Litanga 30
30
1Lwa Raheli ya lola ya vula kwivulira Yakobo avana, Raheli ya kendeka ku amwavo wewe; kandi ya volera Yakobo, Mbe avana, kinga nda kudza. 2Na Yakobo ya vihirirwa na Raheli: na a teva, Inze mbeye mbugono bwa Nyasaye, wa ku gaya lwivulu lwe inda? 3Na Raheli ya vola, Henza, mutugwa wange Bilha, u ve naye; uyu a duke kwivula ku masigamo gange, na inze kandi nda nyola avana kuye. 4Na ya mu ha Bilha mutugwa wewe kuva mukali wewe: na Yakobo ya li naye. 5Na Bilha ya vereka, ni yivulira Yakobo mwana muyai. 6Na Raheli ya vola, Nyasaye u nkalagiye, kandi u huliye mwoyo gwange, na u mbeye mwana muyai: kunangwa ya mu gulika Dan. 7Na Bilha mutugwa wa Raheli ya vereka kandi, na yivulira Yakobo mwana muyai wa kaviri. 8Na Raheli ya vola, Mmali kulwana na amwavo wange ubulwane ubunene, na mmu guuti: na a mu gulika Nafitali.
9Na Leah lwa ya lola ya leka kwivula, ya leta Zilipa mukana mutugwa wewe, na a mu ha Yakobo kuva mukali wewe. 10Na Zilipa mukana mutugwa wa Leah yivulira Yakobo mwana muyai. 11Na Leah ya vola, I veye inkavi yange: na a mu gulika Gadi. 12Na Zilipa yivulira Yakobo mwana muyai wa kaviri. 13Na Leah ya vola, Mbeye nobugasu kigira avakali va la nanga ubugasu: na ya mu gulika Asheri.
14Na Rubeni ya tsia mmadiku geligesa lyengano, na a nyola makuyu gombulimu, na a ga leta ku mama wewe Leah. Ma Raheli ya volera Leah, Mwadza, u mbe ku makuyu gomwana wowo. 15Naye ya mu volera, I veye inkuva inkekeke ive kuhila musatsa wange? Wenya kuhila makuyu gomwana wange kandi? Na Raheli ya vola, Kunangwa a la va nive ubudiku yibu kigira makuyu gomwana wowo. 16Na Yakobo ya twula mmulimi mgolova, na Leah ya tsia kumwaganira, na a mu volera, Ga ku dukiranga kwingira ku inze; kigira nda ku laganira ku makuyu gomwana wange. Na ya li naye ubudiku yibwo. 17Na Nyasaye ya hulira Leah, naye ya vereka, na yivulira Yakobo mwana muyai wa katano. 18Na Leah ya vola, Nyasaye u mbeye madanyi gange, kigira nda ha musatsa wange mutugwa wange: na ya mu gulika lieta Isakari. 19Na Leah ya vereka kandi, na yivulira Yakobo mwana muyai wa katano na mulala. 20Na Leah ya vola, Nyasaye u mbeye kihaanwa kilahi; kalunu musatsa wange a la menya ninze, kigira mmwivuliye avana vayai vatano na mulala: na ya gulika lieta lilye Zebuloni. 21Na lwenyima yivula mukana, na ya mu gulika lieta Dina. 22Na Nyasaye yidzulitsa Raheli, na a boholola inda yeye. 23Naye ya vereka, na yivula mwana, na ya vola, Nyasaye u twulidzi linyegwa ku inze: 24na ya mu gulika lieta lilye Yosefa, na a vola, Yahova u medi ku inze mwana wundi muyai.
25Kunangwa lwa Raheli ya li ni yivula Yosefa, Yakobo va volera Labani, U mbe munwa ntsie kuduka hango hange, nomu kivala kyange. 26Mbe avakali vange na vana vange ava nku tumekiye, na u leke ntsie: kigira u manya ubutumiki bwange bwa nku tumekive. 27Na Labani ya mu volera, Ni mba ni nyoye tsimbabasi imbiri wowo, u menye: kigira ndoli Yahova u ngasidzi kigira ive. 28Kandi u mbolere madanyi gogo, na nda ku ha. 29Naye ya mu volera, Ive u manya kuli nda ku tumekira, kandi kuli liva lyemitugu gyigyo gya li mmakono gange. 30Kigira gya li mikekeke gya wa li nagyo lwa nkikiri kuduka, nagyo gyi medeki kuva minyingi; na Yahova u ku gasidzi hosi ha nda tsia: na kalunu nda duka inyinga ki kulombera avenyumba yange? 31Naye ya teva, nda kuha ikindu ki? Na Yakobo ya vola, U ta mpa kindu: nu u va nu u nkolera inkuva yiyi, nda kwayira mitugu gyigyo kandi nokugyilinda. 32Nda vita hagati hemitugu gyigyo lero, na nda twulidza mitugu gyosi gyi veye na mavahu, na mibalabale, na mamwamu mu magondi, na gyosi gya mavahu na mibalabale mu tsimbuli: na ku yigyo gyi la va madanyi gange. 33Kunangwa ubulungi bwange bu la ndolekidza lwenyima, inyinga yokuvalidza madanyi imbiri w owo: ku mitigu gyosi gu ta li na mavahu kinga mibalabale mu tsimbuli, kinga mamwamu mu magondi, yigu ni gu nyoleka mu gyange, u la vola gwibeywi. 34Na Labani ya vola, Nkano ga ka va kuli livola lilyo. 35Naye ku lidiku yilyo ya twulidza tsikole tsinkalanye, na tsisanzali, na tsimbuli tsinkali tsyosi tsimbalabale na tsisanzali, na tsyosi tsi veye na lilavu ku mbiri, na magondi gosi amamwamu, na a gyi vika mu makono ga avana veve; 36na ya gyi hila ha duka ulugendo lwa madiku gavaka hagati hehe na Yakobo: na Yakobo yaya imitugu gya Labani gya tigala.
37Na Yakobo ya vugula misala kuli mitaave, na migusa na gyemiserevenze; na a gyi kuvula ububala bale, na a kola ubulavu bwa li mumisala bu loleke. 38Na ya singeridza misala gya ya li kukuvula imbiri we vyayo mu miieregyi na ha vyayo vi nweranga; navyo vya vohola inyinga vidzanga kunwa. 39Na vyayo vya voholera imbiri wemisala, na vyayo vivula vimeme vikalanye na vibalabale, na visanzali. 40Na Yakobo yahula vimeme, na a henzidza vyayo vi henzi ku mikalanye na gyosi mimwamu mu kyayo kya i Labani: na a vika vyayo vivye haluvega, si a vi sanya nemitugu gya Labani mba. 41Kunangwa, lwa gyetsingulu gyekyayo gya tumanga, Yakobo ya vika misala imbiri wetsimoni tsyevyayo muferegyi, gyi voholere hagati nemisala; 42navutswa lwe kyayo kya li king'ahu, si ya ki vikira misala mba: kunangwa ving'ahu vya li vya Labani, na vikomeru vya li vya Yakobo. 43Namundu uyu ya medeka ligali, na ya li nevyayo vinene, navatugwa avakana navatugwa avayai, na tsing'amia, na tsisukiri.
ទើបបានជ្រើសរើសហើយ៖
Litanga 30: MBE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1967