Levitikɔs 2
2
Edziban Afɔrbɔ
1Na sɛ obiara dze edziban afɔr ayɛyɛdze rebrɛ EWURADZE a, n’ayɛyɛdze no nyɛ isiam pa; na onhue ngo ngu do, na ɔmfa krɔbɔw nto do: 2na ɔmfa mbrɛ Aaron mbabanyin asɔfo no: na ɔmfa isiam pa, nye no ngo no ne nsapuw, ɔnye no krɔbɔw no nyinara: na ɔsɔfo no nhyew no dɛ nkaadze wɔ afɔrmbukyia no do, ogya afɔr a oyi nka huanhuam ma EWURADZE: 3na edziban afɔr no mu dza ɔbɛka no nyɛ Aaron nye ne mbabanyin dze: ɔyɛ EWURADZE ogya afɔr mu krɔnkrɔndze mu adzekrɔnkrɔn.
4Na sɛ edze edziban afɔr ayɛyɛdze a wɔto no wɔ fononoo mu bi rebɛba a, fa isiam pa epitsi tatar a wɔafrɔw no ngo, anaa epitsi tatar ntrɛtraba a wɔasera ho ngo. 5Na sɛ w’ayɛyɛdze no yɛ ɔtosɛn mu edziban afɔr a, ma ɔnyɛ isiam pa epitsi a wɔafɔw no ngo. 6Bubu mu esinesin, na hue ngo gu do: ɔyɛ edziban afɔr. 7Na sɛ w’ayɛyɛdze no yɛ ɔkyesɛn mu edziban afɔr a, fa isiam pa nye ngo yɛ. 8Na fa edziban afɔr a wɔdze ndzɛmba yinom ayɛ no brɛ EWURADZE: wɔmfa mma ɔsɔfo no, ma ɔmfa mbra afɔrmbukyia no ho. 9Na ɔsɔfo no nyi edziban afɔr no do nkaadze no, na ɔnhyew no wɔ afɔrmbukyia no do: ɔyɛ ogya afɔr a oyi nka huanhuam ma EWURADZE. 10Na edziban afɔr no mu dza ɔbɛka no nyɛ Aaron nye ne mbabanyin dze: ɔyɛ EWURADZE ogya afɔr mu krɔnkrɔndze mu adzekrɔnkrɔn. 11Edziban afɔr biara a hom dze bɛbrɛ EWURADZE no, mma wɔmmfa mbɔrkaw nnyɛ: na mma hom nnhyew mbɔrkaw, anaa ewo biara, dɛ ogya afɔr mma EWURADZE. 12Hom mfa iyinom mbrɛ EWURADZE, dɛ nduadzewakan ayɛyɛdze: na afɔrmbukyia no do dze, na mma bi mmba mmbeyi nka huanhuam. 13Na w’edziban afɔr ayɛyɛdze biara fa nkyen to mu; nkyii so mma wo Nyankopɔn ahyɛmu nkyen no mmpa w’edziban afɔr mu: w’ayɛyɛdze nyinara mu fa nkyen ka ho bra.
14Na sɛ edze nduadzewakan ayɛyɛdze rebrɛ EWURADZE a, fa eburow mbɛtsem a wɔatoto no ogya mu, eburow mbɛtsem nomanoma a wɔapose, yɛ wo nduadzewakan mu ayɛyɛdze bra. 15Na fa ngo gu do, na fa krɔbɔw to do: ɔyɛ edziban afɔr. 16Na ɔsɔfo no nhyew ne nkaadze no, n’eburow mposee no bi, nye no ngo no bi, nye no krɔbɔw no nyinara; ɔyɛ ogya afɔr ma EWURADZE.
ទើបបានជ្រើសរើសហើយ៖
Levitikɔs 2: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
ជំពូកនេះមិនមាននៅក្នុងជំនាន់បកប្រែនេះទេ។ សូមជ្រើសរើសជំពូកផ្សេង ឬជំនាន់បកប្រែមួយផ្សេង។