2 Makabhewu 3
3
I. GIVANGELO NYA GU YEYISE GA VA NA MAKABHEWU
(3—7)
Guvegisa thomba ya Nyumbani ga Nungungulu
1Matshiguni yale, lidhoropa nya gukatege li nga bani li vbanya mugurulani, milayo na yi nga gu landriswa gwadi khu dzindzila nya lisine, khu kotani nya gukhodwe ga Oniya, Muphasi nya Khongolo nya mhamba ni litunga a nga li dwanago ni guvivba, 2Nyumba ya Nungungulu yi di gu ningwa githawo ambari khu vafumeli va vbavbandze. Avo va di gu rungudza Wulanga nya Guage, va engedzela wufumu waye khu miningelo nya lisima. 3Khu magirelo yoyo, Selewuko, mufumeli nya khongolo wa Aziya a di livbela khu gyuma gyaye, satshavbo si nga bani si gu vbwetega gasi gu gira miphaselo nya dzimhamba.
4Aholu, gu di manega moyo nya gupwani khu Simoni, nya lihundzu la Bhejami,#3:4 Vambe valoveteli vari khavo lihundzu la Bhiliga. a nga vegwago kha nga mukhedziseli nya Nyumba ya Nungungulu, a di hambana ni Khongolo nya Vaphasi nya mhamba khu mahungu nya magimbidzeselo nya thumo nya guwonelele wulanga nya wugwewo nya mufumo. 5Kha nga a nga tandrega gu pala Oniya, a diya vbweta moyo nya gupwani Apoloniyo wa tigoni ga Tarisiya, a nga bani na gu fumela kha nga mwamangulu wa Kelesiriya ni Finisiya. 6A diya mu embela gukhuye gikhwama gya Nyumbani ga Nungungulu gi tade khu wufumu nya tandravasayi, tengo wakone wu si kodzwigo gu pimwa, gambe wu si thumiswigo gu renga esi nya miphaselo, a di khuye a na dzi garadza khu gukhuye gyuma gyatshavbo gyogyo gi bela kwamani nya mufumo.
Gurumwa ga Heliyodhoro
7Apoloniyo a di hongola ga mufumeli aya ganela naye khu mahungu nya wufumu ni dzithomba va nga bani va ganede khidzo. Mufumeli a di hatha Heliyodhoro, muwoneleli nya ndranga yaye, a mu rumela ni nayo nya guye dzega dzithomba dzodzo. 8Heliyodhoro a di dzegela gu phara ndzila na gukhuye a guya holela madhoropa ya Kelesiriya ni Finisiya, gasi a di yela guya gira iso a nga rumwago khu mufumeli. 9Na vbohide Jerusalema, a di ya hakhwa gwadi khu Khongolo nya Muphasi nya mhamba ni vakhongolo va dhoropani gwatshavbo, uye a di va ninga mahungu a nga rumedwago ni gu va tivisa gighelo nya lendro laye, a va wudzisa, gukhuye: Ina satshavbo soso lisine gani. 10Muphasi nya khongolo nya mhamba a di mu embela khuye egi a gu nagyo, gyuma nya dzinoni ni sigulungu 11ni tengo nya gukari wu lumbago Hirikano, mwamana wa Tobhiya, mwama nya guthavisege. Esi si ngu hambana ngudzu ni malipha ya Simoni nya guvivbedwe khu monyo, bwelo khavbo a mu embela gukhuye tengo watshavbo nya dzitsapawu dzi guromo guningana basi mazana mana (400) dzitaleta nya parata ni mazana mavili (200) nya ndralama. 12A di mu embela gambe khuye kha gu kodzegi gu pemba vale va nonedzago githawo ni gutumba guaga nya Nyumba ya Nungungulu kha nga wulanga wu si yeligo gu nyenyeziswa, wu ningwago githawo tigoni gwatshavbo.
Heliyodhoro a ngu zama gu phanga Nyumbani ga Nungungulu
13Aholu Heliyodhoro, khu gu landrisa guruma ga mufumeli a di va hakha khuye dzithomba dzedzi dzi ngu yela gu dzegwa dzi yiswa nyumbani nya thomba nya wufumu. 14Khu litshigu a nga bani a li vegiside uye, a di bela khu makungo nya guvbwete gu ya dzega dzithomba dzodzo.
Gukhugela gikhati gyogyo, wuvi ni gutshaniseka nya gukhongolo ngudzu gu di fenengedza lidhoropa latshavbo. 15Vaphasi nya mhamba na va ambade guambala gwawe nya wuphasi, va di noga mbeli nya giluvelo, va gu lomba wule a guromo ndzadzini a gu uye a nga vega nayo nya kwama, a ruma gu sayisa gwadi dzithomba dza vale va ngata dzi vegago. 16Mwalo a nga bani a khedza khovbeni ga Khongolo nya Vaphasi nya mhamba a sipwi wuvi, kholu khovbe yaye yi di wonegisa wuvi nya wukhongolo ngudzu wa hefemuloni gwaye. 17Hwanga wu nga mu telago wu di kutsunga givili gyatshavbo khu rerema yi nga wonegisa gugaradzega gwa ndrani nya monyo waye. 18Khu gu wona gighoho nya gunyenyeziswe Nyumba ya Nungungulu na gi gu vboha vbafuvbi, vathu va di duga khu sikwata khu dzindrangani gwawe va ya patana gumogo va gira nombelo. 19Vanyamayi, na va sumede silendra kala maveleni, va di tadza dzindzila; dzimbiri dzi olovelago gu khothedwa nyumbani, dzi di wonega na dzi gu tutuma, dzimbe dzi ya malimbatunu, dzimbe mabhiyotunu, dzimbe dzi khedzisela khu sihogoni. 20Vatshavbo va di khusedza mandza ndzadzini va lombelela. 21Gu di pwisa wusiwana gu wona gutshaniseka ga vathu vava va khuvekidego ni wuvi wa Khongolo nya Vaphasi nya mhamba.
Tsayiso wa Heliyodhoro
22Vatshavbo va di lomba gu vhikedwa khu Nungungulu nya Tshivba Yatshavbo, gasi a vbulugise guphangwa kwama nya dzithomba dza vale va nga ta vegago. 23Heliyodhoro khu gyaye gipandre, a di dzi vegisede gu landra thumo waye kala mahegiso. 24A diri gumogo ni vathu vaye na va somide matshari, vbafuvbi ni wulanga nya thomba, gikhati Pfhumu, mune nya maphuvbo nya Tshivba Yatshavbo, a nga dzi wonegisago ga vatshavbo va nga tiyelago gu bela Nyumbani ga Nungungulu. Avo va di dzima khu hwanga mbeli nya wudhumo wa Nungungulu. 25Va di wona kavalu na yi khiledwe khu muthu nya guthise ngudzu, na yi ambagisedwe sighwabhata nya wufumu, na yi gu veta Heliyodhoro khu masabi khu mawundru ya mbeli. Mukhileli a di ambade dzingandzu nya ndralama nya wufumu. 26Khu gikhati gya gimwegyo, gu di vboha mambe madzaha mavili nya tshivba, nya gutale khu wugulu, na va ambade wufumu, va nga ta ema kheno ni eno ga Heliyodhoro, va mu kwamula nyamba hefemula ni gu mu khinyelela ngudzu. 27Heliyodhoro a di dzegela gu thega vbavbatshi a gu fenengedzwa khu gidema nya guthise ngudzu. Vabangaladzi vaye va di mu khusa va mu ladzisa vbalithathotunu. 28Uye, khu gikhatinyana hwane a nga belago makhuvini nya thomba na gu bangaladzwa khu vathu nya vangi ni masotshwa yatshavbo ma mu vhikelago, khuye olu a dugago na vbede tshivba hwane nya gu bani na yi wone gwadi tshivba ya Nungungulu. 29Avbo uye a nga bani na gu konya vbavbatshi khu gu bayiswa khu tshivba ya Nungungulu, nyamba ganela ambari gutumba gukhuye a na vbanya, 30aholu vavbanyi va Jerusalema va di rungudza Pfhumu Nungungulu a nga dhumisago nyumba yaye. Wulanga nya Guage, khu gikhatinyana wu nga bani wu tade khu wuvi ni pfilupfilu, olu wu tade khu gunengela ni gutsaka, kholu Pfhumu nya Tshivba Yatshavbo a wonegisidego tshivba yaye.
31Khavbo avbo, vambe vangana va Heliyodhoro va di hidzimela ga Oniya va mu lomba gu a lombelela ga Uye a Khusegidego Ngudzu, a thele wuhigo nya guvbanyise ga wule a nga bani a gu sala nyambana rendre nya guvbanyiswe gambe. 32Khongolo nya Vaphasi nya mhamba, khu gu thava gukhuye mufumeli a nga pimisa gukhuye Vajudha va di gira gikungo nya gusonge Heliyodhoro, a di gira phaso nya mhamba a gu mu lombela womi. 33Gikhati Khongolo nya Vaphasi a nga bani a gu ningela mhamba nya ditshedzo, ma di ta wonega gambe mahoni ga Heliyodhoro ayo madzaha yale ya mamowo na ma ambade dzingandzu dza dzimwedzo, ma ta ema, ma mu embela, khayo: “Bonga ngudzu Oniya, Muphasi nya Khongolo nya mhamba, kholu khu kotani yaye, Pfhumu a ngu gu bweledzela womi. 34Uwe olu u gi tidego gitsayiso gya ndzadzini, tivisa vathu vatshavbo wugulu wa Nungungulu.” Na va ganede magana yaya, va di mwalalega.
Heliyodhoro a ngu vbindrugedza a khodwa
35Heliyodhoro a di ningela phaso nya mhamba ga Pfhumu, a gira milombelo ni sisambanyo nya singi ga wule a nga mu bweledzelago guvbanya. Khavbo avbo, Heliyodhoro a di bonga Oniya, a gu bwelela ni masotshwa yaye ga mufumeli. 36A di gira wufakazi ga vathu vatshavbo khu siliwugiso nya sikhongolo a nga girago Nungungulu na si wona khu maho yaye. 37Mufumeli a di wudzisa Heliyodhoro khuye khu wevbi mwama a pimisago gukhuye a nga mu rumela nyaluphye gu hongola Jerusalema. Heliyodhoro a di hakha, khuye: 38“Wa gu bani uri ni nala wago, mwendro muthu u dzitigo gukhuwe a ngu gu phika, mu rumele uye a hongola iyoyo. A gu ya vbuluga a na wuya na dayisidwe nya dzadi, kholu wulanga wule, khu lisine, yomo tshivba ya Nungungulu. 39Oyu a vbanyago ndzadzini, womo wulanga wule. A ngu bayisa ni gu mbembisa ni wevbini a belago khu mapimo nya guvivbe.” 40Khiso esi si nga dugelela ga Heliyodhoro ni guvbanyiswa nya thomba ya Nyumbani ga Nungungulu.
ទើបបានជ្រើសរើសហើយ៖
2 Makabhewu 3: BGG2014
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.
2 Makabhewu 3
3
I. GIVANGELO NYA GU YEYISE GA VA NA MAKABHEWU
(3—7)
Guvegisa thomba ya Nyumbani ga Nungungulu
1Matshiguni yale, lidhoropa nya gukatege li nga bani li vbanya mugurulani, milayo na yi nga gu landriswa gwadi khu dzindzila nya lisine, khu kotani nya gukhodwe ga Oniya, Muphasi nya Khongolo nya mhamba ni litunga a nga li dwanago ni guvivba, 2Nyumba ya Nungungulu yi di gu ningwa githawo ambari khu vafumeli va vbavbandze. Avo va di gu rungudza Wulanga nya Guage, va engedzela wufumu waye khu miningelo nya lisima. 3Khu magirelo yoyo, Selewuko, mufumeli nya khongolo wa Aziya a di livbela khu gyuma gyaye, satshavbo si nga bani si gu vbwetega gasi gu gira miphaselo nya dzimhamba.
4Aholu, gu di manega moyo nya gupwani khu Simoni, nya lihundzu la Bhejami,#3:4 Vambe valoveteli vari khavo lihundzu la Bhiliga. a nga vegwago kha nga mukhedziseli nya Nyumba ya Nungungulu, a di hambana ni Khongolo nya Vaphasi nya mhamba khu mahungu nya magimbidzeselo nya thumo nya guwonelele wulanga nya wugwewo nya mufumo. 5Kha nga a nga tandrega gu pala Oniya, a diya vbweta moyo nya gupwani Apoloniyo wa tigoni ga Tarisiya, a nga bani na gu fumela kha nga mwamangulu wa Kelesiriya ni Finisiya. 6A diya mu embela gukhuye gikhwama gya Nyumbani ga Nungungulu gi tade khu wufumu nya tandravasayi, tengo wakone wu si kodzwigo gu pimwa, gambe wu si thumiswigo gu renga esi nya miphaselo, a di khuye a na dzi garadza khu gukhuye gyuma gyatshavbo gyogyo gi bela kwamani nya mufumo.
Gurumwa ga Heliyodhoro
7Apoloniyo a di hongola ga mufumeli aya ganela naye khu mahungu nya wufumu ni dzithomba va nga bani va ganede khidzo. Mufumeli a di hatha Heliyodhoro, muwoneleli nya ndranga yaye, a mu rumela ni nayo nya guye dzega dzithomba dzodzo. 8Heliyodhoro a di dzegela gu phara ndzila na gukhuye a guya holela madhoropa ya Kelesiriya ni Finisiya, gasi a di yela guya gira iso a nga rumwago khu mufumeli. 9Na vbohide Jerusalema, a di ya hakhwa gwadi khu Khongolo nya Muphasi nya mhamba ni vakhongolo va dhoropani gwatshavbo, uye a di va ninga mahungu a nga rumedwago ni gu va tivisa gighelo nya lendro laye, a va wudzisa, gukhuye: Ina satshavbo soso lisine gani. 10Muphasi nya khongolo nya mhamba a di mu embela khuye egi a gu nagyo, gyuma nya dzinoni ni sigulungu 11ni tengo nya gukari wu lumbago Hirikano, mwamana wa Tobhiya, mwama nya guthavisege. Esi si ngu hambana ngudzu ni malipha ya Simoni nya guvivbedwe khu monyo, bwelo khavbo a mu embela gukhuye tengo watshavbo nya dzitsapawu dzi guromo guningana basi mazana mana (400) dzitaleta nya parata ni mazana mavili (200) nya ndralama. 12A di mu embela gambe khuye kha gu kodzegi gu pemba vale va nonedzago githawo ni gutumba guaga nya Nyumba ya Nungungulu kha nga wulanga wu si yeligo gu nyenyeziswa, wu ningwago githawo tigoni gwatshavbo.
Heliyodhoro a ngu zama gu phanga Nyumbani ga Nungungulu
13Aholu Heliyodhoro, khu gu landrisa guruma ga mufumeli a di va hakha khuye dzithomba dzedzi dzi ngu yela gu dzegwa dzi yiswa nyumbani nya thomba nya wufumu. 14Khu litshigu a nga bani a li vegiside uye, a di bela khu makungo nya guvbwete gu ya dzega dzithomba dzodzo.
Gukhugela gikhati gyogyo, wuvi ni gutshaniseka nya gukhongolo ngudzu gu di fenengedza lidhoropa latshavbo. 15Vaphasi nya mhamba na va ambade guambala gwawe nya wuphasi, va di noga mbeli nya giluvelo, va gu lomba wule a guromo ndzadzini a gu uye a nga vega nayo nya kwama, a ruma gu sayisa gwadi dzithomba dza vale va ngata dzi vegago. 16Mwalo a nga bani a khedza khovbeni ga Khongolo nya Vaphasi nya mhamba a sipwi wuvi, kholu khovbe yaye yi di wonegisa wuvi nya wukhongolo ngudzu wa hefemuloni gwaye. 17Hwanga wu nga mu telago wu di kutsunga givili gyatshavbo khu rerema yi nga wonegisa gugaradzega gwa ndrani nya monyo waye. 18Khu gu wona gighoho nya gunyenyeziswe Nyumba ya Nungungulu na gi gu vboha vbafuvbi, vathu va di duga khu sikwata khu dzindrangani gwawe va ya patana gumogo va gira nombelo. 19Vanyamayi, na va sumede silendra kala maveleni, va di tadza dzindzila; dzimbiri dzi olovelago gu khothedwa nyumbani, dzi di wonega na dzi gu tutuma, dzimbe dzi ya malimbatunu, dzimbe mabhiyotunu, dzimbe dzi khedzisela khu sihogoni. 20Vatshavbo va di khusedza mandza ndzadzini va lombelela. 21Gu di pwisa wusiwana gu wona gutshaniseka ga vathu vava va khuvekidego ni wuvi wa Khongolo nya Vaphasi nya mhamba.
Tsayiso wa Heliyodhoro
22Vatshavbo va di lomba gu vhikedwa khu Nungungulu nya Tshivba Yatshavbo, gasi a vbulugise guphangwa kwama nya dzithomba dza vale va nga ta vegago. 23Heliyodhoro khu gyaye gipandre, a di dzi vegisede gu landra thumo waye kala mahegiso. 24A diri gumogo ni vathu vaye na va somide matshari, vbafuvbi ni wulanga nya thomba, gikhati Pfhumu, mune nya maphuvbo nya Tshivba Yatshavbo, a nga dzi wonegisago ga vatshavbo va nga tiyelago gu bela Nyumbani ga Nungungulu. Avo va di dzima khu hwanga mbeli nya wudhumo wa Nungungulu. 25Va di wona kavalu na yi khiledwe khu muthu nya guthise ngudzu, na yi ambagisedwe sighwabhata nya wufumu, na yi gu veta Heliyodhoro khu masabi khu mawundru ya mbeli. Mukhileli a di ambade dzingandzu nya ndralama nya wufumu. 26Khu gikhati gya gimwegyo, gu di vboha mambe madzaha mavili nya tshivba, nya gutale khu wugulu, na va ambade wufumu, va nga ta ema kheno ni eno ga Heliyodhoro, va mu kwamula nyamba hefemula ni gu mu khinyelela ngudzu. 27Heliyodhoro a di dzegela gu thega vbavbatshi a gu fenengedzwa khu gidema nya guthise ngudzu. Vabangaladzi vaye va di mu khusa va mu ladzisa vbalithathotunu. 28Uye, khu gikhatinyana hwane a nga belago makhuvini nya thomba na gu bangaladzwa khu vathu nya vangi ni masotshwa yatshavbo ma mu vhikelago, khuye olu a dugago na vbede tshivba hwane nya gu bani na yi wone gwadi tshivba ya Nungungulu. 29Avbo uye a nga bani na gu konya vbavbatshi khu gu bayiswa khu tshivba ya Nungungulu, nyamba ganela ambari gutumba gukhuye a na vbanya, 30aholu vavbanyi va Jerusalema va di rungudza Pfhumu Nungungulu a nga dhumisago nyumba yaye. Wulanga nya Guage, khu gikhatinyana wu nga bani wu tade khu wuvi ni pfilupfilu, olu wu tade khu gunengela ni gutsaka, kholu Pfhumu nya Tshivba Yatshavbo a wonegisidego tshivba yaye.
31Khavbo avbo, vambe vangana va Heliyodhoro va di hidzimela ga Oniya va mu lomba gu a lombelela ga Uye a Khusegidego Ngudzu, a thele wuhigo nya guvbanyise ga wule a nga bani a gu sala nyambana rendre nya guvbanyiswe gambe. 32Khongolo nya Vaphasi nya mhamba, khu gu thava gukhuye mufumeli a nga pimisa gukhuye Vajudha va di gira gikungo nya gusonge Heliyodhoro, a di gira phaso nya mhamba a gu mu lombela womi. 33Gikhati Khongolo nya Vaphasi a nga bani a gu ningela mhamba nya ditshedzo, ma di ta wonega gambe mahoni ga Heliyodhoro ayo madzaha yale ya mamowo na ma ambade dzingandzu dza dzimwedzo, ma ta ema, ma mu embela, khayo: “Bonga ngudzu Oniya, Muphasi nya Khongolo nya mhamba, kholu khu kotani yaye, Pfhumu a ngu gu bweledzela womi. 34Uwe olu u gi tidego gitsayiso gya ndzadzini, tivisa vathu vatshavbo wugulu wa Nungungulu.” Na va ganede magana yaya, va di mwalalega.
Heliyodhoro a ngu vbindrugedza a khodwa
35Heliyodhoro a di ningela phaso nya mhamba ga Pfhumu, a gira milombelo ni sisambanyo nya singi ga wule a nga mu bweledzelago guvbanya. Khavbo avbo, Heliyodhoro a di bonga Oniya, a gu bwelela ni masotshwa yaye ga mufumeli. 36A di gira wufakazi ga vathu vatshavbo khu siliwugiso nya sikhongolo a nga girago Nungungulu na si wona khu maho yaye. 37Mufumeli a di wudzisa Heliyodhoro khuye khu wevbi mwama a pimisago gukhuye a nga mu rumela nyaluphye gu hongola Jerusalema. Heliyodhoro a di hakha, khuye: 38“Wa gu bani uri ni nala wago, mwendro muthu u dzitigo gukhuwe a ngu gu phika, mu rumele uye a hongola iyoyo. A gu ya vbuluga a na wuya na dayisidwe nya dzadi, kholu wulanga wule, khu lisine, yomo tshivba ya Nungungulu. 39Oyu a vbanyago ndzadzini, womo wulanga wule. A ngu bayisa ni gu mbembisa ni wevbini a belago khu mapimo nya guvivbe.” 40Khiso esi si nga dugelela ga Heliyodhoro ni guvbanyiswa nya thomba ya Nyumbani ga Nungungulu.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gitonga DC Bible © Bible Society in Mozambique, 2014.