiʔɛ ki nɛ nyu siimɛdɛngɛ wuʔu nɛ̄. Wéli baa koliyo 16..
16Lɛ̀lɛ líì nī mi céri tiì cé fìɛ gbòbori dèʔ mi yàa liyɛ nī yè,
muɔ nyapigele ke 'puu nɛ mi nyaʔa.
Muɔ cé mi sìi cɛnyɛ sɛbɛ yè nɛ̀ kúɔ
muɔ sɛbɛkuruwo nī wè,
cɛnyɛ nyáà nyuɔ mi yé yɛli bè kúɔ yè,
nɛ̀ ki yaʔa yire yàa fáala sì cé fìɛ puu bileʔ.
17ʔé Kulocɛliɛ, muɔ sɔ̀ngirɔ ti 'kpúʔɔ mi nɛ̄, ti cɛ́ngɛnmɛ piī gbɛ̀libɛ;
ti mìɛni bìnɛ wi 'niʔɛ nɛ̀ tóri díɛ!
18Mɛni m'bé gbɛ̀ jáa bè muɔ sɔ̀ngirɔ tɔ́ri dè ?
Ti 'niʔɛ nɛ́ tóri dàrimiʔɛ nɛ̄ gè !
A mi 'ŋɔ́ni nɛ̀ yɛ̀ wè, mi nɛ ń'nɛ puu nɛ́ muɔ ní.
19ʔé Kulocɛliɛ ! A ki yē cɛni nyaa muɔ nɛ siɛnpiile peli kpúu bèle o !
Bàli pe sìsiɛn ŋu gè, pe 'yɛli pe‑ líili mi nɛ̄ !
20Piyē nɛ muɔ wori nyu dè nɛ́ funbiʔi ní
níɛ muɔ míʔɛ yeri gè waʔanɛ !
21Yewe yo, kiì yɛli léʔ pe 'mi biɛn bàli muɔ 'biɛn bèle ?
Pe fǎga mi biɛn léʔ bàli pe túngu nɛ́ muɔ ní wè ?
22Pe 'mi sɔ́migɔ nɛ̀ biɛn kányiʔɛ nɛ̄,
pe nyɛ́nì kò mi tíimɛ leguulo.
23Kulocɛliɛ, ‑mi cɛli ma wéli, ma mi fungo cɛ́n gè !
‑Mi siʔɛ ma wéli ma mi laabiɛnmɛ cɛ́n bè !
24‑Ki wéli a ki yē mi yē kobiʔi nɛ̄ gè,
ma mi yiʔɛ kíni gè bànguɔ koligo nī gè !
ទើបបានជ្រើសរើសហើយ៖
Ŋúnuyɔ 139: sev
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.