Iruruputo 16
16
Timoti ko lulueko Paula ni Sailasi
1Ni Paula ni Sailasi ta qo olake Debi ni sai kazo Lisitara peuru kale sai kala lotu maba o evakoi o ṉi ta Timoti va kikelani. Voko niania melai kama pado lotu maba, kota Jiu ama, melai vovo mama ta Quriki ala. 2Ni kiadamu seke tuvevo putani Lisitara ni Aikoniami peuru kale ke evani ta Timoti ta kala uri ala maba va kikelake. 3Nio vo Paula ta ova zariake odievo vo Timoti tu vota o luluevo vo kiolake, so sole vota o movevake vo. Vota so o movevake vo ako kiadama Jiu amu seke evani koa omuqa peuru kale amu ta lula ke paqumuke ta Timoti vo Mama ta Quriki ala sole.#16:3 Timoti vo mama ta Quriki ala pui Jiu ala so sole vo Timoti ta pui opa movei molele ala keru. Matu tapata tu pui movemove ala okai bazubazutou ko Uri ama Bazu koa omuqa peuru kale ama Jiu amu kasi. Sokale avo inio Paula ta o movevake saita. 4Ni so keru sea zouke ke keve keru peuru poso kale, inio seta ke kati olake ko bazu seke tuvevo putani kasi se apositolo madu ni lotu tanatanamu Jerusalema ke evani ke vatoekema quli ko bazu, ni seta kemai bazuekake se tu seta ke zoriko koa bazu poso. 5So sole sea lotu qoqono poso ta ke pizatake seko oqu kale ni kubo elole kebeta olake kiadama ṉaniu poso kale.
Paula ko uloito Toroasi peuru kale
6Ni seta keta olake koa Pirijia ni Qelesia ranama peuru poso kale kude, ako vo Tabu ala Auvana ta pui o zariemake se tu seta kekai bazubazuto ko Uri ama Bazu Eisia ranama peuru poso kale sole. 7Ni so keru se kekai baroi keru ko Maisia rana ko vado, seta ke madoekake tu seta ke zio Bitinia rana, melai Jisu vo Tabu ala Auvana ta pui o zariemake se. 8So sole seta sidopua zio ke evake Maisia kude, ni ke olake Toroasi. 9Ni koa ipu kale inio Paula ta o keake kama pado kelokelozato. Ni koa kelokelozato kale vota o veake kala Masedoniala maba vo obeta lojoani ni o pasevani vo, vo eri kiolani, “Kua koi Masedonia peuru poso kale tauvenelole eṉe!” kiolani. 10Eria kelo o evake vo Paula koa kelokelozato, ti ṉebeta zarizari a ke inio tu ṉe zio Masedonia, ako eṉeta ṉeqai nianiiake ta vo Baṉara inio o nokaeṉela eṉe tu ṉeqai bazubazuto ko Uri ama Bazu sai ke evani maba poso kasi kiṉelake sole.
Lidia ko lilizio Pilipai peuru kale
11Ni eṉeta ṉe dadaoke tepe vaka kale Toroasi azo ni sidopua pakeo ṉeda evake Samotaresi udu kale, ni koko raneo kale ta Neapolisi peuru kale ṉe baroake. 12Sai kazo inio eṉeta ṉe qailake kiṉu kale ni ṉe baroake Pilipai Masedonia tanala kuleto ala matu peuru kale, kubo Romu amu ke evekoi. Ni eṉeta ṉe evake sai kama ṉaniu poso. 13Ni kala Sabati ṉaniu kale inio eṉeta ṉeda saqorake koa peuru ko veutu kale kude ni ṉeda olake kala orori ko kama rana, sai eṉe ṉe qerukeruekekoi ta koa zae ta kama pado zae sai Jiu amu ke roveakoi padoilo vararaitole. Eṉeta ṉe bapuake ni ṉe mati pesipesitake sea rekoreko poso se sai ke padoini vararaitole. 14Ni kama pado se azo koko taṉela viqema eṉe ta Lidia. Kota Taiataira ama rekoreko, ko kokai tatabaraovima ko soqu domu ama suma. Ni kota kama pado rekoreko koko ilusivema vo Baṉara, ni vo Baṉara ota ka veukeni koko kerukeru tu ko didieko vo Paula o kasekema quli. 15So sole ko ni se koko pade kale ke evani ta ke bapitaiso puivake, ni koko tova kota ko paseṉelake eṉe, ni eri kikolake, “Kuemo ni pa emo saita aṉako pade kale, aṉata tuvevo avole a duvevo puevani lala vo Lekasa kimela ta!” kikolake. Ni kota ko ṉelai matu titiake eṉe sole eṉeta ṉe olake koko pade kasi.
Pirito pade kale Pilipai peuru kale
16Ni omadeu ṉaniu kale eṉe ṉe qeve keru vararaito ko zaekale, eṉeta ṉe doraekake kama pado mabaku ama sinaqu rusu ziolo sama, koko roveako pidokiko koko ereilo ama quli. Koa iruruputo kale inio kota koma koake matu kubo takula koko lekasa poso. 17Ni kota ko lulueṉelake Paula ni eṉe upaupatole ni eri kikolake, “Nia maba poso inio vo Matu Raura kala Baṉara ko nabulu madu! Ni se inio ke mela kasekani me pakio ko keve!” kikolake. 18Ni kota so pado kobeta kake kubo ṉaniu, ti matu kaikua nio kobe ivake vo Paula so sole vota oka lilitake ko ni eri kiolake koa ziolo kasi, “Vo Jisu Karisito ko ṉikale aṉata a bazueṉa ṉo tu ṉota saqore kokale azo!” kiolake. Ni koa ziolo ta kota saqorake koa taku kale koa sinaqu rusu kale azo.
19Ni so keru koko lekasa poso ke paqumuka keru se takula kekai koako keve ko paito, seta ke saputikake Paula ni Sailasi ni seta ke rajaekake nioqa maketi ko zaekale tanatanamu ko tanama kale. 20Ni seta ke kati kuevake nioqa koa peuru kale ama omuqa Romu ama titizato ko maba kidi kasi ni eri kikelake, “Nioqia omuqa maba kidi ta Jiua nioqa, ni nioqata qo ereka ko tapata animeko peuru kale. 21Nioqata qokai nianiiekata ko edoloma bazu koko bikoirikako animeko bazu; ako animeta Romu amu mela sole, ni anime kasi ta pui ko zarizia tu zoriko soama bazu,” kikelake. 22Ni koa padopadoilo ta kekai zomanake Paula ni Sailasi kai kasakeo seko ruqe kaseko kale nioqa.
Ni nioqa titizato ko maba kidi ta qo bazuemake se tu seta keta ka rotieko Paula ni Sailasi ko sabosabo nioqa tonama ni seta ke sisiparuekake nioqa. 23Ni nioqako pazoko ko tova, seta ke kati olake nioqa pirito pade kale ni seta ke bazuevake vo pirito pade o kati vailani tu vota o kati vinavinato tibulo nioqa, va kikelake. 24Ni vo o viqa keru koa bazu vota o kati olake nioqa pirito pade kale ni ota ka piriekake nioqako kiti omuqa duki ama papani kiti ko purapura sama ko tiania.
25Nio ipu tiania vasi inio Paula ni Sailasi ta qo vararaitake ni qokai keraoke kama lotu kera Baṉara kasi, ni koa pirito pade kale amu ta keta ka didiekake ko. 26Ni ota podoloa koi matuma nunu ta ko nunuqataekake ko pirito pade ko vola ni kiadama koko tibulu ta kota ka veukaziake, ni koa pirito pade kale amu ko piri ta kota ma rupasiake. 27Nio koa nunu ta ko toirativake koa pirito pade o kati vailani, ni vota o keake koa pirito pade ko tibulu poso ta lula veukaveuka muli, ni voko kerukeru kale ta seke piriziani ta lula keta soqoiva muli kiolake, so sole vota o ravuzikake voko benisi ni ota vouvailo o ṉavi kiolake. 28Melai Paula ta o velavelaoke matuma kora kale ni eri kiolake, “Ṉota pui niumailo ṉo ṉavi! Eṉea kiada ṉela ta ṉebeta eva muli koi sole!” kiolake.
29Nio koa pirito pade o kati vailani ta o bazuevake kala tu o kati kilo ko juke, ni taukavole ota amaqeake, ni tipetaipe ota evake ni ota piake Paula ni Sailasi ko kiti kasi. 30Ni vota o kati saqorake nioqa kupekupe, ni eri kiolake nioqa kasi, “Lekasa kidi, loma quli a erekou ni aṉata a bakiovou?” kiolake.
31Ni nioqata qo vati tiorikake vo ni eri kiqolake, “Tuvevo iva vo Lekasa Jisu nio ṉota ṉo bakiovou, ṉo ni ṉoko saidi ni ṉokale amu ṉoko pade kale ke evani,” kiqolake. 32Ni nioqata qokai bazubazutake vo Baṉara ko bazubazu vokasi ni kiadamu seke evani voko pade kale. 33Ni koa taku kale koa ipu inio vo pirito pade o kati vailani ta o odiekake nioqa ni ota ka pusaekake nioqa ko tabi, ni vo ni kiadamu voko pade kale ke evani ta maba koa taku kale inio bapitaiso keta evake. 34Ni vota o kati olake Paula ni Sailasi voko pade kale ni o niaekake ko sailao ni qo vuatake. Ni vo ni vokale amu ta keta matu zoleike, ako seta ke tuvevo puevake vo Baṉara sole.
35Ni koko raneo kale inio nioqa Romu ama titizato ko maba kidi ta qo soroekake nioqako omuqa nabulu bazu sate ko eri kikolako, “Zariekomo nioqa tu qo zio,” kio sama.
36So sole vo pirito pade o kati vailani ta o bazuevake vo Paula, ni eri kiolake, “Nioqa titizato ko maba kidi ta bazu qo soroeka tu ṉo ni Sailasi ta qe rupasiovou kikolako. Sole qeta qe zolailou erisaṉa, ni olako bule kale,” kiolake.
37Melai Paula ta eri kiolake nioqako omuqa nabulu kidi kasi, “Puliako nioqa titiziqelo eqe inio nioqata qo pazoqelala sea kiadamu ko ubutiania, ni eqeta Romua qela#16:37 Romu ko bazu kale ta pui kopa zariziovi tu ke pazomo Romu amu puliako madoemo titizikinio kale. inio! Melai nioqata qo soroemala ni ke vaeqelala pirito pade kale. Ni erisaṉa ta nioqata qo qelai zaria eqe tu nioqata qo soroeqelo eqe moizavole. Eqeta maba qe lupa so! Qo ṉavi Romua nioqa titizato ko maba kidi qo kilo tu qopa saqoriqelo koi kazo,” kiolake.
38Nio nioqa omuqa nabulu ta qokai bazutake koa pesio poso, ni so keru nioqa Romua nioqa titizato ko maba kidi qo viqa keru Paula ni Sailasi ta Romua nioqa inio kio, nioqata qota matu ṉake. 39So sole nioqata qo olake ni qopa kai eraeraoke nioqa; ni nioqata qo saqorikake nioqa pirito pade kale azo, ni nioqata qoka titiake tu nioqata qo vaeko koa peuru. 40Ni Paula ni Sailasi ta qo vaekake ko pirito pade ni qota olake Lidia ko pade kasi. Sai nio nioqata qo toraemake seke tuvevo putani, ni nioqata qo katimake se kama zuvarato sama pesio, ni qota olake.
ទើបបានជ្រើសរើសហើយ៖
Iruruputo 16: BLBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in the Bilua language, Solomon Islands © The Bible Society of the South Pacific, 1995.
