Malu Menza 8
8
1Shawule uvua muanyishe pende lufu lua Stefane alu.#8.1 Fuanyikija ne 22.20.
Shawule udi ukengesha Tshisumbu tshia bena ditaba
Dituku mene adi, kutuadijabu kukengesha bikole Tshisumbu tshia bena ditaba tshivua mu Yerushalayime. Bena ditaba bonsu kutangalaka. Kuyabu mu buloba bua Yudeya ne bua Samariya. Bapostolu kudishadila. 2Bantu balamatshi ba Mvidi Mukulu kujika Stefane. Kudilabu bikole bua lufu luende.
3Shawule uvua wenza muende muonsu bua kubutula Tshisumbu tshia bena ditaba. Uvua upita ku nzubu ku nzubu, ukuata balume, ukuata bakaji, ubela mu lukanu.#8.3 Fuanyikija ne 22.4-5; 26.9-11.
Filipe udi umanyisha Lumu lua Disanka mu Samariya
4Bantu bavua batangalaka, bavua bendakana miaba yonsu, balongesha Lumu lua Disanka. 5Filipe kuya mu tshimenga tshikulu tshia Samariya,#8.5 tshimenga tshikulu…: mu mikanda mikuabu ya kale, mbafunde amu: tshimenga kampanda. wenda ulongesha bena mu tshimenga ne: Kristu wafiki! 6Bantu bavule bavua bateleja ne ntema malongesha a Filipe, bualu bavua bumvua lumu lua bishima bivuaye wenza, babimona kabidi ne abu abidi. 7Bualu mikishi mibi ya bungi ivua mikuate bantu, ivua ipatuka, yela mbila mikole. Bena tuneke bavule ne batebuki bavua basanguluka. 8Nanku bantu bavua basanka bikole mu tshimenga atshi.
9Mu tshimenga amu muvua muntu, dina diende Simone. Ukavua musombemu bidimu bivule. Uvua muena dialu, ukemesha bena Samariya. Uvua udiamba ne: ndi muntu muneme. 10Bantu bonsu, bana ne bakulumpe, bavua bamuteleja ne ntema, bamba ne:
— Muntu ewu ke bukole bua Mvidi Mukulu. “Bukole bunene,” mutudi tuamba, ke budi munda muende.
11Nanku bavua bamuanyisha, bualu uvua ubakemesha matuku mavule ne midimu yende ya dialu. 12Kadi Filipe mumane kubakengesha Bukalenga bua Mvidi Mukulu, kabidi ne bukole bua dina dia Yezu Kristu, kuitababu Lumu lua Disanka. Kubatuaye mu mayi, balume ne bakaji. 13Simone kabidi kuitaba. Kumutuabu mu mayi. Kushalaye pabuipi ne Filipe. Uvua ukema bua bishima binene ne malu a dikema bivua bienzeka, yeye mumone.
14Bapostolu bavua mu Yerushalayime, bumvua ne: bena mu Samariya mbitabe muaku wa Mvidi Mukulu, kubatuminabu Petro ne Yowanane. 15Bobu bamane kufika mu Samariya, kutendelelabu Mvidi Mukulu, bua bena ditaba bapete Mueyelu wa Tshijila. 16Bualu Mueyelu wa Tshijila kauvua muanji kupuekela nansha muntu umue. Kadi bavua babatua amu mu mayi mu dina dia Mfumu Yezu. 17Nenku Petro ne Yowanane kubatenteka bianza. Kupetabu Mueyelu wa Tshijila.
18Kadi Simone umona ne: bena ditaba mbapete Mueyelu wa Tshijila, bualu bapostolu bavua babatenteka bianza, kutuadilaye Petro ne Yowanane makuta, 19ubalomba ne:
— Mpeshayi kabidi bukenji ebu, bua muntu yonsu undi ntentekela bianza, apete Mueyelu wa Tshijila.
20Kadi Petro kumuandamuna ne: — Wewe ne makuta ebe, nubutuke! Bualu udi wela meji ne: dipa dia Mvidi Mukulu tudi mua kudisumba ku makuta! 21Wewe kuena mua kukuata netu mudimu nansha kakese, bualu muoyi webe kawena mululame kumpala kua Mvidi Mukulu. 22Lekela meji mabi auvua nawu. Utendelele Mfumu, bua, bu biobi mua kuenzeka, akufuile luse, bua meji mabi auvua muele. 23Bualu ndi mumone muudi ne lubabu munda muebe tente, mujingila kudi bubi. 24Ke Simone kuambila Petro ne Yowanane ne:
— Ngakuilayi nuenu kudi Mfumu, bua kannyoki munudi nuamba amu.
25Bapostolu babidi aba bamane kujadikila bantu muaku wa Mfumu, kabidi bamane kubumvuijawu, kupinganabu mu Yerushalayime. Mu njila bavua benda balongesha Lumu lua Disanka mu misoku ya bungi ya bena Samariya.
Filipe ne muena Kushe
26Mutumibue wa Mvidi Mukulu kuambila Filipe ne:
— Pueka kuinshi mu ditunga,#8.26 Pueka kuinshi mu ditunga: badi mua kuandamuna kabidi ne: pueka munda munya. ulonde njila wa kale wa mu tshipela, wa kumuka ku Yerushalayime, kufika ne ku Ngaza.
27Filipe kuya diakamue. Mu njila kupetanganaye ne muntu. Uvua muntu mupakula, muntu munene mu bulongolodi bua ditunga dia bena Kushe, mulami wa mpetu yonsu ya mukalenga mukaji wabu.#8.27 Mu mikanda mikuabu mukalenga mukaji awu badi bamuinyika “Kandase”. Kadi Kandase ki ndina dia muntu to. Muaku awu udi uleja amu muanzu wa mukalenga mukaji wa bena Kushe (ditunga dia lelu dia Etiyopiya), bu mudi muaku “Farawone” uleja muanzu wa mukalenga wa bena Ejipitu. Uvua muye kutendelela Mvidi Mukulu mu Yerushalayime. 28Ukavua upingana kuabu, musombe mu ditempu diende, ubala mukanda wa muambi Yeshaya. 29Ke Mueyelu wa Tshijila kuambila Filipe ne:
— Ambuluja, upete ditempu diadia.
30Filipe kusemena, wenda unyema. Kulu vuaye muena Kushe ubala#8.30 Ku kale bantu bavua babala mikanda ne diyi dikole. mukanda wa muambi Yeshaya. Filipe kumukonka ne:
— Udi mujingulule biudi ubala abi anyi?
31Muntu awu kumuandamuna ne:
— Nenujingulule bishi, pandi tshiyi ne udi mua kubinjunguluila?
Kulombaye Filipe bua abande mu ditempu, asombe pamue nende. 32Miaku ya mu Mukanda wa tshijila ivuaye ubala ivua nenku:
“Uvua bu mukoku udibu baya nawu ku tshishipelu, bu muana wa mukoku udi upuwa, padibu bamukulula boya.
Kavua muakule muaku nansha umue.
33Bavua bamupepeja, banyanga tshilumbu tshiende.
Udi mua kuakula bua ndelanganyi yende nnganyi?
Bualu bavua bamushipe pa buloba.#8.33 Tun. 32-33: Yesh 53.7-8, muvua bena Ngreke bandamune miaku eyi ku kale.
34Muena Kushe awu kuebeja Filipe ne:
— Ngambila tumone, udi muambi utela ewu nnganyi? Udi uditela anyi, udi utela muntu mukuabu?
35Ke Filipe kumujinguluila miaku ya mu Mukanda wa tshijila ivuaye ubala. Ke muvuaye mumulongeshe Lumu lua Disanka lua Yezu. 36Baya too, kufikabu muaba uvua mayi. Muena Kushe kuambila Filipe ne:
— Ke mayi aa. Tshidi tshikandika bua kuntuamu ntshinyi?
[ 37Filipe kumuandamuna ne:
— Pawikala muitabe ne muoyi webe mujima, badi mua kukutua mu mayi.
Ke muntu awu kuandamuna ne:
— Ndi ngitaba ne: Yezu-Kristu ke Muana wa Mvidi Mukulu!#8.37 Kabena basangane kan. 37 mu mikanda yonsu ya kale to. Bumue ke miaku ya kale ya mu ditendelela, ivuabu bambe pavuabu batue bantu mu mayi.]
38Kuimanyikaye ditempu. Filipe ne muena Kushe kutuluka, kubuela bonsu babidi mu mayi. Ke Filipe kumutua mu mayi. 39Bobu bamane kupatuka mu mayi, Mueyelu wa Tshijila kuambula Filipe. Muena Kushe nanshaye kumumona kabidi to. Kutungunukaye ne luendu, wenda usanka. 40Filipe kudimona ne: nkadi mu Azote.#8.40 Azote: ke tshimenga tshia kale tshia Ashdode tshia bena Peleshete (tangila 1 Sam 5.1-7). Kutungunukaye ne luendu too ne ku tshimenga tshia Kezareya. Mu njila uvua wenda ulongesha Lumu lua Disanka mu bimenga bionsu.
ទើបបានជ្រើសរើសហើយ៖
Malu Menza 8: TSH96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible avec Livres Deutérocanoniques en Tshiluba © Société Biblique de la R. D. Congo, 1996
