2 Makabhewu 4
4
Milembo ya Simoni
1Simoni, muthuledzi nya thomba ni mulogovedzi nya litigo laye, a di singedza malipha Oniya, gukhuye khuye a nga kutsedzela Heliyodhoro gu gira iso a nga girago, a khala kharalo, givangelo nya guvivba gogo. 2A di rana mupfhadzi wule a girelago nya sadi lidhoropa, oyu a gu muemeli nya vathu vaye ni muvhikeli nya milayo. 3Livengo leli li diya hwindzo khu gu andra, gukala vambe nya tsawa wa Simoni va mana nandru nya gusonge vathu. 4Oniya, khu gu wona dzimhango dzedzi nya matshoho yoyo yatshavbo, ni gu wona gukhuye Apoloniyo, mwamangulu wa Kelesiriya, a gu mwamana wa Menesitewu, a ngu emela mapimo nya guvivbe ya Simoni, 5a diya dzi wonegisa ga mufumeli, nasiri khu mapimo nya guye thuledze vathu va na gyawe, aholu na gu gurumedzwa basi khu gukhathalela dzifanelo dza vathu vaye vatshavbo ni edzi dza moyo ni moyo. 6A di wona gwadi gukhuye, mufumeli a gumba lamula mahungu yaya, gu na garadza ngudzu gu manega gurula ni gu vbedza guhandruga ga Simoni.
7Hwane nya gufe ga mufumeli Selewuko, Antiyoko Epifaniyo na pharide ndronga nya wufumu, Jasamo,#4:7 Jasamo, ndruye wa Oniya, lina laye nya mavelego a diri Josuwa, aholu a vbindrugedza lina a dzi rana khuye Jasamo khu gufela gu yeyedza gukhuye digide gwaye a bela umo nya tumbunugo nya wuhedheni nya Gigereki, a di rengelela mufumeli, kala a gu ningwa gu khala uye khongolo nya vaphasi nya mhamba. ndruye wa Oniya, a di phela gu tedwa khu makolo nya guvbwete wulanga nya Muphasi nya khongolo nya mhamba. 8A diya wonana ni mufumeli, a tumbisa gu mu ninga mazana mararu ni livbandre na limwedo magumi (360) dzitaleta nya parata ni livbandre na mararu magumi dzitaleta (80) nya yimbe mikhupo. 9Gudiga nya isoso, a di tumbisa gambe gu livba ga mufumeli dzimbe lizana ni livbandre magumi (150), a gu mu dzumedzisa gu tula wulanga nya mihagano nya gutiyise mili madzaha ni wulanga nya guhevbudze guti madzaha,#4:9 Wulanga wowo wu di ranwa khu Gigereki gupwani “Ginásio,” ni “Efebhiya,” a gu wulanga va nga bani va tshanganisa avbo madzaha gukhugela likhumi na livbandre na miraru kala magumavili myaga, va hevbudzwa mafumbu yatshavbo nya mapalisana, nya tshivba, gu dwana, guti, mapimo ni gugengela. Kharati lidhoropa li di vbindrugedza li gu khala wulanga nya guhevbudze tumbunugo nya mavbanyelo nya Giheleni. Wona gambe: 1 Mak 1:14-15. ni gu lovela vathu va vbanyago Jerusalema kha nga sivelegwa sa Antiyokiya.
10Na dzumedzisidwe khu mufumeli ni gu ningwa gu khala muphasi nya khongolo nya mhamba, Jasamo a di ndrindra va na gyawe ga yimbe mitumbunugo nya mavbanyelo nya Vagereki.#4:10 Tumbunugo nya mavbanyelo ni wukhodwa nya Vagereki wu di ranwa pwani “Helenismo”. 11A di fuvisa wurendra wule va nga ningwago Vajudha khu mufumeli, khu gu lomba ga Johane, babe wa Ewupolemu, a nga rumedwago ga Varoma guya vbedzisa guhunga navo pwanano nya gidzumeledzwano ni wupari. Jasamo a di tshipisa gambe milayo ya tigoni, a gu bedza sihena nya wuhedheni, si hambanago ngudzu ni Nayo. 12Tiyide gu vbaha wulanga nya guhevbule avbo mitumbunugo nya Gigereki vbafuvbi ni wulanga nya likhokhola, #4:12 Likhokhola khu Gigereki pwani “Acropole” , a diri wulanga wu vbahidwego gitezi, gasi gu khala avbo vawoneleli nya lidhoropa. Khu wulanga wowo gu di wonega tendrela watshavbo nya Nyumba ya Nungungulu. a gurumedza madzaha ya mudzindrangani nya guthavisege gu ambala petasu.#4:12 “Petasu” gihugu va ambalago Vagereki va belago mapalisanani ni litungani gasi gu vhikela hungo. 13Tumbunugo nya mavbanyelo nya Gigereki wu di bela khu tshivba ni tshivba, ni gingweno nya sihena nya wuhedheni gi di vhuvhuma ngudzu, na gi gu ningwa wulanga khu wupumbu nya wukhongolo wa Jasamo, a nga bani a wonega ngudzu kha nga muthu nya guvivbedwe khu monyo, nasiri kha nga khongolo nya Vaphasi nya mhamba. 14Vaphasi nya mhamba va di si sayisi gwadi thumo nya giluvelo, va di si khathali khu Nyumbani ga Nungungulu, va di si ningeli miphaso, aholu, va di sengana khu gyawe, va tutumela guya dzi bedzedzela nyumbani nya sihevbulo nya tumbunugo nya Gigereki numo nya mihagano nya guloledziswe. 15Va di si khathali khu gu zundza litigo lawe, va di tsakiswa ngudzu khu gu ningwa malanga nya gukhugege nya tumbunugo nya Gigereki. 16Khu kotani nya isoso va di dzi vangela libango nya likhongolo ngudzu, kholu avo vale va nga bani va gu zama gu va pimedzela mavbanyelo yawe ga satshavbo, va di vbindrugedza va va wugela, va khala valala ni vatshanisi vawe.
17Matshigu ma nga landrelago, hwane nya esi, ma di wonegisa gwadi gupwani guhambanisa milayo ya Nungungulu khandri gilo nya guhagane khigyo. 18Khu matshigu va nga bani va gu gira, mihagano nya yikhongolo yi girwago khu livbandre ni livbandre myaga, dhoropani ga Tiro, na romo mufumeli, 19Jasamo nya guvivbedwe khu monyo a di rumela khu Jerusalema, tsawa nya vathu nya sivelegwa sa Antiyokiya, na vari ni mazana mararu (300) dzidrakima nya parata gasi guya girwa miphaso nya gurungudze Herikule. Aholu, avo va nga bani va pharide tengo wowo, va di wona gu si khalegi gwadi gu wu thumisa vbamiphasotunu, khu kharato, va di wona nari tshukwana gu thumisa dzitsapawu dzedzi ga simbe silo. 20Khu gugola ga Jasamo, gyuma gi di yela na gi thumisidwe vbamiphasotunu ga Herikule, aholu vale va nga dzi resago va di pimisa gu dzi thumisa gu girisa dzingalava nya makasiya nya gudwane nyimbi.
Antiyoko Epifaniyo dhoropani ga Jerusalema
21Apoloniyo, mwamana wa Menesetewu, a di rumedwa gu hongola Egipito, khu gikhati nya guphariswe ndronga mufumeli Pitolomewu Filometori. Antiyoko a di tiviswa gupwani mufumeli yoyu vbindrugedzide mawonelo, a gu khala nala waye, a di vbweta wulanga nya gusihale. Khu guralo, a di vbindra khu tigoni ga Dzope, a gu hongola Jerusalema. 22A diya hakhwa khu githawo khu Jasamo gumogo ni lidhoropa latshavbo, a gu bela khu gutsakedwa vbakari nya myenge ni mikulungwane. Khu vbale, a di khuga ni masotshwa yaye a gu hongola Finisiya.
Menelawu a ngu tshikedza Jasamo
23Na gu vbindride myaga miraru, Jasamo a di rumela Menelawu, ndruye wa Simoni, uye hi ganedego khuye hwane, gasi gu yisa dzitsapawu ga mufumeli, ni guya vbedzisa mabhulo khu mahungu nya gukari nya givbiredza. 24Aholu na dzumedwe mahoni ga mufumeli, Menelawu a di mu bikela mithumo, a khusedza wugulu nya mufumo waye, a tumbisa gu mu ninga mazana mararu (300) dzitaleta guvbindra edzi a nga mu ningago Jasamo. Khu magirelo yoyo, a di ningwa wulanga nya gukhale muphasi nya khongolo nya mhamba. 25Khu kharati, na ningidwe mikhwepa nya wufakazi wa mufumeli, a di wuya Jerusalema mwama wule a nga bani nari mwalo fanelo nya gukhale khongolo nya vaphasi nya mhamba, kholu a diri ni mapimo nya dzihanyi ni wusongi kha nga girengo gya khabini. 26Khu magirelo yaya, Jasamo a nga wandrago wulanga wa ndriyaye khu gu rengelela, a di wandredwa nuye wulanga khu mumbe muthu, a gurumedzwa gu thavela tigoni ga va na Amoni. 27Aholu Menelawu, nari vbagikhalotunu nya wuphasi, kha nga dzi garadza khu gu ningela dzitsapawu ga mufumeli khu tengo a nga bani na tumbiside gu mu ninga. 28Kha thela kota khiso, ambari a nga bani na gu hengudwa khu Sositrato, muthangeli nya likhokhola, a nga bani nari uye gambe muhengisi nya mikhupo; khu gighelo gegi, vatshavbo va vavili va di rambwa guya dzi wonegisa mbeli ga mufumeli. 29Menelawu a di tshiya ndriyaye Lisimako a mu tshikhedza kha nga Muphasi nya khongolo nya mhamba, Sositrato a di tshikedzwa khu Kratesi, muthangeli nya tsawa nya sivelegwa sa Kipra.
Gu songwa ga Oniya
30Na si gu dugelela satshavbo sesi, vavbanyi va Tarsu ni va Malo, va di gira gitereka, va wugela mufumo kholu lidhoropa lawe li di ningedwa ga Antiyokide, mwangadzi nya wuvili wa mufumeli. 31Khu guralo, mufumeli a di khuga khu guvbiredza, gasi guya va rudzisela, a gu tshiya Androniko, moyo nya linganagana gu mu tshikedza thumoni nya wufumeli. 32Menelawu a di pimisa, a wona nari gikhati nya gupwanane ni Androniko; a di mu ninga sombo nya gukari nya ndralama, si nga bidwago Nyumbani ga Nungungulu; simbe sombo a diya rengisa tigoni ga Tiro ni madhoropani ya vbafuvbi. 33Gikhati a nga manago lisine nya satshavbo sesi, Oniya a nga bani na mane wulanga nya wuthavelo tigoni ga Dhafine, vbafuvbi ni Antiyokiya, a di mu kawuka. 34Aholu Menelawu a di rana Androniko khu phuvbo, a mu lomba gukhuye a songe Oniya. Androniko a diya ganela ni Oniya. A di ya mu phazamisa khu magana nya gusengedzele, a tiyisa situmbiso khu gusambanya. Ambari na gu kanakana, Oniya a di dzumela gu diga wuthavelo waye. Gikhati a dugidego, Androniko a di mu songa, nyamba thava tsayiso.
35Khandri Vajudha basi, aholu ni vambe vathu nya vangi va nya mayigo navo va di khuveka ni gulila khu gu songwa khu wughevenga mwama yoyu nyambana nandru. 36Avbo mufumeli a nga wuyago khu madhoropani ya Silisiya, Vajudha va dhoropani gumogo ni Vagereki nya vangi, va nga bani va si goli wughevenga, va diya thuledza khu masongelo nya guvivbe va nga songago khayo Oniya, nyambana gighelo. 37Antiyoko a di goroga ngudzu, a gu tedwa khu gisiro a lila khu gu alakanya guti ni wugengeli nya wukhongolo wa Oniya. 38Na khondrisidwe khu likhulo nya likhongolo, a di dzegela gu tshula Androniko mwendra waye nya giwunguwungu, a gu mu pferulela guambala gwaye, a mu kwirindrindra khu lidhoropa latshavbo kala wulangani a nga songelago avbo Oniya. Khavbo vbale gi ngaya songedwa avbo gighevenga gile, Pfhumu Nungungulu a gi ningidego tsayiso gukhedza khu guvivba gi giridego.
Gufa ga Lisimako
39Nari Jerusalema, Lisimako, khu gu kutsedzedwa khu Menelawu, a di engedzela mithumo yaye nya wuvafa ni gu nyenyezisa sombo nya guagiswe. Na gu palusidwe mithumo yeyi, vathu va di mu ndragela, kholu sombo nya singi nya ndralama si di dzimede.
40Gidzemo gi di vbisega khu gigaha, Lisimako a di somisa matshari gipimo nya magumararu mazana (3.000) vama na va gu thangedwa khu mwama moyo nya dzihanyi, mwama nya khongolo khu tanga gumogo ni wughevenga, a di phela gu gira pfilupfilu.
41Aholu vathu, avbo va nga dzitigo nya gukhavo Lisimako a ngu va dhumela, vambe va di phara siwindri, vambe misimbo, vambe va di tadza mandza khu nguma, silo si nga bani si romo vbale, khu pfilupfilu va di rinyela satshavbo sesi masotshwa ya Lisimako. 42Khu magirelo yaya, nya vangi va di bayisedwa, vambe va di songwa, vale va nga vbuluga va di thava; mune nya gighoho gegi nya gikhongolo a di songwa vbafuvbi ni thomba ya Nyumbani ga Nungungulu.
43Khu kotani nya pfilupfilu yatshavbo yeyi, gu di vegwa nayo nya guningwe nandru Menelawu. 44Avbo mufumeli a nga vbohago tigoni ga Tiro, sirumwa siraru nya tshangano nya madhota, si di mu bikela mbeli gwaye nandru a rwegidwego. 45Aholu Menelawu na wonide nya gukhuye luzide, a di tumbisa dzitsapawu nya dzingi ga Pitolomewu, mwamana wa Dhorimeni, gasi a mane wuhigo ga mufumeli. 46Khu guralo, Pitolomewu, na dzegide mufumeli a hongola naye vbavbatshi nya makupakupa nga khwatshi a gu hadza guya mana gupepa, a diya mu gira a vbindrugedza mipimiso. 47Khu magirelo yaya, Menelawu ambari a nga bani ari uye mune murumi nya guvivbe gwatshavbo, a di tsetseledwa khu mufumeli milandru yatshavbo nya guvivbe a giridego. Aholu, va di rwegwa nandru nya gusongwe vathu nya sisiwana, va nga yela, na va tshudwe nyambana nandru, ambari nari gukhwatshi va di lamudwa phathani ga Vakita.#4:47 Vakita mahundzu nya vathu nya valegalegi, va diri vahavisi ni vakhileli nya dzikavalu. Va di vbanya mayigoni ya Kawukazu, vbafuvbi ni Yiphwa nya Gusivbale, va di ambwa ngudzu khu gugaradza nya milayo yawe. 48Khu guralo, vale va nga vhikela dzifanelo nya lidhoropa, nya vathu, ni sombo nya guage, khavo va nga dzegela gutsayiswa khu guvbiredza nyambana gighelo. 49Khu guralo, ambari vathu nya sivelegwa sa Tiro va dipwa wuvi nya wukhongolo ngudzu khu kotani nya wusongi wowu, va di livba gasi gu dzinga khu wuzundzo vathu vava. 50Khu magirelo yoyo, khu kotani nya makolo ya vafumeli vbadzitsapawutunu, Menelawu a di simama ni wufumu, na gu engedzela gu dandra khu wuvivbi, a vbindrugedza a khala mutshanisi nya khongolo wa va na gyawe.
ទើបបានជ្រើសរើសហើយ៖
2 Makabhewu 4: BGG2014
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.