Mishiraachechinaꞌo 26
26
Taatoo Agripphi Aafoochaa Bi Qellichon Phawuloosi Taggo
1Taatoo Agripphi Phawuloosin “Neech beeti mooyon geton hakkihine” iye. Aroochee Phawuloosi bi kishoon yaggiꞌi ishichiye: 2-3“Taatoo Agrippho, Ayihudeenaꞌochi doyoonaa gajjiteyoo bullinon manjiiꞌa ariibeeto neene; ebich Ayihudeenaꞌo ta toommooch yaaqqiti taggoo bullich hanaach ne aafooch neexaꞌa wochoon ta hakkitoyich, ta qelloon diireeto tuniiꞌa haddiyoye. And ta yibbaatoon gaꞌoona elle ne waayemmoyich, neen qollaabeeto taane.
4“Batti batt ta hajjee showoonaa Yerusaaleminooch ta beetaa, ta bushittinoochee tiijjaꞌa and beddaahaa amoommi asho ta gaata, Ayihudeenaꞌo bulli arii beetinaꞌone. 5Yeerich no maddaabeeti gommona Muusichi Sheeroon manjiiꞌi quyeebeeti Farisoo tunaꞌa ta beemon xepphoochee tiijjiꞌi arii beetinaꞌone; ebich boonoshi qaawigaata, ta shuunoon miixoon hakkiyeete. 6Andoo Yeeri no qaabbechinaꞌoyich bi gibenikkiti hini gibenoona nalleyoyich neexeto taane. 7Aaraa gutte no yoodeenaꞌo xumoonaa areddoonon kuppheꞌi, Yeerich maddiibee hini gibeno ceennemmoyich quyee beetinaꞌone. Taatoo Agrippho, Ayihudeenaꞌo taan taggeebeeto, hini are gibenoyichiye. 8‘Yeeri qititinaꞌon tiijjoon hakkaachemmone’ iꞌi amoyich gabii beetote?
9“Ta, ta qelloona ‘Asheenaꞌo Naazireetechi Yesuusichi shigoon boonoshi ceegaachemmoyich, taach bi hakkeemmi wottoon qiiccemmo taane’ iyaꞌa gabaa beehoye. 10Ebin wotta Yerusaalemaa tuniito taane; qeeshee ukkireenaꞌo waanee ta wocheyoon bekkiibeeti koorichoon yechaꞌa, kittinneenaꞌo daggoochee meetinaꞌon cuyee kexooch cuchiito taane. Boonoshi wuxee beegaatoo, ta wotta wuxii beetinaꞌona tookkaa ikkotteto taane. 11Meeti areddoon Ayihudeenaꞌo kiceebeeti kexo bulliich deebaa sheeraabee, Yesuusin boonoshi nookkemmoyich qiiccaa beehoye. Oogichaa kaaraꞌa Ayihudee showoyee maach tuneti katemeenaꞌooch beddaahaa hammaꞌa boonoshin duꞌii beehoye” iye.
Yesuus Waan Bi Wottoon Phawuloosi Geto
(Mishiraachechinaꞌo 9:1-19; 22:6-16)
12“Taatoocho, ebi mooyoyich qeeshee ukkireenaꞌo waanee ta wocheyoon bekkiibeeti koorichoon yechaꞌa, Damaasiqa hammaabee, 13gommoochaa shiritte saati bedooch, aabee aaxxoyee beshe bekkoon beeggeho; hini bekkoo taannaa taanna tookkii hammiibeeti asheenaꞌonochi guudoona shimaayoochee aaxxehe. 14Areegaata no bulli showooch dihaꞌa no beetaa, Hibiree noonoona ‘Sawulo, Sawulo! Taan ne duꞌiibeeto amoyichiye? Guxechi gumboon#26:14 Ebi guxechi gumbo bi gaacciibeeto gijjoon gashoyichiye. ne qafo neech beshe iritoon deebemmone’ immi qaaroon waayeho.
15“Tawoo ‘Doonocho, ne koni neene?’ iyo.
“Doonoo wochiꞌi, ‘Ne duꞌiibeeti Yesuusi taane. 16And tiyiree ne baatoona neexebe. Neech ta bekketi naboo, taach ne maddemmoyich, wotta taan ne beeggeti mooyona, neechoo ta bekkiyemmi mooyona ta miixoo ne tunemmoyichiye. 17Israꞌeeleenaꞌonaa boonoshi waan neen ta wochaabeeti, Aageteenaꞌonochi kishoochee neen wodiyemmo taane. 18Neen ta daachiibeeto, boonoshi aafoon qechiree manderoochee bekkooch, Sheexaanoyich hajjeyoochee Yeerich hajjeyooch ne wochemmoyichiye. Arooba boonoshi axaaxoyich maaroon danemminaꞌone; wotta ta toommooch mulloon tooꞌiyoona yaafeeti asheenaꞌo deqqemmi wojjooch boonoshi ixoo haddeyemmone’ iye.
19“Illa Taatoo Agrippho, shimaayoochee taach bekketi yaaꞌoon qajje getaano taane. 20Shiichaꞌa Damaasiqa beetinaꞌoyich, gubb wotta Yerusaaleminaa Yihudee showoo bullinooch beetinaꞌoyich, wotta Aageteenaꞌoyich axaaxee gommoochee Yeer waan boonoshi wottemmonaa boonoshi wottoon bekkiibeeti shuunoon boonoshi shuunemmonoyich gettoye.#Mish. 9:20,28-29 21Ebichi naboona Ayihudeenaꞌo yaafee kechi daggooch ta beetaa, taan yechiyeete; wuxoonoo qaawiyeete. 22-23Tunebaani and beddaahaa Yeeri taan gaachetaa, ‘Keemechinaꞌonaa Muusina “Kiristoosi xuuxoon beeggemmone; qitoocheenoo shiichoo tuneree tiyemmone; ebina Ayihudeenaꞌonaa Aageteenaꞌonoyich wodee bekkoon gettemmone” iꞌi boonoshi gettito ceennemmone’#Isi. 42:6; 49:6 iꞌi oogoyichoo tuneba giishoyich miixoyee damba bare ta getteti mooyo aalloone” iye.
24Ishichiꞌi Phawuloosi bi qellichon bi taggee beetaa, iraashoo Fisxoosi oogeti qaaroona “Phawulooso, geyehine amoone! Meeti doyoo neen geyiitone” iye.
25Tunetaa Phawuloosi ishichiye: “Oogoocho, geyeyaano taane; ta noonoochee kechiibeeti mooyo ceenone; ibere mooyone. 26Ebi mooyon taatoo arii bi beetoyich, bi aafooch kupphaꞌa geton hakkito taane. Ebiyoo manderoochaa shuuneyaanoone; ebich ebi mooyo biich aacheyee qayon ariibeeto taane. 27Taatoo Agrippho, keemechinaꞌo keemmiton iberiibeeto toonoo neene? Ne iberiyoon ariibeeto taane” iye.
28Agripphiyoo Phawuloosin, “Hini qamini saatooch taan kittinnoo tuniiya gabaa beetine?” iye.
29Phawuloosi wochiꞌi, “Genjebe, qamine, ne ikkeeto tuneyaanoon, hanaach ta noonoochee waayee beetinaꞌo bulli, hini ta cucheyoyee damba, mooyo bullina taanoommon boonoshi tunemmoyich, Yeerin qollaabeeto taane” iye.
30Ebiyee gubb, taatoo Agripphi, iraashoo Fisxoosi, Bariniiqi, boonoshina tookkii kotetinaꞌo bulliyoo hamma tiyiyeete. 31Aroochee kechiꞌi hammiibee, boonoshinaa boonoshina “Hini uro qitoo qayenona cucheyoyich biin bechemmi mooyo amoonolla shuuneyaanoone” iꞌi yibbaateheete.
32Taatoo Agripphi iraashoo Fisxoosich “Hini uro ‘Qesaari aafooch ta mooyo giddebe’ bi getaan gaata, biicheeyeshone” iye.
ទើបបានជ្រើសរើសហើយ៖
Mishiraachechinaꞌo 26: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
