Mark 6
6
Wɔpow Jesus wɔ Nazarɛt
(Matthew 13.53-58; Luke 4.16-30)
1Na Jesus fii hɔ kɔree, na ɔbaa nankasa no kurow mu, na n’esuafo no dzii n’ekyir. 2Na ahomgyeda no durii no, ɔhyɛɛ ase kyerɛkyerɛe wɔ nhyiamudan no mu, na nyimpadodow no tsiee no no, hɔn ho boow hɔn dɛ, Henfa na oyi nyaa dɛm ndzeyɛɛ yi? Ebɛn nyansa nye dza wɔdze ama no yi, na ebɛn tum ndwuma nye dza ɔdze ne nsa ayɛ yi? 3Ana nnyɛ odwimfo no a ɔyɛ Mary ne ba no, James nye Judas nye Simon hɔn nua no nye yi bi? Ana nnyɛ ne nkyerɛbaa na wɔwɔ hɛn nkyɛn ha yi? Na ɔyɛɛ hɔn fintsidua. 4#Joh 4.44 Na Jesus see hɔn dɛ, Enyidzi mmbɔ nkɔnhyɛnyi gyedɛ nankasa no kurow mu, nye n’ebusuafo mu, nye nankasa ne fie. 5Na oenntum annyɛ tum edwuma biara wɔ hɔ, gyedɛ ayarfo kumaabi a ɔdze ne nsa too hɔn do yɛɛ hɔn edur. 6Na gyedzi a wonnyi yɛɛ no nwanwa.
Jesus Soma Duebien no
(Matthew 10.5-15; Luke 9.1-6)
Nna okekyiin nkurobaase kyerɛkyerɛe.
7Na ɔfrɛɛ duebien no, na ɔhyɛɛ ase somaa hɔn beenu beenu, na ɔmaa hɔn tum wɔ esunsum fi do; 8#Luk 10.4-11 na ɔhyɛɛ hɔn dɛ mma wɔmmfa biribiara nntu kwan, gyedɛ poma nko: mma wɔmmfa edziban anaa kotoku, anaa sika wɔ hɔn abɔdo mu; 9na wɔnhyɛ mpaboa, na mma wɔnnhyɛ ntar ebien. 10Na ɔsee hɔn dɛ, Beebiara mbrɛ hom bɛhɛn fi biara mu no, hom ntsena hɔ nkodu dɛ hom befi hɔ akɔ. 11#Ndwu 13.51 Na kurow biara a ɔnnkɛgye hom no, na wonnketsie hom wɔ mu no, hom fi hɔ rokɔ a, hom mporoporow hom ananadze huntuma ngye dase ntsia hɔn. 12Na wɔkɔree kɛpae mu kaa dɛ wonnu hɔnho. 13#Jas 5.14 Na wotuu mbɔnsam pii na wɔdze ngo seraa ayarfo pii saa hɔn yarba.
John Onumanyi no no Wu
(Matthew 14.1-12; Luke 9.7-9)
14 #
Mat 16.14; Mar 8.28; Luk 9.19 Na Ɔhen Herod tsee, osiandɛ Jesus ne dzin tahyee: na ɔsee dɛ, John Onumanyi no enyan efi ewufo mu: dɛm ntsi na tum ndzɛmba yi reyɛ no mu edwuma no. 15Na binom see dɛ, Elija a; na binom so see dɛ, Nkɔnhyɛnyi a, tse dɛ nkɔnhyɛfo no mu baako. 16Na Herod tsee no, ɔsee dɛ, John a mutwaa ne tsir no enyan bio.
17 #
Luk 3.19, 20 Nna Herod nankasa asoma ma woekosuo John mu akyer no akɔto efiadze, wɔ no nua Filip yer Herodias ntsi: osiandɛ nna Herod awar no. 18Na John see Herod dɛ, Ɔmmfa mbra mu mma wo dɛ ebɔwar wo nua ne yer. 19Na Herodias kyekyeer no hyɛɛ ne yamu, na ɔpɛɛ dɛ oku no, naaso oenntum: 20osiandɛ Herod suroo John, nna onyim dɛ ɔyɛ nyimpa tsenenee nye krɔnkrɔn ntsi, ɔbɔɔ no ho ban. Sɛ oritsie no a, no ho hyehye no dodow, naaso ɔdze dɛw tsiee no. 21Na da bi a Herod ridzi n’awoda no, ɔtoo pon maa n’ekunyin nye n’asafohen nye Galilii mpanyimfo; 22na Herodias ne babaa bae bɛsawee ma ɔsɔɔ Herod nye hɔn a wɔtse edzidzi no enyiwa: na ɔhen no see akataasia no dɛ, Bisa me biribiara a epɛ, na medze bɛma wo. 23Na ɔkaa ntam kyerɛɛ no dɛ, Biribiara a ibebisa me no, medze bɛma wo dze ekesi m’ahenman ne fa. 24Na ɔkɔree kɛsee ne na dɛ, Mimbisa ebɛnadze? Na ne na see dɛ, John Onumanyi no ne tsir. 25Na ntsɛmara ɔyɛɛ har baa ɔhen ne nkyɛn, na ɔbɛsee no dɛ, Mepɛ dɛ edze John Onumanyi no ne tsir to prɛtse mu ma me seseiara. 26Na ɔyɛɛ ɔhen no yaw dodoodow, na osian ne ntam nye hɔn a wɔnye no tse edzidzi no ntsi, ɔammpɛ dɛ ɔbɛka oho akyerɛ no. 27Na ntsɛmara ɔhen no somaa ɔbrafo hyɛɛ no dɛ ɔnkɛfa tsir no mbra; na ɔkɔree kotwaa John ne tsir wɔ efiadze, 28na ɔdze ne tsir no too prɛtse mu bae, na ɔdze maa akataasia no, na akataasia no dze kɛmaa ne na. 29Na n’esuafo no tsee no, wɔbae bɛfaa no fun na wɔdze kɔtoo nda bi mu.
Jesus Ma Mpemenum Edziban
(Matthew 14.13-21; Luke 9.10-17; John 6.1-14)
30Na asomafo no boaa hɔn ano baa Jesus nkyɛn na wɔbɛkaa dza wɔayɛ nye dza wɔakyerɛkyerɛ nyina kyerɛɛ no. 31Na ɔsee hɔn dɛ, Homankasa hom mbra sar do nkyɛn beebi, na hom mbɔhom kakra. Osiandɛ nna dodowara reba rokɔ ma wonnya adagyer nndzidzi mpo. 32Na wosii mu nam hɛn mu kɔr sar do beebi. 33Na nyimpa pii hun dɛ worisi mu, na wonyim hɔn no, wofi nkurow nyina mu tutuu mbirika nam daadze kɔr hɔ, na wotwaar hɔn ano. 34#Nka 27.17; 1 Ahe 22.17; 2 Mbe 18.16; Eze 34.5; Mat 9.36 Na ɔbaa daadze no, ohun nyimpadodow pii na ne yamu hyehyee no maa hɔn osiandɛ wɔtse dɛ nguan a wonnyi ɔhwɛfo; na ɔhyɛɛ ase kyerɛkyerɛɛ hɔn ndzɛmba pii. 35Na adze rebɛsa no, n’esuafo no baa ne nkyɛn bɛsee dɛ, Ha yɛ sar do, na adze so resa; 36gyaa hɔn ma wɔnkɔ nkuroba nye nkuraase a etwa ehyia yi mu nkɔtɔ biribi ndzi. 37Na Jesus buaa hɔn dɛ, Homara hom mma hɔn biribi ma wondzi. Na wɔsee no dɛ, Ana yɛnkɔtɔ paanoo sika denare ahaenu mfa mma hɔn ma wondzi? 38Na ɔsee hɔn dɛ, Hom wɔ paanoo ahen? Hom nkɔhwɛ. Na wɔkɔhwɛe no wɔsee dɛ, Enum, nye esunam ebien. 39Na ɔhyɛɛ hɔn dɛ wɔmma hɔn nyinara ntsenatsena ekuw ekuw wɔ efuw momon no do. 40Na wɔtsenatsenaa akyerɛpɛn akyerɛpɛn, ɔha, ɔha, nye eduonum, eduonum. 41Na ɔfaa paanoo enum no, nye esunam ebien no, na ɔhwɛɛ sor no, ohyiraa do, na obubuu paanoo no, na ɔdze maa n’esuafo no dɛ wɔmfa ntoto hɔn enyim; na ɔkyɛɛ esunam ebien no mu maa hɔn nyinara. 42Na hɔn nyina dzidzii na wɔmee. 43Na wɔtasee mporoporoba nkɛntsɛn duebien nye esunam no so bi. 44Na hɔn a wodzii paanoo no, wɔyɛ mbarimba mpemenum.
Jesus Nantsew Po Enyi
(Matthew 14.22-33; John 6.15-21)
45Na ntsɛmara opiapiaa n’esuafo no dɛ wɔnkɔ hɛn mu na wondzi n’enyim kan wɔ esuegya noho wɔ Bɛtsaeda, ma ɔno nhwɛ, ngya nyimpadodow no kwan. 46Na ɔkraa hɔn no, osii mu kɔr kokwaa do kɔsɔree. 47Na odur anafua no, nna hɛn no wɔ po finimfin, na no nko wɔ daadze. 48Na ohun dɛ wɔrofona akwan, osiandɛ mframa esi hɔn enyim no, bɛyɛ anafua dasu a otsia anan no mu no ɔnantseew po enyi baa hɔn nkyɛn, na ɔyɛɛ dɛ ɔrepɛ apa hɔn ho; 49na hɔn dze, wohun dɛ ɔrenantsew po enyi no, wɔdween dɛ saman a, na wɔkekaa mu, 50osiandɛ hɔn nyina hun no ma hɔn akoma tui. Na ntsɛmara ɔnye hɔn kasae, na ɔsee hɔn dɛ, Hom nhyɛ dzen: mara a, mma hom nnsuro. 51Na ɔkɔr hɔn nkyɛn wɔ hɛn no mu, na mframa no gyaae. Na hɔn ho boow hɔn dodoodow koraa, 52osiandɛ wɔanntse paanoo no ho asɛm no ase, nna hɔn akoma epirim.
Jesus Sa Ayarfo Yarba wɔ Genesaret
(Matthew 14.34-36)
53Na wotwae no, wɔbaa Genesaret asaase do na wodwirii. 54Na wofii hɛn mu no, ntsɛmara na wohun no, 55na wotutuu mbirika kekyiin asaase nyina mu, na wɔhyɛɛ ase soaa hɔn a wɔyar wɔ nkɛtɛ do baa beebiara a wɔtsee dɛ ɔwɔ no. 56Na beebiara a ɔkɔree, nkurobaase anaa nkurow anaa nkuroba mu o, wɔdze ayarfo totoo gua do, na wɔserɛɛ no dɛ ɔmma wɔmfa hɔn nsa nka n’atar ano ndwow nko kɛkɛ; na dodow a wɔkaa no no, hɔn ho yɛɛ hɔn dzen.
ទើបបានជ្រើសរើសហើយ៖
Mark 6: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
Mark 6
6
Wɔpow Jesus wɔ Nazarɛt
(Matthew 13.53-58; Luke 4.16-30)
1Na Jesus fii hɔ kɔree, na ɔbaa nankasa no kurow mu, na n’esuafo no dzii n’ekyir. 2Na ahomgyeda no durii no, ɔhyɛɛ ase kyerɛkyerɛe wɔ nhyiamudan no mu, na nyimpadodow no tsiee no no, hɔn ho boow hɔn dɛ, Henfa na oyi nyaa dɛm ndzeyɛɛ yi? Ebɛn nyansa nye dza wɔdze ama no yi, na ebɛn tum ndwuma nye dza ɔdze ne nsa ayɛ yi? 3Ana nnyɛ odwimfo no a ɔyɛ Mary ne ba no, James nye Judas nye Simon hɔn nua no nye yi bi? Ana nnyɛ ne nkyerɛbaa na wɔwɔ hɛn nkyɛn ha yi? Na ɔyɛɛ hɔn fintsidua. 4#Joh 4.44 Na Jesus see hɔn dɛ, Enyidzi mmbɔ nkɔnhyɛnyi gyedɛ nankasa no kurow mu, nye n’ebusuafo mu, nye nankasa ne fie. 5Na oenntum annyɛ tum edwuma biara wɔ hɔ, gyedɛ ayarfo kumaabi a ɔdze ne nsa too hɔn do yɛɛ hɔn edur. 6Na gyedzi a wonnyi yɛɛ no nwanwa.
Jesus Soma Duebien no
(Matthew 10.5-15; Luke 9.1-6)
Nna okekyiin nkurobaase kyerɛkyerɛe.
7Na ɔfrɛɛ duebien no, na ɔhyɛɛ ase somaa hɔn beenu beenu, na ɔmaa hɔn tum wɔ esunsum fi do; 8#Luk 10.4-11 na ɔhyɛɛ hɔn dɛ mma wɔmmfa biribiara nntu kwan, gyedɛ poma nko: mma wɔmmfa edziban anaa kotoku, anaa sika wɔ hɔn abɔdo mu; 9na wɔnhyɛ mpaboa, na mma wɔnnhyɛ ntar ebien. 10Na ɔsee hɔn dɛ, Beebiara mbrɛ hom bɛhɛn fi biara mu no, hom ntsena hɔ nkodu dɛ hom befi hɔ akɔ. 11#Ndwu 13.51 Na kurow biara a ɔnnkɛgye hom no, na wonnketsie hom wɔ mu no, hom fi hɔ rokɔ a, hom mporoporow hom ananadze huntuma ngye dase ntsia hɔn. 12Na wɔkɔree kɛpae mu kaa dɛ wonnu hɔnho. 13#Jas 5.14 Na wotuu mbɔnsam pii na wɔdze ngo seraa ayarfo pii saa hɔn yarba.
John Onumanyi no no Wu
(Matthew 14.1-12; Luke 9.7-9)
14 #
Mat 16.14; Mar 8.28; Luk 9.19 Na Ɔhen Herod tsee, osiandɛ Jesus ne dzin tahyee: na ɔsee dɛ, John Onumanyi no enyan efi ewufo mu: dɛm ntsi na tum ndzɛmba yi reyɛ no mu edwuma no. 15Na binom see dɛ, Elija a; na binom so see dɛ, Nkɔnhyɛnyi a, tse dɛ nkɔnhyɛfo no mu baako. 16Na Herod tsee no, ɔsee dɛ, John a mutwaa ne tsir no enyan bio.
17 #
Luk 3.19, 20 Nna Herod nankasa asoma ma woekosuo John mu akyer no akɔto efiadze, wɔ no nua Filip yer Herodias ntsi: osiandɛ nna Herod awar no. 18Na John see Herod dɛ, Ɔmmfa mbra mu mma wo dɛ ebɔwar wo nua ne yer. 19Na Herodias kyekyeer no hyɛɛ ne yamu, na ɔpɛɛ dɛ oku no, naaso oenntum: 20osiandɛ Herod suroo John, nna onyim dɛ ɔyɛ nyimpa tsenenee nye krɔnkrɔn ntsi, ɔbɔɔ no ho ban. Sɛ oritsie no a, no ho hyehye no dodow, naaso ɔdze dɛw tsiee no. 21Na da bi a Herod ridzi n’awoda no, ɔtoo pon maa n’ekunyin nye n’asafohen nye Galilii mpanyimfo; 22na Herodias ne babaa bae bɛsawee ma ɔsɔɔ Herod nye hɔn a wɔtse edzidzi no enyiwa: na ɔhen no see akataasia no dɛ, Bisa me biribiara a epɛ, na medze bɛma wo. 23Na ɔkaa ntam kyerɛɛ no dɛ, Biribiara a ibebisa me no, medze bɛma wo dze ekesi m’ahenman ne fa. 24Na ɔkɔree kɛsee ne na dɛ, Mimbisa ebɛnadze? Na ne na see dɛ, John Onumanyi no ne tsir. 25Na ntsɛmara ɔyɛɛ har baa ɔhen ne nkyɛn, na ɔbɛsee no dɛ, Mepɛ dɛ edze John Onumanyi no ne tsir to prɛtse mu ma me seseiara. 26Na ɔyɛɛ ɔhen no yaw dodoodow, na osian ne ntam nye hɔn a wɔnye no tse edzidzi no ntsi, ɔammpɛ dɛ ɔbɛka oho akyerɛ no. 27Na ntsɛmara ɔhen no somaa ɔbrafo hyɛɛ no dɛ ɔnkɛfa tsir no mbra; na ɔkɔree kotwaa John ne tsir wɔ efiadze, 28na ɔdze ne tsir no too prɛtse mu bae, na ɔdze maa akataasia no, na akataasia no dze kɛmaa ne na. 29Na n’esuafo no tsee no, wɔbae bɛfaa no fun na wɔdze kɔtoo nda bi mu.
Jesus Ma Mpemenum Edziban
(Matthew 14.13-21; Luke 9.10-17; John 6.1-14)
30Na asomafo no boaa hɔn ano baa Jesus nkyɛn na wɔbɛkaa dza wɔayɛ nye dza wɔakyerɛkyerɛ nyina kyerɛɛ no. 31Na ɔsee hɔn dɛ, Homankasa hom mbra sar do nkyɛn beebi, na hom mbɔhom kakra. Osiandɛ nna dodowara reba rokɔ ma wonnya adagyer nndzidzi mpo. 32Na wosii mu nam hɛn mu kɔr sar do beebi. 33Na nyimpa pii hun dɛ worisi mu, na wonyim hɔn no, wofi nkurow nyina mu tutuu mbirika nam daadze kɔr hɔ, na wotwaar hɔn ano. 34#Nka 27.17; 1 Ahe 22.17; 2 Mbe 18.16; Eze 34.5; Mat 9.36 Na ɔbaa daadze no, ohun nyimpadodow pii na ne yamu hyehyee no maa hɔn osiandɛ wɔtse dɛ nguan a wonnyi ɔhwɛfo; na ɔhyɛɛ ase kyerɛkyerɛɛ hɔn ndzɛmba pii. 35Na adze rebɛsa no, n’esuafo no baa ne nkyɛn bɛsee dɛ, Ha yɛ sar do, na adze so resa; 36gyaa hɔn ma wɔnkɔ nkuroba nye nkuraase a etwa ehyia yi mu nkɔtɔ biribi ndzi. 37Na Jesus buaa hɔn dɛ, Homara hom mma hɔn biribi ma wondzi. Na wɔsee no dɛ, Ana yɛnkɔtɔ paanoo sika denare ahaenu mfa mma hɔn ma wondzi? 38Na ɔsee hɔn dɛ, Hom wɔ paanoo ahen? Hom nkɔhwɛ. Na wɔkɔhwɛe no wɔsee dɛ, Enum, nye esunam ebien. 39Na ɔhyɛɛ hɔn dɛ wɔmma hɔn nyinara ntsenatsena ekuw ekuw wɔ efuw momon no do. 40Na wɔtsenatsenaa akyerɛpɛn akyerɛpɛn, ɔha, ɔha, nye eduonum, eduonum. 41Na ɔfaa paanoo enum no, nye esunam ebien no, na ɔhwɛɛ sor no, ohyiraa do, na obubuu paanoo no, na ɔdze maa n’esuafo no dɛ wɔmfa ntoto hɔn enyim; na ɔkyɛɛ esunam ebien no mu maa hɔn nyinara. 42Na hɔn nyina dzidzii na wɔmee. 43Na wɔtasee mporoporoba nkɛntsɛn duebien nye esunam no so bi. 44Na hɔn a wodzii paanoo no, wɔyɛ mbarimba mpemenum.
Jesus Nantsew Po Enyi
(Matthew 14.22-33; John 6.15-21)
45Na ntsɛmara opiapiaa n’esuafo no dɛ wɔnkɔ hɛn mu na wondzi n’enyim kan wɔ esuegya noho wɔ Bɛtsaeda, ma ɔno nhwɛ, ngya nyimpadodow no kwan. 46Na ɔkraa hɔn no, osii mu kɔr kokwaa do kɔsɔree. 47Na odur anafua no, nna hɛn no wɔ po finimfin, na no nko wɔ daadze. 48Na ohun dɛ wɔrofona akwan, osiandɛ mframa esi hɔn enyim no, bɛyɛ anafua dasu a otsia anan no mu no ɔnantseew po enyi baa hɔn nkyɛn, na ɔyɛɛ dɛ ɔrepɛ apa hɔn ho; 49na hɔn dze, wohun dɛ ɔrenantsew po enyi no, wɔdween dɛ saman a, na wɔkekaa mu, 50osiandɛ hɔn nyina hun no ma hɔn akoma tui. Na ntsɛmara ɔnye hɔn kasae, na ɔsee hɔn dɛ, Hom nhyɛ dzen: mara a, mma hom nnsuro. 51Na ɔkɔr hɔn nkyɛn wɔ hɛn no mu, na mframa no gyaae. Na hɔn ho boow hɔn dodoodow koraa, 52osiandɛ wɔanntse paanoo no ho asɛm no ase, nna hɔn akoma epirim.
Jesus Sa Ayarfo Yarba wɔ Genesaret
(Matthew 14.34-36)
53Na wotwae no, wɔbaa Genesaret asaase do na wodwirii. 54Na wofii hɛn mu no, ntsɛmara na wohun no, 55na wotutuu mbirika kekyiin asaase nyina mu, na wɔhyɛɛ ase soaa hɔn a wɔyar wɔ nkɛtɛ do baa beebiara a wɔtsee dɛ ɔwɔ no. 56Na beebiara a ɔkɔree, nkurobaase anaa nkurow anaa nkuroba mu o, wɔdze ayarfo totoo gua do, na wɔserɛɛ no dɛ ɔmma wɔmfa hɔn nsa nka n’atar ano ndwow nko kɛkɛ; na dodow a wɔkaa no no, hɔn ho yɛɛ hɔn dzen.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.