ABARUMI 6
6
Okobwatana na Kristo nogotabwatana nebibe
1Ninki rende toratebe? Togenderere ase ebibe, erinde amabera amenteke abe amange kobua? 2Yaya, taibo! Intwe abatwakure korwa ase ebibe, naki toranyare komenya ase ebibe naende? 3Timomanyeti ng’a intwe twensi abatwabatisetwe ase Kristo Yeso nigo twabatisetwe ase amakweri aye? 4Naboigo twatindegetwe amo nere ase enchera y’ebatiso ase amakweri, erinde buna Kristo abogetigwe korwa ase abakure ase obonene bwa Ise, naboigo naintwe, totaare ase obogima oboyia.
5Naki onye twabwatanire nere ase amakweri buna ayaye, naboigo torabwatane nere ase okobokigwa buna okwaye. 6Twamanyire ng’a obomwanyabanto bwaito bwa kare nigo bwabambetwe amo nere, erinde omobere bw’ebibe osirigwe, titoba abasomba b’ebibe naende. 7Naki ere oyokure osiboirwe korwa ase ebibe. 8Korende onye twakwete amo na Kristo, twegenire ng’a natobe moyo amo nere. 9Twamanyire ng’a Kristo oyobogetigwe korwa ase abakure tagokwa naende; amakweri takomogambera naende. 10Ase ogokwa koria akwete nigo akwerete ebibe ara rimo rioka, korende obogima boria are nabwo nigo are nabwo ase Nyasae. 11Naboigo nainwe mwebare ng’a mwabeire abakure ase ebibe, korende mwabeire moyo ase Nyasae ime ase Kristo Yeso.
12Bono timotiga ebibe bigambe ime ase emebere yaino eyekonyorekana namakweri, na timobaisa koigwera okogania kwabo okobe. 13Timobaisa korua ebiimo biaino bikore ebibe buna ebikorero bi’obobe, korende mwerue abanyene ase Nyasae buna abanto barusetigwe korwa ase ogokwa na babekirwe ase obogima, na ebiimo biaino ase Nyasae bibe ebikorero bi’oboronge. 14Naki ebibe tibikobagambera inwe, ekiagera timori inse y’amachiko korende inse y’amabera.
Okworokereria korwa ase obosomba
15Ninki rende? Tokore ebibe ekiagera totari inse y’amachiko korende inse y’amabera? Yaya taibo! 16Timomanyeti ng’a onye mwerure ase omonto onde koba abasomba baye na komoigwera, nigo more abasomba baye ere oria moigwerete, onye nobosomba bw’ebibe obokoraa gochia ase amakweri, gose obosomba bw’okoigwera obokoraa gochia ase oboronge? 17Korende Nyasae aakerwe ng’a mbuya mono, ekiagera inwe, abamwarenge abasomba b’ebibe, mwabeire abaigweri ase chinkoro chiaino ase okworokereria koria mwaetwe, 18na ekero mwasiboretwe korwa ase ebibe mogakorwa koba abasomba b’oboronge. 19Nigo ngokwana buna engencho ya mwanyabanto ase engencho y’oboreu bwaino bwa mwanyabanto, Naki koreng’ana buna inwe ritang’ani mwaruete ebiimo biaino bibe ebisomba bi’obonyaka na ase ogosaria okonene mono, naboigo na bono karue ebiimo biaino bikorere oboronge, monyare gokorwa koba abachenu.
20Naki ekero mwarenge abasomba b’ebibe nigo mwarenge abasibore korwa ase oboronge. 21Nkwama ki rende mwanyorete korwa ase ebinto biria bikobarentera obosooku bono? Naki omoerio bw’ebinto ebi namakweri. 22Korende bono ekero mwasiboirwe korwa ase ebibe na gokorwa koba abasomba ba Nyasae, okwama kwaino more nakwo noko, ng’a mokorwe koba abachenu, na omoerio oye nobogima bwa kare na kare. 23Naki eng’eria y’ebibe namakweri, korende ekeegwa kia Nyasae nobogima bwa kare na kare ase Kristo Yeso, Omonene oito.
ទើបបានជ្រើសរើសហើយ៖
ABARUMI 6: EKEGUSIIBBLE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
OLD EKEGUSII BIBLE PROTESTANT EDITION
©Bible Society of Kenya, 2020
