Maatiyoosi 23
23
Muusichi Sheeree Dojjechinaꞌonaa Fariseenaꞌonochon Yesuusi Geto
(Maariqoosi 12:38-39; Luqaasi 11:43-46; 20:45-46)
1Ebiyee gubb, Yesuusi dofee asheenaꞌonaa bi dabbeenaꞌonoyich ishichiꞌi gettiye: 2“Muusichi Sheeree dojjechinaꞌonaa Fariseenaꞌona Muusichi gabberooch kotetinaꞌone. 3Ebich boonoshi gettiibeeto bullin tuniibote; ceechibote. Tunebaani boonoshi shuunee beeton shuuneyaahote. Ebiyoo boonoshi yibbaatee beeton boonoshi qelloona tuniyaaneenaꞌo boonoshi tunetoyichiye. 4Magge shaagoon cuchiꞌi ashi toommooch shaakkiiheete; tunetaa ikke yaphereenolla kettiyoon qaawaacheete.
5“Boonoshi shuunoo bullin asho beeggemmoyich baach shuuneheete. Ebich boonoshi baroonaa boonoshi kishoonooch boonoshi cuyeebeeti xifetoon gamichiyeete; boonoshi qoreddee caappoon genjiiheete; 6gifiree kexoochaa oogee xaaꞌoon, Ayihudeenaꞌo kiceebeeti kexoochaa genje gabberoon, 7gabiyee godoochaa showooch qebonee diggiyoonaa dojjechocho getaa ceekkoonon qaawiyeete.
8“Tunebaani ittoshi dojjecho getaa ceekkeyaahote. Ittoshich ikke Dojjecho baach bi beetoyich, ittoshi bulli ikke manoo ittoshine. 9Wotta shimaayooch beeti ittoshi Nihoo ikkoo bi tunetoyich, showee toommooch beeto koninolla nihoo getiree ceeggaahote. 10Ittoshi Doono ikkoo, biyoo Kiristoosine; ebich doono getaa ceekkeyaahote. 11Ittoshiyee beshimmo ittoshi wochee bushoo tunebe. 12Bi qelloon oogiimmo bulli giishemmone; bi qelloon giishiimmo bulli oogemmone” iye.
Yesuusi Shabaatte Wottoon Woowo Geto
(Maariqoosi 12:40; Luqaasi 11:39-42,44,52; 20:47)
13“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Asho shimaajji taatittineech bi giyaachemmoyich kelloon hicciyote. Ittoshi qelloona giyaachote; giya qaawii beetinaꞌoyichoo bajjiyote. 14[Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Xuumeenaꞌo kexon tiichiibee ittoshi shuunoon qeroyich corootoon geechii genjiihote. Ebich Yeeri beshe shattii giiriiti nalloon ittoshi toommooch kindiyemmone.]
15“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Ikke uroon ittoshi waan wochoyich baharoonaa showoonon guuddiyote. Ashoon ittoshi danetoyee gubb ittoshi toommooch kindemmoyee beshe shiweree qaaqqee nalloon bi toommooch kindiihote.
16“Hini aaf doogeenaꞌon yaabiibeeti aaf doogeenaꞌote, ittoshich woowo! ‘Asho “Yaafee kexona!” iꞌi bi wogegaata, amolla tuneyaachemmone; tunetaa “Yaafee kechi aachoona!” iꞌi bi wogegaata, wogo biin yechemmone’ iyote. 17Hini mullaalli wolleenaꞌote! Aachoonaa are aachoon yaafiibeeti yaafee kexonoochee aabi beshiye? 18Wotta ittoshi ‘Asho “Deejjee gudoona!” iꞌi bi wogegaata, amolla tuneyaachemmone; tunebaani “Deejjee gudee toommooch beeti deejjoona!” iꞌi bi wogegaata, wogo biin yechemmone’ iyote. 19Hini aaf doogeenaꞌote! Deejjoonaa deejjoon yaafiibeeti deejjee gudoonoochee aabine besho? 20Illa ‘Deejjee gudoona!’ iꞌi wogeebeeto, deejjee gudoonaa bi toommooch beeti deejjoo bullina wogetone. 21‘Yaafee kexona!’ iꞌi wogeebeeto, yaafee kexonaa bi maacooch beeti Yeerina wogetone. 22‘Shimaayoona!’ iꞌi wogeebeeto, Yeerichi taatee qeenonaa bi toommooch koteti Yeerina wogetone.
23“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Kefoo, aaꞌaafoonaa kamuunonoochee#23:23 Kamuuno, gishiishi aafechi, shachiibeeti, cinnechi qimaamee mixone. asraatoon Yeerich kichiyote; tunebaani sheeree daggooch beeti beshe mooyon qajjitote; ebiyoo tachii nalloo, ashich ariqqeꞌi maaroonaa gibeneeto tunoonane. Are Yeerich ittoshi kichii beeton qayaanoon, eboshinoo wotta tuniiya bedo ittoshine. 24Hini ashoon yaabiibeeti aaf doogeenaꞌote, ‘Noon eeꞌiyemmone’ iꞌi ittoshi uyoochee shunneen teegiyote; tunebaani gaaleen qooxxiyote.
25“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Xoofoonaa shaatoonochi qeddoon machiyote; tunebaani boonoshi maacooch ittoshi shuuneti bogoonaa hiriggoona arooch ceennitone. 26Hini aaf dooge Farisoocho, shiichiree maacichon mayi xalliibe; maachichoo tookki xallemmone.
27“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Maachi maashee toommooch hagaa booroona dikkeeꞌi boonoshi malletetaanona, boonoshi maacooch qititi asheenaꞌochi shaawushoonaa eeꞌe mooyona ceenniti maashee toommeexi kexinaꞌon shaahoo ittoshine. 28Ebiyee ittoshi wotta maaxoochaa ashich cadiqo shaahii bekkehote; tunebaani ittoshi maacooch mulloon xalloo shaahoonaa gondoonon ceechiyote” iye.
29“Hini ittoshi maacoon xalloo shaahiibeeti Muusichi Sheeree dojjechinaꞌonaa Fariseenaꞌonote, ittoshich woowo! Keemechinaꞌo duukketi maashee toommooch kexon haggiyote; cadiqeenaꞌochi haawulitoonoo malletiihote. 30Wotta ‘No qaabbechinaꞌochi yemeenooba no beeto gaata, keemechinaꞌon wuxitinaꞌona tookki ikkotteyaachesho noone’ iyote. 31Ishigaata, keemechinaꞌon wuxitinaꞌochi bushiishoo ittoshi tunoon ittoshi qelloona miixee beetote. 32Ittoshi wotta ittoshi qaabbechinaꞌochi axaaxee xoofooch ceechiyote.
33“Hini dingereenaꞌote! Xekerechi bushiisheenaꞌote! Yeeri nallemmi shiweree qaaqqoochee aabichiree muriccehote? 34Ebich keemechinaꞌon, yiiteenaꞌonaa dojjechinaꞌonon ittoshi waan woche daachiyemmo taane. Boonoshi daggoochee ikkikkeenaꞌon wuxemmo ittoshine; ikkikkeenaꞌon yooddemmo ittoshine; boonoshi daggoochee ikkikkeenaꞌon ittoshi kiceebeeti kexoochaa arengoona xoobiree katemoochee katemooch yookkemmo ittoshine. 35Ebich cadiqo tuneti Abeelichi damoochee tiijjiꞌi, yaafee kexonaa deejjee gudee gutte daggoonoochaa ittoshi wuxiti Baraakiyichi bushoo Zakaariyaasichi damooch beddaahaa, showee toommooch ufeti cadiqeenaꞌo bullichi damee naboona echeyemmo ittoshine.#Hal. 4:8; 2 Kiin. 24:20-21 36Iberoon ittoshich gettoye: Ebi bullichi nalloo hini shiijjeroo toommooch kindemmone” iye.
Yerusaalemi Asheenaꞌon Yesuusi Shuno
(Luqaasi 13:34-35)
37Daakkiꞌi Yesuusi ishichiye: “Hini Yerusaalemi asheenaꞌote! Keemechinaꞌon wuxii beetinaꞌote! Ittoshi waan wocheetinaꞌon xaqqoona yexxii wuxii beetinaꞌote! Baakkee bi bushiishoon bi qoshee daggooch bi guufoommon, tawoo ittoshin ikkooch kicoyich ambiche wottoon shunnetote! Tunetaa ittoshi qaawaano ittoshine. 38Ebiyoche, ittoshi kexo onoo tuneree shokko echemmone. 39Ittoshich gettoye: ‘Doono Yeerichi shigoona waabeeto diireebe’#Shod. 118:26 ittoshi immi wottoon ebiyee damba taan beegaachemmo ittoshine” iye.
ទើបបានជ្រើសរើសហើយ៖
Maatiyoosi 23: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
