Luqaasi 3
3
Aacona Afaallechi Yowannisi Mishiraachee Geto
(Maatiyoosi 3:1-12; Maariqoosi 1:1-8; Yowannisi 1:19-28)
1Xibaaroosi Qesaari taateti aaraa uuche natooba, Fantoosechi Phelaaxoosi Yihudee iraashoo tuneꞌi bi beehooba, Heroodisiyoo Galiilee iraashoo tuneꞌi bi beehooba, bi manoo Filipphoosiyoo Ixuriyaasee showoonaa Xirakonidoosee showoonochi iraashoo tuneꞌi bi beehooba, Lisanoosiyoo Abilaanee iraashoo tuneꞌi bi beehooba,#3:1 Heroodisi, Filipphoosinaa Lisanoosina ebi boonoshi yechiti showee taateenaꞌone. 2Haanninaa Qeyaafina qeeshee guudeenaꞌo tuneꞌi boonoshi beehooba, Zakaariyaasichi bushoo Yowannisi barahooch bi beetaa, Yeerichi qaaro bi waan waahe. 3Ebich Yowannisi tiyiꞌi asheenaꞌon “Axaaxee gommoochee Yeer waan wotteree aacona afaalleebote; Yeeri ittoshi axaaxoon maaremmone” iꞌi dojjiibee Yoordaanoosi aachi guudooch beeti showoo bulliich hammiye. 4-6Arooba keemechi Isiyaasichi macaafooch,
“ ‘Doonochi gommon qanniibote;
bi woretoonoo kaachi qaxxebote;
bamboo bulli ceennemmone;
guudoonaa geppoo bullina yitiree yimaanemmone;
wotta wuuqqe gomminaꞌo tatemminaꞌone;
iritiibeeti gommoo naqqo tunemmone;
arooba asho bulli Yeerichi wodiyoon beeggemmone’
iibee barahoochaa cookiibeeti ashi qaaro”#Isi. 40:3-5
getaa kooreeti qaaro ceenniye.
7Ebich Yowannisi aacona afaalleya bi waan waati dofee asheenaꞌoyich ishichii beehe: “Hini xekerechi bushiisheenaꞌote! Yeer waanee kindemmi kaaree shiixxoochee ittoshi muriccemmoyich, konine ittoshich gettito? 8Illa ittoshi axaaxee gommoochee Yeer waan ittoshi wottoon bekkiibeeti shuunoon shuunebote. Wotta ittoshi mulloona ‘Abrahamichi bushiishoo noone’ getiree yebeneyaahote. Ittoshich gettoye: Hini xaqqeenaꞌoochee Yeeri Abrahamich bushiishoon halloon hakkiye. 9And qofiyo mixinaꞌochi xepphooch kotetone; illa gaawe aafoon aafeyaani mixo bulli kucheree qaaqqooch duppeyemmone” iye.
10Ishin waayeti dofee asheenaꞌo “Illa amoon hallibona?” iꞌi echeheete.
11Yowannisi wochiꞌi, “Gutte tahecho tubbetoyich ikkoon imbe. Maayecho maayaalloyich imbe” ii beehe.
12Arooba gabiyee guudeenaꞌo#3:12 Gabiyee guudeenaꞌo, asheenaꞌo waanee qarexoon maciibeeti asheenaꞌone. wotta aacona aafaalleya bi waan waaꞌi, “Dojjechocho, no wotta amoon hallibona?” iꞌi echeheete.
13Biyoo “Ittoshich getteetoyee beshe qaraxoon ashi waanee echaayote” iye. 14Ginee naayinaꞌo wotta “Nowochi amoon hallibona?” iꞌi echeheete.
Yowannisiyoo “Bokkoochoommon guufichiree ashoon boggaahote; kootoon taggeree ashoon xuqqaahote; ittoshich icheebeeti shumaayoo ittoshich beddiye” iye.
15Asheenaꞌo tunemmi mooyon quyeebee, bulliyona Yowannisi mooyon gajjiteebee, “Hini uro Kiristoosi tunehe?” iꞌi boonoshi mulloona yexiiheete. 16Yowannisi tiyiꞌi bullich “Tawoo aacona ittoshin afaallaabeeto taane. Tunebaani bi caammee cuyoon biich ta bedaani tayee beshe kuppho waa beetone; aroo Yaafe Ayaanoonaa qaaqqoona ittoshin afaallemmone. 17Maayoon yooppiibeeti qiico bi kishoochiye; maayo bullin yooppiree xalliyemmone; are yooppaa xalleti teepphoon bi gotooch geddemmone; tunebaani maaxxoon tahaani qaaqqoona michemmone” iye. 18Ebich asheenaꞌon baribare wodde ciicoona ciicciibee mishiraachee qaaroon gettii beehe.
Aacona Yesuusi Afaalleyoo
(Maatiyoosi 3:13-17; Maariqoosi 1:9-11)
19-22Asheenaꞌo aacona afaalleeheete; Yesuusi wotta aacona afaalleeꞌi kechii corootii bi beetaa, shimaayoo qecheehe; aroochee Yaafe Ayaano bi ashittinee halloo uggechoommon tuneꞌi Yesuusi toommooch kindiye. Wotta shimaayoochee “Ta shunnaabeeti ta bushoo neene; neenna emirito taane” ii beeti qaaro waayeehe.
Yowannisin Iraashoo Heroodisi Cuchiyoo
(Maatiyoosi 14:3-4; Maariqoosi 6:17-18)
Galiilee iraashoo Heroodisi, bi manoochi mechee Heroodiyaadin bi shaaggitoyich, wotta bare meeti gonde mooyinaꞌon bi shuunetoyich, Yowannisi biin kaarehe; tunebaani Heroodisi ebi bulli gonde mooyinaꞌo toommooch daakkiꞌi Yowannisin yechii cuchiihe.
Yesuusichi Shiijjee Yoodo
(Maatiyoosi 1:1-17)
23Yesuusi batti batt Yeerichi qaaroon dojjooch bi giyiyooba, bi eeno shaashe natt bedoone. Asheenaꞌoyich bi shaahito Yooseefichi bushoo, Eeli bushoo, 24Mataati bushoo, Lewi bushoo, Miliki bushoo, Yaani bushoo, Yooseefi bushoo, 25Matatiyaasi bushoo, Amootsi bushoo, Naahoomi bushoo, Esili bushoo, Nagaayi bushoo, 26Maati bushoo, Matatiyaasi bushoo, Semeeni bushoo, Yoseeki bushoo, Yoodi bushoo, 27Yowanaani bushoo, Reesi bushoo, Zerubabeeli bushoo, Shelateeli bushoo, Neeri bushoo, 28Miliki bushoo, Aaddi bushoo, Qosaami bushoo, Elimadaami bushoo, Eeri bushoo, 29Yaasi bushoo, Elezeeri bushoo, Yoraami bushoo, Mataati bushoo, Lewi bushoo, 30Simooni bushoo, Yihudi bushoo, Yooseefi bushoo, Yoonaami bushoo, Eliyaqimi bushoo, 31Meeli bushoo, Mayinaani bushoo, Maaxaati bushoo, Naataani bushoo, Daawiti bushoo, 32Iseyi bushoo, Obeedi bushoo, Boꞌaazi bushoo, Saalimooni bushoo, Nahishooni bushoo, 33Aminadaabi bushoo, Araami bushoo,#3:33 Ikkikke wonnee Yaafe Macaafooch, “Adimi bushoo” ii beeto beetone. Ariniyi bushoo, Hetsirooni bushoo, Feretsi bushoo, Yihudi bushoo, 34Yaaqobi bushoo, Yisaaqi bushoo, Abrahami bushoo, Taari bushoo, Nakoori bushoo, 35Seruugi bushoo, Reꞌi bushoo,#3:35 Giriikee Yaafe Macaafo, “Raagayi” iye. Feleegi bushoo, Ebeeri bushoo, Seeli bushoo, 36Qayinaami bushoo, Arifakisaadi bushoo, Sheemi bushoo, Noohi bushoo, Lameeki bushoo, 37Matusaali bushoo, Henooki bushoo, Yaareedi bushoo, Mahaleeli bushoo, Qenaani bushoo, 38Henooshi bushoo, Seeti bushoo, Addaami bushoo, Yeeri bushoone.
ទើបបានជ្រើសរើសហើយ៖
Luqaasi 3: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
