Maatiyoosi 13
13
Yaree Shookkechochi Shaahiyoo
(Maariqoosi 4:1-9; Luqaasi 8:4-8)
1Arooba Yesuusi kexoochee kechii hammiꞌi baharee gashooch kotehe. 2Biyoo dofee asheenaꞌo bi waan kiceetoyich, baharee toommooch beeti giishi markabeech kechiꞌi kotehe. Asheenaꞌo bulli baharee gashooch beeti showooch neexeheete. 3Asheenaꞌoyich meeti mooyon shaahiyoona gettiye. Gettiibeenoo ishichiye: “Ellebote, yaree shookkecho bi yaroon shookka kechiye. 4Shookkii bi beetaa, ikkikkoo gommi gashooch holliye. Aroon kafeenaꞌo waa macii maaheete. 5Baroo maacaa xaqqechi showooch holliye. Showoo giishetoyich kaatee collehe; 6tunetaa aabe michimmona shoolliye; cammon awuro bi qajjitoyich, shuuqqiye. 7Baroo wotta angichi xuppo beetooch holliye; are angichi xuppoo naaxii kechiꞌi maahe. 8Baroo wotta qeemi showooch holliꞌi collehe; diccii kechiꞌinoo aafehe; ikkoo balle aafoon, ikkoo shiche aafoon, ikkoo shaashe aafoon aafehe. 9Waayeebeeti waajjecho waayebe” iye.
Bi Dabbeenaꞌo Echeton Yesuusi Wochoo
(Maariqoosi 4:10-12; Luqaasi 8:9-10)
10Ebiyee gubb, bi dabbeenaꞌo Yesuus waan giddeꞌi, “Amoyichiye asheenaꞌoyich shaahiyoona ne gettaabeeto?” iꞌi echeheete.
11Yesuusi wochiꞌi ishichiye: “Yeeri shimaajji taatittinee maacee mooyon ittoshich arichiitone; tunetaa bareenaꞌoyich arichiyaanoone. 12Beetoyich daakkaa ichemmone; biichoo woddemmone. Tunetaa amolla aallo waanee biich beeti giishechewolla tiijjeyemmine. 13Ebich ciinniibee beego boonoshi qajjitoyich, waayeebee ello boonoshi qajjitoyich, shalligoonoo boonoshi qajjitoyich shaahiyoona boonoshich arichiihoye. 14Isiyaasi ishichitone:
‘Hini asheenaꞌo waayoon waayee beeteete; shalligaacheete.
Ciinon ciinnii beeteete; beegaacheete.
15Boonoshi aafoona boonoshi ciinaachemmoyich,
boonoshi waamona boonoshi waayeyaachemmoyich,
boonoshi mulloona boonoshi shalligaachemmoyich,
ta waan boonoshi wottetaa boonoshin ta wodiyaachemmoyich,
boonoshi mulloon muumiitinaꞌone;
boonoshi waamon ulliitinaꞌone;
boonoshi aafoonoo oppetinaꞌone’#Isi. 6:9-10
iꞌi bi keemmiti keemo boonoshi toommooch ceennitone.
16“Tunetaa ittoshi aafo ciinnii bi beetoyich, ittoshi waamoo waayee bi beetoyich, diireeto ittoshine. 17Iberoon ittoshich gettoye: Meeti keemechinaꞌonaa cadiqeenaꞌona ittoshi beeggii beeton beegoyich qaatitinaꞌone; tunebaani beegaaneenaꞌone; ittoshi waayee beetonoo waayoyich qaatitinaꞌone; tunebaani waayeyaaneenaꞌone” iye.
Yaree Shookkechochi Shaahiyoon Biichiꞌi Yesuusi Geto
(Maariqoosi 4:13-20; Luqaasi 8:11-15)
18Yesuusi daakkiꞌi ishichiye: “Yaree shookkechochi shaahiyoo amo gaata waayebote. 19Yeerichi taatittinee qaaroon waayeꞌi shalligaano bulli toommooch gondoochi nihoo woyemmone; boonoshi mullooch shookketi qaaroon maciree daammemmone; eboshi gommi gashooch holliti yaroomminaꞌone. 20Wotta maacaa xaqqo beeti showooch holliti yaroon shaahii beetinaꞌo, Yeerichi qaaroon waayeꞌi bekkech emiroona deqqii beetinaꞌone. 21Tunetaa cammon yeshaaneenaꞌo boonoshi tunetoyich yagaachemminaꞌone; Yeerichi qaaree naboona iritoo woyee duꞌo waahooba bekkech giinnii dihechinaꞌone. 22Ebiyoommon angichi xuppo beeti showooch holliti yaroon shaahii beetinaꞌo, Yeerichi qaaroon boonoshi waayetaa, hini showeexi beemon gaboonaa gijjee shaawona dacheyoona boonoshi mullooch naaxiꞌi boonoshi waayeti qaaroon maa beetone; ebichi naboona aafeyaanoon dobberee echemminaꞌone. 23Qeemi showooch holliti yaroon shaahii beetinaꞌo, Yeerichi qaaroon waayeꞌi shalligii beetinaꞌone. Boonoshiyoo aafoon aafemminaꞌone; ikkoo balle aafoon, ikkoo shiche aafoon, ikkoo shaashe aafoon aafemmone” iye.
Dadaddee Shaahiyoo
24Yesuusi bare shaahiyoon ishichiꞌi boonoshich gettiye: “Shimaajji taatittine ebiyoommine: Ikke uro bi goyooch deꞌe yaroon shookkiye. 25Tunebaani asho bulli tokketeechaa, uroochi shixecho waaꞌi teepphee daggooch dadaddoon shookkiichii hammiye. 26Teepphoo collee diccii bi aafehaa, dadaddoo wotta bekkehe.
27“Goyee doonochi shuunechinaꞌo waaꞌi, ‘Doonocho! Deꞌe yaroon shoohaano neene? Dadaddochi amoochee waahe?’ iꞌi echeheete.
28“Biyoo wochiꞌi, ‘Shixechone shookkito’ iye.
“Bi shuunechinaꞌoo ‘And hamiree waaxi no bayon qaawii beetine?’ iyeete.
29“Tunetaa teepphee doono wochiꞌi, ‘Dadaddoon waaxi ittoshi beetaa teepphoo tookki waaxemmone; qayote. 30Dadaddoo teepphoona tookki kashe; qecci goorooba qeccechinaꞌon “Dadaddoon shiichiree macibote; qiriree qaaqqoona michibote; teepphoon wotta ta gotooch gedote” gettemmo taane’ iꞌi gettiye” iye.
Shanaafee Aafee Shaahiyoo
(Maariqoosi 4:30-32; Luqaasi 13:18-19)
31Wotta Yesuusi bare shaahiyoon boonoshich gettiye: “Shimaajji taatittine ebiyoommine: Asho bi goyooch shanaafee aafeen shookkiye. 32Hini shanaafee aafe bare maayi yaroo bulliyee giishecheene; tunebaani shookkaꞌa collaa bi diccehooba daaddeexi maayeenaꞌoyee besheene. Shimaajji kafeenaꞌo waaꞌi bi atooch kotoon boonoshi hakkimmi wottoon ooge mixo tunemmine” iye.
Bukee Shittee Shaahiyoo
(Maariqoosi 4:33-34; Luqaasi 13:20-21)
33Yesuusi daakkiꞌi bare shaahiyoon gettiye; ishichiye: “Shimaajji taatittine ikke ure bukoo tiyimmi wottoon daammaa keejje qunnee buddinoona tookkaa xiriqqaꞌa bi kotiiti bukee shittoommine” iye.
34Yesuusi dofee asheenaꞌoyich ebi bullin shaahiyoona gettiye; mooyon shaahiyaalloon getaanoone. 35Ebi bi tuneti naboo,
“Shaahiyoona gettemmo taane;
Yeeri alemoon bi hallitoochee tiijjiꞌi
aacheeti mooyon gaxxemmo taane”#Shod. 78:2
iꞌi keemecho gettito ceennemmoyichiye.
Dadaddee Shaahiyoon Yesuusi Biichii Geto
36Arooba Yesuusi asheenaꞌon qajjiꞌi kexooch giyiye. Bi dabbeenaꞌo bi waan giddeꞌi, “Budeexi dadaddee shaahiyoon kaachiree nooch gete” iyeete.
37Biyoo wochiꞌi ishichiye: “Deꞌe yaroon shookkito Ashi Bushoone; 38budoo alemoone. Deꞌe yaroo Yeerichi taatittinee bushiisheenaꞌone; dadaddoo gondoochi nihoo bushiisheenaꞌone. 39Shixecho tuneꞌi dadaddoon shookkito daabiloosine; qeco yemeenee ciiroone; qeccechinaꞌoo Yeerichi maraakeenaꞌone.
40“Illa dadaddo macaa qaaqqoona bi micoommon, yemeenee ciirooba ebiyoommon tunemmone. 41Ashi Bushoo bi maraakeenaꞌon deejjemmone; asheenaꞌoyich xugo tunee beetinaꞌonaa hukkoon shuunee beetinaꞌo bullinon bi taatittinee daggoochee macemminaꞌone; 42qaaqqee sheellooch duppemminaꞌone; aroochaa eefonaa gashee qaayona tunemmone. 43Arooba cadiqeenaꞌo boonoshi Nihoo Yeerichi taatittineechaa aabeechoommon aaxxemminaꞌone. Illa waayeebeeti waajjecho waayebe” iye.
Aaxxe Mooyinaꞌochi Shaahiyoo
44“Wotta shimaajji taatittine ebiyoommine: Ikke uro goyee daggooch aacheeti aaxxe qiicoon danehe. Daneꞌi arooch wochii aachiye. Oogeton emiriibee hammii biich beeto bullin kemmiꞌi are goyoon kemehe.
45“Wotta shimaajji taatittine ebiyoommine: Ikke giixecho macecikkiti inqoon kemeya iꞌi qaawiye. 46Aaxxe gatiyoo kichiibeeti ikke inqoon bi danehooba hammiꞌi biich beeto bullin kemmiꞌi hini are inqoon kemehe” iye.
Haashee Dabbee Shaahiyoo
47“Wotta shimaajji taatittine ebiyoommine: Haashe yesheenaꞌo boonoshi dabboon baharooch dufaa, dabboo haashee yaroo bulliichee yechiye. 48Haashoo dabbooch ceennimmona, boonoshiyoo aacoochee geechii kichiyeete; showooch koteꞌi deꞌi deꞌoon guubooch macii kiciyeete; gondi gondoon kichiꞌi duppiyeete. 49Yemeenee ciirooba ebiyoommon tunemmone; Yeerichi maraakeenaꞌo waaree cadiqeenaꞌo daggoochee gondeenaꞌon qephi kichemminaꞌone; 50qaaqqee sheellooch duppemminaꞌone; aroochaa eefonaa gashee qaayona tunemmone” iye.
Geene Mooyonaa Andire Mooyona
51Yesuusi bi dabbeenaꞌon “Ebi bulli ittoshi mullooch giyite?” iꞌi echehe.
Boonoshiyoo “Eeha giyitone” iyeete.
52Biyoo “Illa shimaajji taatittineecha ta dabboo tuneti sheeree dojjecho bulli, bi kiciti qiicoochee andire mooyonaa geene mooyonon kichiibeeti doonoommone” iye.
Yesuusin Naazireetechinaꞌo Qayo
(Maariqoosi 6:1-6; Luqaasi 4:16-30)
53Yesuusi hini shaahiyeenaꞌon gettii bi ciichitoyee gubb, aroochee tiyiꞌi hammiye. 54Bi dicciti showooch waaꞌi asheenaꞌo worganemmi wottoon Ayihudeenaꞌo kiceebeeti kexoochaa asheenaꞌoyich dojjiye. Boonoshiyoo ishichiyeete: “Hini uro ebi ariyoonaa gaakkechi shuunee shuunoonon amoochee danehe? 55Hini uro anaaxoochi bushoo toone? Bi indee Maariyami tooneene? Bi maneenaꞌo Yaaqobi, Yooseefi,#13:55 woyee Yoosayi Simooninaa Yihudina tooneenaꞌone? 56Bi maache maneenaꞌo bulli noonna tookkii beetinaꞌo tooneeta? Ishigaata, eboshi bullin amoochee danehe?” iyeete. 57Hini mooyo boonoshich xugo tunehe.
Tunebaani Yesuusi “Keemechon bi shiijjee showeexi asheenaꞌonaa bi kechi asheenaꞌonoyee beshetaa bareenaꞌo oogiyaanoon qayaacheete” iye.
58Bi toommooch mulloon tooꞌiyoo boonoshi qajjitoyich, arooch wodde gaakkechi mooyon shuuneyaanoone.
ទើបបានជ្រើសរើសហើយ៖
Maatiyoosi 13: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
