ZABUR 35
35
Do'e nunas tulung
1Zabur Daud.
Ya ALLAH, lawan dengan saq ngelawan kaji,
perang kance dengan saq mélé perang lawan kaji.
2Bait utar-utar dait éndé Deside,
dait bangkit nulung kaji.
3Angkat kandik dait tumbak Deside
jari ngelawan dengan saq maléq kaji.
Manikang léq kaji
bahwe Deside penyelamet kaji.
4Menengang dengan saq mélé nyematéq kaji
tekalahang dait teperilaq.
Menengang dengan saq bekomplot ngelawan kaji
mundur siq bingungne.
5Menengang ie pade tepaléq siq Malaékat ALLAH,
maraq gambas saq tekesurang siq angin.
6Menengang ie pade tepaléq siq Malaékat ALLAH,
léq langan saq peteng dait lolat.
7Percume ie pade masangang kaji perangkep
atao ngeduk longkak jari bau kaji.
8Menengang ie pade tetimpe kebinasean
saq selung-selung dateng.
Menengang ie pade tame léq perangkepne mésaq
terus geriq dait binase.
9Make kaji besurak-surak lantaran ALLAH,
angen kaji cemoh,
séngaq Ie nyelametang kaji.
10Siq sepenoq angen kaji matur,
“ALLAH, Deside nénten araq bandinganne!
Deside lepasang saq lemah léman saq kuat,
saq miskin dait sengsare léman saq nindes ie.”
11Saksi-saksi saq jahat bangkit ngelawan kaji,
dait nuduh kaji gawéq hal-hal saq nénten kaji taoq.
12Kesolahan kaji ie pade bales siq kejahatan;
kaji araq léq dalem keadaan saq putus ase gati.
13Léq waktu ie pade sakit, kaji sedih dait puase;
kaji bedo'e pacu-pacu,
14maraq do'eang sopoq semeton
atao sopoq sahabat karib.
Kaji nunduk tangisin ie pade,
maraq kaji bedukecite lantaran inaq kaji mésaq.
15Laguq waktu kaji susah, ie pade seneng,
dait bekeriwung ngelawan kaji.
Ie pade lampaq bedinjat-dinjat
jari menghine kaji.
16Ie pade terus ngoloq-oloq,
dait merhatiang kaji siq meriqne.
17Jangke piran, ya Junjungan Saq Mulie, jangke piran
Deside cume nyereminang doang?
Selametang kaji léman serangan ie pade,
luputang nyawe kaji léman singe-singe nike.
18Make kaji gen besyukur léq Deside léq tengaq-tengaq umat Deside,
dait memuji peséngan Deside léq dalem kumpulan dengan luwéq.
19 #
Zbr. 69:5; Yah. 15:25 Sampunang menengang kaji tejoraq
siq dengan saq nénten bedowé alasan meriq léq kaji.
Sampunang menengang kaji tesurakin
siq dengan saq nénten bedowé alasan napi-napi meriq léq kaji.
20Raos ie pade nénten gerasaq;
ie pade ngerencaneang gen nipu
tipaq dengan saq idup rukun.
21Ie pade bekuih-kuih léq kaji dait bebase
bahwe ie pade sampun serioq perbuatan kaji.
22Laguq Deside, ya ALLAH, sampun cingakin ie;
sampunang meneng, ya Junjungan kaji Saq Mulie,
sampunang jaoq léman kaji.
23Silaq bangkit béle pelekare kaji,
ya Allah kaji dait Junjungan kaji, tulung kaji!
24Béle kaji, séngaq Deside adil, ya ALLAH Tuhan kaji,
sampunang menengang musuh nyurakin kaji.
25Sampunang menengang ie pade bebase léq dalem angenne,
“Syukur, ite sampun binaseang ie.
Napi saq ite melétang sampun tekabulang!”
26Menengang dengan saq demen serioq sengsare kaji
jari bingung dait mauq ilaq.
Menengang dengan saq nyombongang diriq léq kaji
tehine dait teperilaq.
27Semoge dengan saq melét serioq kaji tejariang kenaq,
besurak dait cemoh.
Semoge ie pade beulang-ulang bebase,
“Tetu-tetu agung ALLAH nike!
Ie kayun nyelametang hambe-Ne!”
28Make kaji gen beriteang keadilan Deside,
dait memuji sejeloan.
ទើបបានជ្រើសរើសហើយ៖
ZABUR 35: LAISAS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល