MARIKO 3
3
Yesu Yahonyinya Mundu Walema Mukhono
(Mat 12:9-14; Luka 6:6-11)
1Yesu yinjila mu lisinagogi, mwa mundu wali niyalema mukhono yali nali. 2Vandu valala vaheenzeshitsa Yesu valole niiva alamuhonyinya khulitukhu li Lisabato, nikanyalikha vamuyaale. 3Yesu yavoolela mundu mwenoyo, “Hamba imbeli inu.” 4Yesu yavareeva, “Malako keru kavoolanga khukhole shina khulitukhu li Lisabato? Khukhole vindu vilahi inoho vindu vitamanu? Khuhonyinyi vulamu inoho khwiira?” Navutswa vahonjela vutswa. 5Yesu yaheenza muvo nu vurima navavelelela shichila vali vachinji mirwi mikali, navoolela mundu mwenoyo, “Kololoshitsa mukhono kwokwo.” Mundu mwenoyo yakukololoshitsa, nu kuhona. 6Vafarisayo vasimukha nivarula mu lisinagogi nivakana vwangu na vandu valala varulanga mu mukaanda kwa Herode, khandi nivaloshitsa khuli vanyala khwiira Yesu.
Shituma shia Vandu Himbi khu Inyanza
7Yesu nende veechi veve vasimukha nivatsia khu Inyanza ya Galilaya; khandi shituma shikali shia vandu nivamulonda. Vali nivaruli mu tsisomo tsia Galilaya nende Yudeya, 8Yerusalemi, mu lusomo lwa Idumeya, khuluveka luli ivukwi wu Muchela kwa Yorodani, mu mataala kali himbi Tiro nende Sidoni. Vandu venavo voosi vitsa khulola Yesu, shichila vali vahulila makhuva khulondokhana khu vindu via yali nakholanga. 9Yesu yavoolela veechi veve vamurecheshele liaro, shichila vandu vali nivamuminanga; 10yali uhonyinyi vandu vanyishi; khali yavo voosi vali nivalwala viminilitsanga nivenya khumutiilakhu. 11Lwa vandu vali na matimoni muvo valolanga Yesu, vakwitsanga hasi imbeli wewe, nivalaanjilila, “Uli Mwana wa Nyasaye!”
12Yesu yasiomela matimoni kavuli khuvoolelakhu mundu wosi ye ni viina.
Yesu Yarovola Veechi Likhomi lilala na Vavili.
(Mat 10:1-4; Luka 6:12-16)
13Yesu yasimukha natsia khunina khu shikulu, nalaanga vandu va yenyanga, navo nivatsia khuye. 14Yesu yarovola likhomi na vavili, vayalaanga varumwa, navavoolela, “Murovole munonde; khandi niitsa khumuruma khutsia khwilwatsa; 15na munyi muliitsa khuva nu vunyali vu khukhunga matimoni.” 16Yava navo va yarovola likhomi na vavili: Simoni (Yesu yamukulikha lira Petro); 17Yakobo nende amwavo wewe Yohana, nivali vaana va Zebedayo, (Yesu yavakulikha lira Boaneregesi, kavoolanga “Vahilikananga khuli likulu)” 18Andereya, Filipu, Batsolomeyo, Matayo, Tomasi, Yakobo mwana wa Alufayo, Tatayo, Simoni wakwanilanga shivala shieshie, 19nende Yuda Isikarioti, watsama Yesu.
Yesu nende Belezebuli
(Mat 12:22-32; Luka 11:14-23; 12:10)
20Nalwo lwa Yesu yasimukha natsia ingo. Shituma shikali shia vandu vitsa khandi nivakana halala, khali Yesu nende veechi veve nivavula vwiyangu vukhulia. 21Lwa vandu vi inzu yavo vahulila vandu nivavoolanga, Yesu ukwili mulalu, vasimukha nivatsia khumuvukula. 22Vechitsi va Malako valala vali nivaruli Yerusalemi vavoolanga, “Belezebuli ali muye! Mukali wa matimoni neye umuheetsanga tsingulu tsiu khukakhunga.” 23Khulwa yako, Yesu yavalaanga ha yali nali navareevela mu tsinganu: “Shetani yakhanyala ndina khukhunga Shetani weshie? 24Niiva shivala shilavukhana mu vituma vikwananga viene khuviene, shivala shienesho shishinyala khuhindila tawe. 25Niiva vandu vi inzu valiitsa khwavukhana mu vituma vikwananga viene khuviene, vandu vi inzu yeneyo valiitsa khuyongovela. 26Khulwa yako, niiva vwami vwa Shetani vuliitsa khwavukhana mu vituma, vuliitsa khuvula khuhindila; navutswa vuliitsa khusalana nu khuvwaho.
27“Mundu avulakhuho unyala khwinjila mu inzu yu mundu wi tsingulu, amunuuli vindu vievie, nakharaanji khuvoha mundu wi tsingulu mwenoyo; khwachinguli inzu yeye.”
28“Muvoolelanga kilikali ndi, vandu vanyala khusemehwa khurula mu vwoni vwavo vwosi nende vindu vitamanu via vavoolanga khu Nyasaye; 29navutswa mundu uvoolanga shindu shitamanu khu Roho Mutakatifu, aliitsa khuvula khusemehwa; shichila nu vwoni vunyala khuvula khusemehwa”
30Yesu yavoola ndio, shichila vandu valala vavoolanga, “Litimoni lili muye.”
Mama wa Yesu nende Vaana Vanga Yesu
(Mat 12:46-50; Luka 8:19-21)
31Mama wa Yesu nende vaana vanga Yesu vatukhaho. Vasinjila ilwanyi wi inzu, nivarumana likhuva venyanga khulola Yesu. 32Vandu vali nivikhale himbi khu Yesu vamuvoolela, “Lola, mama wowo, vamwavo vovo, nende vambotso vovo vali ilwanyi, khandi venyanga khukhulola.”
33Yesu yavareeva, “Ni viina mama wanje? Ni vanga viina vaana veru?” 34Yaheenza mu vandu vali nivikhale himbi khuye, navoola, “Loli! Woyo neye mama wanje nende vamwavo vaanje! 35Mundu wu kholanga lienya lia Nyasaye neye amwavo wanje, mbotso wanje, nende mama wanje.”
ទើបបានជ្រើសរើសហើយ៖
MARIKO 3: LLLCATHOLIC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society of Kenya, 2013