Roomi 9
9
Yeeri Kaacciti Asheenaꞌo
1Kiristoosina tunaꞌa iberoon gettoye; kootoon yibbaateyaache; ta mullo Yaafe Ayaanoona yaabeeꞌi miixee beetone. 2Oogeti ayinoo, kuxeyaani xuuxoo ta mullooch beetone. 3Ta xibeenaꞌo tuneti ta maneenaꞌoyicha getiree Kiristoosiyee bariree ta qelloona uppeto ta tunemmoyich qaataa beehoye. 4Boonoshiyoo Israꞌeelee macceenaꞌone; Yeeriyoo boonoshin bi hajjee bushiisheenaꞌo tuniihe; bi oogee yiiroochee boonoshich qoodiye; wogoonoo boonoshina tookkii giyiye; sheeroonoo boonoshich immiye; yaafee kechi maddee doyoon, meeti baribare gibenee qaaroonoo boonoshich immiye. 5Qaabbechinaꞌochi yareenaꞌone; eboshichi daggoochee Kiristoosi meenona shiijjeꞌi waahe; biyoo bulliyee beshoone; bulli yemeenoonoo diireeti Nuggishoone. Ameena.
6Tunebaani Yeerichi gibenee qaaro shaddeetone geto toonoone. Ebi Israꞌeelee yareenaꞌo bulli ibere Israꞌeeleenaꞌo tooneenaꞌone. 7Wottoo Abrahamichi yareenaꞌo boonoshi tunetoyich, boonoshi bulli ibere bi bushiisheenaꞌo tooneenaꞌone; tunebaani Yeeri Abrahamich “Yisaaqichi yaroone ne yaroo getaa ceekkemmo”#Hal. 21:12 itone. 8Ebi geto Yeeri gibenikkiti gibenee qaaroona shiijjeti bushiisheenaꞌo ibere bi yaroo tuneꞌi haddeeteetalli, ebi meenona shiijjeti bushiisheenaꞌo Yeerichi bushiisheenaꞌo tooneenaꞌone getone. 9Ebiyoo “Ta getteti aabooba woyemmo taane; Saariyoo bushoon shiyemmine”#Hal. 18:10,14 iꞌi Yeeri gibenee qaaroon bi gettitoyichiye.
10Ebi ikkeeto baach toonoone; Ribiqi ikke nihoo waanee, biyoo no qaabbechi Yisaaq waanee qaappoon bi yeqqefehooba, 11-12Yeeri biich “Qaabboo guuchoyich hajjeyemmone”#Hal. 25:23 iye. Ebin bi ito bushiisheenaꞌo batt shiijjeyaani boonoshi beetaa, gaaweto tuneba gondo, ikkeenolla boonoshi tuniyaan beehoobane. Ebich Yeeri kaaccitoommon bi gaboo manjito bi tunemmoyich, ikkoon bariiꞌi bi kaaccito boonoshi shuuneti shuunoona tuneyaanoon, bi ceeggiti ceegoonane. 13Ebiyoo “Yaaqobin shunnoye; tunebaani Esayin shixxoye”#Milik. 1:2-3 getaa bi kooreetoommoniye.
14Illa ama gettehone? Yeeri gondoon shuunee beetone? Shuuneyaache! 15Yeeri Muusich
“Ikke uroon maariya ta qaawigaata,
maaremmo taane;
ikke uroyichoo ariqqeya ta qaawigaata,
ariqqemmo taane”#Key. 33:19 bi itoommoniye.
16Ebich maaroo danemmo maariibeeti Yeer waaneenalli, ashi daaggoona woyee ashi qiiccoona toonoone. 17Yaafe Macaafoochaa Yeeri Faroonin “Ne toommoochaa ta tuniyaabeeti shuunoona ta giidoon ta bekkiyemmoyich, ta shigoo showee toommo bulliich bi arichemmoyich, ebichi naboyichiye neen ta taatiito”#Key. 9:16 iye. 18Illa Yeeri ikke uroon maariya bi qaawigaata, maariye; ikke uroonoo mulli manjoo tuniiya bi qaawigaata, mulli manjoo tuniihe.
Yeerichi Kaaree Shiixxoonaa Bi Maaroona
19Illa Yeeri eechiibeeto tuneechii, “And beddaahaa amoyich ashoon gondiihe? Yeerichi daaggoon ‘Tato toonoone’ geton hakkemmo, konine?” getiree diqqich echemmo neene. 20Tunebaani haano ashoocho, ishichiree Yeerich wochemmo ne koni neene? Nuuqqoochee shuuneebeeti qiico shuuneton “Amoyich ebin tuniiꞌa taan shuunenne?” gettehe?#Isi. 29:16; 45:9 21Woyee nuuqqee hachecho ikke nuuphoochee ikke qiicoon oogee qiico, wotta ikke qiicoon qalle qiicoon tuniiꞌi shuunoyich nuuqqee toommooch hakkoo biich aalle?
22Tunebaani Yeeri bi kaaree shiixxoon bekkiiya, bi hakkoonoo arichiiya shunniye; ebich aalloyich qanniti bi kaaree shiixxee qiiceenaꞌon woddoon haaꞌiihe. 23Bi oogee yiiroochee boonoshi qoodeyemmoyich shiichiꞌi bi qanniiti, bi ariqqeti qiiceenaꞌo toommooch worganikkiti bi oogee yiiroon bekkiiya shunniye. 24Eboshiyoo noone getone; noonoo Ayihudeenaꞌo daggoochee baach tuneyaanoon, Aageteenaꞌo daggoochee wotta ceeggitone. 25Ebiyoommon wotta keemechi Hoseeꞌichi Macaafoochaa Yeeri,
“Ta macceenaꞌo tuneyaaneenaꞌon
‘Ta macceenaꞌo’ getiree ceeggemmo taane;
ta shunaani asheenaꞌon
‘Ta shunnetinaꞌo’ getiree ceeggemmo taane.#Hos. 2:23
26‘Ittoshi ta macceenaꞌo toono ittoshine’
boonoshi getteeti xaaꞌooch
aroochaa ‘Beeyechi Yeerichi bushiisheenaꞌo’
getaa ceekkemminaꞌone”#Hos. 1:10 itone.
27Keemechi Isiyaasi bi macaafoochaa
“Israꞌeeleenaꞌo baharee gasheexi qacoommon boonoshi woddeteenona,
giishecheenaꞌo baach wodemminaꞌone.
28Doono showee toommooch beeti asheenaꞌo bulli toommooch
bi nalloon kaate maaciree ikke wottoon ceechemmone”#Isi. 10:22-23
iꞌi Israꞌeeleenaꞌochon cookii gettitone.
29Wotta Isiyaasi shiichiꞌi ishichitoommon,
“Beshe Mawe Doono Yeeri nooch yaroon bi echiyaan gaata,
Sodoomin tunesho, Gomoorinoo shaahesho noone.”#Isi. 1:9
Israꞌeeleenaꞌoyich Mishiraachee Qaaro Getteyoo
30Illa ama gettehone? Cadiqoon dabbaani Aageteenaꞌo cadiqiyeete; boonoshi cadiqitoo Yeeri toommooch mulloon tooꞌiyoonane. 31Tunebaani Israꞌeeleenaꞌo cadiqoo daneebeeti sheeroon dabbiibee ebi are sheerooch shagaaneenaꞌone. 32-33Amoyichiye shago boonoshi qajjito? Shuunoonalli, Yeeri toommooch mullee tooꞌiyoona cadiqoon boonoshi qaawoo qajjitoyichiye. Yeeri ishichitone:
“Ebiyoche, asheenaꞌon tephemmi xaqqoon,
yexi dichemmi xaqqee guudon Tsiyoon kotiyemmo taane;
bi toommooch mulloon tooꞌiibeeto yeelleyaachemmone”#Isi. 8:14; 28:16
getaa bi kooreetoommon, ebi are tephemmi xaqqoona tepheeꞌi dihiyeete.
ទើបបានជ្រើសរើសហើយ៖
Roomi 9: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
