मत्ती 19
19
बैईदाऊअ दैणें बारै ईशूए शिक्षा
(मरकुस 10:1-12)
1ज़ांऊं ईशू इना गल्ला करी मुक्कअ, ता सह लागअ गलील लाक्कै का हांढदअ; संघा पुजअ जरदण नदी पारा बाखा यहूदा लाक्कै। 2ता ईशू पिछ़ू आऐ बडै भारी लोग, और ईशू किऐ तिंयां हर दुख तकलिफी का दूर।
3फरीसी पंथे लोग बी आऐ तेखअ ईशू सेटा, संघा लागै तेऊ इहअ पुछ़ी परखदै, संघा लागै तिंयां ईशू लै बोलदै “हरेक गलती पिछ़ू कै मर्धा आपणीं बेटल़ी छ़ाडणीं ठीक आसा?” 4ईशू दैनअ तिन्नां लै ज़बाब, “तम्हैं कै इहअ पहल़अ निं आथी कि ज़ुंणी तिंयां बणांऐं, तेऊ बणांऐं तिंयां शुरू ई का मर्ध और बेटल़ी; संघा बोलअ तिन्नां लै इहअ कि (मूल़ 1:27, मरकुस 10:6)
5 “एते ई बज़्हा रहणैं तिंयां आपणैं आम्मां-बाप्पू का ज़ुदै ज़िहै आपणीं बेटल़ी संघै, और तिंयां दूई हणैं एक देही? 6तैही निं तिंयां ऐबै दूई देही आथी पर तिंयां रहा एक देही बणीं। इहअ करै ज़ुंण परमेशरै ज़ोल़ै दै आसा तिन्नां ज़ुदै करदै निं तम्हैं लागा।”
7तेखअ बोलअ तिन्नैं ईशू लै, “तै परमेशरे गूर मुसा लिखै दै बधाना दी इहअ किल्है आसा लिखअ कि बैईदाऊअ लिखी करै सका आपणीं बेटल़ी छ़ाडी?”
8ईशू बोलअ तिन्नां लै, “मुसा पल़अ एते तैणीं लिखणअ कि थारै मन तै काठै हुऐ दै, ज़ै तम्हां मनणअ ई नांईं त आथी; तै दैनअ तेऊ इहअ हुकम कि बेटल़ी लै दुखा दैणैं का दैआ तेसा बैईदाऊअ दैई करै छ़ाडी। पर शुरू का निं इहअ बधान आथी त।
9 “पर हुंह बोला तम्हां लै इहअ कि ज़ुंण बी कंझ़रनै का सुआई किज़ू होरी गल्ला पिछ़ू आपणीं बेटल़ी छ़ाडी करै दुजी संघा बैह करे, सह करा कंझ़रनेओ पाप। ज़ुंण छ़ाडी दी बेटल़ी संघै बैह करा, सह बी आसा कंज़रअ।”
10तेखअ च़ेल्लै बोलअ ईशू लै, “ज़ै इहअ आसा, तै आसा बैहा करनै का एही रहणअ ठीक।”
11ईशू बोलअ तिन्नां लै, “सोभ निं एसा गल्ला मनी सकदै, एता सका सिधै तिंयां मनी ज़हा लै परमेशरै एता मनणैंओ दान आसा दैनअ द। 12कई आसा हुऐ ज़ल्मां ओर्ही दपुर्षअ। कई आसा इहै ज़ुंण मणछै आसा दपुर्षै बणांऐं दै। पर कई आसा इहै ज़ुंण स्वर्ग राज़ा लै आसा दपुर्षै बणैं दै। ज़ुंण एसा गल्ला मनी सका सह मनें।”
लान्हैं लै बर्गत
(मरकुस 10:13-16; लुका 18:15-17)
13लोगै आणै लान्हैं ईशू सेटा कि तिन्नां दी हाथ डाही करै प्राथणां करे, पर च़ेल्लै लागै तिन्नां पिछ़ू रहणा लै बोलदै।
14ईशू बोलअ तिन्नां लै, “लान्हैं दैआ मुंह सेटा लै एछणैं, इना लै निं नांईं करा, किल्हैकि इना लान्हैं ज़िहै लोगो ई आसा स्वर्गो राज़।” 15तेखअ दैनी ईशू तिन्नां लान्हें मुंडै हाथ फेरी करै तिन्नां लै बर्गत। तेखअ लागअ तिधा का हांढदअ।
सेठ ज़ुआन मणछ और सदा रहणैं आल़ी ज़िन्दगी
(मरकुस 10:17-31; लुका 18:18-30)
16ता एकी मणछै बोलअ ईशू सेटा एछी करै, “हे गूरू, हुंह इहअ किज़ै भलअ करूं ज़ेता करै हुंह सदा रहणैं आल़ी ज़िन्दगी लै डेऊई सके?”
17ईशू बोलअ तेऊ लै, “तूह मुखा भलाईए बारै किल्है पुछ़ा? परमेशरा सुआई निं होर कोहै बी भलअ आथी। पर ज़ै तूह सदा रहणैं आल़ी ज़िन्दगी लै डेऊणअ च़ाहा, तेता लै कर तेऊओ हुकम मनी।”
18तेऊ बोलअ ईशू लै, “कुंण ज़िहअ हुकम?”
ईशू बोलअ तेऊ लै, “हत्या निं करनी, नां कंज़रै हणअ, च़ोरी निं करनी, झ़ुठी गवाही निं दैणीं। 19आपणैं आम्मां-बाप्पूओ करनअ अदर और होरी लोगा लै बी करै आप्पू ज़ेही झ़ूरी।”
20तेखअ बोलअ तेऊ ज़ुआन मणछै ईशू लै, “इना गल्ला मना हुंह होछ़ी उझै! ऐबै मुंह दी कै कामीं आसा?”
21ईशू बोलअ तेऊ लै, “ज़ै तूह सिध्द हणअ च़ाहा, तै डेऊ, और आपणीं धन-माया बेच़ी करै बांड गरीबा दुखी दल़िदरा लै। ताह भेटणअ स्वर्गै धन, संघा आप्पू लाग मुंह पिछ़ू हांढदअ।”
22एसा गल्ला शूणीं हुअ सह ज़ुआन मणछ बडअ भारी दुखी, किल्हैकि सह आसा त बडअ भारी सेठ।
23तेखअ बोलअ ईशू आपणैं च़ेल्लै लै, “हुंह खोज़ा तम्हां का सत्त कि धन-माया आल़ै मणछो आसा स्वर्ग राज़ा दी डेऊणअ बडअ कठण। 24भी बोला हुंह तम्हां का इहअ परमेशरे राज़ा दी सेठा आल़ै मणछो डेऊणैं का सान आसा ऊँटो सिऊंणीए पाशी बाती निखल़णअ।”
25इहअ शूणीं करै हुऐ च़ेल्लै रहैन “एऊ साबै निं च़ाल्लअ कोहिओ उद्धार हई या तै कुंण सका स्वर्गै डेऊई?”
26ईशू बोलअ तिन्नां बाखा भाल़ी करै, “ज़ुंण मणछे भलै नांईं हई सकदअ, सह सका परमेशरे भलै हई।”
27एता लै बोलअ पतरसै, “भाल़, हाम्हैं ता आसा गऐ दै सोभ गल्ला छ़ाडी करै ताह पिछ़ू एछी, तै हाम्हां किज़ै भेटणअ?”
28ईशू बोलअ तिन्नां लै, “हुंह खोज़ा तम्हां का सत्त कि नऊंईं पोस्ती दी ज़ेभै हुंह मणछो शोहरू आपणैं प्रतपे राज़गादी दी बेशणअ, ता तम्हैं बी ज़ुंण मुंह संघै रहै, तम्हां बी करनअ बारा राज़गादी दी बेशी करै इस्राएले बारा गोत्रो न्याय। 29ज़ुंणी बी मेरी तैणीं आपणैं घर-बण, भाई-बैहण, आम्मां-बाप्पू, शोहरू-माठै, खेच-खहल़, मेरै नांओंऐं छ़ाडे, तेऊ भेटणअ एसा ज़िन्दगी दी तेता का बी खास्सअ फल ज़ुंण तेऊ का पिछ़ू छ़ुटअ और तेऊ लै हणअ सदा रहणैं आल़ी ज़िन्दगीओ हक। 30पर बडै भारी आसा ज़ुंण आजू आसा, तिंयां हणैं पिछ़ू। ज़ुंण पिछ़ू आसा तिंयां हणैं आजू।”
ទើបបានជ្រើសរើសហើយ៖
मत्ती 19: OSJNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This work is licensed under Creative Commons Attribution-ShareAlike 4.0 License.
