Malu Menza 16
16
Timote udi ulamata Polu ne Silase
1Polu kufika mu Derbe, pashishe mu Listra.#16.1 Tangila 14.8, 21. Muine amu muvua muena ditaba, dina diende Timote. Mamuende uvua muena Yuda mumane kubuela mu Tshisumbu tshia bena Kristu. Tatuende uvua muena Ngreke. 2Bena ditaba ba mu Listra, ne ba mu Ikoniyume, bavua banyishe Timote bikole. 3Ke pavua Polu musue kuya nende. Nanku kuyaye kumuteka panshi, bualu bua bena Yuda bavua mu ditunga adi. Bualu bonsu bavua bamanye muvua tatuende wa Timote muena Ngreke. 4Mu bimenga bivuabu bapitshila, bavua bamanyisha bena ditaba mikenji ivua bapostolu ne bakulu ba mu Yerushalayime bele. Bavua balomba kabidi bena ditaba, bua bayikumbaje bimpe.#16.4 Mikenji eyi badi bayumvuija, bayifunda mu tshikosu mu mukanda unudi mua kubala mu 15.23-29. 5Mu Bisumbu bionsu bantu bavua bakolesha ditaba diabu, bavulangana kabidi ku dituku ku dituku.
Mvidi Mukulu udi uleja Polu malu mu Trowase
6Mueyelu wa Tshijila uvua mukandike Polu, ne bavuaye nabu, bua kabalongeshi muaku mu buloba bua Aziya. Ke bobu kupitshila mu buloba bua Frijiya ne bua Ngalate.#16.6 Buloba bua Aziya: buvua ku bumfumu bua bena Rome. Mu buloba amu muvua tshimenga tshia Efeze. Frijiya ne Ngalate mmatunga abidi avua kabidi mu Aziya mukese. 7Bafika ku mikalu ya Miziya, kukebabu kubuela mu buloba bua Bitiniya. Kadi Mueyelu wa Tshijila kubakandika. 8Nanku kupitabu mu Miziya,#16.8 Miziya: mbuloba buvua ku mukalu ne mukidi munene wa Bosfore. kuya ku tshisabu tshia Trowase. 9Butuku Mvidi Mukulu kuleja Polu malu. Kumonaye muntu wa bena Masedoniya muimane, umulomba ne: “Pitshila mu Masedoniya, uvue kutuambuluisha!” 10Polu mumane kumona malu aa, tuetu kudilongolola diakamue bua kuya mu Masedoniya. Bualu tuvua bashindike ne: Mvidi Mukulu udi mutubikile bua kulongesha bena mu ditunga adi Lumu lua Disanka.
Mu Filipe, Lidiya udi witaba Mfumu
11Tubuela mu majuwa mu Trowase, tuetu kuya buludi ne mu tshidila tshia Samotrase. Butshia tuetu kufika mu Neyapolise.#16.11 Neyapolise: ntshisabu tshia ku mutu kua mayi manene a Ejeya, mutumba ne tshimenga tshia Filipe. 12Tumuka amu, tuetu kufika mu Filipe, tshimenga tshia tshitupa tshia kumpala tshia buloba bua Masedoniya,#16.12 tshimenga tshia tshitupa tshia kumpala tshia buloba bua Masedoniya: mu mikanda mikuabu ya kale mbafunde ne: tshimenga tshikulu tshia buloba bua Masedoniya. tshivua kabidi ku bumfumu bua bena Rome. Tuetu kushala mu tshimenga atshi amue matuku. 13Dituku dia Dikisha, tuetu kupatuka mu tshimenga, kuya ku muelelu wa musulu, kutuvua bela meji ne: netupete muaba uvua bena Yuda batendelela. Tuetu kusomba muaba awu, kuyukilangana ne bakaji bavua basangilamu. 14Umue wa kudibu, dina diende Lidiya, uvua mutumine ku tshimenga tshia Tiyatira. Uvua ngendamushinga wa bilamba bikunze bia mushinga mukole. Uvua mumane kulamata tshisumbu tshia bena ditaba ba bena Yuda. Uvua muteleje ne ntema bituvua tuamba. Mfumu kunzulula muoyi wende, bua umvue bimpe bivua Polu wakula. 15Kumutuabu mu mayi, yeye ne nzubu wende mujima.#16.15 Fuanyikija ne 16.33; 18.8. Pashishe kutulombaye ne:
— Panuikala bamone ne: ndi ngitaba Mfumu menemene, nuvua kusomba kuanyi.
Kutusengelelaye bikole. Tuetu kushisha kuitaba.
Polu mu nzubu wa lukanu mu tshimenga tshia Filipe
16Dituku dikuabu tuvua tuya muaba uvua bantu batendelela. Tuetu kusambakena ne mukaji mupika, muikale ne mukishi mubi uvua umusaka bua kuambila bantu malu adi ne bua kuenzeka. Uvua upetesha bamfumu bende lupetu lua bungi ku mudimu awu. 17Kutulondaye tuetu ne Polu, wela mbila ne:
— Bantu aba mbena mudimu wa Mvidi Mukulu, Muena kulu! Badi banumanyisha munudi mua kupanda!
18Mukaji awu uvua wenza nanku matuku a bungi. Pashishe kutondabi Polu. Ke kukudimukaye, wambila mukishi mubi awu ne:
— Mu dina dia Yezu Kristu, ndi nkutumina diyi ne: patuka munda mua muntu awu!
Diakamue mukishi kupatuka. 19Kadi bamfumu ba mukaji awu bavua bamona ne: katuakupetela kabidi makuta kudi mukaji awu. Nanku kukuatabu Polu ne Silase, benda babapulumuna kumpala kua bamfumu ba tshimenga, muaba uvua bantu basangile. 20Kubimanyikabu kumpala kua balombodi ba tshimenga ba bena Rome, babambila ne:
— Bantu aba badi batombola bantu mu tshimenga tshietu. Badi bena Yuda! 21Badi balongesha bibidilu bidi mikenji yetu kukandika. Bu mutudi bena Rome, katuena mua kubianyisha, nansha kubienza.
22Bantu bonsu bavua basangile muaba awu kuela Polu ne Silase bibingu. Ke balombodi kutuma diyi, bua babavule bilamba, babatuutshishe mikaba. 23Bamane kubatuuta bikole, kubelabu mu nzubu wa lukanu. Kuambilabu mulami wa nzubu awu ne: ubalame bimpe. 24Mulami umvua nanku, kubelaye mu kazubu ka munda mua nzubu menemene. Kubelaye kabidi tshikunyi ku makasa.
25Munda nkulu, Polu ne Silase bavua batendelela, bimba misambu, batumbisha Mvidi Mukulu. Bena lukanu bakuabu bavua babateleja. 26Diakamue tshikumina tshikole kuenzeka, kunyukisha nzubu wa lukanu too ne ku tshitaku tshiende. Bu mpindiewu, biibi bionsu bia nzubu wa lukanu kunzuluka, nkanu ya bena lukanu bonsu kufuka. 27Mulami utabuluka ku tulu, kumonaye biibi bionsu bia nzubu wa lukanu buashi. Kutulaye muele wende bua kudishipa, bualu uvua muele meji ne: bena lukanu mbanyeme. 28Kadi Polu kumuela diyi muende muonsu ne: — Kudienzedi bibi nansha! Tuetu bonsu tudi apa!
29Ke mulami kulombesha muendu, kubuela lukasa mu kazubu kavua bena lukanu. Kudielaye ku makasa a Polu ne Silase, uzakala ne buowa. 30Pashishe kubapatulaye mu kazubu aku, ubakonka ne:
— Bakalenga, bua meme kupanda, ngenze tshinyi?
31Polu ne Silase kuandamuna ne:
— Itaba Mfumu Yezu. Nanku neupande, wewe ne nzubu webe.
32Nanku kubalongeshabu, yeye ne bonsu ba mu nzubu muende, muaku wa Mfumu. 33Butuku abu, mulami kuya nabu, kusukula mputa yabu. Diakamue yeye ne bena diende bonsu, kubatuabu mu mayi.#16.33 Fuanyikija ne 16.15; 18.8. 34Mulami kuya ne Polu ne Silase kuende, kubalambishila biakudia. Yeye ne bonsu ba mu nzubu muende bavua ne disanka divule, bualu mpindiewu bavua bitaba Mvidi Mukulu.
35Butshia balombodi ba tshimenga ba bena Rome kutuma bantu, bua bambile mulami ne:
— Lekela bantu abu, baye!
36Ke mulami kuvua kuambila Polu ne:
— Balombodi ba tshimenga mbatume diyi, bua bamupatule mu lukanu. Nanku nudi mua kupatuka. Nuaya amu bimpe!
37Kadi Polu kuambila bantu bavua balombodi batume ne:
— Tuetu bavua bapete bukenji bua bena Rome,#16.37 Meyi ne mikandu bia bena Rome bivua bikandika balombodi ba mbulamatadi, bua kabatuutshishi bantu, bavua ne bukenji bua bena Rome, mikaba (kan. 22). Bua bukenji bua bena Rome buvua Polu nabu, tangila 22.25-29; 23.27. mbatutuutshishe mikaba, bantu bonsu batangile, kabayi banji kutulumbuluisha. Bavua batuelesha kabidi mu lukanu. Kadi mpindiewu badi basue kutulekela mu musokoku anyi? Tuetu katuena basue nanku to! Balombodi bafike bobu nkayabu bua kutulekela!
38Bantu bavuabu batume, kuyabu kuambila balombodi ba tshimenga ba bena Rome miaku ayi. Balombodi bumvua ne: Polu ne Silase badi ne bukenji bua bena Rome, buowa kubakuata. 39Kuvuabu kubalomba luse. Pashishe kubalekelabu, babasengelela bua bumuke mu tshimenga. 40Polu ne Silase bamane kupatuka mu nzubu wa lukanu, kuyabu kua Lidiya. Kumonanganabu ne bena ditaba, kubakoleshabu ku muoyi, kulayanganabu nabu.
ទើបបានជ្រើសរើសហើយ៖
Malu Menza 16: TSH96
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible avec Livres Deutérocanoniques en Tshiluba © Société Biblique de la R. D. Congo, 1996
