Matiye 13
13
Yatanʔarafɔli kàsiile lè
(Mar 4.1-9; Luk 8.4-8)
1Ki cɛngɛ gáà gè, a Zezi wi 'yiri saʔa nī gè nɛ̀ sɛ́nì tɛ́ni kuʔɔjii nyuɔ nɛ̄ gè. 2A siɛnnɛ pe 'kɛ́ nɛ̀ sɛ́nì gbuʔulo wi táanni nìʔɛbɛlɛ. A ki 'nyaa fúɔ a wi 'jíin nɛ̀ tɛ́ni kɔ́ri káà nī luʔɔ nī gè, á siɛnnɛ pe 'yéri baa luʔɔ nyuɔ nɛ̄ gè. 3A wi 'kele sáa juu pe mɛ́ kàsiʔile nī, nɛ́ pe yɛ: «Ye- nyaa, tàfaliwɛ wáà yé yiri nɛ̀ sɛ́ni yatanʔara wáari. 4Bà sí wi ti wáari nɛ waa wè, a tàa sɛ́nì tuu koligo táanni gè, a sínjari 'yiri nɛ̀ ti júɔ. 5A tàa sɛ́nì tuu sìndari tiʔɛ nī, a tire 'fali nɛ̀ caanri nɛ̀ fìin, bɛ̀ tári sì 'puu baa sáa ki tiʔɛ nī gèʔ. 6Bà cɛngɛ kɛ́nì yiri nɛ wáari níɛ sórigi gè, a ti 'fali nɛ̀ waʔa, bɛ̀ nìre tiì cé jíin nɛ̀ kɛ́ dàala laamɛ nī bèʔ. 7A tàa sɛ́nì tuu wíire sunʔɔmɔ nī, a wíire ti 'yɛ̀ nɛ̀ ti cò. 8A tàa sɛ́nì tuu dàacɛnnɛ tiʔɛ nī, a tire 'sɛn: tìrige káà, yasɛnrɛ dabataan; kàa, yasɛnrɛ togotaanri; kàa, yasɛnrɛ togo nɛ́ kpɔrigɔ. 9A ngbúʔulo yē ŋìi nɛ̄, wi- ti lúʔu.»
Kɔri ŋìi ní Zezi wiī nɛ nyu kàsiʔile nī gèle
(Mar 4.10-12; Luk 8.9,10)
10A pìtɛnmɛnɛ pe 'kɛ́ nɛ̀ sɛ́nì Zezi yɛ wè: «Gáa nɛ̄ muɔ nɛ nyu nɛ́ pe ní kàsiʔile nī ?»
11A wi 'siɛnnugoro kɛn dè pe mɛ́ nɛ́ pe yɛ: «Yeli bèle, Nyìʔɛnɛ Kùlofɔligɔ ki kalarigɛlɛ ke cɛ́nmɛ kɛn bè yeli mɛ́, wiì sí ki kɛn bàli mɛ́ bèleʔ. 12Nɛ́ ki cɛ́n, a yakaa yē siɛn ŋíì mɛ́, pe bé ní wi kɛn, wi bé taa nìʔɛgɛ. Ŋìi sí wī yakaa fùn wè, cɛ̀ri ŋáà tíimɛ wī siɛn mɛ́ wè, pe bé wi suɔ wi mɛ́. 13Kire nɛ̄ mi nɛ nyu nɛ́ pe ní kàsiʔile nī, nɛ̀ taʔa gíi nɛ̄, piyē nɛ wéli, pe sí wè nyaʔaʔ; ngbúʔulo kiyē pe nɛ̄ pe lúru pe sí wè ti kɔri cɛ́ngi wèʔ. 14Gìi Kulocɛliɛ siɛnjuuliɛwɛ Ezayi wi cé juu nɛ̀ yaʔa gè, ki siɛnrɛ tire ti nyɛ́ni forigi ti nyɔgɔlɔ nī gèle siɛnnɛ bálì nɛ̄ bèle. Ki siɛnrɛ ti n'dɛ:
Yeli béri lúru,
yeli sǐ sí de ti kɔri cɛ́ngi wèʔ;
yeli béri wéli,
yeli sǐ sí de nyaʔaʔ.
15 Kùlo náà siɛnnɛ
pe funyɔ yi 'gbɛ̀n,
a pe ngbúʔulo ke 'lúʔu mabiɛn;
nɛ̀ pínɛ pe 'pe nyapigele tɔ́n gèle,
peli fǎri nyaʔa ke nīʔ;
peli ngbúʔulo ke fǎri lúruʔ;
peli funyɔ yi fǎri
siɛnrɛ ti kɔri cɛ́ngi wèʔ;
peli fǎga peli funyɔ yiʔɛ yèʔ, dí mi sí pe puʔɔʔ # 13.15 Koliyo 14-15 tiʔɛ nī gè, Eza 6.9-10 tire ti 'juu náʔa gè nɛ̀ yɛli nɛ́ girɛki siɛnliɛrɛ ní dè. .
16«Nɛ̀ sí ki taa yeli bèle, yeli wuʔu kiī tànʔa, bɛ̀ yeli nyapigele kiyē nɛ nyaʔa gèle, nɛ̀ pínɛ yeli ngbúʔulo kiyē nɛ lúru. 17Kányiʔɛ nɛ̄, m'bé ki juu yeli mɛ́, ki láa 'puu Kulocɛliɛ siɛnjuulo nɛ́ siɛnsinminɛ nìʔɛnɛ nɛ̄, bè gàa nyaa gè, gàa yeli nɛ nyaʔa gè; nɛ̀ sí ki taa piyè gbɛ̀nɛ ki 'nyaaʔ. Nɛ̀ pínɛ pe 'puu nɛ caa bè gàa lúʔu gè, gàa yeli nɛ lúru gè; piyè sí ki taa nɛ̀ lúʔuʔ.»
Zezi wi 'yatanʔarafɔli kàsiile kɔ̀n lè
(Mar 4.13-20; Luk 8.11-15)
18«Yeli bèle, ye- sí yatanʔarafɔli kàsiile lúʔu lè ye ni kɔri cɛ́n wè. 19Siɛn ó siɛn wi 'Nyìʔɛnɛ Kùlofɔligɔ siɛnrɛ lúʔu dè nɛ́ kò wiì ti kɔri cɛ́n wèʔ, Sìpiiwe wi nɛ̂ pɛn nɛ̀ pɛ́nì yatanʔara kɔ̀n dè siɛn wi fungo nī gè; bɛ̀ ki yē majo yatanʔara dáà pe 'tánʔa koligo táanni gè. 20Yatanʔara díì pe 'tánʔa sìndɛnigɛ nɛ̄ gè, tire 'nyaa siɛn ŋíì wi sî siɛnrɛ lúʔu dè níɛ fali nɛ̀ ti líɛ nɛ́ fundaanra ní wè, 21nɛ̀ sí ki taa ti nɛ̌ nìre wáa wi nīʔ, lɛ̀lɛ láà cɛ̀ri wuu wi sî puu ki siɛn wè. A wuʔɔgɔ sí kɛ́nì nɔ̀ wi nɛ̄ wè, nɛ́ parigɛ ní gè Kataanna Siɛnrɛ tire kɛnmɛ nɛ̄ bè, wi nɛ̂ fali nɛ̀ yiri tɛ́ngɛlɛ nī lè. 22Dìi ti 'tuu wíire nī dè, tire 'nyaa siɛn ŋíì wi sî siɛnrɛ lúʔu dè, á ki nɛ̂ nyaa duniya kasɔngilɔ nɛ́ lɔri tàanma ní bè, ti nɛ̂ wi cɔ̀ri; ti nɛ̌ sɛnʔ. 23Yatanʔara díì sí pe 'tánʔa dàacɛnnɛ nī lè, kire 'nyaa siɛn ŋíì wi 'siɛnrɛ lúʔu dè nɛ́ ti kɔri cɛ́n wè; wire nɛ̂ sí díɛ sɛn: tìrige káà, yasɛnrɛ dabataan; kàa, yasɛnrɛ togotaanri; kàa, yasɛnrɛ togo nɛ́ kpɔrigɔ.»
Sùɔrigɔ kàsiile lè
24A wi ní nɛ̀ kàsiile láà wáa nɛ̀ pe kɛn nɛ́ pe yɛ: «Nyìʔɛnɛ Kùlofɔligɔ kiī bɛ̀ nàguɔ wáà tíɛlɛ wi ní nɛ yatanʔajɛ̀nrɛ tári wi siʔi nī gè. 25Nɛ̀ ki yaʔa lɛ̀lɛ níì nī siɛnnɛ pe kɛ́nì sínɛ bèle, a nàguɔ wi leguu wi 'yiri nɛ̀ sɛ́nì sùɔrigɔ tánʔa baa yatanʔara nī dè, nɛ́ láʔa nɛ̀ kɛ́. 26Bà yatanʔara ti kɛ́nì yɛ̀ dè nɛ́ sɛn dè, a sùɔrigɔ míɛni ki 'yɛ̀. 27Bà tiʔɛfɔli wi baakuɔlɔ pe 'kɛ́ nɛ́ sɛ́nì ki 'nyaa mmɛ gè a pe koli nɛ̀ kɛ́ nɛ̀ sɛ́nì wi yɛ: ‹Kàfɔli, yatanʔajɛ̀nrɛ túʔu bɛ̀ʔ muɔ cé tánʔa baa muɔ siʔi nī gè ? Sùɔrigɔ kire sí kɛ́nì kɔ́n sé ?› 28A wi 'pe yɛ: ‹Leguuwo wire wi sɛ́nì kire kpíʔile.› A baakuɔlɔ pe sí jo: ‹Muɔ nɛ caa lé we sa ki kɔ́ligi ?›
29«A wi 'jo: ‹ʔéʔe, á kire laa a yeli sɛ́nì je sùɔrigɔ kɔ́ligi gè, yeli bága yafalidɛ táà fàri bè kɔ́ligi nɛ́ ki ní. 30Ye- ti yaʔa tiri pínɛ de liʔi bè pa nɔ̀ yaliire ti kún lɛ̀lɛ nī lè. A lɛ̀lɛ ni kɛ́nì nɔ̀ pe sa ti kún dè, m'bé ki juu ti kúnvɔlilɔ mɛ́ bèle bé pe yɛ: Ye- kíni ye sùɔrigɔ kire kɔni ye ki puɔ puʔɔlɔ puʔɔlɔ ye ki sórigo; yé sí yaliire koli dè ye sa nyɔ́gɔ m'mɛ́ síkanʔa nī.› »
Mutaridi pìige kàsiile lè
(Mar 4.30-32; Luk 13.18-19)
31A Zezi wi ní nɛ̀ kàsiile láà wáa nɛ̀ pe kɛn nɛ́ pe yɛ: «We bé gbɛ̀ Nyìʔɛnɛ Kùlofɔligɔ tɔ́nminɔ gè nɛ́ yatanʔabiige káà ní, pe 'ki ye mutaridi, a siɛn wáà 'ki líɛ nɛ̀ sɛ́nì ki tánʔa wi siʔi nī gè. 32Mutaridi pìige kire ki 'cɛ́ri yatanʔara ti mìɛni nɛ̄ dè. Nɛ̀ sí ki taa a ki gbɛ́nɛ̀ yɛ̀ gè, ki nɛ̂ kpàʔala naaguɔ yafalidɛ ti mìɛni nɛ̄ dè, nɛ̀ kò tiige; sínjari nìɛ waa nɛ tɛ̀ní ki lère nɛ̄ dè.»
Sìnvari kàsiile lè
33A wi ní nɛ̀ kàsiile láà wáa nɛ̀ pe kɛn nɛ́ pe yɛ: «Nyìʔɛnɛ Kùlofɔligɔ kiī bɛ̀ sìnvari tíɛlɛ, a cɛliwɛ wáà 'ti líɛ nɛ̀ ti nyaʔami míiniʔɛmɛ nī, a míimɛ pi mìɛni pi 'yɛ̀.»
Gáa nɛ̄ Zezi wiī nɛ nyu kàsiʔile nī gèle
(Mar 4.33-34)
34Zezi wi cé kele gálì ke mìɛni juu siɛnnɛ mɛ́ bèle kàsiʔile nī wī, wiì puu nɛ nyu nɛ́ pe ní kàsiʔile fùnʔ. 35A kire ki 'kɛn siɛnrɛ dáà Kulocɛliɛ siɛnjuuwo wi cé juu dè, a ti 'fori; wi cé jo:
M'bága mi nyuɔ múgu gè
bèri nyu kàsiʔile nī,
bèri kalarigɛlɛ jáari gèle,
gàli ke tíi nɛ̀ puu baa
duniya sélimɛ nɛ̄ bè # 13.35
Ŋún 78.2
tire ti 'juu náʔa gè. .
Zezi wi 'sùɔrigɔ kàsiile kɔ̀n lè
36Bà siɛnniʔɛmɛ pi kɛ́nì núgo bè, a Zezi wi 'kɛ́ kpáa mɛ́. A wi pìtɛnmɛnɛ pe 'pɛn wi kúrugu nɛ̀ pɛ́nì wi yɛ: «Sùɔrigɔ kàsiile ni kɔri tìɛ wè weli nɛ̄, sùɔrigɔ gáà muɔ 'jo ki 'puu siʔi nī gè.»
37A wi 'pe yɛ: «Ŋàa wi nyɛ́ni yatanʔajɛ̀nrɛ tári dè, Siɛn Pùɔ wire wī; 38duniya wire sí wī siʔi gè; yatanʔajɛ̀nrɛ tire 'nyaa Nyìʔɛnɛ Kùlofɔligɔ ki siɛnnɛ bèle, sùɔrigɔ kire sí yē Sìpiiwe wi siɛnnɛ bèle. 39Leguuwo ŋáà sí wi 'sùɔrigɔ tánʔa gè, gbòdolilo kàfɔli wire wī; yaliire líɛ lɛ̀lɛ lè, duniya kúɔjɛngɛ kire gī; bìli sí pe je ga yaliire líɛ dè, nyìʔɛnɛ tundunminɔ peli bīɛlɛ. 40Bɛ̀ sí yeli 'ki nyaa a pe 'sùɔrigɔ kɔni gè nɛ́ ki sórigo kàsun nī gè, bɛ̀ ki bága kpíʔile duniya kúɔjɛngɛ gè. 41Siɛn Pùɔ wi bága wi nyìʔɛnɛ tundunminɔ tórigo bèle, pe- pa kúrugodiʔɛlɛ ke mìɛni koli bè yige wi Kùlofɔligɔ nī gè, nɛ́ bìli mìɛni pe nyɛ́ni kakolido kpínʔini dè, 42bè ti wáa kàsun dìbige nī gè; kire tiʔɛ kire nī kɔnwaara nɛ́ gànʔana cérigige bága puu wè. 43Kire lɛ̀lɛ nī lè, siɛnsinminɛ bèle, peli béri nyíʔɛnɛ pe Tuu wi Kùlofɔligɔ nī gè bɛ̀ cɛngɛ tíɛlɛ gè. A ngbúʔulo yē ŋìi nɛ̄ wi- ti lúʔu.»
Lɔri làridɛ kàsiile lè nɛ́ kofii wori ní dè
44«Nyìʔɛnɛ Kùlofɔligɔ kiī bɛ̀ lɔri tíɛlɛ, á pe 'ti làrigɛ siʔi nī; siɛn ŋíì wi sɛ́nì ti nyaa dè a wi 'ti làrigɛ cígini. Bɛ̀ sí fundaanra ti 'cíi wi nɛ̄ dè, a wi 'kɛ́ nɛ̀ sɛ́nì wi kɔliyɛrɛ ti mìɛni pári, nɛ́ kɛ́ nɛ̀ sɛ́nì siʔi gáà suɔ gè.
45«Cígini Nyìʔɛnɛ Kùlofɔligɔ kiī bɛ̀ yapariwɛ tíɛlɛ, wi 'kɛ́ nɛ̀ sɛ́nì kofii cɛ̀nwɛ caa wè. 46Bà sí wi sɛ́nì kofii wáà nyaa wi ní lagbɛnrɛ wuu wè, a wi sɛ́nì wi kɔliyɛrɛ ti mìɛni pári nɛ́ kɛ́ nɛ̀ sɛ́nì wi suɔ.»
Jùɔ kàsiile lè
47«Nɛ̀ pínɛ Nyìʔɛnɛ Kùlofɔligɔ kiī bɛ̀ jùɔ kpuɔwɔ tíɛlɛ, a pe 'wi wáa kuʔɔjii nī wè. A wi 'luʔɔ yɛrɛ ti mìɛni felide pínɛ nɛ̀ kɔli. 48Bà sí jùɔ wi kɛ́nì nyì wè, a pe wi 'píle nɛ̀ yige luʔɔ nī gè nɛ̀ cáan luʔɔ nyuɔ nɛ̄ gè, nɛ́ tɛ́ni nɛ̀ cɛ̀nrɛ yori dè nɛ̀ le yalege nī, dìi ti wè káama wèʔ, nɛ́ tire wáa kàsɛngɛ nɛ̄. 49Bɛ̀ ki bága puu duniya kúɔjɛngɛ gè, nyìʔɛnɛ tundunminɔ pe bága pɛn bè pa siɛnpiile yori bèle bè yige siɛnsinminɛ nī bèle, 50bè pe wáa kàsun dìbige nī gè. Kire tiʔɛ nī gè kɔnwaʔa nɛ́ gànʔana cérigige bága puu baa.»
Lɔri fɔnrɔ dè nɛ́ lɔri liɛrɛ kàsiile lè
51A Zezi wi 'pe yúgo: «Yeli 'dàa ti mìɛni cò kìɛ ?»
A pe 'wi yɛ: «ʔaan.»
52A wi 'pe yɛ: «Fànʔa Siɛnrɛ sɛbɛcɛ́nwɛ ó sɛbɛcɛ́nwɛ wi 'kò Nyìʔɛnɛ Kùlofɔligɔ pìtɛnmɛwɛ wè, we bé gbɛ̀ wi tɔ́nminɔ nɛ́ nàguɔ wáà ní kpáapogofɔli, wi 'yafɔnrɔ yige wi lɔri nī dè nɛ́ yaliɛrɛ ní.»
Nazarɛti wuulo piyè tɛ́ngɛ Zezi nɛ̄ wèʔ
(Mar 6.1-6; Luk 4.16-30)
53Bà Zezi kɛ́nì juu nɛ̀ kúɔ nɛ́ pe ní kàsiʔile siɛnrɛ dáà nī dè mmɛ gè, a wi 'yiri baa kire tiʔɛ nī gè, 54nɛ̀ kɛ́ kàʔa gíì mɛ́ wi cé liɛ wè#13.54 Nazarɛti kàʔa ki 'puu (wéli baa 2.23; Luk 4.16). nɛ̀ sɛ́ni siɛnnɛ tɛnmɛ bèle pe tɛnmɛzaaya nī yè; a ki 'pe fungo wúɔ a pe 'jo: «Sé wi 'kɔ́n nɛ́ kire sìnjilige gáà ní gè, nɛ́ kakpoliyo fànʔa gáà ní gè ? 55Kátɛngbuɔnwɔ wi jaa wire túʔu bɛ̀ʔ nàguɔ ŋáà wè ? Wi yàa wire túʔu bɛ̀ʔ pe ye Maari wè, nɛ́ wi cɔninɔ ní bèle Zaki, nɛ́ Yusufu, nɛ́ Siimɔ, nɛ́ Zudi wè#13.55 Wéli baa Mat 12.46; Mar 6.3; Luk 3.23; Zan 6.42. ? 56Wi cɔninɔ pìcapigele, pe mìɛni pe túʔu wè bile nɛ́ we ní ? Sé sí wi 'kɔ́n nɛ́ dàa ti mìɛni ní dè ?» 57A kire 'fali nɛ̀ kò pe mɛ́ kúrugodiɛlɛ.
A Zezi wi sí pe yɛ: «Kulocɛliɛ siɛnjuuwo wi wè nɛ kpuʔɔrɔ tari wi kàʔa nīʔ, nɛ́ wi saʔa wuulo sunʔɔmɔ nīʔ.»
58A kire 'ki kɛn wiì kakpoliyo sáa kpíʔile baa ki tiʔɛ nī gèʔ, bɛ̀ piyè cé tɛ́ngɛ wi nɛ̄ wèʔ.
ទើបបានជ្រើសរើសហើយ៖
Matiye 13: sev
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
