Mishiraachechinaꞌo 9
9
Yesuus Waan Sawuli Wotto
(Mishiraachechinaꞌo 22:6-16; 26:12-18)
1Ebichi daggooch Sawuli “Boonoshin wuxi ciichemmo taane” iꞌi, Doono Yesuusichi dabbeenaꞌo toommooch daakkii miicheebee, qeeshee guudo waan hammiye. 2Hammiꞌi, “Damaasiqi katemooch beeti Ayihudeenaꞌo kiceebeeti kechi ukkireenaꞌoyich koorichoon kooriree taach imbe; arooch Yesuusichi gommon dabbii beetinaꞌon, anaaminaꞌo tunebeeta maacheenaꞌon yeshi cuyiree Yerusaalem deebona” iꞌi qollehe. 3Aroochee hammiibee Damaasiqa bi katinnimmona, diqq shimaayoochee bekko bi guudoona waccii aaxxehe. 4Sawuli bekkech showooch dihiichii, “Sawulo, Sawulo! Taan ne duꞌiibeeto amoyichiye?” iibeeti qaaroon waayehe.
5Biyoo “Ta Doonocho, koni neene?” iꞌi echehe.
Doono biich wochiꞌi, “Ne duꞌiibeeti Yesuusi taane. 6And tiyiree katemooch gibe; ne tuniyemmo neech getteyemmone” iye.
7Arooba Sawulina tookkii hammiibeeti asheenaꞌo qaaroon waayeebee koninolla beegaanoon, noonoo miimeꞌi neexeheete. 8Sawuli bi dihitoochee tiyiye; bi aafoon bi gaxximmona, ciinnemmon qajjiye. Ebich asheenaꞌo bi kishoon yechiꞌi yaabiibee, Damaasiqa daammiyeete. 9Biyoo maataanoon, uyaanoon, bi aafo ciinaanoonoo keejj qeyiye.
10Are Damaasiqa Hanaani getteebeeti ikke Yesuusichi dabboo beehe; Doono yaaꞌoona Hanaano iꞌi ceeggiye.
Biyoo “Ta Doonocho, amoone?” iye.
11Doono Yesuusi biich ishichiye: “Kaate tiyiree Kaamoo getteebeeti gommooch hambe. Arooch Yihudi kexooch beeti, Sawuli getteebeeti, ikke Xeriseesi katemee ashoon qaawibe. Biyoo corootee toommoochiye bi beeto. 12Wotta hini Sawuli wochinnoon ciinnemmoyich, Hanaani getteebeeti uro giyiꞌi, bi kishoon bi toommooch bi kotiitaa, [yaaꞌoona] beeggitone” iꞌi gettiye.
13Tunetaa Hanaani wochiꞌi, “Ta Doonocho, hini uro Yerusaalem beeti yaafeeti ne asheenaꞌo toommooch ambiche gondoon bi shuuneto gaata meeti asheenaꞌo waanee waayeto taane; 14wotta ne shigoon ceeggii beetinaꞌo bullin bi cuchemmoyich, qeeshee ukkireenaꞌo biin ukkiriiꞌi hiniich deejjitinaꞌone” iye.
15Tunetaa Doono Yesuusi wochiꞌi, “Hini uro meeti Aageteenaꞌoyich, taateenaꞌoyich, Israꞌeeleenaꞌoyichoo ta shigoon bi arichiyemmoyich taach ta kaacceti qiicoone. Ebich bi waan hambe; 16taachon miixeya ambiche xuuxoon bi beeggemmo gaata ta biich bekkiyemmo taane” iye.
17Ebich Hanaani hammiꞌi are kexooch giyiye; Sawuli toommooch bi kishoon kotiiꞌi, “Ta manoo Sawulo! Wochinnoon ne aafo ciinnemmonaa Yaafe Ayaanoona ne ceennemmonoyich, ne waan Doono taan deejjitone. Biyoo hiniich ne waa beetaa, gommoochaa neech bekketi Yesuusine” iye.
18Bekkech teepphee kongeroommo bi aafoochee holliye. Arooba bi aafo ciinniye; tiyiꞌi aacona afaalleehe; 19maayoonoo maaꞌi kupphehe.
Damaasiqaa Yesuusichi Wochoon Sawuli Geto
Aroyee gubb Sawuli Damaasiqa beeti Yesuusichi dabbeenaꞌona tookkii giisheche aaboon kotehe. 20Boonoshina tookkii beebee, Ayihudeenaꞌo kiceebeeti kexinaꞌoochaa Yesuusi Yeerichi Bushoo bi tunoon gettii beehe. 21Waayetinaꞌo bulli worganeheete. “Hini uro Yerusaalem beeti hini shigoon ceeggii beetinaꞌon aalliito toone? Hiniich bi waato, boonoshin cuyiree qeeshee ukkireenaꞌo waan daamma toone?” iyeete. 22Tunetaa Sawuli kupphee kupphee waahe; Damaasiqa beeti Ayihudeenaꞌoyich Yesuusi aroo Kiristoosi bi tunoon xiishii arichiibee, boonoshi gettemmon muccii beehe.
23Meeti areddoyee gubb Ayihudeenaꞌo Sawulin wuxiya echeeheete. 24Sawuli boonoshi echeyoon waayehe. Boonoshiyoo Sawulin wuxiya xumoonaa areddoonon katemee kelloon manjiiꞌi quyee beeheete. 25Tunebaani Yesuusichi dabbeenaꞌo xumoona Sawulin daammiꞌi, mokkooch geddii xaqqee uxeree gutte daggeexi aahoona beshiiꞌi woderoona kindiiheete.
Sawuli Yerusaalem Hamo
26Sawuli Yerusaalem hammiꞌi, arooch beeti Yesuusichi dabbeenaꞌo daggooch bacceya qaawiye; tunebaani boonoshi bulli Yesuusichi dabboo bi tunoon iberiyoo boonoshi qajjitoyich shattiyeete. 27Tunetaa Barnabaasi Sawulin daammiꞌi, mishiraachechinaꞌo waan shakkiihe. Aroochee Doono Yesuusin gommoochaa bi beegonaa Doono biich bi getonon, wotta Damaasiqi katemooch aafoon kuppheꞌi Yesuusichon bi getonoo gettiye. 28Ebiyee gubb, Sawuli Doono Yesuusichi shigoona aafoon kuppheꞌi gettiibee, boonoshina tookkii Yerusaalem kechii giyiibee beehe. 29Wotta Giriikee noonoon ariibeeti Ayihudeenaꞌoyich gettii boonoshina tookkii gajjitee beehe; tunetaa biin wuxiya qaawiyeete. 30Arooba maneenaꞌo ebin ariiꞌi Qesaariya daammiyeete; aroochee Xeriseesi daachiiheete.
31Arooba Yihudee showoo, Galiilee showoonaa Shamaaree showoo bullinooch beeti kittinnee guuphinaꞌo shatoochee kasheheete, manjiyeete; Doonoyichoo hajjeebee Yaafe Ayaanoona goggeebee qeyii qeyii meettiyeete.
Kiristoosichi Giidoona Pheexiroosi Tuniiti Gaakkechi Gutte Mooyo
32Arooba Pheexiroosi bulli xaaꞌooch guuddiibee, Liidi katemooch beeti yaafeenaꞌo waan hammiye. 33Are xaaꞌooch ashittinoon wuxiibeeti biiyoona shimitte naton beerooch qeyiꞌi beeti, Eeniyi getteebeeti ikke uroon danehe. 34Biinoo ishichiye: “Eeniyoo, Yesuus Kiristoosi neen wodiitone. Tibe, ne qeenon yaggibe” iye. Aroo bekkech tiyiye. 35Liidinaa Shaarooninooch beetinaꞌo bulli hini are woditi uroon beeggiꞌi, Doono Yesuus waan wotteheete.
36Arooba Yoopphi katemooch Xaabbiti getteebeeti, ikke Yesuusichi dabbee beehan. Bi shigo Giriikee noonoona Doriqi#9:36 Doriqi geto “Xiixxee” getone. getteehe. Areyoo bulli aaboon deꞌe mooyon shuunaabee, iriteetinaꞌon gaachaabee beehan. 37Ebi ureyoo ikke areddoon biiyaꞌa qitiyan; bi dubenoon machiꞌi kechi toommeexi kexooch geddiyeete. 38Liidi Yoopphi katemoyich katino bi tunetoyich Yooppha beeti Yesuusichi asheenaꞌo Pheexiroosi Liida bi beemon waayeꞌi, gutte asheenaꞌon wochee daachiiꞌi kaate boonoshi waan bi woyemmoyich Pheexiroosin qolleheete.
39Bekkech Pheexiroosi tiyiꞌi, boonoshina tookkii waahe. Waa bi shaggimmona, asheenaꞌo kechi toommeexi kexooch biin daammiyeete. Xuume maacheenaꞌo bulli eefeebee, Doriqi kashoona beebee boonoshich bi shuuneti qamisoonaa bare tahoonon kichiꞌi yaachii Pheexiroosich bekkiibee bi guudoona neexeheete.
40Aroochee Pheexiroosi bullin maach kichiichii, guteneꞌi corootiye. Bi corootitoyee gubb, dubeno waan wotteꞌi, “Xaabbite, tibe” iye. Bekkech bi aafoon gaxxiyan; Pheexiroosin ciinnaꞌa tiyaa kotahan. 41Biyoo bi kishoona yechiꞌi tiijjii neechiye; xuume maacheenaꞌon bare kittinneenaꞌona tookkii ceeggiꞌi, “Ebiyoche, kashechine” iꞌi boonoshich bekkiihe. 42Ebiyee gubb, Yooppha beetinaꞌo bullich hini mooyo waayeehe. Ebina meeti asheenaꞌo boonoshi mulloon Doono Yesuusi toommooch tooꞌiiheete. 43Pheexiroosiyoo Yooppha Simooni getteebeeti, gooqqoon quccechi ikke uroona tookkii meeti aaboon kotehe.
ទើបបានជ្រើសរើសហើយ៖
Mishiraachechinaꞌo 9: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
