MARIKO 5
5
Yeso yahonyia mundu waali na mademoni
(Mat. 8:28-34; Luk. 8:26-39)
1Yeso harara na aviigi veve vaduuka lwangereka lundi lwinyanza ya Galilaya mu kivala cha Gerasa. 2Lwa Yeso yika kutura mu liato, yavugana nu mundu waatura mu vilindwa uwaali ni lidemoni. 3Umundu oyo yaali ni yamenya mu vilindwa. Sihaali ho nu mundu ku vosi uwaali anyala kumuvoha kali ni minyororo mba. 4Yaali ni yavofwa haali kanyingi ni vivia kandi minyororo, navuzwa yagadula iminyororo kandi akalanyia ivivia zana. Umundu si yaali ho ni zinguru ziu kumukiring'anyia mba. 5Zing'inga ziosi, uvudiku nu mbasu, yaali mu vilindwa nu mu vigulu, nahanzuka nu kwiduya na magina.
6Ulwa yalora Yeso nakikiri ihale, yanyagura nazia kusigama imbiri weve, 7nahanzuka nu mwoyo munene navoora, “Onyenyaa ki ivi Yeso Mwana wa Nyasaye, oveeye igulu Ligali? Ngogonya, imbiri wa Nyasaye, utandambiza mba!”
8Yavoola ndio kigira Yeso yaali namuvooleye, “Ivi lidemoni, tula mu mundu uyu!”
9Yeso yamuteeva, “Ilieta liilio nivwaha?”
Naye yamutivulira, “Ilieta liange ni Legiona#5:9 Legiona: Liveeye kovora “Vanyingi”., kigira koveeye avanyingi!” 10Yaazizagilira kogoonya Yeso avuli kukunga amademoni kutura mu kivala yicho mba.
11Chaali ho ichayo chi zinguruvi ichaali nichayaa ha kiguru. 12Amademoni yago gagoonya Yeso ni, gavoora “Ukutumi kuzie mu zinguruvi, kwingiri muzio.” 13Naye yaavugilira. Maku mademoni yago gaturaa vwangu ni gikuba muzio. Ichayo choosi ikiduuka izielefu ziviri chasulunguta zimbiru ni zigwa munyanza, nizikuzira mu.
14Yavo avaari avayi vi zinguruvi yizio viiruka nuvuti nivavoora amakuva yago mu lidaala nu mu kivala. Vandu vaatura ni vazia kolola agaali ni gekoleki.
15Lwa vazia ku Yeso, valora umundu waali na mademoni niyikaye makiriri, kandi niyiviiki zinguvu, vaali nu vuti. 16Avandu vaali nivaloli agaali ni gekoleki, vavoolera avandi amakuva gaali negekoleki ku mundu wa mademoni gaali nigaagumira, kandi agaakoleka ku zinguruvi.
17Maku vataanga kogoonya Yeso atuli mu kivala chavo.
18Lwa Yeso yaali ni yingiraa mu liato, umundu wa mademoni gaali nigaagumira yamugoonya, “Leka nzie harara na ivi!”
19Navuzwa Yeso yamugaya, namuvolera, “Zia yengo woovo ku avandu vovo, uvavoolere ivindu vinene viu Mwami akokoleeye, kandi kuli amali kukovelerera.”
20Kunangwa umundu oyo yatura nazia kuvitira mu Dekapolisi, navoora ivindu via Yeso yaali naamukoleye. Avandu vosi avahulira vagenya ligali.
Mukaana wa Yairo nu umukali wadira kunguvu ya Yeso
(Mat. 9:18-26; Luk. 8:40-56)
21Lwa Yeso yaali namali kwambuka kandi ni liato ku lwangereka lundi lwinyanza, ikiduma ekenene chavunga imbiri weve; naye yaali nasingiyi ahimbi ninyanza. 22Yaza mulala ku aviimiliri vi lisinagogi, ilieta lilie yalangwa Yairo. Lwa yalora Yeso, yagwa havirenge vivie 23namugoonya ligali, navoora, “Mukaana wange mukekeeke aveeye ahimbi kukuza. Mwaza ngogonya, nuyanza hamba uviiki kuye amakono googo, ahone, ave mwoyo!”
24Yeso yazia harara naye. Ni kiduma cha avandu avanyingi ligali vamulonda, ni vamumiina kutura izimbega ziosi.
25Yaali ho mukali mulala umulwaye uwataaza amasahi ku lwi mihiga likomi na giviri, 26Kali niiva yaali niyaazia ku avaahi vi zinyasi avanyingi, siyaahona mba. Yaali niyaatumikira mabese manyingi, navuzwa yaazizagilira kulwala kuvita lwambiri. 27Lwa yahulira amakuva ga Yeso, yaza nang'unya mu kiduma inyima weve, nadiira kunguvu yeeye, 28niyevolera umwene, “Nindiira kunguvu yeeye vuzwa, ndahona.”
29Mukali uyu yadira kunguvu ya Yeso, ahene yaho ilitaaza lia masahi geege liakalizira; kandi yahulira naahoni mu muviri gwigwe. 30Ahene yaho Yeso yamanya ndi izingulu ziituli kuye, yagirung'ana mu kiduma nateeva, “Nivwaha udiiyi kunguvu yange?”
31Aviigi veve vaamutivulira, “Olola kuli ikiduma kiminanaa, na ivi oteeva, ‘Nivwaha undiiyi?’ ”
32Navuzwa Yeso yaazizagilira kohenza izimbega ziosi alore umundu okoli ndio. 33Navuzwa umukali oyo kigira yamanya ichaali nikekoleki kuye, yagwa hasi imbiri wa Yeso novodegeri, namuvolera agiligali goosi. 34Yeso yamuvolera, “Mukaana wange, lisuuvira liilio likohonyi. Zia ni mirembe na ohone ligali.”
35Lwa Yeso yaali nakevoola ndio, avandu valala vaza kutura munyumba ya Yairo, ni vamuvolera, “Mukaana woovo umali kukuza. Leka Umwigizi ave!”
36Yeso siyavugula ikindu mu gavavoola mba, navuzwa yavolera munene wi lisinagogi, “Utatia mba, suuvira vuzwa.” 37Siyavugilira umundu woosi kumulonda mba natali Petero Yakobo na Yohana amwavo weve venyine.
38Lwa vaduuka hango hu munene wi lisinagogi, Yeso yahulira iliyoga, ililira ni lisioma ilinyingi. 39Yingira munyumba, navavoolera, “Kigira ki mukubaa zikwiri ni musiomaa? Mukaana uyu siakuzi mba, agonaa.”
40Vatanga limuhenyahenya. Yavavolera vatuli ichova vosi, ma navugura baba na mama wu mukaana oyo harara na aviigi veve, ni vingira ahu mwana yaali naagoni. 41Yagumira umwana mukono namuvolera, “Talitakumi,” iliveeye kovora, “Mwana mukaana, ngovolera uvuki!”
42Ahene yaho umukana oyo yavuka nagenda. Yaali naveeye ni mihiga likomi na giviri. Lwayaga geekoleka, avandu vagenya ligali kuvita kegero.
43Navuzwa Yeso yaviganihiza ligali vatalandiza amakuva yaga ku mundu kali mulala mba. Yavavolera vahe mukaana oyo ichukulia.
ទើបបានជ្រើសរើសហើយ៖
MARIKO 5: LOGOOLI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 2019