ZABUR 49
49
Percume ngandelang kesugihan
1Umaq pemimpin kor. Zabur kaum Korah.
2Pade dengahang, hai selapuq bangse,
pade bukaq kentok, hai penduduk dunie,
3dengan sederhane, atao dengan saq tehormat,
dengan miskin, atao dengan saq sugih.
4Tiang gen ngucapang ucapan-ucapan bijaksane,
dait napi saq tiang pikirang nike dalem gati pengertianne.
5Tiang gen merhatiang sesenggak,
dait jelasang artine sambil puniq kecapi.
6Tiang ndéq takut sewaktu kebucuq,
waktu tiang tekepung siq musuh saq jahat.
7Ie pade ngandelang kesugihanne,
dait nyombongang dowé bandene.
8Setetune ndéq araq sopoq dengan juaq saq bau nyelametang semetonne,
atao bayah tebusanne tipaq Allah.
9Napi juaq saq teaturang ndéqne bau cukup;
mahel gati aji tebusan nyawene,
10adéq ie luput léman kematéan
dait mauq idup selaéq-laéqne.
11Tetu, ie gen serioq:
Bahwe dengan bijaksane éndah ninggal.
Dengan bongoh dait bodo pade-pade binase,
dait ngadéqang dowéne umaq dengan lain.
12Ie pade gen ndot léq kuburan selaéq-laéqne;
nike taoq ie pade ndot,
timaq laéq ie pade bedowé luwéq tanaq.
13Manusie ndéq iniq idup terus léq dalem keméwahan;
maraq binatang, ie éndah gen binase.
14Maraq nike nasib dengan saq ngandelang diriqne,
dait mase depan dengan saq puas siq ucapanne.
15Maraq dombe, ie pade tetentuang jari maté;
maut gen jari pengarat ie pade.
Kelémaq-lémaq ie pade tekalahang siq dengan jujur;
awak ie pade becat jari berek léq dunie dengan maté,
jaoq léman balé saq méwah.
16Laguq Allah gen bébasang tiang,
Ie gen ngelepasang tiang léman kuase maut.
17Ndaq takut lamun dengan jari sugih,
dait kehormatan keluargene sayan beromboq.
18Séngaq waktu ninggal ie ndéq gen jauq napi-napi,
dowéne ndéq gen turun ojok kubur bareng ie.
19Malahan lamun sopoq dengan bahagie waktu ie idup,
dait teajum-ajum lantaran keberhasilanne,
20ie gen milu éndah kance leluhurne
ojok taoq saq peteng selaéq-laéqne.
21Manusie ndéq gen bau terus idup léq dalem keméwahan,
maraq binatang, ie éndah gen binase.
ទើបបានជ្រើសរើសហើយ៖
ZABUR 49: LAISAS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល