Malu Menza 18
18
Polu mu Korente
1Pashishe Polu kumuka mu Atene, kuya mu Korente.#18.1 Korente…: ke tshimenga tshikulu tshia mu ditunga dia Akaya. Bantu ba bungi bavua basombamu. Tshimenga atshi tshivua ne lumu lubi. 2Kusanganaye mu Korente muena Yuda, dina diende Akuila, wa mu buloba bua Pontuse. Utshivua ufumina ku Italiya ne mukajende Priskila. Bualu mukalenga wa bakalenga Klode#18.2 Pontuse: ke buloba bua ku mutu mu Aziya mukese, ku muelelu wa mayi manene Mafiike. — Klode: tangila 11.28 ne diumvuija. Uvua mutume diyi, bua bena Yuda bumuke mu Rome, mu tshidimu tshia 49, nansha tshia 50. uvua mutume diyi, bua bena Yuda bonsu bumuke mu Rome. Ke Polu kuya kumonangana ne Akuila ne mukajende. 3Bu muvuabu bamanye mudimu wa momumue (bavua benji ba nzubu ya ntenta), Polu kuya kusomba kuabu, bua bakuate mudimu pamue. 4Dituku dionsu dia Dikisha, Polu uvua ulongesha mu nzubu wa kutendelela, usonsola bena Yuda ne bena Ngreke, bua bitabe Mvidi Mukulu.
5Silase ne Timote kumuka ku Masedoniya,#18.5 Tangila 17.15. kuya ku Korente. Bobu bamane kufika, ke Polu kudifila muende muonsu ku mudimu wa kulongesha muaku. Uvua ujadikila bena Yuda ne: Yezu udi Kristu. 6Kadi bena Yuda bavua bamuluisha, bamupenda. Nanku Polu kubanyukuila bilamba biende, ubamba ne:
— Panuikala bajimine, nuambe ne: tudi badijimije nkayetu.#18.6 kubanyukuila bilamba…: fuanyikija ne Mar 6.11 ne diumvuija . Meme tshiena ne bualu. Bituadija ku lelu, nenye kudi bantu ba bisamba bikuabu.
7Umuka ku nzubu wa kutendelela, kuyaye kua Titiyuse Yustuse, muena Ngreke uvua mubuele mu tshisumbu tshia bena ditaba ba bena Yuda. Nzubu wa muntu awu uvua mutumba ne nzubu wa kutendelela. 8Krispuse, mulombodi wa nzubu wa kutendelela, ne bena nzubu wende bonsu,#18.8 Fuanyikija ne 16.15, 33. kuitaba Mfumu. Bena Korente ba bungi bumvua bivua Polu ulongesha, kuitababu. Kubatuabu mu mayi.
9Butuku kampanda, Mfumu kuleja Polu malu, umuambila ne:
— Kutshinyi. Kadi akula amu kuakula. Kupuwu to. 10Bualu ndi nebe. Muntu kakukulenga bua kukuenzela bibi to. Bualu mu tshimenga etshi bantu ba bungi mbanyi!
11Polu kushala mu Korente tshidimu tshijima ne ngondu isambombu, ulongesha bantu muaku wa Mvidi Mukulu.
12Pavua Ngaliyone muena Rome mupete muanzu wa mulombodi wa buloba bua Akaya,#18.12 Mikanda mikuabu ya mu tshikondu atshi idi ijadika bidimu bivua Ngaliyone mupete muanzu mu Korente, ke 51-52, nansha 52-53. bena Yuda kumyuangana bua kuluisha Polu. Kumukuatabu, kuya nende ku tshilumbuluilu, 13bamba ne:
— Muntu ewu udi witabijija bantu, bua batendelele Mvidi Mukulu mushindu udi mikenji mikandike.
14Pavua Polu ukeba kuakula, Ngaliyone kuambila bena Yuda ne: — Bena Yuda, nuenu bamvuile ne bualu bubi buenza kudi muntu ewu, nansha ne tshilema tshinene, mvua mua kunuteleja. 15Kadi bu munudi amu nuelangana mpata bua miaku, bua mena, ne bua mikenji yenu, abi bidi binutangila amu nuenu nkayenu. Tshiena musue kukosa bilumbu bia nenku to!
16Ke kubipataye mu tshilumbuluilu. 17Nenku bonsu kukuata Sostene, mulombodi wa nzubu wa kutendelela, kumutuutshila kumpala kua tshilumbuluilu aku. Kadi Ngaliyone kavua muelemu diyi to.
Polu udi upingana mu Antiyokiya
18Polu kushala kabidi matuku makumbane mu Korente. Pashishe kulayanganaye ne bena ditaba. Yeye, Priskila ne Akuila, kubuela mu majuwa, kuya ku Siriya. Bangabanga ne kubuela mu majuwa mu Kenkreya, Polu uvua mukunguishe mu mutu, bualu uvua muenze dilaya.#18.18 Kenkreya…: ntshisabu tshidi mu Korente, luseke ludi diba dipatukila lua tshimenga. — Matuku onsu avua dilaya dikuata muntu, kavua mua kubeyisha nsuki to. Tangila Dib 6.5-18. 19-21Kufikabu mu Efeze. Polu kubuela mu nzubu wa kutendelela, kuyukidilangana ne bena Yuda. Bena Yuda kulomba Polu, bua ashale nabu matuku makuabu. Kadi Polu kavua musue to. Uvua ulayangana nabu, wamba ne:
— Nempingane kuenu kunu, pikala Mvidi Mukulu musue. Kushiyaye Priskila ne Akuila muaba awu. Kumukaye mu Efeze ne majuwa. 22Utuluka mu Kezareya, kuyaye mu Yerushalayime, bua kumonangana ne Tshisumbu tshia bena ditaba. Pashishe kuyaye ku Antiyokiya. 23Usombamu amue matuku, kumukaye tshiakabidi. Kupitshilaye mu buloba bua Ngalate ne bua Frijiya,#18.23 Tangila 16.6 ne diumvuija . wenda ukolesha balongi bonsu mu ditaba.
Apolose mu Efeze ne mu Korente
24Muena Yuda mukuabu, mulelela mu Aleksandriya, dina diende Apolose, kufikaye mu Efeze. Uvua ngamba malu, mumanye Mikanda ya tshijila bilenga. 25Bavua bamulongesha njila wa Mfumu. Uvua ulongesha pende ne disuminyina, umanyisha bantu malu a Yezu bijalame, kayi utupakana. Kadi uvua mumanye amu muvuabu batua bantu mu mayi mushindu uvua Yowanane muenze.#18.25 Fuanyikija ne 19.3-4. 26Kulongeshaye ne dikima mu nzubu wa kutendelela. Pavua Priskila ne Akuila bamumvua ulongesha, kuyabu nende kuabu. Kumumvuijabu malu a njila wa Mvidi Mukulu avuaye kayi muanji kumanya. 27Pashishe Apolose uvua musue kuya mu Akaya. Bena ditaba kumukolesha ku muoyi bua ayemu. Kufundilabu bena ditaba ba mu buloba abu, bua bamuakidile bimpe. Yeye mumane kufika mu Akaya, kuambuluishaye bikole bantu bakavua bamane kuitaba ku luse lua Mvidi Mukulu. 28Bualu uvua ufuisha bena Yuda bikole ku mesu a bantu bonsu, ubumvuija Mikanda ya tshijila, ubaleja nayi ne: Yezu udi Kristu, Musungidi wetu.
ទើបបានជ្រើសរើសហើយ៖
Malu Menza 18: TSH96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible avec Livres Deutérocanoniques en Tshiluba © Société Biblique de la R. D. Congo, 1996
