Mateo 24
24
'Dö̧ibaji̧ möle baledakwa̧ Jesús yöawina wene
1Jesúsma Dios ejutjö laebenama, iteda öba̧ja̧di̧ waisachadö ichö jo̧banö tji̧sebinobe Dios ejubi, ö'öbönö ju̧kwi̧ ejubiyabi, isabenö otiwejubiya jö̧ba̧lö. 2Tji̧sebökwe, Jesúsma jobadönö yöawinobe:
—Chömöledö, isabenö yötawaduwakwö, okobe jwiinö biya̧ ejubiya inawiyatjö otikwa ejubiya kwedaduwi̧ma, babe otiwijayonö, tupakwö pjolö lotjakwa̧ ejubiya, ja̧danö jwiinö pjolö lotjakobetjö̧, inawa bakwawabi jelewa wamema ji̧bökakwawa—
jö̧ba̧lö.
3Jesús mösa'o Olivos mikwa'otjö öbamatenama, iteda öba̧ja̧di̧ waisachadö jo̧dawa'ye ichö Jesúsnö abebö tja̧ja̧kwinobe:
—Ja̧ yökawaja̧ma, ¿dianö badekwachakwa̧da? Ja̧danö yemidanö kwichakwa̧ abönö, ja̧danö 'dö̧ibaji̧ möle baibakwa̧ abönö, ¿taji baledakwa̧da, baledi̧ edö, Aaa, juluwanö Jesús ichakobe, juluwanö 'dö̧ibaji̧ möle baibakobe, jö̧ba̧lö döwaisoböma?—
jö̧ba̧lö abebö tja̧ja̧kwinobe. 4Atjebökwe, Jesúsma atadinobe:
—Ö'wiakwawönö kwö̧jaduwo, jelo̧ ökwödönö omöna yöa̧li̧ kwösödaduwapji jö̧ba̧lö. 5Ba̧jekwadö chiminö ichö yötjawakwedö, Ötjödasa Dios weakwo̧ jö̧a̧linökwesa, jö̧ba̧lö. Ja̧danö, ba̧jekwadö jobadö omöna yötjawi̧ tjösödakobe. 6Ja̧danö, guerra kwakwatjakwawi̧ wene kwa̧ja̧kwaduwakobe, yöne kwakwatjakwawi̧ wenebi, jelobe ödötjö kwakwatjakwawi̧ wenebi, jo̧kwaijayonö ja̧ baledi̧ a̧ja̧kwö, kwo̧'wo̧ tjo̧achaduwa chömöledö. Jau chömöledö, ja̧ jawa isabenö baledobö jo̧be, jo̧kwaijayonö ina 'dö̧ibaji̧ möle baibokobe. 7Ja̧danö, ju'wedö tjitebo jojodö, ju'wedö tjitebo jojodökwö kwakwabakwawö tjölakwabikwawakobe, ja̧danö bakwo̧ la'aka luwo̧ ömöayedökwö, jelo̧ la'aka luwo̧ ömöayedökwö kwakwabakwawö tjölakwabikwawakobe, ja̧danö jelobetenia a̧wi̧chi̧ ja̧kobe, ja̧danö niji tjö̧awakobe. 8Ja̧ okobe jwiinö baledijayonö, ina 'dö̧ibaji̧ möle baibökakobe. Wanedö yötawa: Jitji̧nö jemakwuju jitji̧nö emö nöinö usula jemawakwa̧ abönö, ja'yubenö niobe, ¿jö̧tö? Ja̧danö ja̧ baledi̧ma, inesö usula tjemawakwa̧maökö, sule ja̧ abönö baledakwa̧ jawada ja̧kobe.
9Ikenama ökwödönö iyö lotjakobe, usula kwemawaduwinö ja̧tjobö, ja̧danö ökwödönö kwabö lotjakobe, ja̧danö ötjö chöba̧ja̧di̧ waisachadököbaduwobetjö̧, okobe deinö ökwödönö tjöpöjödakobe. 10Ja̧ möle, ba̧jekwadö katjatibakobe, ja̧danö tjömöledönö tjöpöjojodönö iyö lotjakobe, ja̧danö tjömöledönö tjöpöjödakobe. 11Ja̧danö, ba̧jekwadö sulabenö yöbawadöma sulabenö yötjawakobe, ja̧danö ba̧jekwadö jobadö yötjawi̧ a̧ja̧kwö tjösödakobe, 12ja̧danö sulabenö ja̧awa nöinö nöachobetjö̧, jojodö idöda tjömöledönö tjösödi̧ma ja'yuwachibakobe. 13Jo̧kwaijayonö chömöledö, jejenö sulabenö baledijayonö, tjo̧'wo̧ 'dibachibö baledadöma, isabenö tjö̧jibakobe. 14Ja̧danö, Dios yöbawö ö̧jena jawa otiwa jawa wenema böjȩ bakwameachibanö yötjawakobe tja̧ja̧kwobö, okobe deinö tjitebotenia jojodö tja̧ja̧kwobö, ja̧danö jemi ikenada 'dö̧ibaji̧ möle baibakobe.
15Baikwö yötawa inesö mikwawi̧ wene chömöledö, ja̧danö biya̧ yötawi̧ wȩyukwöja yöba̧ladö otiwanö omukwatö yötja̧lobö jo̧be. Dios yöawi̧ yöbawina Daniel mikwo̧ma iwȩyudinobe, inesö suli̧ma Dios ejutjö jojodö teachakwawökȩko̧nö kwedaduwakobe jö̧ba̧lö, ja̧danö jo̧ba iwȩyudinadanö kwedaduwakobe 'dö̧ibaji̧ möle. 16Ja̧danö, jejenö kwedaduwenama, Judea nijinö ju̧kwadöma juluwanö mö'ösa'ijube dötjibajobö ja̧kobe. 17Jau chömöledö, te'ada̧lökönö juluwanö dötjibajobö ja̧kobe. Baikwö yötawa: Bakwo̧ ejutjö labebajo̧ma, eju okwa tebachökönö itea isakwökönö juluwanö döibajobö ja̧kobe. 18Ja̧danö, batjo otido̧ma, ejube ȩwa̧jibökönö kamijido̧ wamesado̧ isakwökönö juluwanö döibajobö ja̧kobe. 19Ja̧ mölema, isabenö usula tjemawakwedö, ya̧dötjö metu'wo ja̧döbi, tji̧tji̧munö o̧do'bi̧ ojwadöbi. 20Ja̧danö, Diosnö akebaduwo, ja̧ dökibaduwakwa̧ma tiyuwi̧ baledapji jö̧ba̧lö, ja̧danö jojodö tjotidökö möle baledapji jö̧ba̧lö. 21Isabenö ja̧ möle usula tjemawakwa̧ma la'akatjöda edajiböködö jojodöma, Dios böjȩ otidinemikwö baikwö bajalenö. Ja̧danö, ja̧ jaye usula emawakwawama, la'akatjöda yemidanö baledökena. 22Jau chömöledö, ja̧ möle baledakwa̧ lekwe baleditjö̧ma, okobe deinö böjȩnö ju̧kwadö debö tji̧'yo jö̧tja̧lena, jo̧kwaijayonö iteda omudawö ujuninawö̧nö omukwatö lekwökönö ja̧akwo̧ Diosma.
23Jemi ikenama, bakwo̧ ökwödönö yöawitjö̧ma: ¡Edaduwi, bitema Dios weakwo̧ jö̧a̧linökwe!, jö̧ba̧lö yöawitjö̧ma, ja̧danö Dios weakwo̧ jö̧a̧linökwema yada ö̧jobe jö̧ba̧lö yöawitjö̧ma, yöawi̧ ösödökönaduwi. 24Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe. 25Jau chömöledö, ja̧ baledakwa̧ abönö, ökwödönö yötawajabe kwöwaisaduwobö.
26Ja̧danö jojodöma ökwödönö, Edajaduwi, Dios weakwo̧ jö̧a̧linökwema jojodö deobe jo̧, jö̧ba̧lö yötjawitjö̧ma, jobema 'yö̧könaduwi. Ja̧danö, Edaduwi, bejunö jo̧, jö̧ba̧lö yötjawitjö̧bi ösödökönaduwi. 27Jau chömöledö, yemidanö chichenama, öwaetjöda öwawinö chichakobe. Wanedö yötawa: Böba idejena okobe jwiinö mölejȩ öwawinö ideji̧danö, ötjö jojo baibanö jeminökwe chichakwa̧bi juluwanö öwaetjöda öwawakobe, okobe deinö tjedobö. 28Jau chömöledö, kwöwaisaduwa, bo̧lö̧ jwitjachenama. Juluwanö kwöwaisaduwa, Aaa, wobiya ba̧ jö̧ba̧lö, ¿jö̧tö? Ja̧danö, chichakwa̧ baledi̧ jawa edö Jesúsma ichaji̧ jö̧ba̧löma akebaduwökena, öwaetjöda kwöwaisaduwakwedöja, yemidanö ichajabe jö̧ba̧lö waapjida öwawakobetjö̧.
29Ja̧danö juluwanö ja̧ möle usula tjemawaja̧ ikenama, Jawo̧ yȩatibakobe, ja̧danö yö̧te jawo̧ma idejatökakobe, ja̧danö si̧li̧'i̧döma mölejȩbetjö metjakobe, ja̧danö okobe deinö mölejȩnö la̧jadöma wainö batjibakobe.
30Ikenama ötjö jojo baibanö jeminökwe chichakwa̧ i̧sebi̧ jawama mölejȩbetjö öwawakobe. Ja̧danö ötjö jojo baibanö jeminökwe mölejȩbetjö ojwiyo'wonö chichobe edö, ötjö jwiinö juluwo̧ ja̧danö salöinö dejato̧ chichobe edö, tjitebokwena ju̧kwadötjö ötjönö öpöjödadöma nöinö tjubudekwabikobe. 31Ja̧danö asabikwawa jawa trompeta labinö ökwöakobe, ja̧danö chömöayedö ángelesdönö wetocha, böjȩ bakwameachibanö 'ya̧nö, omudawö chujuninawö̧nö ko̧ko̧dö tjichejebobö.
32Baikwö wanedö yötawa kwöwaisachibaduwobö chömöledö: Ökwödöma higos towi edö, o̧ba baibakwa̧ waisadöja, ¿jö̧tö? Jau chömöledö, towi ötjebiya pjewökachibi̧ma, ja̧danö 'yayi öjiya pjoawenama, kwöwaisaduwobe, imiamema tjo̧wi̧ yöneawachiba, jö̧ba̧lö. 33Ja̧danö, ja̧ ökwödönö jo̧da yötawaja̧ jawa kwedaduwenama, kwöwaisaduwakobe, Jesús yemidanö ichakwa̧ma isabenö yöneawachiba jö̧ba̧lö, isabenö juluwanö ichibakobe jö̧ba̧lö. 34Isabenö yötawaduwakwö chömöledö, okobe jwiinö ökwödönö yötawaja̧ jawa isabenö baledakobe, babe möle jojodö okobe deinö wotjakwa̧ abönö. 35Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe—
jö̧ba̧lö yöawinobe Jesúsma.
Diosda 'dö̧ibakwa̧ möle waiso̧ma, jö̧ba̧lö Jesús yöawina wene
36Tupakwö yöawinobe Jesúsma:
—Jejenö isabenö baledakobe chömöledö, jo̧kwaijayonö ja̧ baledakwa̧ möle, ja̧danö ja̧ baledakwa̧ hora waisadöma deobe. Mölejȩnö ja̧dö ángelesdötjöbi, ötjö Dios itji̧bi wajwidobe chömöledö. Sule Chabe'do Diosda ja̧ baledakwa̧ möle waiso̧ma. 37Ja̧danö chömöledö, ötjö jojo baibanö jeminökwe chichakwa̧ möle badekwachi̧ma, Noé ö̧jinena ju̧kwadö tjomukwatokonö Dios lȩebi̧ baibinadanö badekwachakobe. 38Jau chömöledö, ojwe okwatakwa̧ abönö, jojodöma kwanöbi tjukwinobe, ja̧danö owöbi tjowinobe, ja̧danö ömadöbi ya̧döbi tji̧lȩkwa̧munö tjeminobe, Noé isowinö a̧jibakwa̧ möle baibenanö kabatö. 39Jobadöma Dios lȩebakwa̧ wajwitjinobe, jobadönö söbebö lobö, Dios ojwe okwatobö weenanö kabatö, ¿jö̧tö? Ja̧danö jejenö jojodö wajwitjinadanö, ötjö jojo baibanö jeminökwema jojodö wajwitjonö chichakobe.
40Jau chömöledö, ja̧ möle ömadö du̧ju̧taja batjotjö tjotidonö, jobadötjö bakwo̧nöda chemocha, jelo̧ okobe ö̧jibonö, 41ja̧danö ya̧dö du̧ju̧taja bakobe trigoso̧pja̧ tjotidonö, jobadötjö bakwujunöda chemocha, jeluju okobe jö̧jibonö. 42Jo̧kwajabetjö̧, te'ada̧lönö kwö̧jaduwo chömöledö, kwuluwo̧ yemidanö ichakwa̧ möle wajwiköbaduwobetjö̧.
43Baikwö wanedö yötawa chömöledö: O̧do uluwo̧ma naukwabo̧ tebachö önaukwakwa̧ hora öwaisitjö̧ma, abökönö ite'ada̧lena, naukwabo̧ tebachö önaukwapji jö̧ba̧lö, ¿jö̧tö? 44Ja̧danö chömöledö, ökwödöma jojo baibanö jeminökwe chichakwa̧ möle wajwiköbaduwobetjö̧, ö'wiakwawönö te'ada̧lö kwö̧jaduwo, chichakwa̧ möle wajwiköbaduwobetjö̧—
jö̧ba̧lö yöawinobe Jesúsma.
Bakwo̧ ömöayedönö Jesús wanedö yöawina wene
45Tupakwö yöawinobe Jesúsma öba̧ja̧di̧ waisachadönö:
—Jau chömöledö, la'aka luwo̧ ömöayo̧ otiwanö iteda uluwo̧ wei̧ ja̧bö ö̧ji̧danö kwö̧jaduwo. Baikwö wanedö yötawa: Bakwo̧ la'aka luwo̧ma, jelobe i̧'yakwa̧ abönö iteda ömöayedötjö bakwo̧nö weinobe, iteda eju jawa ite'ada̧lobö, ja̧danö ju'wedö jo̧ba ömöayedönö te'ada̧lö, tju̧kwa kwakwawa tjukwo jö̧tja̧lena iyobö. 46Ja̧danö, la'aka luwo̧ ȩwa̧jenama, jo̧ba ömöayo̧ma weinadanö ja̧bö ö̧jitjö̧ma, isabenö o̧'wo̧ ösöwanö ö̧jakwo̧ ömöayo̧ma, ¿jö̧tö? 47Jau chömöledö, otiwanö wei̧danö ja̧iökwe, la'aka luwo̧ma jo̧banö ujunena, okobe jwiinö ujuna̧li̧ itea te'ada̧lo̧ baibanö, ¿jö̧tö?
48Jo̧kwaijayonö, jo̧ba ömöayo̧ sulabo̧ ö̧jitjö̧ma, iteda uluwo̧ weaja̧danö ja̧bökönö, Aaa, chuluwo̧ma lekwe deakobe jö̧ba̧lö, 49ju'wedönö uluwo̧ ömöayedönö kwakwaena, ja̧danö 'dukwachawö̧kwö kwanöbi ukwena, ja̧danö owa̧löbi owa̧lena. 50Jo̧kwaijayonö, jo̧ba sulabo̧, Aaa, chuluwo̧ma ina ichökö, ina ichakwa̧ hora badekwachokobe jö̧ba̧lö ina omukwatayi, juluwanö uluwo̧ ȩwa̧jena. 51Ja̧danö chömöledö, iteda ömöayo̧ weinöködanö ja̧bo̧nö jejenö öbadekwajitjö̧ma, ömöayo̧nö labinö lȩebakobe chömöledö, ja̧danö jo̧banö ikwö loakobe, dötölatajanö omukwatadökwö budekwabinö o'ye kikisö ja̧bö usula emawobö—, jö̧ba̧lö yöawinobe Jesúsma, iteda öba̧ja̧di̧ waisachadönö.
ទើបបានជ្រើសរើសហើយ៖
Mateo 24: WPC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2021, All Rights Reserved
