Ndwuma 14
14
Paul na Barnabas Wɔ Ikonium
1Na ɔbaa dɛ Ikonium so wɔkɔr Jewfo nhyiamudan no mu, na wɔkɛkaa asɛm ma Jewfo nye Griikfo nyimpadodow pii gyee dzii. 2Na Jewfo asoɔdzenfo no kenyaan amanamamfo no, na wɔmaa wonyaa adwen bɔn wɔ enuanom no ho. 3Na dɛm ntsi wɔtsenaa hɔ kyɛree, na wɔkasaa ndam do wɔ Ewuradze mu, na no so dzii n’adom asɛm no ho dase, na ɔnam hɔn nsa do yɛɛ nsɛnkyerɛdze nye anwanwadze. 4Na kurow no mu nyimpadodow no mu paae, na ɔfa dzii Jewfo no afa, na ɔfa so dzii asomafo no afa. 5Na amanamamfo nye Jewfo nye hɔn etsitsir bɔɔ kyirididi baa dɛ wɔrobɔbɔ hɔn adapaa na woesiw hɔn abo no, 6wohunii na woguanee kɔr Likaonia nkurow Listra nye Derbe nye asaase a oehyia hɔ no do: 7na hɔ na wɔkɛkaa asɛmpa no.
Listra Dwumadzi
8Na Listra hɔ ɔbarimba bi tse hɔ a ne nan mu nnyɛ dzen, ɔyɛ obubuafo fi ne na yamu a ɔnnantseew da. 9Ɔno na Paul rekasa no otsiee no. Na Paul dze, ɔdze n’enyi tsiim no do, na ohun dɛ ɔwɔ gyedzi dɛ no ho bɛsan no, 10ɔdze ndze kɛse tseaa mu dɛ, Soɛr gyina wo nan do tsentsen. Na ohuruhuruwii na ɔnantsewee. 11Na nyimpadodow no hun dza Paul ayɛ no, wɔmaa hɔn ndze do kae wɔ Likaonia kasa mu dɛ, Enyame eyiyi hɔnho dɛ nyimpa esiansian aba hɛn nkyɛn. 12Na wɔfrɛɛ Barnabas Zeus, nye Paul Hermes, osiandɛ ɔno nye ɔsɛnkafo tsitsir no. 13Na Zeus a ɔwɔ kurow no enyim no sɔfoe dze anantwinyin nye nhyiren katraka baa kurow no n’abowano, dɛ ɔnye nyimpadodow no robɔbɔ afɔr. 14Na asomafo Barnabas nye Paul tsee no, wosunsuaan hɔn ntar mu, na wotutuu mbirika kɔdɔɔ nyimpadodow no mu 15#Eks 20.11; Dwom 146.6 tseaa mu dɛ, Mbarimba, ɔyɛ dɛn na hom reyɛ yinom yi? Hɛn so yɛyɛ hom saso nyimpa dɛ homara, na yɛka asɛmpa kyerɛ hom dɛ hom ndan mfi egyangyandze yi ho nkɔ tseasefo Nyankopɔn nkyɛn: ɔno na ɔbɔɔ sor nye asaase nye po, nye dza ɔwɔ mu nyina: 16ɔno na mbersantsen a oebotwa mu no, ɔmaa amanaman nyina kwan dɛ wɔnnantsew hɔnankasa hɔn akwan mu. 17Naaso oenngyaa no ho adasedzi, dɛ ɔyɛɛ ayamuyie, na ɔdze nsu fii sor maa hom, nye ndɔbaaber, na ɔdze edziban nye abotɔyamu hyɛɛ hom akoma ma. 18Na nsɛm a wɔkae nyina ekyir no, wɔfonae ansaana worutum esiw nyimpadodow no kwan dɛ mma wɔmmbɔ afɔr mma hɔn.
19Na Jewfo bi fii Antiok nye Ikonium baa hɔ, na wɔwee guu nyimpadodow no aso mu ma wosiiw Paul abo, na wɔtwee no fiir kurow no mu a nna wosusu dɛ oewu. 20Na esuafo no begyinaa no ho hyiae no, ɔsoɛree na ɔkɔr kurow no mu; na adze kyee no ɔnye Barnabas fii hɔ kɔr Derbe.
Wɔsan Kɔ Antiok a Ɔwɔ Siria
21Na wɔkaa asɛmpa no kyerɛɛ kurow no na wɔyɛɛ dodowara esuafo no, wɔsanee baa Listra, Ikonium nye Antiok, 22bɛhyehyɛɛ esuafo no nkuran, na wotutuu hɔn fo dɛ wɔntsena gyedzi no mu, na afei so otwar dɛ yedua ahohia pii mu kɔ Nyankopɔn ahenman no mu. 23Na wɔhyehyɛɛ mpanyimfo wɔ asɔr nyina mu, na wodzii mbuada yɛɛ asɔr no, wɔdze hɔn hyɛɛ Ewuradze a wɔgyee no dzii no ne nsa.
24Na wotwaa mu wɔ Pisidia no, wɔbaa Pamfilia. 25Na wɔkaa asɛm no wɔ Perga no, wosianee bodur Atalia; 26ofi hɔ na wɔfaa nsuenyi baa Antiok mbrɛ wɔdze hɔn hyɛɛ Nyankopɔn adom nsa maa edwuma a woekowie dzi no. 27Na wɔbae no, wɔfrɛfrɛɛ asɔrmba no boaa ano, na wɔkaa dza Nyankopɔn dze hɔn akɛyɛ nyina, na mbrɛ oebue gyedzi abow no ama amanamamfo no. 28Na wɔnye esuafo no tsenaa hɔ ma ɔkyɛree.
ទើបបានជ្រើសរើសហើយ៖
Ndwuma 14: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
