MATAYO 13
13
Omoreng’anio bw’omobusuri
(Mar 4:1–9; Luk 8:4–8)
1Ase rituko riria Yeso akarua nyomba agaikaransa ase enyancha mbarabare. 2Emeganda emenene ekamosangererekanera, goika ere akariina obwato ime, agaikaransa aroro, na omoganda bwonsi ogatenena ase engegu. 3Akabatebia amang’ana amange ase emereng’anio, okobora, “Omobusuri akamanora kogenda kobusura. 4Ekero are kobusura, chimbusuro chinde chikagwa ase enchera ensemo, chinyoni chigacha, chigachiria, 5na echinde chikagwa ase egetare, aase amaroba arenge amake; chikamera bwango, ekiagera amaroba arenge amake. 6Omobaso ogachia kobara, chigasusana, na ekiagera chitarenge nemeri, chikoma. 7Na echinde chikagwa ase amagwa ime, na amagwa aria agakina, agachimiga. 8Na echinde chikagwa ase amaroba amaya, chikama echinde rigana, na echinde emerongo etano nomo, na echinde emerongo etato. 9Oyore namato akoigwera, tiga aigwe.”
Ekerenga ki’ogokwana ase emereng’anio
(Mar 4:10–12; Luk 8:9–10)
10Aborokigwa baye bagacha, bakamoboria, “Nase ki kware gokwana nabarabwo ase emereng’anio?” 11Akabairaneria, “Inwe mwaeirwe komanya obobisi bw’oboruoti bwa igoro, korende barabwo tibaeiri. 12Naki oyore na gento naegwe, nere namenteranigwe; korende oyotabwati gento naurwe nonya nekio abwate. 13Eke nakio gekogera ngokwana nabarabwo ase emereng’anio, ekiagera okorora nabarore, korende tibakorora, na okoigwa nabaigwe, korende tibakoigwa, nonya nokomanya, tibakomanya. 14Ase barabwo obobani bwa Isaya bwaikeranire, obogoteba:
“Okoigwa namoigwe, korende timokomanya nonya ng’ake,
na okorora namorore, korende timokorora nonya ng’ake.
15Naki chinkoro chi’abanto aba chiabeire chinyoro,
na amato abo nigo are amarito ase okoigwa,
na amaiso abo bayamiamirie,
tibacha korora namaiso abo
gose baigwe namato abo,
gose bamanye ne chinkoro chiabo,
baonchoke, na inche mbagwenie.
16Korende amaiso aino nasesenirie, ekiagera nkorora are, na amato aino, ekiagera nkoigwa are. 17Nekeene nabatebirie: Ababani abange na abanyene oboronge mbaganetie korora aya moroche inwe, tibayarora, na koigwa aya mokoigwa inwe, tibayaigwa.
Ogotebereria kw’omoreng’anio bw’omobusuri
(Mar 4:13–20; Luk 8:11–15)
18“Gaki, igwa omoreng’anio bw’omobusuri. 19Ekero omonto akoigwa ring’ana ri’oboruoti, na ere takorimanya, nigo agocha oria omobe, otaboria riria riasimekirwe ase enkoro yaye, oyo nere obusuirwe ase enchera ensemo. 20Na oyo obusuirwe ase egetare nere oria okoigwa ring’ana, erio kegima oribwata nomogoko, 21korende tari nemeri ime yaye, ogenderera ekero egeke; na ekero emechando egochi‐gocha, gose okorosigwa ase engencho ye ring’ana, erio bwango ogwa korwa ase okwegena kwaye. 22Na oyo obusuirwe ase amagwa, oyo nere okoigwa ring’ana; okorengereria gw’ense na obong’ainereria bw’enibo biaba nkomiga bire ring’ana, riaba tirikwama. 23Na oyo obusuirwe ase amaroba amaya, nere oria okoigwa ring’ana, orimanya; nere ekeene bwama okwama. Oyomo bwama rigana, na oyonde emerongo etano nomo, na oyonde emerongo etato.”
Omoreng’anio bw’amabanchore
24Akabatebia omoreng’anio onde, agateba, “Oboruoti bwa igoro nigo bogwekaine nomonto obusurete embusuro engiya ase omogondo oye; 25korende ekero abanto bararire, omobisa oye agacha akabusura amabanchore ime ase engano, akagenda. 26Egachia komera ekama chinyeke, erio amabanchore naro akarorekana. 27Erio abasomba b’omonyene enyomba bagacha, bakamoboria: Omonene, tikwabusurete embusuro engiya ase omogondo oo? Naki rende ororekanire namabanchore? 28Akabatebia: Nomobisa okorete bo. Abasomba bakamoboria: Inee! Norigetie tochie toyasangererie? 29Akabakania: Yaya; moise gosangereria amabanchore namosimore engano amo naro. 30Bitige bikine bionsi bibere goika rigesa, na ekero kie rigesa nintebie abakogesa: Ritang’ani sangereria amabanchore, moyaboe emesaima monyare koyasamba; korende engano moyesangererie gochia kiage kiane.”
Omoreng’anio bw’entetere y’omote onga buna omosabisabi na oyo bw’ememera
(Mar 4:30–34; Luk 13:18–21)
31Akabatebia omoreng’anio onde, agateba, “Oboruoti bwa igoro nigo bogwekaine nentetere y’omote onga buna omosabisabi omonto abogoretie, akayesimeka ase omogondo oye; 32ero nenke mono kobua chimbusuro chionsi, korende koyakinire eba enene kobua chinyeni chionsi, eba omote, goika chinyoni chia igoro chichia koroisia ebiswa ase chinsagia chiaye.”
33Akabatebia omoreng’anio onde, “Oboruoti bwa igoro nigo bogwekaine nememera omokungu abogoretie, akayebeka ase ebirengo bitato bi’obosie, goika bionsi bikabota.”
34Aya onsi Yeso nigo ayakwanete ase emeganda eria ase emereng’anio; na tabatebetie ring’ana otatiga ase emereng’anio, 35erinde rinyare goikeranigwa eriatebetwe nomobani,
“Nimaanore omonwa one ase emereng’anio,
inyatore ayabisegete korwa ogotongwa gw’ense.”
Omoreng’anio bw’amabanchore ogotebererigwa
36Erio Yeso agatiga emeganda, akagenda nyomba. Aborokigwa baye bakamochiera, bakobora, “Totebererie omoreng’anio bw’amabanchore a mogondo.” 37Akairaneria, “Oyogosimeka embusuro engiya n’Omwana‐o‐mwanyabanto; 38omogondo nense; embusuro eyio engiya nabana b’oboruoti; na amabanchore nabwo abana b’oria omobe. 39Omobisa oria oyasimegete nere Saitani; rigesa nomoerio bw’ense, na abarache kogesa nabamalaika. 40Buna amabanchore agosangererigwa asambwa nomorero, naboigo nomoerio bw’ense orache koba. 41Omwana‐o‐mwanyabanto natome abamalaika baye, na barabwo nabasangererie na kobarusia korwa ase oboruoti bwaye abakogera abande bagochwe, na abagokora ebibe bonsi, 42nababatugute ase eriko ri’omorero. Aroro agwo abanto inababe nekerero na okoriania amaino. 43Erio abanyene oboronge nabagirigente buna erioba ase oboruoti bwa Ise obo. Oyore namato akoigwera, tiga aigwe.
Emereng’anio y’enibo, na eruru, na ekeonga
44“Oboruoti bwa igoro nigo bogwekaine nenibo yabisire ase omogondo, eye omonto anyorete, akayebisa; erio ase omogoko oye akagenda, akaoonia ebiabwate bionsi, akagora omogondo oria.
45“Naende oboruoti bwa igoro mbogwekanirie nomonto omoonchoreria, okorigia chiruru chingiya. 46Ere agachia korora eruru eyemo ye rigori rinene, akaimoka akagenda, akaoonia ebiabwate bionsi, akayegora.
47“Naende oboruoti bwa igoro nigo bonga buna ekeonga ekiarutetwe ase enyancha ime, kegasangereria chinswe chia kera egesaku. 48Ekero giaichoire, abanto bagakeng’usa gocha engegu; bagaikaransa, bagasangereria chiria chingiya ase amakuru, na chiria chimbe bagachituguta. 49Naboigo arache koba ase omoerio bw’ense. Abamalaika nabaoroke bache gwatanana baria ababe korwa ase abanyene oboronge, 50babatugute ase eriko ri’omorero. Aroro agwo abanto inababe nekerero na okoriania amaino.”
51Yeso akababoria, “Mwamanyire aya onsi?” Bakamoiraneria, “Ee.” 52Akabatebia, “Ase engencho eyio kera omworokia bw’amariko oyokorirwe koba omworokigwa bw’oboruoti bwa igoro, obeire omogwekano bw’omonyene enyomba, oyokorua ase emonga yaye ebinto ebiyia na ebikoro.”
Yeso okwangwa Nazareti
(Mar 6:1–6; Luk 4:16–30)
53Ekero Yeso akoorire emereng’anio eyio, akarua aroro, akagenda aase aande. 54Agachia goika ense yaye omonyene, akaborokereria ase esinagogi yabo, goika bagakumia, bagatebania, “Oyo ng’ai anyorire obong’aini obo na ogokora oko gwe chinguru? 55Oyo tari omwana bw’omobaachi? Ngi’na tari oria okorokwa Mariamu? Na bamura bamwabo tibari Yakobo, na Yusufu na Simion, na Yuda? 56Na basubati bamwabo bonsi tibari aa seito? Gaki oyo ng’ai ayanyorire aya onsi?” 57Bakagechigwa asare. Korende Yeso akabatebia, “Omobani takomocha gosikwa otatiga ase ense yaye na mwaye.” 58Ere takorete ogokora gwe chinguru okonge agwo, ekiagera batarenge nokwegena.
ទើបបានជ្រើសរើសហើយ៖
MATAYO 13: EKEGUSIIBBLE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
OLD EKEGUSII BIBLE PROTESTANT EDITION
©Bible Society of Kenya, 2020
