Maariqoosi 6
6
Yesuusin Naazireetechinaꞌo Qayo
(Maatiyoosi 13:53-58; Luqaasi 4:16-30)
1Ebiyee gubb, Yesuusi aroochee kechiꞌi bi dicciti showooch hammiye; bi dabbeenaꞌo wotta biinna tookkii hammiyeete. 2Shambetoo shagaa, Yesuusi boonoshi kiceebeeti kexooch giyiꞌi asheenaꞌon dojjooch giyiye.
Bi dojjiton meeti asheenaꞌo waayeꞌi worganeebee, “Hini uro ebi mooyon amoochee danehe? Biich icheeti ariyoo amoommone? Beeggaa no ariyaani gaakkechi shuunoon aabichiꞌiniye bi shuuneebeeto? 3Hini uro anaaxoo toone? Maariyamichi bushoo toone? Bi maneenaꞌo Yaaqobi, Yoosi,#6:3 woyee Yoosayi Yihudinaa Simoonina tooneenaꞌone? Wotta bi maache maneenaꞌo noonna tookkii beetinaꞌo tooneenaꞌone?” iꞌi hoxeheete.
4Yesuusi boonoshich “Keemechon bi shiijjee katemeexi asheenaꞌo, bi xibeenaꞌonaa bi kechi asheenaꞌonoyee beshetaa bareenaꞌo oogiyaanoon qayaacheete” iye. 5Are xaaꞌooch giisheche biiyechinaꞌochi toommooch bi kishoon kotii wodiyoyee damba amee gaakkechi shuunoonolla tuniyoyich cir hakkaanoone. 6Bi toommooch mulloon tooꞌiyoo boonoshi qajjitoyich worganehe.
Aaraa Gutte Mishiraachechinaꞌon Yesuusi Wocho
(Maatiyoosi 10:5-15; Luqaasi 9:1-6)
Ebiyee gubb, Yesuusi gafee toommona guuddiꞌi asheenaꞌoyich dojjii beehe.
7Yesuusi aaraa gutte bi dabbeenaꞌon bi waan ceeggiꞌi gutti gutteree boonoshi hammemmoyich wochehe; yinneenaꞌon ashi toommoochee boonoshi yookkemmoyichoo ukkirittinoon boonoshich immiye. 8Boonohichoo ishichiye, “Gommooch ittoshi keyigaata, gumboyee damba shoho tuneba shohee kojjoon woyee gijjee kolloon yechaahote. 9Tunebaani ittoshi baatooch caammoon gedote. Wotta gutte tahoon taheyaahote. 10Amee xaaꞌoochona shaggiꞌi ashi kexooch ittoshi giyigaata, are xaaꞌoon gawukkiꞌi ittoshi hammimmi wottoon are kexooch kotebote. 11Ittoshin iibbiyoo qajjiꞌi, ‘Ittoshi gettii beeton waayeyaache’ ii beeti xaaꞌeexi asheenaꞌoyich, boonoshi toommooch miixoo bi tunemmoyich gommooch keyiree ittoshi baateexi quttoon tebbeechi aroochee keyote” iye.
12Boonoshiyoo hammiꞌi, axaaxee gommoochee Yeer waan boonoshi wottemmoyich asheenaꞌoyich gettiyeete. 13Meeti yinneenaꞌon asheenaꞌo toommoochee yookkiyeete. Meeti biiyechinaꞌon zayitoon huuttiibee wodiiheete.
Aacona Afaallechi Yowannisi Qitoo
(Maatiyoosi 14:1-12; Luqaasi 9:7-9)
14Yesuusichi shigo bulli xaaꞌooch gaminnii bi arichetoyich, taatoo Heroodisi waayehe. Ikkikke asheenaꞌo “Hini Aacona Afaallechi Yowannisine; ebiyoommi gaakkechi mooyon tuniyoo bi hakkito, qitoochee tiyiꞌiniye” iyeete.
15Bare asheenaꞌo Eliyaasine iyeete. Bareenaꞌo wotta “Hini keemechone; wonnee keemechinaꞌoommi ikke keemechone” iyeete.
16Tunebaani Heroodisi ebin waayeꞌi, “Aroo bi qettoon ta kuchiiti Yowannisine; aroo qitoochee tyitone” iye.
17-18Heroodisi bi ishichiti naboo ebine: Heroodisi bi manoo Filipphoosi mechee Heroodiyaadin bi shaaggitoyich, Yowannisi tiyiꞌi biich “ ‘Ne manoochi mecheen shaage’ iꞌi Muusichi Sheeroo daaggaanoone” ii beehe. Ebi bi mechechi naboyich Heroodisi “Yowannisin yeshi cuyote” iꞌi bi ginee naayinaꞌo daggoochee wochehe. Boonoshiyoo hammiꞌi yechii cuyee kexooch geddiyeete. 19Heroodiyaadiyoo Yowannisich qummaꞌa bi wuxeyemmi gommon qaawaa beehan; tunetaa hakkaaneene. 20Ebiyoo Heroodisi Yowannisi cadiqoonaa yaafoona bi tunoon bi ariitoyich, biin shattiꞌi quyii bi beetoyichiye. Heroodisi Yowannisi getaa emiriibee waayee beehe; tunetaa bi waayeti mooyona oogichii gaabbii beehe.
21Ebiyee gubb, Heroodisi bi shiijjee aabee baarooba bi mikkirechinaꞌonaa bi ginee iraasheenaꞌonon, Galiilee showeexi ogoogeenaꞌonoo gifiroon ceeggiye. Gifiree bi ceego Heroodiyaadich gommon qechiye. 22Arooba Heroodiyaadichi bushee gifiree kexooch giyaa duubon duubbaꞌa Heroodisinaa biinna tookkii kotetinaꞌonon emirikkiyan.
Taatoo tiyiꞌi busheen “Ne qaawiton ta waanee qollebe. 23Ta taatittinee qatolla bi tunetaa, ne qollemmon neech immemmo taane” iꞌi wogehe.
24Ebich bushee kexoochee kechaꞌa hammaa bi indeech “Taatoon amoon qollebote?” iyaꞌa echahan.
Indeyoo “ ‘Aacona Afaallechi Yowannisi qelloon taach imbe’ getiree qollebe” iyan.
25Bekkech bushee afaafinoona taatoo waan giyaꞌa taatoon “Aacona Afaallechi Yowannisi qelloon gafetoona and taach ne immemmoyich qaawaabeeti taane” iyan.
26Arooba taatoo oogichii ayiniye; tunetaa bi wogeti wogoonaa biinna tookkii koteti iibbeenaꞌonoyicha iꞌi busheyich bi heciyoon shaddoo shunaanoone. 27Bekkech bi ginechinaꞌo daggoochee ikkoon ceeggiꞌi, Yowannisi qelloon bi deebemmoyich gettiye; uroo cuyee kexooch hammii Yowannisi qettoon kuxxiꞌi, 28bi qelloon gafetoona deebii busheyich immiye. Busheyoo daammaa bi indeech immahan. 29Ishin waayeti Yowannisi dabbeenaꞌo hammii bi dubenoon deebiꞌi duukkiyeete.
Uuche Humeenaꞌoyich Yesuusi Maanjoo
(Maatiyoosi 14:22-23; Luqaasi 9:10-17; Yowannisi 6:1-14)
30Ebiyee gubb, mishiraachechinaꞌo boonoshi hammitoochee wotteꞌi ikkooch Yesuus waan giddeꞌi, boonoshi shuunetonaa boonoshi dojjito bullinon biich gettiyeete. 31Biyoo “Barahooch ittoshi ikkeeto waaree giishechoon kote kashebote” iye. Bi ishichiti naboo, dofee asho boonoshi waan hammii waa bi beetoyich maayoonolla boonoshi maayemmi saatoon boonoshi muccetoyichiye.
32Ebich Yesuusinaa bi dabbeenaꞌona giishi markabeech kechii koteꞌi barahooch hammiyeete. 33Tunebaani boonoshi hammii beetaa, meeti asheenaꞌo beeggiꞌi boonoshin ariiheete. Ebich katemee toommo bulliichee baharee gashoon baatoona woceebee, boonoshiyee shiichiꞌi hammii boonoshi kindemmi xaaꞌooch shaggiyeete. 34Yesuusi markabeechee kindiibee dofee asheenaꞌon beeggiꞌi, qiddaalli bagoommo boonoshi tunetoyich bi maacoona micciꞌi ayiniye. Boonoshichoo meeti mooyon dojjooch giyiye.
35Aroochee showoo beshee womikkoo wottetaa, Yesuusichi dabbeenaꞌo bi waan giddeꞌi, “No beeto, gafoo aalli xaaꞌoone; andoo showoo xumetone. 36Asheenaꞌo hini guudeexi goyechi gafooch hamiree maayoon boonoshi qellich boonoshi kememmoyich diggiiree daachiibe” iyeete.
37Tunetaa Yesuusi wochiꞌi, “Ittoshi maanjibote” iye.
“Ishigaata, hamiree gutte balle diinaaroona#6:37 Ikke diinaaro shuunechochi ikke heeyi shuunee gatiyoone. koshon boonoshich kemebona?” iꞌi echeheete.
38“Ittoshich ambiche kosho beete? Eke hami beegote” iye.
Boonoshiyoo hammii beeggiꞌi, “Uuche xekee koshonaa gutte haashoona beete” iyeete.
39Ebiyee gubb, Yesuusi bi dabbeenaꞌo asheenaꞌon qoodi qoodiree mocee toommooch boonoshi kotiyemmoyich gettiye. 40Arooba asheenaꞌo balli balloonaa aachi aachoona tuneꞌi yaaroona koteheete. 41Aree hillooch Yesuusi uuche xekee koshonaa gutte haashoonon tiijjii yechiꞌi shimaajj ciinniichii Yeerin galletehe. Koshon tiichiꞌi bi dabbeenaꞌoyich “Ebin asheenaꞌoyich qoomebote” iꞌi immiye; haashoonoo qoodiꞌi bullich immiye. 42Boonoshiyoo daammiꞌi qoometaa, bulliyoo maaꞌi michiyeete. 43Bi dabbeenaꞌo aaraa gutte ogooge mokkee ceeni, echeti koshonaa haashoonochi ooyoon tiijjiyeete. 44Koshon maatinaꞌo daggoochee anaaminaꞌo baach uuche humeenaꞌone.
Baharee Aachi Toommona Yesuusi Shaꞌo
(Maatiyoosi 14:22-23; Yowannisi 6:15-21)
45Ebiyee gubb, Yesuusi bi dabbeenaꞌon “Hini asheenaꞌon diggiiꞌa ta deennemmi wottoon, giishi markabeech keyiree beqach Beetisayida tayee shiichiree beshebote” iye. 46Biyoo asheenaꞌon diggii deenniichii corootiya geppooch kechiye.
47Xum bi dabbeenaꞌo markabeena baharee gutte daggooch boonoshi beetaa, Yesuusi bi ikkeeto showooch beehe. 48Arooba boonoshi toommooch yongo daappitoyich markabee boojjetoona yoppeebee xuuxeheete. Yesuusi boonoshi xuuxoon beeggiꞌi, qaabbe baakkee kuuhooch baharee toommona shaꞌeebee boonoshi waan waahe; waaꞌi boonoshiyee aaf besheya iye. 49-50Tunetaa baharee toommona shaꞌeebee bi womon boonoshi bulli beeggiꞌi, yoogoone iꞌi keqqii cookiyeete.
Biyoo bekkech boonoshich “Kupphebote! Taane, shattaahote” iye. 51Aree hillooch boonoshi waan markabeech kechiye. Bekkech yongo shashewimiye. Bi dabbeenaꞌo ebina oogichii worganeheete. 52Ebiyoo boonoshi mullo muumetaa, Yesuusi giisheche koshon asheenaꞌoyich bi abbetiyoon boonoshi mullooch kotiyaaneenaꞌo boonoshi tunetoyichiye.
Biiyechinaꞌon Genshareexaa Yesuusi Wodiyoo
(Maatiyoosi 14:34-36)
53Yesuusinaa bi dabbeenaꞌona baharoon kimmiꞌi Genshareexee showooch shaggiyeete; markabeen aachi gashooch neechiyeete. 54Markabeechee boonoshi kindiyaa, bekkech asheenaꞌo Yesuusin ariiꞌi, 55are showee guudo bulliich wocee hammii, “Yesuusi beete” getteeti xaaꞌooch biiyechinaꞌon shaaꞌoona shaageꞌi deebiyeete. 56Gafooch, katemoonaa bi guudoona beeti goyechi gafoonooch, Yesuusi hammimmi xaaꞌoo bulliich, asheenaꞌo biiyechinaꞌon gabiyee godooch kichiꞌi kotiichii, are biiyechinaꞌo bi qoreddee caappoonolla boonoshi yechemmoyich qolleheete. Yechitinaꞌo bulli wodiyeete.
ទើបបានជ្រើសរើសហើយ៖
Maariqoosi 6: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.