OGOKORA KW’ABATOMWA 24
24
Okogambigwa gwa Paulo ase obosio bwa Feliki
1Nyuma y’amatuko atano, Anania, omokuani omonene, agatirimboka amo nabande b’abagaaka na omokwani oyomo, Teritulo; barabwo bagatebereria gavuna amang’ana igoro ya Paulo. 2Ekero Teritulo achia korangerigwa, agachaka komosoera, agateba,
“Aye, omosike Feliki, ase okogamba kwao twanyorire omorembe omonge, na ase okorigereria kwao gwakoreire egesaku giaito ebinto ebinge ebiya, 3gaki iga tokobinyora kera ekero na kera aase, na gokoakera ng’a mbuya mono. 4Korende tinkogochanda kobua, nagosoroire ototegerere ase amang’ana amake ase ogwancha kwao. 5Naki twanyorire omonto oyo ng’a nomochege are, na omochaki bw’eriomana ase Abayahudi abare ase ense yonsi, naende nomotang’ani bw’ekeombe ki’Abanazareti. 6Naende nigo ateemete kogindia Hekalu riko. Ase ayio tokamobwata, [tokarigia komogambia ase amachiko aito. 7Korende Lisia, omochiki omonene bw’abarwani, agaika, akamorusia ase amaboko aito ne chinguru, 8agachika abamosoeri baria bache asore.] Aye omonyene nonyare komoboria, onyore engencho y’amang’ana onsi twamosoeire intwe.”
9Abayahudi nabarabwo bakamosoera, bakabora ng’a amang’ana ayio naboigo are.
10Erio gavuna akorotera Paulo okoboko erinde akwane. Paulo akairaneria,
“Amaene namanyire ng’a aye kwabeire omogambi ase egesaku eke ase ekero ki’emiaka emenge, igo ninyare gwekengera ase omoyo bw’omosasoko. 11Naki buna oranyare komanya, amatuko taraeta kobua ikomi na abere korwa ekero natiirete kogenda Yerusalemu gosasima. 12Abanto aba tibanyoreti nkoamererania na monto, gose koburukania omosangererekano ase Hekalu ime, nonya nase chisinagogi gose ase omochie ime. 13Gose tibakonyara koorokia amang’ana aya bansoera bono ng’a namaene are. 14Korende ring’ana eri ndaorokie asore, ng’a ase enchera eyio bakoroka ensemo y’ogweatanana, inche nigo nkomosasima Nyasae bwe chisokoro chiaito, na kwegena ayarikire ase amachiko na ase chibuku chi’ababani. 15Ninde nogosemeria ase Nyasae buna barabwo bare nakorokwo, ng’a okobokigwa kw’abakure nakobe ase abanyene oboronge, na ase abatari abanyene oboronge boigo. 16Inche boigo nateemire koba nenkoro etari kongambia ase obosio bwa Nyasae, na ase obosio bw’abanto. 17Bono yaetire emiaka etai meke ngacha ndetere abanto b’egesaku kiane ebiegwa, naende indue chisadaka. 18Ekero narenge gokora aya, bakaanyora ime ase Hekalu nesibirie, timbeti nomoganda gose riroroche. Korende Abayahudi bande, abarwete Asia mbarengeo. 19Abwo mbagwenerete koba aiga ase obosio bwao na gonsoera, onye bare ne ring’ana igoro asende. 20Gose abanto aba bare aa abanyene batebe nkomocha ki banyorete asende ekero natenena ase ekegambero, 21otatiga ase engencho ye ring’ana erimo natebete neriogi rinene, ekero natenenete egati yabo. Ngateba: Ase engencho y’okobokigwa kw’abakure nakio nkogamberigwa ase obosio bwaino iga rero.”
Feliki ogotiga ekina kerare
22Korende Feliki, ekiagera amanyete boronge amang’ana ’Enchera eria, agatiga ekina kerare, akabora, “Lisia, omochiki omonene bw’abarwani karatirimboke, rirorio ninyigwe amang’ana aino.” 23Agachika omotang’ani oria bw’abarwani rigana arende Paulo, korende amoe ribaga rike, gose tamokania nonya noyomo bw’abasani baye komokorera, gose gocha komorora.
24Nyuma y’amatuko atai make, Feliki agaika na Durusila mokaye, oyorenge Omoyahudi. Akarangeria Paulo, akamoigwa ogokwana amang’ana igoro y’okomwegena Kristo Yeso. 25Ekero Paulo are gokwana amang’ana igoro y’oboronge, na okwerita, na ekina kegochi‐gocha, Feliki akaba nobwoba, akamotebia, “Ase ekero eke bono, karagenda; ekero ndanyore ribaga, ninkorangerie naende.” 26Amo nayio nigo asemeretie ng’a naegwe chifeta na Paulo. Nabo akana‐komorangeria ekero ase ekero gokwana nere. 27Korende emiaka ebere koyaerire, Porikio Festo agasoa obogambi ribaga ria Feliki; na Feliki akarigia gwekora omuya ase Abayahudi, agatiga Paulo osibire.
ទើបបានជ្រើសរើសហើយ៖
OGOKORA KW’ABATOMWA 24: EKEGUSIIBBLE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
OLD EKEGUSII BIBLE PROTESTANT EDITION
©Bible Society of Kenya, 2020
