Matius 18
18
Hihimo to i wowomboꞌ tuwuꞌne i poparentana Pueꞌ Ala
(Mrk. 9:33-37; Luk. 9:46-48; 17:1-2)
1I tempo tiꞌo, topeguruna hi Yesu noloumohi meꞌitano pe Io, rotiꞌi, “Pueꞌ, himo to i wowomboꞌ tuwuꞌna i lali poparentana Pueꞌ Ala?”
2Katoꞌo, hi Yesu mowowoimo haduo oꞌanaꞌ, Nopopetotiꞌi i hinarora, 3honiꞌi Notiꞌikihi, “Tuꞌu mpololeke to kutiꞌikikei hieꞌe: ane hawaꞌi iwolihikei pekirimi hei hibali oꞌanaꞌ hieꞌe, hawaꞌkei hingkiꞌ mewali toaꞌNa Pueꞌ Ala i lali PoparentaNa. 4Hihimo to mengkaꞌiwowoiꞌ hei hibali oꞌanaꞌ hieꞌe, iomo to i wowomboꞌ tuwuꞌne ka lekiꞌ-lekiꞌna toaꞌNa Pueꞌ Ala i lali PoparentaNa.
5Hihimo to mantorimo haduo toaꞌ to mengkaꞌiwowoiꞌ, hibali oꞌanaꞌ hieꞌe, i lali konaꞌKu, palaihana Akumo to notorimono. 6Angkana hihimo to mampomonawuꞌ haduo toaꞌ to hibali oꞌanaꞌ tiꞌo horiana hamboaꞌmo mepoꞌohi pe Aku, hingkiꞌ makaja mpololeke pehukune Pueꞌ Ala i toaꞌ tiꞌo. Aginamo haꞌanu watu pogilia to kodeꞌ nihoi i dokoꞌna hei nitube pe lali tahiꞌ.
7Horewuꞌhi toaꞌ i duniaꞌ hieꞌe, alaꞌ molangkaꞌ-langkaꞌ to rowali hingkeꞌna mampomonawuꞌhi toaꞌna Pueꞌ Ala horiana hamboaꞌmohi mepoꞌohi. Walia to hibali tiꞌo poko uwaꞌ, angkana horewuꞌhi mpololeke toaꞌ to mepomonawuꞌ tiꞌo.
8Ane rapaꞌna korawemi hamali ba kapuꞌmi hamali to mangkomikei mowali dosa, ibokuꞌmolu hei nitube. Aginamo hamalilu korawemi ba kapuꞌmi, angkana pahuakei kotuwuꞌ to wolaꞌ moꞌawa hante Pueꞌ Ala, hintina romali korawemi hei kapuꞌmi, angkana nitubekei pe lali api to mamua nturusi. 9Hei ane rapaꞌna matami hamali to mangkomikei mowali dosa, nidungkiꞌmolu hei nitube. Aginamo hamalilu matami angkana pahuakei kotuwuꞌ to wolaꞌ moꞌawa hante Pueꞌ Ala, hintina romali matami, angkana hingkiꞌ nitubekei pe lali naraka.”
Pandiriꞌ noniuꞌ i gimba to moholi
(Luk. 15:3-7)
10Nopololiu womo hi Yesu lolitaNe, Notiꞌi, “Mewaliꞌ, majaga-jagakei mpololeke. Inioꞌ itiꞌikei toaꞌ to hibali oꞌanaꞌ hieꞌe, hawaꞌhi modumbuꞌ. Alaꞌ tuꞌu mpololeke to Kutiꞌikikei: malaꞌeka to mampoꞌodaꞌhi, uwaꞌhi nturusi i suruga hei mampowutehi pe Pueꞌ Ala hapo to mewali i toaꞌ to ropoꞌodaꞌ. 11[Alaꞌ Anaꞌ Manusiaꞌ hupaꞌ pe duniaꞌ mamposalamaꞌ toaꞌ to moꞌela ka Pueꞌ Ala.]#18:11 I suraꞌ Matius wiharo Yunani to hohai mpololeke, lalana hieꞌe hawaꞌi teꞌukiꞌ, angkana teꞌukiꞌ i woriꞌ suraꞌ to niꞌukiꞌ huliꞌ i ngkamuri.
12Hohumbo pekirimi ane rapaꞌna uwaꞌ i lumbumi to uwaꞌ gimbana hanatu mbaꞌa, hei hambaꞌa moholi? Hapo to hingkiꞌ nowali? Bateꞌna hingkiꞌ nopolihi gimbane to hio mpuluꞌ hio mbaꞌa i birina, honiꞌi nolou mampaliꞌ gimbana to hambaꞌa to moholi. 13Tuꞌu mpololeke to Kuꞌtikikei, ane nohuamoꞌi huliꞌ gimbane to hamombaꞌa, kodeꞌ konopomotanaꞌne ka gimbana to hio mpuluꞌ hio mbaꞌa to hawaꞌi moholi. 14Hatoꞌo woꞌo Umoꞌmi to uwaꞌ i suruga, hawaꞌi Nolei ane uwaꞌi haduo to hibali oꞌanaꞌ tiꞌo to hingkiꞌ moholi.”
Hapo to hangangaa towali ane uwaꞌ halalinte to masalaꞌ pe ingkiꞌ
15Notiꞌi womo hi Yesu, “Ane uwaꞌi halali hampepoꞌohimu to masalaꞌ pe ingko, hangangaa ako ipomehuaki, hei ipololitaki komasalaꞌne, hingkeꞌna hawaꞌi uwaꞌ to pobahaꞌ posisalaꞌmi, bateꞌnalu ingkei roduo. Ane nopehoromuaꞌi lolitama, hei nohohoꞌ ka komasalaꞌna, pohintuwuꞌmi hingkiꞌ moromiꞌ huliꞌ. 16Angkana ane hawaꞌi hiniꞌ mampehoromua lolitamu, ikomimo haduo ba roduo sabiꞌ hingkeꞌna mampehoromuaꞌi pololitamu pe io. Alaꞌ uwaꞌ teꞌukiꞌ i lali Suraꞌ Mangkolehi waheꞌe:
‘haduo sabiꞌ hawaꞌi maroho,
hangangaa roduo ba tolu duo
to mosobiꞌi mampetotuꞌu komasalaꞌna,
hingkeꞌna mononto kara-karane.’ (Ul. 19:15)
17Ane hawaꞌi womo hiniꞌ mampehoromua lolitara sabiꞌ tiꞌo, ipowutemo i hinarona jumaꞌa. Ane handoaꞌi tene nopehoromua, kehapoꞌi lekiꞌ-lekiꞌna halali hampepoꞌohimi mokamorokiꞌi, nirekeꞌmo hibali toaꞌ to hawaꞌi pobahaꞌ Pueꞌ Ala ba to kodake waliana.
18Tuꞌu mpololeke to Kutiꞌikikei: Pueꞌ Ala hingkiꞌ mamponiuꞌ hapo to ipeꞌopikikei hei ipetotuꞌukei i duniaꞌ. 19Kutiꞌikikei womo: ane uwaꞌkei roduo i duniaꞌ hieꞌe to moꞌawa mekokae merapiꞌ hapolu i UmoꞌKu to uwaꞌ i suruga, pekokaemi tiꞌo bateꞌna hingkiꞌ Nopobuhoꞌi, 20alaꞌ i imbo toaꞌ morampu i lali konaꞌKu, kehapoꞌi roduo ba totolulu, Aku uwaꞌA i lumbu-lumbura.”
Pandiriꞌ noniuꞌ i haduo toaꞌ to hawaꞌi moꞌampuni awana
21Uko tiꞌo, hi Peturuꞌ mangkododungkui hi Yesu hei meꞌitano pe Io, notiꞌi, “Pueꞌ, ane halali hampepoꞌohingku masalaꞌ pe aku, haꞌumbo mpiha hangangaa kuꞌampuni? Ba ganaꞌmo pitu mpiha?”
22Nohoniꞌ hi Yesu, “Hawaꞌi pitu mpihalu. Angkana pitu mpuluꞌ piha ka to pitu mpiha hangangaa iꞌampuni toaꞌ to masalaꞌ pe ingko. 23Alaꞌ poparentana Pueꞌ Ala nipandiriꞌ hibali haduo datu to moparesaꞌ indana hawiꞌnahi. 24Tempo tiꞌo, uwaꞌ haduo hawiꞌ to woriꞌ mpololeke indana rokomi pe hinarona, koworiꞌna indana mojuta-jutamo doiꞌ bulawa. 25Monontomo toaꞌ tiꞌo hawaꞌi nobiaꞌ mobaiari indane. Mewaliꞌ, notiꞌimo datu, ‘Nipobaluꞌmolu hawiꞌ hieꞌe moꞌawa hante anaꞌnahi, hantambina hei lekiꞌ-lekiꞌna lumana, hingkeꞌna tebaiariꞌi indane.’
26Hawiꞌ tiꞌo kaliuꞌ melingkotuꞌ i hinarona datu, merapiꞌ ampu, notiꞌi, ‘Tua, kuperapiꞌ hingkeꞌna ipaꞌaniꞌa wokaia tempo. Kudandi hingkiꞌ kubaiarilu lekiꞌ-lekiꞌne indangku!’ 27Nobahaꞌ datu kohawaꞌne nobiaꞌ mobaiari indana, mewali marima laline i hawiꞌ tiꞌo, honiꞌi notiꞌiki, ‘Indamu kupahimo lekiꞌna, mewaliꞌ mahuliꞌmoko hampoliꞌmo ibaiari.’
28Katoꞌo, molaimo hawiꞌ tiꞌo, hei mangkohidupaꞌki hangko hawiꞌna to maꞌinda pe io hangkiuꞌlu, koworiꞌna indana haꞌumboralu doiꞌ peraꞌ. Kaliuꞌ nohokiꞌ awane tiꞌo honiꞌi noꞌemeꞌ, notiꞌiki, ‘Ibaiari lekiꞌ-lekiꞌne indamu!’
29Melingkotuꞌmo awane tiꞌo merapiꞌ ampu, notiꞌi, ‘Kuperapiꞌ hingkeꞌna ipaꞌaniꞌa tempo. Kudandi hingkiꞌ kubaiarilu indangka!’ 30Angkana hawaꞌi notorimo perapiꞌne tiꞌo. Nopopekahilu pe lali petarungkuꞌa wute indana uko nobaiari.
31Koroꞌokiꞌna hawiꞌ to ntaniꞌna hapo to pewali, masusa mpololeke lalire i toaꞌ tiꞌo, honiꞌi nolouhi pe datu mampowute waliana hawiꞌ tiꞌo. 32Konohorina datu lolitare tiꞌo, norumbaꞌmo toaꞌne nolou mowowoi hawiꞌ to kodake waliana tiꞌo. Kohupaꞌnalu hawiꞌ tiꞌo itoꞌo, notiꞌi datu, ‘Kodake mpololeke waliama! Lekiꞌ-lekiꞌna indamu kupahimo ka suraꞌku, alaꞌ merapiꞌko ampu pe aku. 33Mahamporeꞌi hinaꞌ hawaꞌko mampokarima hangko hawiꞌmu, hibali kokupokarimamu?’ 34Datu bukota mpololeke. Hawiꞌ to kodake waliana tiꞌo nokahi pe lali petarungkuꞌa, nikondo nturusi wute tebaiari lekiꞌ-lekiꞌne indana.”
35Nopotutumo hi Yesu pandiriꞌ tiꞌo, Notiꞌi, “Tiꞌo woꞌo to hingkiꞌ nowalikikei UmoꞌKu i lali suruga ane hawaꞌkei moꞌampuni hangko awami ka lalimi mpololeke.”
ទើបបានជ្រើសរើសហើយ៖
Matius 18: LAILJE
គំនូសចំណាំ
ចម្លង
ប្រៀបធៀប
ចែករំលែក
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
2017 Indonesian Bible Society (Lembaga Alkitab Indonesia)
