Matewu 28
28
Lithowo nya liphanga
(Marko 16:1-8; Luka 24:1-12; Johane 20:1-10)
1Na yi vbindride Sabhadho, khu mambagugya nya litshigu nya guphele nya semana, Mariya wa Madhalene ni mumbe Mariya va di ya holela lithowo. 2Avbovbo, khu githugedza, gu di manega girevareva, kholu ngilozi ya Pfhumu, yi di tshiga khu Ndzadzini yita liginya giwindri, yi khala khu vbatshani gakone. 3Makhalelo yaye yi di wonega kha nga gulasa nya ndzadzi; guambala gwaye gu di aga nga hunguva. 4Masotshwa ma nga bani ma ghadha lithowo ma di ndrendremela, ma gu dzima, khu hwanga.
5Aholu ngilozi yi di khusa lito, yi embela vanyamayi vale, khiyo: “Mu nga thavi; nyi ngu dziti nya gukheni mwa gu vbweta Jesu a nga khokhothedwago. 6Mwalo avba. Wugide, kha nga idzo a nga ganelago khidzo. Deluni muta wona avbo a nga bani lade avbo. 7Olu indrani khu guvbiredza muya tivisa vapizane vaye, khenu: ‘Uye wugide khu gufani, a na mi hegudzani gu vboha Galileya. Iyo mu na guya mu wonago.’ Khiso esi nyi nga vbweta gu mi tivisani!”
Jesu a ngu dzi wonegisa ga vanyamayi nya gukatege
8Vanyamayi vale, na va tade khu hwanga, gumogo ni gunengela, va di khuga khu vbale khu guvbiredza, va gu tutuma, gasi guya tivisa vapizane.
9Jesu a di va khinga, a va losa, khuye: “Gugideni.” Avo va di mu hidzimelela, vaya dzi thesa migondroni gwaye va gu mu khozela. 10Jesu a di va embela, khuye: “Mu nga thavi gilo; indrani muya tivisa vandriyangu va hongole Galileya, va na nyi wonela iyoyo.”
Malipha ya vaghadhi
11Na va nga romo ndzilani vanyamayi vava, vambe vaghadhi va di tutuma va hongola dhoropani vaya tivisa vakhongolo nya vaphasi satshavbo iso si nga dugelelago. 12Ava va di gira tshangano ni madhota, va gu pwana gulivba dzitsapawu nya dzingi masotshwa yale, 13va ma laya, khavo: “Indrani khenu vapizane vaye va di ta ni vbakari nya wutshigu vata mu ba na hi lade. 14Sa gu tidwa isoso khu mwamangulu Pilato, mu nga thavi, ethu khethu hi na gu si tigo. Kha na mi gira gilo.” 15Na va hakhide dzitsapawu, va di gira kha nga idzo va nga embedwago khidzo. Khidzo kharati va embeledzanago khidzo Vajudha kala matshigu ya muhuno.
Gu dzi wonegisa ga Jesu Galileya ni gurumedwa ga vapizane
(Marko 16:14-18; Luka 24:36-49; Johane 20:19-23)
16Vale nya likhumi na moyo va di hongola Galileya, gigomoni gile va nga bani va leletedwe khu Jesu. 17Na va mu wone, va di mu khozela; vbakari gwawe va diromo vambe va nga bani va gu kanakana. 18Khavbo avbo, Jesu a di hidzimela, a va embela, khuye: “Nyi ningidwe tshivba yatshavbo nya gufume Ndzadzini ni mafuni. 19Khu kharato, indrani mu gimbila mu hevbudza mayigo yatshavbo, mu bhapatisa vathu khu lina la Babe, ni la Mwamana, ni la Liphuvbo nya Guage. 20Va hevbudzeni gu landrisa satshavbo iso nyi nga mi hevbudzani. Gasi eni nyi na bani nyiri nanu gikhati gyatshavbo, kala guhegisani nya litigo.”
ទើបបានជ្រើសរើសហើយ៖
Matewu 28: BGG2014
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.
