Mishiraachechinaꞌo 23
23
1Arooba Phawuloosi Ayihudee nallechinaꞌon manjii ciinniꞌi, “Ta maneenaꞌote! Hanaach beddaahaa Yeeri aafoochaa ta shuuneti shuunoyich ta mullo taan ittibateyaache” iye. 2Qeeshee guudo Hanaani Phawuloosi gaꞌooch neexetinaꞌon “Bi noonoon tappebote” iꞌi gettiye. 3Arooba Phawuloosi “Hini booroona dikkeeti duuhocho, Yeeri neen yexaanoon qayaachemmone; kaachi nalliya kotaꞌa tiyaa, ‘Yexote’ iyaꞌa aabichaa nalloon shaaddenne?” iye.
4Phawuloosi gaꞌooch neexeti asheenaꞌo “Yeerichi qeeshee guudoon naaggenne?” iyeete.
5Phawuloosiyoo “Ta maneenaꞌote! Qeeshee guudo bi tunoon ariyaano taane; Yaafe Macaafoochaa ‘Ne asheenaꞌochi ukkiroo toommooch gondoon yibbaateyaahine’#Key. 22:28 getaa kooreetone” iye.
6Tunetaa Phawuloosi arooch beeti, Ayihudee nallechinaꞌo daggoochee qatinaꞌo Saduuqeenaꞌo, qatinaꞌoo Fariseenaꞌo boonoshi tunoon ariiꞌi, bi qaaroon oogichiꞌi, “Ta maneenaꞌote! Ta, Faariisee shiijjeroo tuneti Farisoo taane. Ebiyoo hanaach ittoshi aafooch ta giddeto, ‘Qititinaꞌo tiyemminaꞌone’ iyaꞌa ta gibenetoyichiye” iꞌi gettiye. 7Phawuloosi ishichimmona, Fariseenaꞌonaa Saduuqeenaꞌonochi daggooch kaaro tiyaa, gutta qoodeeheete. 8Ebiyoo Saduuqeenaꞌo “Qititinaꞌochi timo, maraakoo, ayaanoo aalloone” ii beetinaꞌo boonoshi tunemmona, Fariseenaꞌo wotta “Eboshi bulli beetinaꞌone” iꞌi iberii beetinaꞌo boonoshi tunetoyichiye.
9Oogeti cookoo tunehe; Fariseenaꞌo waanee tuneti Muusichi Sheeree dojjechinaꞌo “Hini uro toommoochee no daneti gonde mooyo aalloone; ayaano woyee maraakoo biich gettito tunemmone; no amoon ariihone?” iꞌi gajjiteeheete. 10Kaaro qeeccii qeeccii hammimmona, asheenaꞌo Phawuloosin okk hach geechiree boonoshi hoꞌaachemmoyich shattiꞌi, hume ginee iraashoo bi naayinaꞌon “Hami boonoshi daggoochee Phawuloosin shotteree no kaambooch deebote” iꞌi gettiye.
11Bi decharoobee xum Doono Yesuusi Phawuloosi gaꞌooch neexeꞌi, “Yerusaalem ta miixoo ne tunetoommon, ebiyoommon Roomaa wotta taach ne miixemmoyich qaawiihe; ebich kupphebe” iye.
Phawuloosin Wuxiya Ayihudeenaꞌo Wogo
12Showoo haraa, Ayihudeenaꞌo daggoochee ikkikkeenaꞌo kiceeꞌi, “Hini Phawuloosin wuxaanoon maayoon tuneba uyoon yeshaachone” iꞌi boonoshi kashoona wogeheete. 13Ebin koceetinaꞌo aabbe ashoyee besheenaꞌone. 14Boonoshiyoo qeeshee ukkireenaꞌonaa showee geeneenaꞌona waan hammiꞌi, “ ‘Phawuloosin wuxaanoon amoonolla maataachone’ iyaꞌa no kashoona wogeto noone. 15Illa and ittoshi Ayihudee nallechinaꞌona tookki hume ginee iraashoon ‘Phawuloosin wochiree eche no manjiyemmi mooyo beetone’ getiree, ittoshi waan bi woyemmoyich echebote. Hiniich bi shagaan beetaa, gommoochaa quyeree wuxemmo noone” iyeete.
16Arooba hini boonoshi koceyoon Phawuloosi manee bushoo waayeꞌi, bekkech ginee kaambooch hammii giyiꞌi, Phawuloosich gettiye. 17Phawuloosiyoo balle ginee iraasheenaꞌo daggoochee ikkoon ceeggiꞌi, “Hini bushoo hume ginee iraashoyich bi gettemmi mooyo beetone; daamiree biinna daniibe” iꞌi gettiye.
18Biyoo deꞌa iꞌi bushoon daammii, hume ginee iraashoon “ ‘Hini bushoo neech bi gettemmi mooyo beetone’ iꞌi, cucheti Phawuloosi ceekkiiꞌi taach bi imaa, deeboye” iꞌi gettiye.
19Aroochee hume ginee iraashoo hini are bushoon bi kishoona yechiꞌi, ikke badd daammii, “Taach ne gettemmi mooyo amoone?” iꞌi echehe.
20Bushoo wochiꞌi ishichiye: “Ayihudeenaꞌo daggoochee ikkikkeenaꞌo Phawuloosin wochiree eche boonoshi manjiyemmi mooyo beeton shaahiiree, yaach Ayihudee nallechinaꞌo beetooch ne kichemmoyich, neen echoyich mooyon mashaamiitinaꞌone. 21Wotta aabbe ashoyee besheenaꞌo ‘Biin wuxaanoon maayoon tuneba uyoon yeshaachone’ iꞌi boonoshi kashoona wogeꞌi, gommooch ottii quyee beetinaꞌone. Andoo boonoshi qanniꞌi quyeebeeto, ne noonoochee kechemmi mooyon baachiye. Illa ne boonoshich deꞌa gettaahine” iye.
22Hume ginee iraashoo ebin bi waayetoyee gubb, “Taach ne getteti mooyon konichona gettaahine” iꞌi bushoon daachiihe.
Qesaariya Phawuloosi Hamo
23Ebiyee gubb, hume ginee iraashoo balle ginee iraasheenaꞌo daggoochee gutteenaꞌon ceeggiꞌi, “Xumee keejje saatooch tiyiree, Qesaariya hammemmi gutte balle ginee naayinaꞌon, shabe hareshechinaꞌon, gutte balle ginee awurechinaꞌonoo qanniibote. 24Phawuloosi yebbemmi haresheenaꞌon qanniibote. Biinoo iraashoo Filikis waan diggoona shakkiibote” iꞌi gettiye.
25Koorichoon ishichiꞌi kooriye:
26-30“Shatteeti iraashoo Filikisich bede. Iraashoocho, diggoo neech tunebe!
“Hini uroon wuxiya Ayihudeenaꞌo yeshaa, Roomi showee asho bi tunoon ariiꞌa, ta naayinaꞌona tookkaa shaggaꞌa wodiihoye. Amee naboona boonoshi taggeto gaata ariiya qaawaꞌa, Ayihudee nallechinaꞌo aafooch giddiito taane. Boonoshi taggeto, ‘No sheeroon tiichitone’ getoyee damba hini uroon qitooch woyee cuyooch bechemmi taggoo aalloone. Ayihudeenaꞌo daggoochee ikkikkeenaꞌo hini uroon wuxoyich boonoshi koceyoon waayaꞌa, bekkech ebichi naboona ne waan daachiito taane. Taggetinaꞌo ne aafooch gidderee, taggebeete. Diggebe.
“Taane Qelawudoos Lusiyoosi” ii beetone.
31Ebina ginee naayinaꞌo boonoshich getteetoommon, Phawuloosin yechiꞌi xumoona Antiphaaxiris shakkiiheete. 32Dechara hareshechinaꞌon, “Phawuloosina tookki hambote” iichii, boonoshi ginee kaambooch wotteheete. 33Hareshechinaꞌo Qesaariya shaggii, koorichoon iraashoo Filikisich immiꞌi, Phawuloosin bi aafooch giddiiheete. 34Iraashoo Filikisi koorichoon bi shemmetoyee gubb, “Amee showee asho neene?” iꞌi echehe. Kiliqee asho bi tunoon bi ariitoyee gubb, 35“Neen taggetinaꞌo waahooba, ne taggoon waayemmo taane” iye. Ishichiꞌi Heroodisichi kibbooch quyiihe.
ទើបបានជ្រើសរើសហើយ៖
Mishiraachechinaꞌo 23: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
