लुका 13
13
पाप करवा सोड़ो, नीता मरो
1ते वखत थोड़ाक माणहु ईसु ने तीहया गलील जीला ना माणहु ना बारा मे केवा आय लाग्या, जे यरुसलेम ना मंदीर मे मारीन बादा चड़ाव्वा आवला हता, पीलातुस सीपायड़ा ने कीन मराय्न तीमनु लोय तीमना चड़ावला जानवरु ना लोय मे भेसकी नाखलो। 2ईसु तीमनी खबर ह़मळीन तीमने केदो, “गलील जीला मे रेवा वाळा बीजा आखा माणहु गेथा आहया माणहु जादा पापी हता, अने ईसम करीन ईमनी पोर गरा आय पड़ी, ईसम तमु ह़मजी र्या ह़ु? 3मे तमने केम, ईसम हय; बाखीन कदीम तमु पाप मे गेथु मन बदलीन भगवान वगा नी वळो, ता आमनीन तेम आखान-आखा मरीन खुट जहु। 4तीहया अठ्ठारे माणहु सीलोम नाम नी मुंडवरी पड़ीन डबाय्न मर ज्या, तीहया यरुसलेम मे रेण्या बीजा माणहु गेथा जादा गुनाळ्ळा हता, ईसम तमु ह़मजी र्या ह़ु? 5मे तमने केम, ईसम नी हय; बाखीन कदीम तमु पाप मे गेथु मन फीरवीन भगवान वगा नी वळो, ता आखान-आखा आमनीन तेम मरीन खुट जहु।”
फोळ नी हय तीहया गुलर ना झाड़ नो दाखलो कीन ईसु ह़ीकाड़े
6ता ईसु आहयो दाखलो ह़मळायो, “काना माणेह नी अंगुर नी वाड़ी हती, तीहयी अंगुर नी वाड़ी मे गुलर नु झाड़ हतु। तीहयो ते गुलर ना झाड़े फोळ ह़ोदवा करीन आयो, पण तीने एक बी फोळ नी जड़्यु। 7ता तीहयो माणेह अंगुर नी वाड़ी मे काम करन्या माणेह ने केदो, ‘देख, मे तीन साल सी आहया गुलर ना झाड़ नु फोळ ह़ोदतो आय र्यो, बाखीन मने एक बी फोळ नी जड़्यु। आने वाड दे काहाके आहयु झाड़ आहया जागा ने उदड़ेत काहा रोक र्यु?’ 8पण वाड़ी मे काम करन्यो माणेह केदो, ‘मालीक! आहया साल बी रेवा दे। मे अने च्यारो-मेर खोदीन खातर भरही। 9कदीम आवता साल फाले ता, वारलु से, नीता आने वडाड़ नाखजे।’”
अराम ना दाड़े ढुंगली बयर ने वारु करे
10अराम ना दाड़े ईसु काना भगवान ना भक्ती ना घोर मे माणहु ने ह़ीकापण आपतो हतो। 11तां ह़ारीक एक बयर बी हती, तीहयी बयर ने मांदो पाड़न्यो भुत चोट रेलो हतो। तीहयो ते बयर ने ढुंगी वाळ देदलो हतो अने तीने ह़ुदी उबी नी रेवायतु हतु। अने तीहयी बयर अठ्ठारे साल लग ढुंगी-ढुंगी चालती हती। 12ईसु तीने देखीन ह़ाते बोलायो, अने तीने ज्योरेत केदो, “ओ बाय, तु हाव रोग मे गेथी छुटीन, वारली हय जी!” 13ईसु तीनी पोर हात मेक्यो, अने तत्यारुत तीहयी ह़ुदी उबी हय जी, अने भगवान नी बड़ाय करवा बाज जी।
14युहद्या नो भक्ती करन्या घोर नो मुखी रीह कर लेदो, काहाके ईसु तीहयी बयर ने अराम करवा ना दाड़े वारु करलो हतो, एतरे तीहयो मुखी, माणहु ने केवा बाज ज्यो, “हप्ता मे काम करवा जुगु छोव दाड़ा से, तीहया छोव दाड़ा मे काम करवा जोवे। एतरे आहया छोव दाड़ा मे काना बी दाड़े आवीन आरगा हयो, पण अराम ना दाड़े आरगा हयवा करीन नी आवजो।”
15आहयी वात ह़मळीन मालीक ईसु जपाप आप्यो; “ए ढोंगड़ा करन्या! कदीम तमारो बोळद्यो नीता गदड़ु तहरेलु हय, ता तमु तीने अराम ना दाड़े बी बारथु पाणी पीयाड़वा नी ली जावो ह़ु? 16आहयी बयर ते आपणा माणहु माय्न से। आहयी बयर बी अब्राहम नी अवल्यात, जीने मांदो पाड़न्यो भुत बे कम वीह़ साल लग आह़फा ना हक मे कर र्यो हतो। अराम करवा ना दाड़े आनीन तां गेथो मांदो पाड़न्या भुतड़ा ने सेटो करवा, वारु नी हय ह़ु?” 17ईसु नी आहयी वात ह़मळीन ईसु नो वीरोद करन्या आखा माणहु लजवाय ज्या, पण बीजा आखा माणहु, ईसु घण जुदु काम कर्यो, करीन घण-जबर खुस हय ज्या।
राय ना दाणा नो दाखलो कीन ईसु ह़ीकाड़े
(मत्ती 13:31-32; मरकुस 4:30-32)
18ईसु केदो, “भगवान नु राज कोय ह़रकु से? मे आहयु राज ने कानु चीज वेर तोलु? 19तीहयु एक राय ना दाणान तेवु से, जीने कानो माणेह ली जाय्न आह़फा ना खेतर मे वेर देदो: अने तीहयु वदतु-वदतु मोट्लु झाटवु बण ज्यु। अने चड़ा तीना डाळ्या पोर आवीन पोतरो बांदीन रेवा बाज ज्या।”
खमीर नो दाखलो कीन ईसु ह़ीकाड़े
(मत्ती 13:33)
20ईसु अळी केदो, “मे भगवान ना राज ने काना चीजे तोलु? 21भगवान नु राज तीहया खमीर ह़रकु से, जीने कानी बयर ली तीन चोवकी मे भेसकी देदी, अने आखो लोट खमीर बण ज्यो।”
ह़ाकड़ु झापलु
(मत्ती 7:13,14,21-23)
22ईसु ह़ेर-ह़ेर मे अने गाम-गाम मे, ह़ीकापण आप्तो जाय्न यरुसलेम भणी जवा बाज र्यो हतो। 23कानो माणेह तीने पुछ्यो, “ए मालीक! छुटकारो हात करन्या थोड़ाक माणहु से ह़ु?” अने ईसु तीने केदो, 24“ह़ाकड़ला झापले माय्न भगवान ना राज मे भरायवा नी पुरी-पुरी कोसीत करो, काहाके मे तमने केम, ढेरेत माणहु भरायवा हींठे, अने भराय नी सके।” 25जत्यार घोर नो मालीक उठीन झापलु दी देदो हय, अने तमु बारथा उबा रीन झापलु ठोकीन केवा बाज जहु, ए मालीक! अमारी जुगु बी झापलु उगाड़ दे, ता तीहयो तमने केहे, तमु कां वाळा से मने नी मालम हय? 26ता तमु केवा बाज जहु, आमु तारी अगळ खादा-पीदा अने तु अमारा हाट मे ह़ीकापण आपीन ह़ीकाड़तो हतो। 27पण तीहयो तमने केहे, “तमु कां वाळा से तीहयु मने नी मालम हय, ए आखा भातीन पाप करन्या! तमु आखा मारीन्तां गेथा सेटा हय जाव” 28#मत्ती 22:13; 25:30#मत्ती 8:11,12अने तमु आह़फाम ने बारथा नीकाळती घड़ी, अब्राहम, अने ईसाक अने याकुब अने भगवान वगे गेथा केण्या आखा माणहु ने भगवान ना राज मे बह रेला देखहु, ता तमु रड़हु अने दातु ककड़ावता रेहु। 29उगवणा अने बुडवणा, भगवरा अने दखवरा गेथा माणहु आवह़े अने भगवान ना राज नी खाणु नी पंगात मे भेसकाहे। 30#मत्ती 19:30; 20:16; मरकुस 10:31अने थोड़ाक जे पाछला से, तीहया अगला हय जहे अने थोड़ाक जे अगला से, तीहया पाछला हय जहे।
ईसु नो यरुसलेम सी मोंग
(मत्ती 23:37-39)
31तीहयीत टेमे थोड़ाक फरीसी पंथवाळा आवीन ईसु ने केदा, “आञे गेथो नीकळीन जत रे, काहाके हेरोद तने मार नाखवा हीन्डे।”
32ईसु तीमने केदो, “जाय्न तीहया लेंड्यान तेवी चाल चालवा वाळा हेरोद राजा ने की देवो, ‘मे आज अने वाहणे माणहु ने चोटला भुत ने सेटा करही अने मांदला ने आरगा करही अने तीसरा दाड़े मारु काम पुरु कर देही।’” 33ते बी मने आज, वाहणे अने पन्दाड़े काम करतोत रेणु से, काहाके ईसम हय नी सके के कानो बी भगवान वगे गेथी वात केण्यो माणेह यरुसलेम ने सोड़ीन बीजे मरे।
34“ए यरुसलेम! ए यरुसलेम! तु भगवान वगे गेथी वात केण्या माणहु ने मार नाखे अने भगवान जे माणहु ने तारीन्तां मोकल्लो तीहया माणहु ने बी तु दगड़ाटीन मार नाखे। जेम कुकड़ी आह़फी ना पीच्या ने आह़फा ना पाखड़ा तळे भेळा कर लेय, तेमेत मे ढेरेत काव तारी अवल्यात ने मारा पाखड़ा तळे भेळा करवा हींड्तो हतो, पण तमु मारो नीकारो कर देदा। 35देखो, तमारु घोर उजाड़ अने ह़ुन्लु सोड़ देहे, अने मे तमने केम, तमु मने तत्यार लग नी देखो, जत्यार लग तमु आहयु नी केय, ‘बरकत वाळो से तीहयो, जे मालीक भगवान ना नामे आवे।’”
ទើបបានជ្រើសរើសហើយ៖
लुका 13: PPt2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
