Eksodɔs 40
40
Moses Tu Ehyiadzibuw No Hyɛ Nyankopɔn Nsa
1Na EWURADZE kasaa kyerɛɛ Moses dɛ, 2Bosoom a odzi kan no ne da a odzi kan no si ehyiadzibuw no ne ntamadan no. 3Na fa ahyɛmudaka no si mu, na fa ntwamutam no kata adaka no enyim. 4Na fa ɔpon no kɔ mu, na siesie ndzɛmba a wɔdze sisi do no; na fa kandzeadua no kɔ mu, na sosɔ ne nkandzea no. 5Na fa sika eduhuamhyew afɔrmbukyia no kesi ahyɛmudaka no enyim, na fa ntamadan no n’abowano nsensɛnho no sɛn. 6Na fa ɔhyew afɔr afɔrmbukyia no si ehyiadzibuw no ne ntamadan no n’abow enyim. 7Na fa eguarsɛn no si ehyiadzibuw no nye afɔrmbukyia no ntamu, na fa nsu gu mu. 8Na sisi dampan no hyia, na fa dampan no n’abotsenano nsensɛnho no sɛn. 9Na fa ɔserango no, na fa sera ntamadan no, nye no mu adze nyinara, na yɛ no krɔnkrɔn, ɔnye no ho ndzɛmba nyinara; na ɔnyɛ krɔnkrɔn. 10Na sera ɔhyew afɔr afɔrmbukyia no, nye no ho ndzɛmba nyinara ngo, na yɛ afɔrmbukyia no krɔnkrɔn: na afɔrmbukyia no nyɛ krɔnkrɔndze mu adzekrɔnkrɔn. 11Na sera eguarsɛn no nye ne ntaease no ngo, na yɛ no krɔnkrɔn. 12Na fa Aaron nye ne mbabanyin no bra ehyiadzibuw no n’abowano, na fa nsu hohor hɔn ho. 13Na fa ntar krɔnkrɔn hyɛ Aaron; na sera no ngo, na yɛ no krɔnkrɔn ma ondzi mo sɔfoe. 14Na fa ne mbabanyin no bra, na hyehyɛ hɔn sorntar: 15na sera hɔn ngo dɛ mbrɛ eseraa hɔn egya ngo no, ma wondzi m’asɔfoe: na hɔn sera no nyɛ hɔn daadaa asɔfodzi nkɔ hɔn ebusuasantsen nyina mu. 16Dɛm na Moses yɛe: dɛ mbrɛ EWURADZE hyɛɛ no no nyinara.
17Na ɔbaa dɛ afe a otsia ebien no mu bosoom a odzi kan no mu, da a odzi bosoom no ne kan no, na wosii ntamadan no. 18Na Moses sii ntamadan no, na ɔhyehyɛɛ ne ngyinangyinado no, na osisii ne ntaabow no, na ɔdze ne mbeabeamu no beabeaa mu, na ogyinagyinaa n’edum no. 19Na ɔtserɛɛw buw no mu kataa ntamadan no do, na ɔdze ɔsor buw no ne nkatado no kataa do; dɛ mbrɛ EWURADZE hyɛɛ Moses no. 20Na ɔfaa dase no dze hyɛɛ adaka no, na ɔdze mpoma no hyehyɛɛ adaka no ho, na ɔdze mbɔbɔrhu egua no sii adaka no do ɔsor; 21na ɔdze adaka no kɔr ntamadan no mu, na ɔdze nsensɛnho ntwamutam no sensɛnee, na ɔdze kataa ahyɛmudaka no enyim; dɛ mbrɛ EWURADZE hyɛɛ Moses no. 22Na ɔdze ɔpon no sii ehyiadzibuw no mu, wɔ ntamadan no nkyɛn mu kwaamu afamu, wɔ ntwamutam no ekyir. 23Na osiesiee edziban no wɔ do wɔ EWURADZE enyim; dɛ mbrɛ EWURADZE hyɛɛ Moses no. 24Na ɔdze kandzeadua no sii ehyiadzibuw no mu, wɔ ɔpon no tsentsendo, wɔ ntamadan no nkyɛn mu pomu afamu. 25Na ɔsosɔɔ nkandzea no wɔ EWURADZE enyim; dɛ mbrɛ EWURADZE hyɛɛ Moses no. 26Na ɔdze sika afɔrmbukyia no sii ehyiadzibuw no mu wɔ ntwamutam no enyim: 27na ɔhyeew nduhuam wɔ do; dɛ mbrɛ EWURADZE hyɛɛ Moses no. 28Na ɔdze nsensɛnho no sɛɛn ntamadan no n’abow no ano. 29Na ɔdze ɔhyew afɔr afɔrmbukyia no sii ehyiadzibuw ntamadan no n’abow no ano, na ɔbɔɔ do ɔhyew afɔr nye edziban afɔr; dɛ mbrɛ EWURADZE hyɛɛ Moses no. 30Na ɔdze eguarsɛn no sii ehyiadzibuw no nye afɔrmbukyia no ntamu, na ɔdze nsu guu mu dɛ wɔmfa nhohor hɔnho. 31Na Moses nye Aaron nye ne mbabanyin no hohoor hɔn nsa ho nye hɔn anan ho wɔ hɔ; 32aber a wɔrokɔ ehyiadzibuw no mu, na aber a wɔrebɛbɛn afɔrmbukyia no, wɔhohoor hɔnho: dɛ mbrɛ EWURADZE hyɛɛ Moses no. 33Na osii dampan no dze twaa ntamadan no nye afɔrmbukyia no ho hyiae, na ɔdze dampan no n’abotsenano nsensɛnho no sɛnee. Nna Moses wiee edwuma no yɛ.
34 #
1 Ahe 8.10, 11; Isa 6.4; Eze 43.4, 5; Nyi 15.8 Nna mununkum no bɛkataa ehyiadzibuw no do, na EWURADZE enyimnyam bɛhyɛɛ ntamadan no ma. 35Na Moses enntum annhɛn ehyiadzibuw no mu, osian mununkum no a ɔtse do, na EWURADZE enyimnyam a ahyɛ ntamadan no ma ntsi. 36Na aber a wɔama mununkum no do wɔ ntamadan no do no, nna Israelmba etu kɔ kan, wɔ hɔn akwantutu no nyina mu; 37na sɛ mununkum no wɔamma do a, ɔnodze wonntu kwan araa kodur da a wɔama do no. 38Osiandɛ EWURADZE no mununkum no wɔ ntamadan no do adzekyee, na ogya wɔ mu adzesaa, wɔ Israel fi no nyinara enyim, wɔ hɔn akwantutu no nyina mu.
ទើបបានជ្រើសរើសហើយ៖
Eksodɔs 40: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.