Roman 15
15
Muihkam kupia lâka dauks, man kupiam lâka lika apia
1Bamna yawan kasak lukan lâka ra karna banhwi ba mita swapnikira nani swapnika ba wan karbanka pali baku brih twilki kaia sa, bara yawan wan kupia lâka baman lika luki kaia apia sa. 2Yawan kumi bani wan muihni kupia lâka daukaia sa, witin ba pain kabia dukiara bara kasak lukan lâka ra sin pâwbia dukiara. 3Kan Kraist pali sin ai kupia lâka baman plikras kan; sakuna, Ulbanka dîa aisi ba kat ai mapara takan: “Baha nani mita saura mai wi kan nani ba yang purira kauhan sa.”#Law 69.9. 4Bamna patitara piua wina dîa dîa Ulbanka ra aisin ba, baha lika yang nani ra ai smalkaia dukiara ulban, wihka bîla kaikaia lâka bri ba mita bara Ulbanka nani mita wan maisa nihki ba mita, wan kainara diara briaia ba luki kabia. 5Gâd sika wihka bîla kaikaia lâka bara maisa nihkan lâka wanki ba, bamna witin mita hilp mai munbia walkam wal sim baku baman luki kaia, Kraist Jisas tânka ba kat. 6Baku mika, man nani sut kumi baku prais, wan Dawan Jisas Kraist Gâdka ra bara Aisika ra sin mayuni kama.
Sturi yamni ba Ju apia uplika nani ra smalkan sa
7Baku bamna, man nani pana pana walkam ba muihkam baku bris, sim Kraist mita Gâd prana ra yawan wan brin ba baku. 8Yang dîa aisisna ba lika, Kraist balan Ju nani dukia daukaia, bara baku Gâd marikan sa witin mita wan damika nani ra pramis daukan ba tnata alkan sa, bara marikisa Gâd ba ai pramiska kat kasak daukisa. 9Kraist sin balan Ju apia uplika nani sin Gâd ra mayunaia ai kupia pihni ba mita, Ulbanka wi ba baku:
“Baha mita Ju apia uplika nani tilara dimi mamyunamni,
lawana nani sin man ninam ra aiwanamni.”#2 Sa 22.50; Law 18.49.
10Bara Ulbanka wala ra sin wisa:
“Ju apia nani, Gâd uplika nani ba aikuki liliam banhwi bas.”#Kli S 32.43.
11Plis wala ra sin wisa:
“Ju apia uplika nani sut,
¡Dawan ra mayuni banhs.”#Law 117.1.
12Prapit Aiseya sin ulban:
“Jesé kiamka wina urhwi bal takbia,
nisan nani pura wihtka aimakaia bal takbia,
baha nani sin witin ra bîla kaiki kabia.”#Ais 11.10.
13Bamna Gâd bui man nani ra bîla kaikaia lâka maiki ba, lilia bara kupia kumi lâka ni mai banhkbia, kan man nani sika witin ra kasak lukisma ba, bara bîla kaikanka sin uya maikbia Spirit Holikira karnika ba mita.
14Muihki nani, yang kasak daira walisna, man nani lika kupia yamni lâka bara diara tânka kaikaia lâka ni sin aibanhram pali sma, bara pana pana kupiam kraukaia lâka sin brisma. 15Sakuna naha wauhkataya na wal, yang sibrin âpu param pali diara tila nani man nani ra ulbisna, âmya tiwbia apia ba mata. Naha daukisna Gâd ai kupia yamni bâk adar aikan ba mita, 16Jisas Kraist dukia dadaukra baku Ju apia uplika nani tilara wark daukaia. Baha warkka ba lika Gâd sturka yamni swaki wan saki ba aisi smalkaia, Ju apia uplika nani ba Gâd ra prisant kumi baku yaka pain briaia dukiara, Spirit Holikira mita holi sakan bamna.
17Bamna Kraist Jisas ra kasak lalukra sna ba mita, âiyapah pali Gâd warkka daukisna. 18Kraist yang bâk diara daukan ba purara kau pura praki lika aisamna apia, Ju apia uplika nani ba yarka Gâd bîla wali daukaia dukiara. Naha na ban tnata kat takan, bîla aisi ba baman apia, kuna diara dauki ba mita sin. 19Wark aihka nani bara sain nani karnika ba ni, Gâd Spiritka karnika ba mita sin, Kraist swaki wan saki sturka ba baku natka ra smalkaia sip kapri, ban Jerusalem wina bara sim baku plis wala nani sut ra, bara Iliria tasbaya kat sin. 20Baku sika trai kaikri swaki sakan lâka sturka ba smalkaia, Kraist nina kau walras pliska nani ra, upla wala mita pat playa kum bapan purara utla paskamnara sîa. 21Sakuna Ulbanka ra wi ba baku:
“Witin ai sturka walras kan uplika nani bui kaikbia,
bara baha nani witin tânka walras kan ba mita sin ai tânka pain bribia.”#Ais 52.15.
Pal ba Rom ra waia lukisa
22Naha tâka mita, aima manis yang bui man nani mai kaikaia waia lukuna ba ra, sip apia takri.#Ro 1.13. 23Kuna nanara naha tasbaya sut ra warkki ba sut daukri sa, bara pat mani ailal man nani wal kan ai dauki kan bamna, 24yang lukisna Ispail kuntrika ra waia impakamna, man nani mai kaikaia, bara aikuki lilia aitani bribia ba ningkara, man nani yabalki daukma Ispail kuntrika ra waia. 25Sakuna nanara pali yang lika Jerusalem ra auna, bara prisant kumi sin bri auna wan muihni nani bahara banhwi ba ra yaia. 26Kan Macedonia wina bara Acaya uplika nani sin lukan lalah sakaia, bara wan muihni umpira nani Jerusalem ra bâra banhwi ba nani ra blikaia.#2 Ko 16.1-4. 27Bamna witin nani mapara naha daukaia ba aitani lukata, kan witin nani lika baha uplika nani ra tras bri kan yaia. Ju uplika lalukra nani mita spirit warkka pain bukan ba Ju apia uplika nani aikuki yui brin, bara nanara aitani kan Macedonia bara Acaya uplika nani Ju lalukra nani ra wîna tara hilpka ba yaia.#2 Ko 9.11. 28Baku bamna, naha bisniska na sut daukamna bara lalahka na Jerusalem lalukra nani bâra ba mihta ra mangkamna ningkara, yang Ispail kuntrika ra waia impakamna ba ra, baha piua ra man nani sin mai kaiki luamna. 29Man nani ra wamna ba ra, kasak daira walisna, Kraist mita yamni wan muni ba smalkanka ni ai yamnika ni aibanhbia.
30Muihki nani, yang bui man nani ra mamkabisna wan Dawan Jisas Kraist ba tânka bara Spirit wina latwan lâka wanki ba dukiara sin, aiklabanka ra yang wal asla taki kama, bara yang maita sin Dawan ra puram sunma. 31Gâd ra puram suni makabi bas, lukras uplika nani Judia ra banhwi ba mihta wina ai dakbi sâkbia, bara naha prisantka Jerusalem ra wan muihni nani ra brih auna na, baha nani pain luki bribia, 32bara baku mika, Gâd want sa kaka, man nani ra liliakira wamna, bara mai kaiki ris sin brimna. 33Kupia kumi Gâdka ba, man nani sut wal kabia. Baku kabia.
ទើបបានជ្រើសរើសហើយ៖
Roman 15: MSKTU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2010 Bible Society in Nicaragua
